പ്രവേശന ഫീസില്ലാതെ ഖത്തറിലേക്ക് യാത്ര ചെയ്യാം
ലോകകപ്പ് വേളയില്‍ ഖത്തറിലേക്ക് പ്രവേശിക്കണമെങ്കില്‍ ഹയ്യാ കാര്‍ഡ് വേണമെന്നായിരുന്നു ടൂര്‍ണമെന്റിന്റെ ആദ്യ ഘട്ടത്തിലെ നിബന്ധന. ഹയ്യാ കാര്‍ഡ് ലഭിക്കണമെങ്കില്‍ ലോകകപ്പ് മല്‍സരത്തിനുള്ള ടിക്കറ്റും ഖത്തറില്‍ താമസ സ്ഥലം ബുക്ക് ചെയ്തതിന്റെ രേഖയും ആവശ്യമായിരുന്നു. എന്നാല്‍, ആദ്യ റൗണ്ട് മത്സരങ്ങള്‍ കഴിഞ്ഞ ഡിസംബര്‍ രണ്ട് മുതല്‍ മാച്ച് ടിക്കറ്റ് ഇല്ലാത്തവര്‍ക്കും ഹയ്യാ കാര്‍ഡ് നേടാനും ഖത്തറിലേക്ക് വരാനും അവസരം നല്‍കിയിരുന്നു. അപ്പോഴും ഖത്തറില്‍ അക്കമഡേഷന്‍ നിര്‍ബന്ധമായിരുന്നു. മാത്രമല്ല, മുതിര്‍ന്നവര്‍ക്ക് 500 റിയാല്‍ ഫീസും ഏര്‍പ്പെടുത്തിയിരുന്നു. എന്നാല്‍, ജിസിസിയിലെ പൗരന്മാര്‍ക്കും പ്രവാസികള്‍ക്കും ഈ രണ്ട് നിബന്ധനകളും ഒഴിവാക്കി യാത്ര എളുപ്പമാക്കാനുള്ള തീരുമാനം കൈക്കൊണ്ടതോടെ ഈ രാജ്യങ്ങളില്‍ നിന്ന് ഒട്ടേറെ പേര്‍ അടുത്ത മത്സരങ്ങള്‍ ആസ്വദിക്കുന്നതിനായി ഖത്തറിലേക്ക് തിരിക്കാനുള്ള തയ്യാറെടുപ്പിലാണ്.
സൗദി ഐഡി ഉപയോഗിച്ച് യാത്ര ചെയ്യാമെന്ന് ജവാസാത്ത്
ഹയ്യാ ഫാന്‍ കാര്‍ഡ് ഇല്ലാത്ത സൗദി പൗരന്മാര്‍ക്കും പ്രവാസികള്‍ക്കും തങ്ങളുടെ ദേശീയ ഐഡി ഉപയോഗിച്ച് ഇനി മുതല്‍ ഖത്തറിലേക്ക് യാത്ര ചെയ്യാമെന്ന് സൗദി ജനറല്‍ ഡയറക്ടറേറ്റ് ഓഫ് പാസ്പോര്‍ട്ട്‌സ് അഥവാ ജവാസത്ത് വ്യക്തമാക്കി. സൗദി അറേബ്യയിലെയും മറ്റ് ഗള്‍ഫ് സഹകരണ കൗണ്‍സില്‍ രാജ്യങ്ങളിലെയും പൗരന്മാര്‍ക്കും ലോകകപ്പിന് ടിക്കറ്റില്ലാതെ ഖത്തറിലേക്ക് പോകാന്‍ ആഗ്രഹിക്കുന്ന ജിസിസിയിലെ പ്രവാസികള്‍ക്കും ഹയ്യ ഫാന്‍ കാര്‍ഡ് നിര്‍ബന്ധമാണെന്ന് നേരത്തേ ജവാസാത്ത് അറിയിച്ചിരുന്നു. യാത്രാ നിബന്ധനയില്‍ ഖത്തര്‍ പുതിയ ഇളവ് പ്രഖ്യാപിച്ച സാഹചര്യത്തിസാണ് ജവാസാത്തിന്‍റെ പുതിയ തീരുമാനം. സൗദി, ജിസിസി പൗരന്മാര്‍ക്ക് അവരുടെ ദേശീയ ഐഡി ഉപയോഗിച്ച് ഖത്തറിലേക്ക് പോകാമെന്ന് ജവാസാത്ത് സ്ഥിരീകരിച്ചു. എന്നിരുന്നാലും, ലോകകപ്പ് മത്സരങ്ങളില്‍ പങ്കെടുക്കാന്‍ ആഗ്രഹിക്കുന്നവര്‍ ഹയ്യാ ഇലക്ട്രോണിക് പ്ലാറ്റ്‌ഫോം വഴി രജിസ്റ്റര്‍ ചെയ്യണം.
ആരാധകര്‍ക്ക് ആവേശമായി മൊറോക്കോ വിജയം
ഖത്തര്‍ ലോകകപ്പിന്റെ ശേഷിക്കുന്ന ദിവസങ്ങളില്‍ പ്രവേശന നിയമങ്ങളില്‍ ഇളവ് വരുത്തിയതോടെ തങ്ങളുടെ ഫുട്‌ബോള്‍ സ്വപ്നങ്ങള്‍ സാക്ഷാത്കരിക്കാന്‍ കഴിയുമെന്ന പ്രതീക്ഷയിലാണ് യുഎഇ നിവാസികളും. പ്രത്യേകിച്ച് നോക്കൗണ്ട് റൗണ്ടിലെ മൊറോക്കോ ടീമിന്റെ വിജയത്തിന്റെ പശ്ചാത്തലത്തില്‍. ഒരു അറബ് രാജ്യം ലോകകപ്പിന്റെ ക്വാര്‍ട്ടര്‍ ഫൈനലില്‍ കളിക്കുന്നത് കാണാനുള്ള ആവേശത്തിലാണ് മറ്റ് അറബ് നാടുകളിലെ ആരാധകരെന്ന പോലെ യുഎഇയിലെ ഫുട്‌ബോള്‍ പ്രേമികളും. മാച്ച് ടിക്കറ്റില്ലാത്തതിനാല്‍ കളി നേരിട്ട് കാണാനാവില്ലെങ്കിലും ഫാന്‍ ഫെസ്റ്റിവലുകളിലും ഫാന്‍ വില്ലേജുകളിലും ഒരുക്കിയിരിക്കുന്ന ബിഗ് സ്‌ക്രീനുകളില്‍ കളി ആസ്വദിക്കാനും മികച്ച വിനോദ പരിപാടികള്‍ ആസ്വദിക്കാനും ലോകകപ്പ് ആവേശത്തിന്റെ ഭാഗമാവാനും സാധിക്കുമെന്ന പ്രതീക്ഷയിലാണവര്‍. ഫാന്‍ വില്ലേജുകളില്‍ മിതമായ നിരക്കില്‍ താമസ സൗകര്യങ്ങള്‍ ലഭ്യമാകുന്നത് കാരണം കൂടുതല്‍ ദിവസങ്ങള്‍ ദോഹയില്‍ താമസിക്കാന്‍ ആഗ്രഹിക്കുന്നുവരുമുണ്ട്. വരും ദിവസങ്ങളില്‍ വിമാന യാത്രയ്ക്ക് ചെലവി കൂടുതലാണ് എന്നതിനാല്‍ അധികമാളുകളും യുഎഇയില്‍ നിന്ന് ഡ്രൈവ് ചെയ്ത് പോവാനാണ് ആഗ്രഹിക്കുന്നതെന്നും ഇതുമായി ബന്ധപ്പെട്ട മാധ്യമ റിപ്പോര്‍ട്ടുകളില്‍ പറയുന്നു.
12 മണിക്കൂര്‍ മുമ്പ് യാത്രാനുമതിക്കായി അപേക്ഷിക്കണം
ഖത്തറിലെ പുതുക്കിയ യാത്രാ നിര്‍ദ്ദേശങ്ങള്‍ പ്രകാരം ഡിസംബര്‍ 6 മുതല്‍ വിമാനത്താവളങ്ങള്‍ വഴി ഖത്തറിലേക്ക് വരുന്നജിസിസി രാജ്യങ്ങളിലെ പൗരന്മാര്‍ക്കും താമസക്കാര്‍ക്കും സാധാരണ നടപടിക്രമങ്ങളിലൂടെ രാജ്യത്തേക്ക് പ്രവേശിക്കാം. കര അതിര്‍ത്തി ക്രോസിംഗിലൂടെ എല്ലാ യാത്രക്കാര്‍ക്കും പതിവുപോലെ ബസുകളില്‍ ഗതാഗതം ലഭ്യമാകും. സന്ദര്‍ശകര്‍ക്ക് ഫീസ് കൂടാതെ പാര്‍ക്കിംഗ് സ്ഥലങ്ങള്‍ അനുവദിക്കും. സ്വകാര്യ വാഹനങ്ങളുമായി കര അതിര്‍ത്തിയിലൂടെ വരികയാണെങ്കില്‍ അവര്‍ക്ക് ഡിസംബര്‍ എട്ട് മുതല്‍ രാജ്യത്തേക്ക് പ്രവേശിക്കാനാകും. യാത്രയ്ക്ക് 12 മണിക്കൂര്‍ മുമ്പെങ്കിലും ആഭ്യന്തര മന്ത്രാലയത്തിന്റെ വെബ്‌സൈറ്റില്‍ പെര്‍മിറ്റിന് അപേക്ഷിക്കണം. പെര്‍മിറ്റിന് യാതൊരു ഫീസും ആവശ്യമില്ലെന്നും അധികൃതര്‍ അറിയിച്ചു. ജിസിസി രാജ്യങ്ങളിലെ പരമാവധി പൗരന്മാര്‍ക്കും താമസക്കാര്‍ക്കും ഫിഫ ലോകകപ്പ് ഖത്തറിന്റെ മത്സരങ്ങളും വിനോദ പരിപാടികളും ആസ്വദിക്കാനുള്ള അവസരമൊരുക്കാനുള്ള ഖത്തറിന്റെ താരുമാനത്തിന്റെ ഭാഗമായാണ് ഈ നടപടി.
Video-ബ്യൂട്ടി പാര്‍ലറിന്റെ മറവില്‍ അനധികൃത ചിട്ടി ഇടപാട്; യുവാവ് അറസ്റ്റില്‍
ബ്യൂട്ടി പാര്‍ലറിന്റെ മറവില്‍ അനധികൃത ചിട്ടി ഇടപാട്; യുവാവ് അറസ്റ്റില്‍
