മരിച്ചവരുടെ കുടുംബങ്ങൾക്ക് 50,000 വീതം, പ്രതിമാസം 2500 രൂപ പെൻഷനും; കൊവിഡ് ഇരകൾക്കായി ഡൽഹി സർക്കാർ പദ്ധതി

ന്യൂഡൽഹി: രണ്ടാം കൊവിഡ് തരംഗം ഏറ്റവും നാശമുണ്ടാക്കിയ ഡൽഹിയിൽ ജനപ്രിയ പദ്ധതികളുമായി കെജ്രിവാൾ സര്‍ക്കാര്‍. സംസ്ഥാനത്ത് കൊവിഡ് ബാധിച്ച് മരിച്ചവരുടെ കുടുംബത്തിന് ധനസഹായം പ്രഖ്യാപിച്ചിരിക്കുകയാണ് ഡൽഹി സര്‍ക്കാര്‍. ഇതിന്റെ ഭാഗമായി കൊവിഡ് ബാധിച്ച് മരിച്ചവരുടെ കുടുംബത്തിന് 50,000 രൂപ നഷ്ടപരിഹാരമായി നൽകുമെന്നും മുഖ്യമന്ത്രി അരവിന്ദ് കെജ്രിവാൾ അറിയിച്ചു.



Also Read : തടവുകാരനോട് അടുപ്പം; ലൈംഗിക ബന്ധത്തിന് യൂണീഫോം പാന്റിൽ തുളയിട്ടു; രഹസ്യത്തിന് കൈക്കൂലി ഫോണ്‍; വനിതാ വാര്‍ഡൻ അറസ്റ്റിൽ

നഷ്ടപരിഹാരത്തിന് പുറമെ, പ്രതിമാസം 2,500 രൂപ വീതം പെൻഷനുമായി ലഭിക്കുമെന്നും സര്‍ക്കാര്‍ അറിയിച്ചിട്ടുണ്ട്. കൊവിഡ് -19 പരിവാര്‍ ആര്‍തിക് സഹായത യോജന പദ്ധതിയുടെ ഭാഗമായാണ് ഇത്തരത്തിൽ ഒരു ധനസഹായം ഡൽഹി സര്‍ക്കാര്‍ പ്രഖ്യാപിച്ചത്. ഇന്നലെ പദ്ധതിയുടെ ഉദ്ഘാടനം മുഖ്യമന്ത്രി കെജ്രിവാൾ ഓൺലൈനായി നടത്തുകയും ചെയ്തു.

കൊവിഡ് മോശമായി ബാധിച്ച കുടുംബങ്ങള്‍ക്ക് വേണ്ടി കെ‍ജ്രിവാളിന്റെ നേതൃത്വത്തിൽ ഡൽഹി സർക്കാർ പുതിയ സാമൂഹിക സുരക്ഷാ പദ്ധതി ആരംഭിച്ചു. ഇതിനായി പുതിയ പോർട്ടൽ ആരംഭിക്കുന്നതായും മുഖ്യമന്ത്രി ഇന്നലെ അറിയിച്ചു. ഉത്തരവാദിത്തമുള്ള സർക്കാർ എന്ന നിലയിൽ ഞങ്ങൾ ഈ പദ്ധതി ആരംഭിക്കുകയാണെന്ന് അദ്ദേഹം പറഞ്ഞു.

ഇത് സംബന്ധിച്ച് ഓൺലൈനായി അപേക്ഷകള്‍ സമര്‍പ്പിക്കാം. വെബ്സൈറ്റിലൂടെ ആധാറും മൊബൈൽ നമ്പറും ഉപയോഗിച്ച് കുടുംബങ്ങൾക്ക് നേരിട്ട് അപേക്ഷ സമർപ്പിക്കാവുന്നതാണ്. അപേക്ഷ സമര്‍പ്പിച്ച് ഒരാഴ്ചയ്ക്കുള്ളിൽ സര്‍ക്കാർ പ്രതിനിധികള്‍ വീട്ടിൽ നേരിട്ടെത്തി രേഖകള്‍ പരിശോധിക്കുമെന്നും മുഖ്യമന്ത്രി വ്യക്തമാക്കി.

ഹെയ്തി പ്രസിഡന്റിന്റെ ഘാതകരെ പോലീസ് ഏറ്റുമുട്ടലിൽ കൊലപ്പെടുത്തി

നാല് കൊറോണ വൈറസ് തരംഗങ്ങളെയാണ് ഡൽഹി അഭിമുഖീകരിച്ചത്. അതിൽ ഏറ്റവും ഒടുവിലത്തേതായിരുന്നു ബുദ്ധിമുട്ടേറിയത്. ഏറെക്കുറേ എല്ലാ കുടുംബങ്ങളെയും അത് ബാധിക്കുകയും പലർക്കും പ്രിയപ്പെട്ടവരെ നഷ്ടപ്പെടുകയും ചെയ്തു. നിരവധി കുട്ടികൾ അനാഥരായി. പല കുടുംബങ്ങൾക്കും അവരുടെ ഗൃഹനാഥനെ നഷ്ടപ്പെട്ടു. ഉത്തരവാദിത്തമുള്ള സർക്കാർ എന്ന നിലയിലാണ് ഞങ്ങൾ ഈ പദ്ധതി കൊണ്ടുവന്നത് മുഖ്യമന്ത്രി കെജ്രിവാൾ പറഞ്ഞു.