പണം വെച്ച് ആരെയും വെല്ലുവിളിക്കരുത്; നിയമങ്ങൾ അനുസരിച്ച് വ്യവസായം നടത്തണമെന്ന് സാബുവിനോട് ഐഎൻടിയുസി

കൊച്ചി: കിറ്റക്സ് കമ്പനിയുടമ സാബു എം ജേക്കബ് പറയുന്നത് ശുദ്ധ വിവരക്കേടാണെന്ന് ഐഎൻടിയുസി പ്രസിഡന്റ് ആർ ചന്ദ്രശേഖർ. കേരളത്തിൽ വ്യവസായം നടത്താൻ നിയമങ്ങളുണ്ട്. 74 ഓളം ക്രമക്കേടുകളാണ് കിറ്റക്സിൽ കണ്ടെത്തിയിരിക്കുന്നത്. തൊഴിലാളികൾക്ക് കൂലി നൽകാതിരിക്കാൻ ഹൈക്കോടതിയെ സമീപിച്ച വ്യക്തിയാണ് സാബു എന്നും ഐഎൻടിയുസി പ്രസിഡന്റ് പറഞ്ഞു.



കിറ്റക്സിലെ നിയമ ലംഘനം പരിശോധിക്കണം; പ്രതിപക്ഷ എംഎൽഎമാർ നൽകിയ കത്ത് പുറത്ത്

സ്ഥാപനം ആര് നടത്തിയാലും നിയമപരമായി നടത്തണം. വളർന്നുവന്ന വഴി മറക്കരുത്. ന്യായമായ തൊഴിൽ സംസ്കാരം കിറ്റക്സിൽ ഉണ്ടാവണമെന്നും സാബുവിന്റെ പാത ഇനിയാരും പിന്തുടരരുതെന്നും ചന്ദ്രശേഖർ വ്യക്തമാക്കി. കിറ്റക്സിൽ മിനിമം വേതനം ഉറപ്പാക്കാൻ നിയമപരമായ നടപടി സ്വീകരിക്കുമെന്നും അദ്ദേഹം പറഞ്ഞു. വോട്ട് ചെയ്ത് ജയിപ്പിച്ച ജനങ്ങൾ പ്രശ്നങ്ങൾ ഉന്നയിക്കുമ്പോൾ ജനപ്രതിനിധികൾക്ക് കണ്ടില്ലെന്നും നടിക്കാൻ സാധിക്കില്ല. അവരെ കുറ്റം പറയുന്നതിൽ അർത്ഥമില്ലെന്നും ഐഎൻടിയുസി പ്രസിഡന്റ് പറഞ്ഞു.

തൊഴിലാളികളുടെ ന്യായമായ കൂലി കോടതി വഴി തടഞ്ഞും തൊഴിൽ വകുപ്പ് ഉദ്യോഗസ്ഥരെ ഭീഷണിപ്പെടുത്തിയും വ്യവസായം നടത്തരുത്. നിയമം അനുസരിച്ച് മാന്യമായ രീതിയിൽ വ്യവസായം നടത്താൻ സാബു തയ്യാറാകണമെന്നും ഐഎൻടിയുസി ആവശ്യപ്പെട്ടു.

ത്രികക്ഷി ചർച്ചയ്ക്ക് ശേഷമാണ് മിനിമം വേദനം നടപ്പാക്കേണ്ടത്. അതറിയില്ലെങ്കിൽ അത് പഠിച്ചിട്ട് വേണം വ്യവസായം നടത്താൻ. കോടികളുടെ നിക്ഷേപം മറ്റ് സംസ്ഥാനങ്ങളിലേക്ക് കൊണ്ടുപോകും എന്നു പറയുന്നത് പക്വതയില്ലാത്ത നിലപാടാണ്. മുതലാളിമാരുടെ ഇത്തരം നിലപാടുകൾ ആശാസ്യമല്ലെന്നും ചന്ദ്രശേഖർ പറഞ്ഞു.

കെഎസ്ആർടിസിയുടെ ബെംഗ്ലരു സർവീസുകൾ ഞായറാഴ്ച മുതൽ; യാത്ര ചെയ്യാൻ വേണ്ടത് എന്തെല്ലാം? നിർദേശങ്ങൾ

നിയമം അനുസരിച്ച് അന്തസായി വേണം വ്യവസായം നടത്താൻ. പണമുണ്ടെങ്കിൽ ആരെയും വെല്ലുവിളിക്കാമെന്ന സമീപനം ശരിയല്ല. സാബു രാഷ്ട്രീയത്തിലേക്ക് വരുന്നതിനെ ആരും എതിർക്കുന്നില്ല. പക്ഷേ ഇതര സംസ്ഥാന തൊഴിലാളികളെ അടിമപ്പണിയെടുപ്പിക്കാൻ അനുവദിക്കില്ലെന്നും അദ്ദേഹം വ്യക്തമാക്കി.