മദ്യപാനിയായ ഭർത്താവുമായി തർക്കം; രണ്ട് മക്കളെയും കൊന്ന് യുവതി ജീവനൊടുക്കി

ഈറോഡ്: മദ്യത്തിനടിമയായ ഭർത്താവുമായുള്ള തർക്കത്തിനൊടുവിൽ മകളെയും മകനെയും വിഷം നൽകി കൊന്ന് യുവതി ജീവനൊടുക്കി. തമിഴ്നാട്ടിലെ ഈറോഡ് ജില്ലയിൽ ചൊവ്വാഴ്ചയാണ് നാടിനെ നടുക്കിയ സംഭവം നടന്നത്. ഭക്ഷണത്തിൽ കീടനാശിനി കലർത്തിയാണ് യുവതി മക്കളെ കൊലപ്പെടുത്തിയതെന്ന് പോലീസ് പറഞ്ഞു.



പി ശശികല (33) എന്ന യുവതിയാണ് മക്കളെ കൊലപ്പെടുത്തിയ ശേഷം ജീവനൊടുക്കിയത്. നിതിൻ ശങ്കർ (12), സുദർശന (10) എന്നിവരാണ് കൊല്ലപ്പെട്ടത്. ശശികലയുടെ ഭർത്താവായ കെ പ്രഭു (40) കൂലിപ്പണിക്കാരനാണ്. തിങ്കളാഴ്ച ഇയാൾ, മദ്യം വാങ്ങുന്നതിനായി ഭാര്യയോട് പണം ചോദിച്ചിരുന്നു. ഈ സമയത്ത് മദ്യപാനത്തിൽ നിന്ന് പിന്മാറണമെന്ന് ശശികല ആവശ്യപ്പെടുകയും ചെയ്തു. എന്നാൽ ഭാര്യയുടെ വാക്കുകൾ തള്ളിയ ഇയാൾ പുറത്ത് പോവുകയും മദ്യം വാങ്ങുകയും ചെയ്തു.

സ്ത്രീകൾക്കൊപ്പം നി‍ര്‍ത്തി നഗ്നചിത്രം പകര്‍ത്തി ഭീഷണി; പ്രവാസികളിൽ നിന്നും പണം തട്ടിയ രണ്ടു പേർ പിടിയിൽ

അന്ന് രാത്രിയിൽ പണം നൽകാത്തതിനെച്ചൊല്ലി പ്രഭു ശശികലയുമായി വഴക്കിട്ടു. ഇതിനെത്തുടർന്നാണ് മക്കളെ കൊന്ന് ജീവനൊടുക്കാൻ യുവതി തീരുമാനിക്കുന്നതെന്ന് പോലീസ് പറഞ്ഞു. തുടർന്ന് ഭക്ഷണത്തിൽ വിഷം കലർത്തി രണ്ട് മക്കൾക്കും നൽകുകയായിരുന്നു. തുടർന്ന് മൂന്ന് പേരും ഉറങ്ങാൻ കിടന്നെങ്കിലും അർദ്ധരാത്രിയോടെ അസ്വസ്ഥകൾ ആരംഭിക്കുകയായിരുന്നു.

മോഡലിങിനായി വിളിച്ചു, പിന്നാലെ ഭീഷണി; 14കാരിയായ കരാട്ടെ താരം മരിച്ച നിലയിൽ

അയൽവാസികളെത്തിയാണ് മൂവരെയും ഈറോഡ് സിറ്റിയിലെ സ്വകാര്യ ആശുപത്രിയിലേക്ക് കൊണ്ടുപോയത്. എന്നാൽ ചൊവ്വാഴ്ച രാവിലെയോടെ മൂന്നുപേരും മരിക്കുകയായിരുന്നെന്ന് പോലീസ് പറഞ്ഞു. മൂന്നുപേരുടെയും മരണവുമായി ബന്ധപ്പെട്ട് മാലയംപാളയം പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, നിങ്ങള്‍ ഒറ്റയ്ക്കല്ല. സഹായം തേടാം ഉടനെ. ദയവായി വിളിക്കൂ: ദിശ ഹെല്‍പ്പ്‍ലൈന്‍ – 1056 (ടോള്‍ ഫ്രീ)