യുഎസ് വനിതാ നയതന്ത്രജ്ഞർ
യുഎസ് വനിതാ നയതന്ത്രജ്ഞരായ ആൻ എൽ മേസൺ, റൂത്ത് ഹോംബെർഗ്, ഷെറീൻ ജെ കിറ്റർമാൻ, ജെന്നിഫർ ബൈവാട്ടേഴ്സ് എന്നിവരാണ് ഔദ്യോഗിക സന്ദർശനങ്ങൾക്ക് അടക്കം മുച്ചക്രവാഹനത്തെ ഉപയോഗിക്കുന്നത്. ഇതിനായി കറുപ്പ്, പിങ്ക് നിറങ്ങളിലായി ഓട്ടോറിക്ഷകൾ വാങ്ങുകയും ചെയ്തിരിക്കുന്നത്. നൂതന സൗകര്യങ്ങളും തങ്ങളുടെ ഓട്ടോറിക്ഷകളിൽ ഉപയോഗിച്ചിട്ടുണ്ട്.
കസ്റ്റമൈസ് ആയി നിർമിച്ച കറുത്ത ഓട്ടോറിക്ഷയിൽ ബ്ലൂട്ടൂത്ത് ഡിവൈസും കടുവയുടെ ചിത്രം പ്രിന്റ് കർട്ടനുകളും സൗകര്യമൊരുക്കിയിട്ടുണ്ട്. ഓട്ടോറിക്ഷകൾക്ക് എന്തോ ഒരു പ്രത്യേകതയുണ്ടെന്നും ഇന്ത്യയിലൂടെ ഒരെണ്ണം ഓടിക്കാൻ അവസരം ലഭിച്ചപ്പോൾ അവർ പറഞ്ഞു.
പാകിസ്ഥാനിൽ സായുധവാഹനങ്ങൾ
ഇന്ത്യയിലേക്ക് എത്തുന്നതിന് മുൻപ് ഞാൻ പാകിസ്ഥാനിൽ ആയിരുന്നപ്പോൾ ഉപയോഗിച്ചിരുന്നത് സായുധമായ വലിയ സുന്ദരമായ വാഹനമാണ്. പക്ഷെ, ഞാൻ എപ്പോഴും തെരുവിലേക്ക് നോക്കുമ്പോൾ ഓട്ടോറിക്ഷകൾ പോകുന്നത് കാണാം, അപ്പോഴേല്ലാം ഓട്ടോറിക്ഷയിൽ ആയിരിക്കാൻ ഞാൻ ആഗ്രഹിച്ചിരുന്നുവെന്ന് നയതന്ത്രജ്ഞയായ ആൻ എൽ മേസൺ വാർത്ത ഏജൻസിയായ എഎൻഐയോട് പറഞ്ഞു.
അവസരങ്ങൾ എപ്പോഴും ഉപയോഗിക്കുന്ന അമ്മയാണ് തന്റെ പ്രചോദനമെന്നാണ് നയതന്ത്രജ്ഞ വ്യക്തമാക്കി.
അമ്മ ലോകം മുഴുവൻ തന്നെ സഞ്ചരിച്ചിട്ടുണ്ട്, അവർ വിയറ്റ്നാം യുദ്ധത്തിൽ പങ്കെടുത്തിരുന്നു, അതിൽ അവർ ഒരുപാട് അനുഭവിക്കുകയും ചെയ്തിട്ടുണ്ട്. ജീവിതവും അമ്മയും എന്നെ എപ്പോഴും രസകരമായ കാര്യങ്ങൾ ചെയ്യാനും അതിനുള്ള അവസരം നേടാനും പഠിപ്പിച്ചുവെന്നും ആൻ മേസൺ കൂട്ടിച്ചേർത്തു.
പിങ്ക് ഓട്ടോ
അതേസമയം, മറ്റൊരു നയതന്ത്രജ്ഞയായ ഷെറീൻ ജെ കിറ്റർമാൻ പൂക്കളുടെ ചിത്രങ്ങൾ ആലേഖനം ചെയ്ത പിങ്ക് നിറത്തിലുള്ള ഓട്ടോറിക്ഷയാണ് സ്വന്തമാക്കിയിരിക്കുന്നത്. സ്വന്തമായി ഓട്ടോറിക്ഷയുള്ള മെക്സിക്കൻ അംബാസിഡറിൽ നിന്നും പ്രചോദനം ഉൾക്കൊണ്ടാണ് കിറ്റർമാനും ഓട്ടോ സ്വന്തമാക്കിയത്.
യുഎസിൽ നിന്നും ഡൽഹിയിലേക്ക് വരാൻ പദ്ധതിയിടുമ്പാൾ തന്നെ മെക്സിക്കൻ അംബാസഡറെക്കുറിച്ച് കേട്ടിരുന്നു. പത്ത് വർഷം മുമ്പ് അവർക്ക് ഒരു ഓട്ടോയും അതിന്റെ ഡ്രൈവറും ഉണ്ടായിരുന്നു. അപ്പോൾ മുതൽ അതിനേക്കുറിച്ച് ചിന്തിക്കാൻ തുടങ്ങിയത്. പിന്നീട് ഇവിടെ എത്തിയപ്പോൾ ഓട്ടോ ഉള്ള ആനിനെ പരിചയപ്പെട്ടു. അതോടെ, എനിക്ക് ഓട്ടോറിക്ഷ സ്വന്തമാക്കണമെന്നും അത് ഓടിക്കണമെന്നും ആഗ്രഹം വളർന്നുവെന്നും ഷെരീൻ പറഞ്ഞു.
നയതന്ത്രം അത്ര നല്ലതല്ല. ആളുകളെ കണ്ടുമുട്ടുന്നതും ആളുകൾ പരസ്പരം അറിയുന്നതും ബന്ധങ്ങൾ കെട്ടിപ്പടുക്കാനുള്ള അവസരവുമാണ് നയതന്ത്രം കൊണ്ട് ഉദ്ദേശിക്കുന്നതെന്നും ഇതെല്ലാം ഓട്ടോയിൽ സഞ്ചരിക്കുമ്പോൾ നടക്കുമെന്നുമാണ് റൂത്ത് ഹോംബെർഗ് പറയുന്നത്.
