ഫലസ്തീനികളോടുള്ള അനീതി ഇനിയും തുടര്‍ന്നുകൂടാ; പ്രത്യേക രാജ്യം അനുവദിക്കണം: അറബ്- ചൈന ഉച്ചകോടിയില്‍ ഷി ജിന്‍പിംഗ്

​ചൈനയുമായുള്ള ബന്ധത്തില്‍ പുതിയ അധ്യായം

ചൈനയുമായുള്ള സഹകരണത്തിന്റെ തോത് വര്‍ധിപ്പിക്കാന്‍ അറബ് രാജ്യങ്ങള്‍ പരിശ്രമിക്കുന്നുണ്ടെന്നും അവരുടെ പങ്കാളിത്തത്തില്‍ പുതിയ ഘട്ടത്തിനായി കാത്തിരിക്കുകയാണെന്നും സൗദി കിരീടാവകാശി പറഞ്ഞു. വെള്ളിയാഴ്ച റിയാദില്‍ നടന്ന സഹകരണത്തിനും വികസനത്തിനുമുള്ള അറബ്-ചൈനീസ് ഉച്ചകോടി ഉദ്ഘാടനം ചെയ്യുകയായിരുന്നു അദ്ദേഹം. അറബ് രാജ്യങ്ങളും ചൈനയും തമ്മിലുള്ള പങ്കാളിത്തം കൂടുതല്‍ ശക്തിപ്പെടുത്തേണ്ടതിന്റെ ആവശ്യകത കിരീടാവകാശി ചൂണ്ടിക്കാട്ടി. അറബ്- ചൈനീസ് ബന്ധം പരസ്പര ബഹുമാനത്തിലും സഹകരണത്തിലും അധിഷ്ഠിതമാണെന്ന് ചൈനീസ് പ്രസിഡന്റ് ഷി ജിന്‍പിങ്ങിനെയും അറബ് നേതാക്കളെയും സാക്ഷിനിര്‍ത്തി കിരീടാവകാശി പറഞ്ഞു. പ്രാദേശികവും ആഗോളവുമായ സ്ഥിരതയ്ക്കായി ചൈനയുമായുള്ള സഹകരണം ശക്തിപ്പെടുത്താന്‍ തന്റെ രാജ്യം പ്രവര്‍ത്തിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു.

​അറബ് രാജ്യങ്ങളുമായി സമഗ്ര സഹകരണം ലക്ഷ്യം

ചൈനയുടെയും അറബ് രാജ്യങ്ങളുടെയും ശോഭനമായ ഭാവിയിലേക്ക് ഉച്ചകോടി നയിക്കുമെന്ന് ഷി പ്രത്യാശ പ്രകടിപ്പിച്ചു. ചൈനീസ്- അറബ് പരസ്പര താല്‍പര്യങ്ങള്‍ നിറവേറ്റുന്നതിനായി അറബ് രാജ്യങ്ങളുമായി സമഗ്രമായ സഹകരണമാണ് ചൈന തേടുന്നതെന്നും അദ്ദേഹം പറഞ്ഞു. മേഖലയിലെ സുസ്ഥിരത നിലനിര്‍ത്തേണ്ടതിന്റെ പ്രാധാന്യത്തെക്കുറിച്ചും ചൈനീസ് പ്രസിഡന്റ് സംസാരിച്ചു. മേഖലയിലെ അടിയന്തര വിഷയങ്ങളില്‍ രാഷ്ട്രീയ പരിഹാരങ്ങള്‍ കൈവരിക്കാനുള്ള അറബ് ശ്രമങ്ങളെ ചൈന പിന്തുണയ്ക്കുന്നുവെന്നും കൂട്ടിച്ചേര്‍ത്തു. ഇസ്ലാമോഫോബിയയെയും തീവ്രവാദത്തെയും നേരിടണമെന്ന് പറഞ്ഞ ഷി, തീവ്രവാദത്തെ ഒരു പ്രത്യേക മതവുമായോ വംശവുമായോ ബന്ധപ്പെടുത്തരുതെന്നും പറഞ്ഞു.

​സൗദിയും ചൈനയും 46 കരാറുകളില്‍ ഒപ്പുവച്ചു

ചൈനീസ് പ്രസിഡന്റ് ഷി ജിന്‍പിംഗിന്റെ സന്ദര്‍ശനത്തിനിടെ സൗദി അറേബ്യയും ചൈനയും ആകെ 46 കരാറുകളും ധാരണാപത്രങ്ങളും ഒപ്പുവെച്ചു. ഹൈഡ്രജന്‍ ഊര്‍ജം, നീതിന്യായം, ചൈനീസ് ഭാഷാ പഠനം, പാര്‍പ്പിടം, നിക്ഷേപം, റേഡിയോ, ടെലിവിഷന്‍, ഡിജിറ്റല്‍ ഇക്കോണമി, സാമ്പത്തിക വളര്‍ച്ച, വാര്‍ത്താ കവറേജ്, നികുതി മാനേജ്മെന്റ്, അഴിമതി വിരുദ്ധ പോരാട്ടം, സ്റ്റാന്‍ഡേര്‍ഡൈസേഷന്‍ എന്നീ മേഖലകളില്‍ ചൈനയും സൗദി അറേബ്യയും ഗവണ്‍മെന്റ് തലത്തില്‍ 12 കരാറുകളും ധാരണാപത്രങ്ങളുമാണ് ഒപ്പുവെച്ചത്. ഇരു രാജ്യങ്ങളിലെയും സര്‍ക്കാര്‍ വകുപ്പുകളും സ്വകാര്യ മേഖലയും തമ്മില്‍ ഒമ്പതു കരാറുകളും ധാരണാപത്രങ്ങളും സൗദിയിലെയും ചൈനയിലെയും സ്വകാര്യ കമ്പനികള്‍ തമ്മില്‍ 25 കരാറുകളും ധാരണാപത്രങ്ങളും ഒപ്പുവെച്ചു.

​ചൈനീസ് പ്രസിഡന്റ് പങ്കെടുത്തത് മൂന്ന് ഉച്ചകോടിയില്‍

അറബ്- ചൈന ഉച്ചകോടിക്കു പുറമെ, സൗദി- ചൈന ഉച്ചകോടിയിലും ഗള്‍ഫ്- ചൈന ഉച്ചകോടിയിലും ചൈനീസ് പ്രസിഡന്റ് പങ്കെടുത്തു. ചൈനയും ഗള്‍ഫ് രാജ്യങ്ങളുമായുള്ള സഹകരണത്തില്‍ ഒരു പുതിയ ചരിത്ര ഘട്ടത്തിന് ചൈനീസ്-ഗള്‍ഫ് ഉച്ചകോടിയോടെ അടിത്തറയിടുകയാണെന്ന് റിയാദിലെ കിംഗ് അബ്ദുല്‍ അസീസ് ഇന്റര്‍നാഷണല്‍ കോണ്‍ഫറന്‍സ് സെന്ററില്‍ നടന്ന സൗദി കിരീടാവകാശി പറഞ്ഞു. എല്ലാ മേഖലകളിലും ഇരുപക്ഷവും തമ്മിലുള്ള ബന്ധം ശക്തിപ്പെടുത്തുന്നതിന്റെ വിവിധ വശങ്ങള്‍ ഉച്ചകോടികള്‍ ചര്‍ച്ച ചെയ്തു. അറബ് മേഖലയിലെ വിവിധ രാഷ്ട്രത്തലവന്‍മാരും പ്രതിനിധികളും ഉച്ചകോടിയില്‍ പങ്കെടുത്തു. മൂന്ന് ദിവസത്തെ ഔദ്യോഗിക സന്ദര്‍ശനത്തിനായി ബുധനാഴ്ചയാണ് ചൈനീസ് പസിഡന്റ് ഷി ജിന്‍പിംഗ് സൗദി അറേബ്യയിലെത്തിയത്.

Video-മെസിയെ വിലക്കാൻ ഒരുങ്ങി ഒരു രാജ്യം | messi