വ്യാജ സര്‍ട്ടിഫിക്കറ്റുകാര്‍ക്കെതിരേ നടപടി വരും
കഴിഞ്ഞ ആറ് മാസത്തിനിടെ വിവിധ രാജ്യങ്ങളിലെ താമസക്കാര്‍ അറ്റസ്റ്റേഷനായി സമര്‍പ്പിച്ച 5,248 എഞ്ചിനീയറിംഗ് സര്‍ട്ടിഫിക്കറ്റുകളില്‍ 4,320 സര്‍ട്ടിഫിക്കറ്റുകള്‍ പരിശോധിച്ചു കഴിഞ്ഞതായി അധികൃതരെ ഉദ്ധരിച്ച് അല്‍ ഖബസ് പത്രം റിപ്പോര്‍ട്ട് ചെയ്തു. പരിശോധിച്ചവയില്‍ ഏഴ് സര്‍ട്ടിഫിക്കറ്റുകള്‍ വ്യാജമായി നിര്‍മിച്ചവയാണെന്ന് കണ്ടെത്തിയതായും അധികൃതര്‍ വ്യക്തമാക്കി. വ്യാജ സര്‍ട്ടിഫിക്കറ്റില്‍ നാലെണ്ണം ഇന്ത്യന്‍ പൗരന്മാരായ പ്രവാസികളുടേതായിരുന്നു. വെനസ്വേല, ജോര്‍ദാന്‍, ഈജിപ്ത് എന്നിവിടങ്ങളില്‍ നിന്നുള്ളവരുടെതാണ് ബാക്കി മൂന്നെണ്ണം. ബാക്കി സര്‍ട്ടിഫിക്കറ്റുകളുടെ പരിശോധന തുടരുകയാണെന്നും പത്രം റിപ്പോര്‍ട്ട് ചെയ്തു. വ്യാജ എഞ്ചിനീയറിംഗ് സര്‍ട്ടിഫിക്കറ്റുകളുണ്ടായി ജോലിയില്‍ പ്രവേശിച്ച ഏഴു പേര്‍ക്കെതിരേ നടപടികള്‍ ആരംഭിച്ചതായും അധികൃതര്‍ അറിയിച്ചു. ജോലിയില്‍ നിന്ന് പിരിച്ചുവിടുകയും കുവൈറ്റില്‍ നിന്ന് നാടുകടത്തുകയും ചെയ്യുന്നത് ഉള്‍പ്പെടെയുള്ള നടപടികളാണ് ഇവര്‍ക്കെതിരേ കൈക്കൊള്ളുക. അതോടൊപ്പം വ്യാജ സര്‍ട്ടിഫിക്കറ്റില്‍ ഇവര്‍ക്ക് എഞ്ചിനീയര്‍മാരായി ജോലി ചെയ്യുന്നതിനുള്ള റിക്രൂട്ട്മെന്റ് വിസ നല്‍കിയവര്‍ക്കെതിരേയും നടപടിയുണ്ടാവും. കുവൈറ്റില്‍ എഞ്ചിനീയര്‍മാരായി ജോലി ചെയ്യുന്ന മുഴുവന്‍ പ്രവാസികളുടെയും സര്‍ട്ടിഫിക്കറ്റുകള്‍ പരിശോധനയ്ക്ക് വിധേയമാക്കി വരികയാണെന്നും അക്കാര്യത്തില്‍ പഴയ ജീവനക്കാര്‍ എന്നോ പുതിയ ജീവനക്കാര്‍ എന്നോ വ്യത്യാമസമില്ലെന്നും അധികൃതര്‍ അറിയിച്ചു.
ഇന്ത്യന്‍ എഞ്ചിനീയര്‍മാര്‍ക്ക് രജിസ്‌ട്രേഷന്‍ ഡ്രൈവ്
കുവൈറ്റിലെ ഇന്ത്യന്‍ എംബസി ഇന്ത്യന്‍ എഞ്ചിനീയര്‍മാര്‍ക്കായി പുതിയ രജിസ്‌ട്രേഷന്‍ ഡ്രൈവ് ആരംഭിച്ചു. കുവൈറ്റില്‍ ജോലി ചെയ്യുന്ന ഇന്ത്യന്‍ എഞ്ചിനീയര്‍മാരില്‍ ഒരു വിഭാഗത്തിന് കുവൈറ്റ് സൊസൈറ്റി ഓഫ് എഞ്ചിനീയേഴ്സില്‍ നിന്ന് നോ ഒബ്ജക്ഷന്‍ സര്‍ട്ടിഫിക്കറ്റ് ലഭിക്കാത്തതുമായി ബന്ധപ്പെട്ട പ്രശ്‌നപരിഹാരത്തിന്‍റെ ഭാഗമായാണ് നടപടിയെന്നാണ് റിപ്പോര്‍ട്ട്. 2020 സെപ്റ്റംബറിലാണ് കുവൈറ്റില്‍ ഇന്ത്യന്‍ എഞ്ചിനീയര്‍മാരുടെ രജിസ്‌ട്രേഷന്‍ അവസാനമായി നടന്നത്. നിലവില്‍ ഇന്ത്യയില്‍ നിന്നുള്ള എഞ്ചിനീയറിംഗ് ബിരുദധാരികള്‍ ഇന്ത്യയിലെ നാഷണല്‍ ബോര്‍ഡ് ഓഫ് അക്രഡിറ്റേഷന്‍റെ അംഗീകാരമുള്ള സ്ഥാപനങ്ങളില്‍ പഠിച്ചവരായിരിക്കണമെന്നതാണ് കുവൈറ്റിലെ നിബന്ധന. എന്നാല്‍, ഇന്ത്യയിലെ ഭൂരിപക്ഷം എഞ്ചിനീയറിംഗ് കോളജുകള്‍ക്കും എന്‍ബിഎ അംഗീകാരമില്ല. ഇതാണ് പ്രശ്‌നത്തിന് കാരണം. ഇതുകാരണം വര്‍ഷങ്ങളായി കുവൈറ്റില്‍ ജോലി ചെയ്തിരുന്ന നൂറുക്കണക്കിന് മലയാളി എഞ്ചിനീയര്‍മാരുടെ ഉള്‍പ്പെടെയുള്ളവരുടെ അപേക്ഷകള്‍ എന്‍ഒസി നല്‍കാതെ കുവൈറ്റ് സൊസൈറ്റി ഓഫ് എഞ്ചിനിയേഴ്‌സ് തള്ളിയിരുന്നു. എന്നാല്‍, റഫറന്‍സ് ആവശ്യങ്ങള്‍ക്ക് ആവശ്യമായ നഡാറ്റാബേസ് പുതുക്കുകയാണ് രജിസ്‌ട്രേഷന്‍ ഡ്രൈവിലൂടെ ലക്ഷ്യമിടുന്നതെന്ന് എംബസി അധികൃതര്‍ അറിയിച്ചു. നേരത്തെ രജിസ്റ്റര്‍ ചെയ്തവര്‍ ഉള്‍പ്പെടെ കുവൈറ്റിലെ എല്ലാ ഇന്ത്യന്‍ എഞ്ചിനീയര്‍മാരും ഓണ്‍ലൈനില്‍ പുതുതായി രജിസ്റ്റര്‍ ചെയ്യണമെന്ന് എംബസി നിര്‍ദ്ദേശിച്ചു. ഈ മാസം 22 ആണ് അവസാന തിയതി.
ഇന്ത്യന്‍ സര്‍ക്കാര്‍ ഇടപെടണമെന്ന് ആവശ്യം
കുവൈറ്റിലെ ഇന്ത്യന്‍ എഞ്ചിനീയേഴ്സ് ഫോറത്തിന്‍റെ കണക്കനുസരിച്ച്, കുവൈറ്റില്‍ ജോലി ചെയ്യുന്ന ഏകദേശം 12,000 ഇന്ത്യന്‍ എഞ്ചിനീയര്‍മാര്‍ എന്‍ഒസി ലഭിക്കാതെ പ്രതിസന്ധിയിലായിട്ടുണ്ട്. ഒരു മാസത്തിനിടെ 800 എഞ്ചിനീയര്‍മാരുടെ എന്‍ഒസി അപേക്ഷകള്‍ കുവൈറ്റ് അധികൃതര്‍ നിരസിച്ചിരുന്നു. എന്‍ബിഎ രൂപീകരിക്കുന്നതിന് മുമ്പ് തന്നെ എന്‍ജിനീയറിംഗ് കോളജുകളില്‍ നിന്ന് ബിരുദം നേടിയവരാണ് ഇവരില്‍ പലരും. ഇക്കാര്യത്തില്‍ ഇന്ത്യന്‍ സര്‍ക്കാറിന്‍റെ ഇടപെടല്‍ ആവശ്യമാണെന്നാണ് എഞ്ചിനീയേഴ്സ് ഫോറം അധികൃതരുടെ ആവശ്യം. എഐസിടിഇ, ഐഐടി, എന്‍ഐടി തുടങ്ങിയ പ്രീമിയം എന്‍ജിനീയറിംഗ് സ്ഥാപനങ്ങള്‍ അംഗീകരിച്ച ഏതെങ്കിലും എന്‍ജിനീയറിംഗ് കോളജുകളില്‍ നിന്നോ സര്‍വകലാശാലകളില്‍ നിന്നോ നല്‍കുന്ന മുഴുവന്‍ സമയ എന്‍ജിനീയറിംഗ് ബിരുദത്തിന് എന്‍ബിഎ അക്രഡിറ്റേഷന്‍ ആവശ്യമില്ലെന്ന് കുവൈറ്റ് സര്‍ക്കാരിനെ അറിയിക്കണമെന്നും അവര്‍ പറയുന്നു.
Video-മന്ത്രിയുടെ വാക്കുകൾ അനുസരിച്ച് ബ്രസീൽ ആരാധകർ
മന്ത്രിയുടെ വാക്കുകൾ അനുസരിച്ച് ബ്രസീൽ ആരാധകർ
