സ്റ്റാൻ സ്വാമിയോട് ചോദിക്കാൻ ഒന്നുമില്ലായിരുന്നു; അറസ്റ്റിലായ ശേഷം എൻഐഎ അദ്ദേഹത്തെ ചോദ്യം ചെയ്തിട്ടില്ലെന്ന് അഭിഭാഷകൻ

ബെംഗളുരു: ഭീമാ കൊറേഗാവ് സംഭവത്തിന്റെ പശ്ചാത്തലത്തിൽ മാവോയിസ്റ്റ് ബന്ധം ആരോപിച്ച് യുഎപിഎ ചുമത്തി അറസ്റ്റ് ചെയ്ത ഫാ സ്റ്റാൻ സ്വാമിയെ അറസ്റ്റിന് ശേഷം ഒരു ദിവസം പോലും ചോദ്യം ചെയ്തിട്ടില്ലെന്ന് അഭിഭാഷകൻ. അറസ്റ്റ് ചെയ്യപ്പെട്ട 2020 ഒക്ടോബർ മുതൽ മരിക്കുന്ന ദിവസം വരെ എൻഐഎ ചോദ്യം ചെയ്തിട്ടില്ലെന്നാണ് അഭിഭാഷകൻ വ്യക്തമാക്കിയിരിക്കുന്നത്.



സ്റ്റാൻ സ്വാമിയിൽ നിന്നും എന്തെങ്കിലും അറിയാനുണ്ടായിരുന്നെങ്കിൽ അദ്ദേഹത്തെ കസ്റ്റഡിയിൽ വാങ്ങി ചോദ്യം ചെയ്യാമായിരുന്നു. എന്നാൽ അദ്ദേഹത്തെ എൻഐഎ കസ്റ്റഡിയിൽ വാങ്ങിയില്ലെന്നും എൻഐഎക്ക് അദ്ദേഹത്തോട് ഒരു ചോദ്യം പോലും ചോദിക്കാൻ ഉണ്ടായിരുന്നില്ലെന്നും അദ്ദേഹത്തിന്റെ അഭിഭാഷകനായ അഡ്വ മിഹിർ ദേശായി പറഞ്ഞു. ന്യൂസ് മിനിറ്റ്സിനോടായിരുന്നു പ്രതികരണം.

അറസ്റ്റിനു മുമ്പ് സ്റ്റാൻ സ്വാമിയെ ചോദ്യം ചെയ്തിരുന്നു. എന്നാൽ പിന്നീട് വെറുതേ തടവിൽ ഇടുകയായിരുന്നുവെന്നും അഭിഭാഷകൻ പറഞ്ഞു. വെള്ളം കുടിക്കാൻ സ്ട്രോ വേണമെന്ന ആവശ്യം പോലും തള്ളിയ അവർ അക്രമങ്ങളുടെ സൂത്രധാരൻ സ്റ്റാൻ സ്വാമിയാമെന്ന് വരുത്തി തീർക്കാനാണ് ശ്രമിച്ചതെന്നും അഭിഭാഷകൻ വ്യക്തമാക്കി.

ജയിലിൽ കഴിയുന്നതിനിടെ കോടതി ഇടപെടലിനെ തുടർന്ന് മേയ് 28 നാണ് സ്റ്റാൻ സ്വാമിയെ ആശുപത്രിയിൽ പ്രവേശിപ്പിച്ചത്. ജുലൈ ആറ് വരെ ആശുപത്രിയിൽ തുടരാനാണ് അനുവാദം നൽകിയത്. ഇതിനിടെയാണ് മരണം സംഭവിച്ചത്.

ആശുപത്രിയിലേക്ക് മാറ്റിയപ്പോൾ ബന്ധുക്കളെ പോലും തിരിച്ചറിയാൻ അദ്ദേഹത്തിന് കഴിയുമായിരുന്നില്ല. ജാമ്യം നൽകിയില്ലെങ്കിൽ താൻ ജയിലിൽ കിടന്ന് മരിക്കുമെന്ന് സ്റ്റാൻ സ്വാമി കോടതിയിൽ പറഞ്ഞിരുന്നു.