കുട്ടികള്‍ക്കും പൊതു ഇടങ്ങളില്‍ പ്രവേശനം അനുവദിക്കും
നേരത്തേ മാളുകള്‍, സിനിമാ തിയറ്ററുകള്‍, പാര്‍ക്കുകള്‍ തുടങ്ങിയ ഇടങ്ങളില്‍ ചെറിയ കുട്ടികള്‍ക്കുണ്ടായിരുന്ന പ്രവേശന വിലക്ക് പുതിയ ഇളവുകള്‍ നിലവില്‍ വരുന്നതോടെ ഇല്ലാതാവും. ഇതു പ്രകാരം പ്രായമഭേദമന്യേ എല്ലാ കുട്ടികള്‍ക്കും സിനിമാ തിയേറ്ററുകള്‍, മാളുകള്‍, പാര്‍ക്കുകള്‍ തുടങ്ങിയ പൊതു ഇടങ്ങളില്‍ പ്രവേശനം അനുവദിക്കും. വിവാഹച്ചടങ്ങുകളില്‍ പങ്കെടുക്കാവുന്നവരുടെ എണ്ണത്തിലും മാളുകളിലും റസ്റ്റൊറന്റുകളിലും അനുവദിച്ചവരുടെ എണ്ണത്തിലും കൂടുതല്‍ ഇളവുകള്‍ പ്രഖ്യാപിച്ചിട്ടുണ്ട്.
പൊതു സ്ഥലങ്ങളില്‍ എത്ര പേര്‍ക്ക് ഒത്തു ചേരാം?
– ഇന്‍ഡോറിലും മജ്‌ലിസിലും വാക്സിനെടുത്ത പരമാവധി 15 പേര്‍ക്കോ വാക്സിനെടുക്കാത്ത അഞ്ചു പേര്‍ക്കോ ഒരുമിച്ചു ചേരാം. ഔട്ട്ഡോറില് വാക്സിനെടുത്ത 30 പേര്‍ക്കും വാക്സിനെടുക്കാത്ത 10 പേര്‍ക്കും ഒത്തുചേരാം.
– പള്ളികളില്‍ വെള്ളിയാഴ്ച ജുമുഅ നമസ്‌കാരം ഉള്‍പ്പെടെയുള്ള പ്രാര്‍ഥനകള്‍ അനുവദിക്കും. ഇനി മുതല്‍ ഏഴു വയസ്സു വരെയുള്ള കുട്ടികള്‍ക്കും പള്ളികളില്‍ പോവാം.
– ഹോട്ടലുകളിലും വെഡ്ഡിംഗ് ഹാളുകളിലും നടക്കുന്ന വിവാഹങ്ങളില്‍ പരമാവധി 80 പേര്‍ക്ക് പങ്കെടുക്കാം. എന്നാല്‍ അതിഥികളില്‍ 75 ശതമാനം പേരും വാക്സിനെടുത്തവര്‍ ആയിരിക്കണമെന്ന നിബന്ധനയുണ്ട്.
– ഇവന്റുകള്‍, കോണ്‍ഫറന്‍സുകള്‍, എക്സിബിഷനുകള്‍ എന്നിവ 30 ശതമാനം ശേഷിയില്‍ നടത്താം. ആരോഗ്യ മന്ത്രാലയത്തിന്റെ അനുമതിക്ക് വിധേയം.
– പാര്‍ക്കുകള്‍, കോര്‍ണിഷുകള്‍, ബീച്ചുകള്‍ എന്നിവിടങ്ങളില്‍ 15 പേരടങ്ങുന്ന സംഘങ്ങള്‍ വരെയാവാം. ഒരേ കൂടുംബത്തില്‍പ്പെട്ടവര്‍ക്ക് എണ്ണം ബാധകമല്ല. സ്വകാര്യ ബീച്ചുകള്‍ ആകെ ശേഷിയുടെ 50 ശതമാനം പേര്‍ മാത്രം.
– അമ്യൂസ്മെന്റ് പാര്‍ക്കുകള്‍, എന്റര്‍ടെയിന്‍മെന്റ് സോണുകള്‍ എന്നിവിടങ്ങളിലെ തുറന്ന സ്ഥലങ്ങള്‍ 50 ശതമാനം ശേഷിയില്‍ പ്രവര്‍ത്തിക്കാം. ഇന്‍ഡോറില്‍ 30 ശതമാനം. ഇവരില്‍ 75 ശതമാനം വാക്സിനെടുത്തവര്‍ ആയിരിക്കണം. കുട്ടികളെ വാക്സിനെടുക്കാത്തവരുടെ കൂട്ടത്തില്‍ പരിഗണിക്കും.
ഓഫീസുകളിലെ ഹാജര്‍ നില
– സര്‍ക്കാര്‍, സ്വകാര്യ ഓഫിസുകളിലും ജോലി സ്ഥലങ്ങളിലും 80 ശതമാനം ജീവനക്കാര്‍ക്ക് ഹാജരാവാമെന്ന നിലവിലെ വ്യവസ്ഥ തുടരും. ബാക്കിയുള്ളവര്‍ വീടുകളില്‍ നിന്ന് ജോലി ചെയ്യണം. ഓഫീസുകളില്‍ നടക്കുന്ന അത്യാവശ്യ യോഗങ്ങളില്‍ 15 പേര്‍ വരെ പങ്കെടുക്കാം. സ്വകാര്യ, സര്‍ക്കാര്‍ മേഖലകളില്‍ വാക്സിനെടുക്കാത്ത എല്ലാ ജീവനക്കാരും ആഴ്ച്ച തോറും കൊവിഡ് റാപിഡ് ടെസ്റ്റിന് വിധേയരാവണം. കൊവിഡ് വന്ന് ഭേദയമാവര്‍ക്കും ആരോഗ്യ കാരണങ്ങളാല്‍ നേരത്തേ ഔദ്യോഗികമായി ഇളവുകള്‍ പ്രഖ്യാപിക്കപ്പെട്ടവര്‍ക്കും ഈ നിബന്ധന ബാധകമല്ല.
റസ്റ്റൊറന്റുകളിലും കഫേകളിലും കൂടുതല്‍ പേര്‍
ക്ലീന്‍ ഖത്തര്‍ സര്‍ട്ടിഫിക്കറ്റ് ഉള്ള റസ്റ്റൊറന്റുകളിലും കഫേകളിലും ഔട്ട്‌ഡോറിലും ഇന്‍ഡോറിലും 50 ശതമാനം പേര്‍ക്ക് ഇരുന്ന് ഭക്ഷണം കഴിക്കാം. വാണിജ്യ വ്യവസായ മന്ത്രാലയത്തിന്റെ നിബന്ധനകള്‍ പാലിക്കുന്ന മറ്റ് റസ്റ്റൊറന്റുകളിലും കഫേകളിലും ഔട്ട്ഡോറില് 30 ശതമാനം പേര്‍ക്കും ഇന്‍ഡോറില്‍ 15 ശതമാനം പേര്‍ക്കും ഭക്ഷണം കഴിക്കാം. ഇന്‍ഡോറില്‍ ഭക്ഷണം കഴിക്കുന്നവര്‍ പൂര്‍ണമായും വാകിസനെടുത്തിരിക്കണം. കുടുംബത്തോടൊപ്പം വരുന്ന കുട്ടികളെ മാത്രമേ ഇന്‍ഡോറില്‍ അനുവദിക്കൂ.
പൊതുഗതാഗത സംവിധാനങ്ങള്‍
– മെട്രോ ഉള്‍പ്പെടെയുള്ള പാതുഗതാഗത സംവിധാനങ്ങള്‍ക്ക് 50 ശതമാനം ശേഷിയില്‍ പ്രവര്‍ത്തിക്കാം. എന്നാല്‍ ബസ്സുകളില്‍ 30 ശതമാനം ആളുകള്‍ മാത്രമേ പാടുള്ളൂ. ഡ്രൈവിംഗ് സ്‌കൂളുകള്‍ 50 ശതമാനം ശേഷിയില്‍. എന്നാല്‍ ഇവിടത്തെ ജീവനക്കാരെല്ലാം വാക്സിനെടുത്തിരിക്കണം.
– സ്വകാര്യ ബോട്ടുകള്‍ക്ക് 50 ശതമാനം ശേഷിയില്‍ പ്രവര്‍ത്തിക്കാം. ടൂറിസ്റ്റ് യാനങ്ങളും വാടക ബോട്ടുകളും 30 ശതമാനം വരെ ശേഷിയില്‍ ഓടാം. സഞ്ചാരികള്‍ വാക്സിനെടുത്ത പരമാവധി 20 പേര്‍. മൂന്ന് പേര്‍ വരെ വാക്സിനെടുക്കാത്തവര് ആവാം.
– സ്വകാര്യ വാഹനങ്ങളില്‍ ഡ്രൈവര്‍ ഉള്‍പ്പടെ പരമാവധി നാലുപേര്‍ മാത്രം. ഒരേ കുടുംബത്തില്‍പ്പെട്ടവര്‍ക്ക് ഇളവുണ്ട്.
വ്യാപാര വാണിജ്യ സ്ഥാപനങ്ങള്‍
– ഷോപ്പിംഗ് സെന്ററുകള്‍ 50 ശതമാനം ശേഷിയില്‍ പ്രവര്‍ത്തനം തുടരും. കുട്ടികള്‍ക്ക് പ്രവേശന വിലക്കില്ല.
ഇവിടെയുള്ള ഫുഡ് കോര്‍ട്ടുകള്‍, മസ്ജിദുകള്‍, ടോയ്‌ലറ്റുകള്‍ എന്നിവ 30 ശതമാനം ശേഷിയില്‍ തുറക്കാം.
– ഹോള്‍സെയില്‍ മാര്‍ക്കറ്റുകള്‍ 50 ശതമാനം ശേഷിയില്‍. കൂട്ടികള്‍ക്കും പ്രവേശിക്കാം.
– പരമ്പരാഗത മാര്‍ക്കറ്റുകളും ഷോപ്പിംഗ് സെന്ററുകളും 50 ശതമാനം ശേഷിയില്‍.
– ബ്യൂട്ടി സലൂണുകളും ബാര്‍ബര്‍ ഷോപ്പുകളും 50 ശതമാനം ശേഷിയില്‍ പ്രവര്‍ത്തിക്കാം. ജീവനക്കാരും ഉപഭോക്താക്കളും വാക്‌സിനെടുത്തരിക്കണം. സലൂണുകളില്‍ ഒരേ സമയം ഒന്നില്‍ കൂടുതല്‍ കുട്ടികള്‍ ഉണ്ടാവാന്‍ പാടില്ല.
– സിനിമാ തിയേറ്ററുകള്‍ 30 ശതമാനം ശേഷിയില്‍. കുട്ടികള്‍ക്കും പ്രവേശനം. ചുരുങ്ങിയത് 75 ശതമാനം പേര്‍ വാക്‌സിനെടുത്തവരായിരിക്കണം. കുട്ടികളെ വാക്സിനെടുക്കാത്ത 25 ശതമാനത്തില്‍ ഉള്‍പ്പെടുത്തും.
– ബിസിനസ് മീറ്റിംഗുകളില്‍ 15 പേര്‍ പേര്‍ വരെ പങ്കെടുക്കാം. ഇതില്‍ ചുരുങ്ങിയത് 10 പേര്‍ വാക്‌സിന്‍ എടുത്തവരായിരിക്കണം.
സ്‌കൂളുകളില്‍ പകുതി കുട്ടികള്‍ക്ക് പ്രവേശനം
– സ്‌കൂളില്‍ ഓണ്‍ലൈന്‍, ഓഫ്ലൈന്‍ പഠനം സംവിധാനം തുടരും. ക്ലാസ്സുകളില്‍ 50 ശതമാനം കുട്ടികള്‍ക്ക് പ്രവേശനം അനുവദിക്കും.
– സ്വകാര്യ വിദ്യാഭ്യാസ സ്ഥാപനങ്ങളും ട്രെയ്നിംഗ് സെന്ററുകളും 50 ശതമാനം ശേഷിയില്‍ പ്രവര്‍ത്തിക്കാം. പരിശീലകര്‍ മുഴുവനും പരിശീലനത്തിനെത്തുന്നവരില്‍ 75 ശതമാനം പേരും വാക്സിനെടുത്തിരിക്കണം.
– നഴ്സറികളും ചൈല്‍ഡ്കെയര്‍ സെന്ററുകളും 50 ശതമാനം ശേഷിയില്‍. ജീവനക്കാരെല്ലാം വാക്സിനെടുത്തിരിക്കണം.
– ലൈബ്രറികളിലും മ്യൂസിയങ്ങളിലും 75 ശതമാനം പേര്‍.
എല്ലാ ആരോഗ്യ സ്ഥാപനങ്ങള്‍ക്കും പ്രവര്‍ത്തിക്കാം
– സ്വകാര്യ ആരോഗ്യ സ്ഥാപനങ്ങള്‍ക്ക് പൂര്‍ണ ശേഷിയില്‍ പ്രവര്‍ത്തിക്കാം. ജീവനക്കാര്‍ മുഴുവന്‍ വാക്‌സിന്‍ എടുത്തവരായിരിക്കണം.
– ഹോസ്പിറ്റാലിറ്റി, ക്ലീനിംഗ് മേഖലകളില്‍ പ്രവര്‍ത്തിക്കുന്നവര്‍ക്ക് പ്രവൃത്തി സമയങ്ങളില്‍ സ്ഥാപനങ്ങളിലും തൊഴിലിടങ്ങളിലും 80 ശതമാനം ശേഷിയില്‍ പ്രവര്‍ത്തിക്കാം. ജീവനക്കാരെല്ലാം വാക്‌സിന്‍ എടുത്തവരായിരിക്കണം.
– ഹോസ്പിറ്റാലിറ്റി-ക്ലീനിംഗ് സര്‍വീസുകളില്‍ വാക്സിനെടുത്ത ജീവനക്കാര്‍ക്ക് ഒന്നിലധികം വീടുകളില്‍ ജോലി ചെയ്യാം.
സ്പോര്ട്സ്, കായിക പ്രവര്‍ത്തനങ്ങള്‍
– ഹെല്‍ത്ത്, ഫിറ്റനസ് ക്ലബ്ബ്, സ്പാ എന്നിവിടങ്ങള്‍ 50 ശതമാനം ശേഷിയില്‍ പ്രവര്‍ത്തിക്കാം. ഉപഭോക്താക്കളും ജീവനക്കാരും വാക്സിനെടുത്തിരിക്കണം.
– ഔട്ട്ഡോര്‍ സ്വിമ്മിംഗ് പൂളുകള്‍ 50 ശതമാനം ശേഷിയില്‍. ഇന്‍ഡോര്‍ സ്വിമ്മിംഗ് പൂളുകളില്‍ 30 ശതമാനം. ഉപഭോക്താക്കളില്‍ 75 ശതമാനം പേര്‍ വാക്സിനെടുത്തിരിക്കണം. കുട്ടികള്‍ക്കും പ്രവേശനം. ഇവരെ വാക്സിനെടുക്കാത്തവരരുടെ കൂട്ടത്തില്‍ എണ്ണും.
– ഖത്തര്‍ ആരോഗ്യ മന്ത്രാലയം അംഗീകരിച്ച പ്രാദേശിക, അന്താരാഷ്ട്ര മല്‍സരങ്ങള്‍ക്കുള്ള ടീം സ്പോര്ട്സ് പരിശീലനത്തില്‍ പുറത്ത് 50 പേരും അകത്ത് 30 പേരും ആവാം. പങ്കെടുക്കുന്നവരില്‍ 75 ശതമാനം പേരും വാക്സിനെടുത്തവരാവണം.
– അന്താരാഷ്ട്ര, പ്രാദേശിക കായിക മല്‍സരങ്ങള്‍ ഔട്ട്ഡോറില് 50 ശതമാനം കാണികളുമായി സംഘടിപ്പിക്കാം. കാണികളില്‍ 75 ശതമാനം പേര്‍ വാക്സിനെടുത്തിരിക്കണം. വാക്സിനെടുക്കാത്തവര് 24 മണിക്കൂറിനുള്ളില്‍ എടുത്ത ആന്റിജന്‍ നെഗറ്റീവ് ടെസ്റ്റ് ഫലം കാണിക്കണം. ഇന്‍ഡോറില്‍ 30 ശതമാനം കാണികള്‍. എല്ലാവരും വാക്സിനെടുത്തിരിക്കണം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : phase 3 of lifting covid19 restrictions in qatar from friday
Malayalam News from malayalam.samayam.com, TIL Network
