ദുബായ് ജബല്‍ അലി തുറമുഖത്ത് വന്‍ സ്‌ഫോടനം; കിലോമീറ്ററുകള്‍ അകലെ വരെ ആഘാതം

ദുബായ്: ദുബായിലെ ജബല്‍ അലി തുറമുഖത്ത് വന്‍ സ്‌ഫോടനം. യുഎഇ സമയം ബുധനാഴ്ച രാത്രി 12 മണിയോടെയാണ് പൊട്ടിത്തെറിയും വന്‍ തീപിടുത്തമുണ്ടായതെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ജബല്‍ അലി തുറമുഖത്തെ ചെറിയ കണ്ടെയ്‌നര്‍ കപ്പലിലുണ്ടായ സ്‌ഫോടനമാണ് തീപ്പിടിത്തത്തിന് കാരണമായതെന്ന് ദുബായ് പോലീസ് കമാന്റര്‍ ഇന്‍ ചീഫ് ലഫ്റ്റനന്റ് ജനറല്‍ അബ്ദുല്ല ഖലീഫ അല്‍ മര്‍രി അറിയിച്ചു. സ്‌ഫോടനത്തെ തുടര്‍ന്ന് നഗരത്തിലുടനീളം പ്രകമ്പനം അനുഭവപ്പെട്ടതായും അധികൃതര്‍ അറിയിച്ചു.



Also Read: പ്രവാസികളെ പ്രവേശിപ്പിക്കാനൊരുങ്ങി കുവൈറ്റ്; ഒരു ദിവസം 5000 യാത്രക്കാരെ അനുവദിക്കും

ആളപയാമൊന്നും ഉണ്ടായിട്ടില്ലെന്നാണ് പ്രാഥമിക റിപ്പോര്‍ട്ടുകള്‍. രണ്ടര മണിക്കൂറിനിടയില്‍ തീ നിയന്ത്രണ വിധേയമായതായും പ്രദേശം തണുപ്പിക്കുന്നതിനുള്ള പ്രവര്‍ത്തനങ്ങള്‍ തുടങ്ങിയതായും ദുബായ് സിവില്‍ ഡിഫന്‍സ് ഡയരക്ടര്‍ ജനറല്‍ മേജര്‍ ജനറല്‍ റാശിദ് താനി അല്‍ മത്‌റൂശി അറിയിച്ചു. തുറമുഖത്ത് അഗ്‌നിശമന സേനാംഗങ്ങള്‍ തീ അണയ്ക്കുന്ന വീഡിയോ ദുബായ് മീഡിയ ഓഫീസ് പോസ്റ്റ് ചെയ്തു. തുറമുഖത്ത് നിന്ന് 15 കിലോമീറ്റര്‍ അകലെ സ്‌ഫോടന ശബ്ദം കേട്ടതായി ദുബായിലെ സിഎന്‍എന്‍ ഉദ്യോഗസ്ഥര്‍ പറഞ്ഞു. കിലോമീറ്ററുകള്‍ അകലയെയുള്ള കെട്ടിടങ്ങള്‍ക്ക് സ്‌ഫോടനത്തില്‍ കേടുപാടുകള്‍ സംഭവിച്ചതായും മാധ്യമങ്ങള്‍ റിപ്പോര്‍ട്ട് ചെയ്തു.

ലോകത്തിലെ ഒന്‍പതാമത്തെ വലിയ തുറമുഖവും ഈ മേഖലയിലെ ഏറ്റവും വലിയ തുറമുഖവുമാണ് ജെബല്‍ അലി. സ്‌ഫോടനത്തിന്റെ ആഘാതത്തില്‍ നഗരത്തിലുടനീളം കെട്ടിടങ്ങള്‍ ഇളകിയതായി ദൃക്‌സാക്ഷികള്‍ റിപ്പോര്‍ട്ട് ചെയ്തു. സ്‌ഫോടത്തിന്റെ കാരണങ്ങള്‍ ഇതുവരെ പുറത്തുവന്നിട്ടില്ല.