മദ്യ നിരോധനം സ്ഥിരീകരിച്ച് ഫിഫ
ലോകകപ്പ് സ്റ്റേഡിയം പരിസരങ്ങളില്‍ മദ്യ നിരോധനം ഏര്‍പ്പെടുത്താനുള്ള തീരുമാനം അന്താരാഷ്ട്ര ഫുട്‌ബോള്‍ ഫെഡറേഷന്‍ ഇന്നലെ ശരിവച്ചു. അതേസമയം, ഖത്തര്‍ ഭരണാധികാരികളുമായുള്ള ചര്‍ച്ചകള്‍ക്കു ശേഷമാണ് ഇത്തരമൊരു തീരുമാനം കൈക്കൊണ്ടതെന്ന് ഫിഫ വെള്ളിയാഴ്ച പുറപ്പെടുവിച്ച പ്രസ്താവനയില്‍ വ്യക്തമാക്കി. ‘ആതിഥേയ രാജ്യത്തിലെ ഭരണാധികാരികളും ഫിഫയും തമ്മിലുള്ള ചര്‍ച്ചകളെത്തുടര്‍ന്ന്, ഫിഫ ഫാന്‍ ഫെസ്റ്റിവലിലും മറ്റ് ആരാധക കേന്ദ്രങ്ങളിലും ലൈസന്‍സുള്ള വേദികളിലും മാത്രമായി ലഹരിപാനീയങ്ങളുടെ വില്‍പ്പന പരിമിതപ്പെടുത്താനും ലോകകപ്പ് സ്റ്റേഡിയത്തിനു ചുറ്റുമുള്ള ബിയര്‍ വില്‍പ്പന പോയിന്റുകള്‍ ഒഴിവാക്കാനും തീരുമാനമെടുത്തിട്ടുണ്ട്’- ഫിഫ പ്രസ്താവനയില്‍ വ്യക്തമാക്കി. എട്ട് ലോകകപ്പ് വേദികള്‍ക്ക് ചുറ്റുമുള്ള ടിക്കറ്റ് പരിധിക്കുള്ളില്‍ ഓരോ മത്സരത്തിനും മുമ്പും ശേഷവും നിയുക്ത കേന്ദ്രങ്ങളില്‍ ബിയര്‍ വില്‍ക്കാനായിരുന്നു ആദ്യം തീരുമാനിച്ചിരുന്നത്. എന്നാല്‍, ഖത്തറിലെ അല്‍താനി രാജകുടുംബത്തിന്റെ താല്‍പര്യ പ്രകാരം, സ്റ്റേഡിയം പരിസരങ്ങളില്‍ മദ്യവില്‍പ്പന പാടെ ഉപേക്ഷിക്കാന്‍ ഫിഫ നിര്‍ബന്ധിതമാവുകയായിരുന്നു.
ഫാന്‍ സോണുകളില്‍ മദ്യം ലഭിക്കും
അതേസമയം, ഖത്തറിന്റെ വിവിധ ഭാഗങ്ങളില്‍ ഫുട്‌ബോള്‍ ആരാധകര്‍ക്കായി ഒരുക്കിയിരിക്കുന്ന ഫാന്‍ സോണുകളില്‍ മദ്യം ലഭിക്കുമെന്ന് അധികൃതര്‍ അറിയിച്ചു. ഇവിടെ വൈകിട്ട് 6.30ന് ശേഷമായിരിക്കും മദ്യ വില്‍പ്പന തുടങ്ങുകയെന്നാണ് റിപ്പോര്‍ട്ട്. അറബ് നാടുകളില്‍ നിന്ന് ധാരാളമായി എത്തുന്ന കാണികളുടെ വികാരം കണക്കിലെടുത്താണ് സ്റ്റേഡിയം പരിസരങ്ങളില്‍ മദ്യവില്‍പ്പന വേണ്ടെന്ന തീരുമാനത്തില്‍ എത്തിയതെന്ന് അധികൃതരെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. ഈ രാജ്യങ്ങളില്‍ മദ്യം അവരുടെ സംസ്‌ക്കാരത്തിന്റെ ഭാഗമല്ല. മദ്യം നിഷിദ്ധമായി കരുതുന്ന ജനങ്ങള്‍ക്ക് അതിന്റെ സാന്നിധ്യം അത്ര ആസ്വാദ്യകരമായി അനുഭവപ്പെടാന്‍ ഇടയില്ലെന്നും ലോകകപ്പ് എല്ലാവര്‍ക്കുമുള്ളതാണ് എന്നതിനാല്‍ അവരുടെ വികാരം മാനിക്കാനാണ് ഭരണാധികാരികളുമായുള്ള ചര്‍ച്ചയില്‍ ഉരുത്തിരിഞ്ഞുവന്ന തീരുമാനമെന്നും അധികൃതര്‍ അറിയിച്ചു. അതേസമയം, ഫാന്‍ സോണുകള്‍ വ്യത്യസ്തമായിരിക്കും കാര്യങ്ങളെന്നും അവിടെ ചില കേന്ദ്രങ്ങളില്‍ മദ്യം ലഭിക്കും. മദ്യം വിളമ്പാത്ത കേന്ദ്രങ്ങളും ഇവിടെ ഉണ്ടാവും. അതിനാല്‍ ഓരോരുത്തര്‍ക്കും അവരുടെ താല്‍പര്യം അനുസരിച്ച് എവിടെ പോവണം എന്ന കാര്യം തിരഞ്ഞെടുക്കാം. എന്നാല്‍ സ്‌റ്റേഡിയത്തിലും ഇത്തരമൊരു തെരഞ്ഞെടുപ്പിന് സാധ്യതയില്ലെന്നതിനാലാണ് ഇവയുടെ പരിസരങ്ങളില്‍ മദ്യ വില്‍പ്പന വേണ്ടെന്നു വയ്ക്കാന്‍ അധികൃതര്‍ തീരുമാനിച്ചതെന്നും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.
ആദ്യം അനുവാദം നല്‍കി; പിന്നീട് പിന്‍വലിച്ചു
പൊതുവെ മദ്യ വില്‍പ്പനയ്ക്ക് കര്‍ശന നിയന്ത്രണമുള്ള രാജ്യമാണ് ഖത്തര്‍. പൊതുജനങ്ങളുടെ കാഴ്ചയില്‍ നിന്ന് മാറി ഹോട്ടലുകളിലും ബാറുകളിലും റെസ്റ്റോറന്റുകളിലും മാത്രമേ ഖത്തറില്‍ മദ്യം വില്‍ക്കാന്‍ അനുവാദം ഉണ്ടായിരുന്നുള്ളൂ. ഇതിന് പ്രത്യേക അനുമതി വാങ്ങുകയും വേണം. എന്നാല്‍ ലോകകപ്പ് ഫുട്‌ബോള്‍ ടൂര്‍ണമെന്റിന് മുന്നോടിയായി മദ്യവില്‍പ്പനയുടെ കാര്യത്തില്‍ ചില നീക്കുപോക്കുകള്‍ക്ക് ഖത്തര്‍ തയ്യാറാവുകയുണ്ടായി. വിദേശരാജ്യങ്ങളില്‍ നിന്നെത്തുന്ന കാണികളുടെ താല്‍പര്യം കണക്കിലെടുത്തായിരുന്നു ഇത്. ഇതിന്റെ ഭാഗമായി കഴിഞ്ഞ സെപ്തംബറില്‍, ബീല്‍ വിതരണ കമ്പനിയായ ബഡ്വെയ്സറിന് തങ്ങളുടെ ഉല്‍പ്പന്നങ്ങള്‍ മത്സര വേദികള്‍ക്ക് പുറത്തും ഫാന്‍ സോണുകളിലും വില്‍ക്കാന്‍ ഖത്തര്‍ അധികൃതര്‍ അനുവാം നല്‍കിയിരുന്നു. എന്നാല്‍ ഫിഫയുമായി നടത്തിയ പുതിയ ചര്‍ച്ചകളുടെ അടിസ്ഥാനത്തില്‍ സ്റ്റേഡിയം പരിസരങ്ങളില്‍ മദ്യത്തിന്റെ വില്‍പ്പന പാടില്ലെന്നാണ് തീരുമാനിച്ചിരിക്കുന്നത്. ഇതോടെ മദ്യവില്‍പ്പന ഫാന്‍ സോണുകളിലും ഹോട്ടലുകളിലും മറ്റുമായി പരിമിതപ്പെടുത്തിയിരിക്കുകയാണ് അധികൃതര്‍.
ബഡ് വെയ്‌സര്‍ കമ്പനിയുമായി ഫിഫ കരാറുണ്ടാക്കി
മദ്യവില്‍പ്പന അനുവദിക്കാനുള്ള ഖത്തറിന്റെ തീരുമാനത്തിന്റെ അടിസ്ഥാനത്തില്‍ ബീര്‍ നിര്‍മാതാക്കളായ ബഡ് വെയ്‌സര്‍ കമ്പനിയുമായി ഫിഫ നേരത്തേ കരാറില്‍ ഏര്‍പ്പെട്ടിരുന്നു. ഖത്തര്‍ ലോകകപ്പ് സ്പോണ്സര് ചെയ്ത ബഡ്വെയ്സറിന്റെ മാതൃ കമ്പനി എബി ഇന്‍ബെവുമായി ഉണ്ടാക്കിയ കരാറിന്റെ അടിസ്ഥാനത്തില്‍ ബിയര്‍ വില്‍ക്കാനുള്ള പ്രത്യേക അവകാശം കമ്പനിക്ക് ലഭിച്ചത്. 83 ദശലക്ഷം ഡോളറിനാണ് കമ്പനി ലോകകപ്പ് സ്പോണ്സര് ചെയ്തിരിക്കുന്നത്. ടൂര്‍ണമെന്റ് നടക്കുന്നതിന് തൊട്ടു മുമ്പ് വരെയും ടൂര്‍ണമെന്റ് കഴിഞ്ഞ ശേഷവും മദ്യം വില്‍പ്പന നടത്താനുള്ള അനുമതിയായിരുന്നു കമ്പനിക്ക് ലഭിച്ചത്. ഇതനുസരിച്ച് സ്റ്റേഡിയങ്ങള്‍ക്കു ചുറ്റും ബഡ് വെയ്‌സര്‍ വില്‍പ്പന ഔട്ട്ലെറ്റുകള് സ്ഥാപിക്കുകയും ചെയ്തിരുന്നു. ഖത്തര്‍ അധികൃതരുടെ പുതിയ തീരുമാനത്തിന്റെ പശ്ചാത്തലത്തില്‍ ഇവിടെ നിന്ന് കണ്‍സഷന്‍ ഔട്ട്ലെറ്റുകള് പുതിയ ലൊക്കേഷനുകളിലേക്ക് മാറ്റാന്‍ ഫിഫയുമായി ചേര്‍ന്ന് പ്രവര്‍ത്തിക്കുകയാണെന്ന് കമ്പനി അറിയിച്ചു. ആരാധകര്‍ക്ക് സാധ്യമായ ഏറ്റവും മികച്ച അനുഭവം എത്തിക്കുന്നതിന് ഫിഫയുമായി ചേര്‍ന്ന് പ്രവര്‍ത്തിക്കുകയാണെന്നും പുതിയ സാഹചര്യങ്ങളില്‍ സാധ്യമായ ഏറ്റവും മികച്ച ഉപഭോക്തൃ അനുഭവം തങ്ങള്‍ ഉറപ്പുവരുത്തുമെന്നും എബി ഇന്‍ബെവ് അറിയിച്ചു.
തീരുമാനത്തിനു പിന്നാലെ വിവാദവും കൊഴുക്കുന്നു
സ്റ്റേഡിയങ്ങള്‍ക്കു ചുറ്റും മദ്യ വില്‍പ്പന പാടില്ലെന്ന ഖത്തറിന്റെ തീരുമാനം വിദേശ രാജ്യങ്ങളില്‍, പ്രത്യേകിച്ച് പടിഞ്ഞാറന്‍ രാജ്യങ്ങളില്‍ പ്രതിഷേധങ്ങള്‍ക്കും വിവാദങ്ങള്‍ക്കും കാരണമായിട്ടുണ്ട്. ഇത്തവണത്തെ ലോകകപ്പ് സാധാരണ പോലെയല്ലെന്നും ഇവിടെ സ്റ്റേഡിയം പരിസരങ്ങളില്‍ മദ്യം വിളമ്പില്ലെന്നും ആരാധകരെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. അതേസമയം, സ്‌റ്റേഡിയങ്ങള്‍ക്കകത്ത് മദ്യം ലഭിക്കാന്‍ ഒരു വഴിയുണ്ടെന്നും 19,000 ഡോളര്‍ നല്‍കി കോര്‍പറേറ്റ് ഹോസ്പിറ്റാലിറ്റി ടിക്കറ്റുകള്‍ എടുത്തവര്‍ക്ക് ഇവ ലഭിക്കുമെന്നും മാധ്യമങ്ങള്‍ റിപ്പോര്‍ട്ട് ചെയ്തു. വിഐപിക്കാര്‍ക്ക് മാത്രം മദ്യം ലഭ്യമാക്കുന്നത് ഇരട്ടത്താപ്പാണെന്ന വാദവും പടിഞ്ഞാറന്‍ മാധ്യമങ്ങള്‍ ഉയര്‍ത്തിയിട്ടുണ്ട്. ഇതുമായി ബന്ധപ്പെട്ട ഫിഫയുടെ ട്വിറ്റര്‍ പോസ്റ്റിന് താഴെ ഖത്തറിന്റെ തീരുമാനത്തെ അനുകൂലിച്ചും എതിര്‍ത്തും നിരവധി പേരാണ് കമന്റുകള്‍ നല്‍കിയിരിക്കുന്നത്.
