എന്തുകൊണ്ട് ഭുപേന്ദ്ര പട്ടേല്‍?

ഗുജറാത്തില്‍ നിര്‍ണായക വോട്ട് ബാങ്കായ പാട്ടീദാര്‍ സമുദായത്തില്‍ നിന്നുള്ളയാളെ അടുത്ത മുഖ്യമന്ത്രി സ്ഥാനത്തേക്ക് പരിഗണിക്കുമെന്ന ഊഹാപോഹങ്ങള്‍ പ്രചരിച്ചപ്പോള്‍ കേന്ദ്ര മന്ത്രി മന്‍സുഖ് മാണ്ഡവ്യ, ലക്ഷദ്വീപ് അഡ്മിസ്ട്രേറ്റര്‍ പ്രഫുല്‍ പട്ടേല്‍, ഉപമുഖ്യമന്ത്രിയായിരുന്ന നിതിന്‍ പട്ടേല്‍ എന്നിവരുടെ പേരുകളാണ് വ്യാപകമായി ഉയര്‍ന്ന് വന്നിരുന്നത്. എന്നാല്‍ ആ പേരുകളെല്ലാം ഒഴിവാക്കിയായിരുന്നു ബിജെപി കേന്ദ്ര നേതൃത്വം ഭുപേന്ദ്ര പട്ടേലിനെ തെരഞ്ഞെടുത്തത്.

എംഎല്‍എ ആയി ആദ്യ ടേമില്‍ തന്നെ മുഖ്യമന്ത്രി കസേരയിലേക്കെത്തുകയായിരുന്നു ഭൂപേന്ദ്ര.

ഭുപേന്ദ്ര പട്ടേലിന്‍റെ ഈ വളര്‍ച്ച ബിജെപിക്കുള്ളില്‍ തന്നെ വലിയ ചര്‍ച്ചയായിരുന്നു. മുന്‍ മുഖ്യമന്ത്രിയായിരുന്ന ആനന്ദിബെന്‍ പട്ടേലിന്‍റെ വിശ്വസ്തന്‍, സിവില്‍ എഞ്ചിനിയീറിങ്ങില്‍ ഡിപ്ലോമ നേടിയ അദ്ദേഹം ഗുജറാത്തിന്‍റെ മുഖഛായ മാറ്റുമെന്നായിരുന്നു ബിജെപിയുടെ വാഗ്ദാനം. കൊവിഡ് കാലത്ത് നിഷ്ക്രിയമായ ഒരു സര്‍ക്കാരായിരുന്നു ഗുജറാത്തില്‍ എന്നായിരുന്നു വിജയ് രൂപാണിക്കെതിരായ പ്രധാന വിമര്‍ശനങ്ങളിലൊന്ന്. എന്നാല്‍ ഭുപേന്ദ്ര പട്ടേലിന് മികച്ച സംഘാടക ശേഷിയാണെന്നും ബിജെപി സംസ്ഥാന ഘടകവുമായി ചേര്‍ന്ന് ഗുജറാത്തിന്‍റെ വികസനം മികച്ച രീതിയിലാണ് അദ്ദേഹം മുന്നോട്ട് കൊണ്ടു പോകുന്നതെന്ന് കഴിഞ്ഞ ഒരു വര്‍ഷം കൊണ്ട് തെളിയിച്ചെന്നും ബിജെപി വ്യത്തങ്ങള്‍ ചൂണ്ടിക്കാട്ടുന്നു.

മോദിയെ പൊട്ടിച്ച് ഭുപേന്ദ്ര പട്ടേല്‍



2,12,480 വോട്ടുകള്‍ നേടി വ്യക്തമായ ഭൂരിപക്ഷത്തോടെയാണ് ഭുപേന്ദ്ര പട്ടേല്‍ രണ്ടാം തവണയും മുഖ്യമന്ത്രിയാകുന്നത്. ഗുജറാത്ത് തെരഞ്ഞെടുപ്പ് ഫലം വന്നതിന് പിന്നാലെ തന്‍റെ ഭൂരിപക്ഷം ഭുപേന്ദ്ര പട്ടേല്‍ മറികടന്നതിലുള്ള സന്തോഷം പ്രധാനമന്ത്രി നരേന്ദ്രമോദി ഡല്‍ഹിയില്‍ പങ്കുവെച്ചു. രണ്ട് ലക്ഷത്തിലധികം വോട്ടുകളുടെ ഭൂരിപക്ഷത്തില്‍ വിജയിക്കുകയെന്നത് റെക്കോഡ് വിജയമാണെന്നും ലോകസഭ സീറ്റുകളില്‍ പോലും അത്രയും വോട്ടുകള്‍ കിട്ടില്ലെന്നും മോദി പറഞ്ഞു. കണ്ടാല്‍ അദ്ദേഹം വളരെ ലളിതനാണെന്ന് തോന്നും. പക്ഷേ അദ്ദേഹത്തിന്‍റെ തീരുമാനങ്ങളെടുക്കാനുള്ള കഴിവ് മികച്ചതാണെന്ന് തെരഞ്ഞെടുപ്പ് ഫലം വന്നതിന് പിന്നാലെ ബിജെപി നേതാവ് മുകേഷ് ദീക്ഷിത് പ്രതികരിച്ചു.

കോണ്‍ഗ്രസ് വക്താവും രാജ്യസഭ എംപിയുമായ ആമി യാഗ്നിക്കിന് കനത്ത പരാജയമാണ് ഘട്ലോദിയ മണ്ഡലത്തില്‍ നേരിട്ടത്. കോണ്‍ഗ്രസിനേക്കാള്‍ 1.92 ലക്ഷം വോട്ടുകള്‍ ഭൂരിപക്ഷത്തോടെയായിരുന്നു ഭുപേന്ദ്ര പട്ടേല്‍ ഘട്ലോതയില്‍ വിജയിച്ചത്. ആമി യാഗ്നിക്കിന് 20,418 വോട്ടുകള്‍ മാത്രമാണ് നേടാന്‍ കഴിഞ്ഞത്. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയുടെ നേതൃത്വത്തിലായിരുന്നു പ്രചാരണം. ഭാരത് ജോഡോ യാത്രക്കിടെ രാഹുല്‍ ഗാന്ധിയും ഗുജറാത്ത് തെരഞ്ഞടുപ്പ് പ്രചാരണത്തില്‍ പങ്കെടുത്തിരുന്നു. എന്നാല്‍ കാര്യമായ ചലനം ഗുജറാത്തില്‍ കോണ്‍ഗ്രസിനുണ്ടാക്കാന്‍ സാധിച്ചില്ല. അതേസമയം എഎപിയുടെ ശക്തമായ സാന്നിധ്യം ഇത്തവണ കോണ്‍ഗ്രസിനെ ദുര്‍ബലമാക്കി. ഡല്‍ഹിക്കും പഞ്ചാബിനും ശേഷം ഗുജറാത്തിലേക്ക് കടക്കുന്ന എഎപിയുടെ രാഷ്ട്രീയ വളര്‍ച്ച അവിശ്വസനീയമാണ്. മുഖ്യമന്ത്രി ഭുപേന്ദ്ര പട്ടേലിനെതിരെ മത്സരിച്ച എഎപി സ്ഥാനാര്‍ഥി വിജയ് പട്ടേല്‍ മൂന്നാം സ്ഥാനത്തെങ്കിലും 15,470 വോട്ടുകള്‍ നേടാനായി.

ജനവിധി അംഗീകരിക്കുന്നു



ഗുജറാത്തിന്‍റെ വികസനത്തെയാണ് ജനങ്ങള്‍ തെരഞ്ഞെടുത്തതെന്നും മോദിയുടെ വിജയമാണ് ഈ വിജയമെന്നും തെരഞ്ഞെടുപ്പ് ഫലം വന്നതിന് പിന്നാലെ ഭുപേന്ദ്ര പട്ടേല്‍ പ്രതികരിച്ചു. കട്വ പട്ടീദാര്‍ സമുദായംഗമാണ് 60 കാരനായ ഭുപേന്ദ്ര പട്ടേല്‍. ഗുജറാത്തില്‍ നിര്‍ണായക രാഷ്ട്രീയ സ്വാധീനമുള്ള വിഭാഗമാണ് പാട്ടീദാര്‍ സമുദായം. ഗുജറാത്തില്‍ ബിജെപിക്ക് തുടര്‍ച്ചയായ വിജയം നല്‍കുന്നതില്‍ പാട്ടീദാര്‍ സമുദായം പ്രധാന പങ്ക് വഹിച്ചിട്ടുണ്ടെന്നാണ് വിലയിരുത്തല്‍. മുന്‍പ് സര്‍ദാര്‍ ധാം, വിശ്വ ഉമിയ ഫൗണ്ടേഷന്‍ എന്നീ പട്ടീദാർ സംഘടനകളുടെ ട്രസ്റ്റിയായിരുന്നു അദ്ദേഹം. 1999-2000 കാലത്ത് മേംനഗര്‍ മുന്‍സിപ്പാലിറ്റി അധ്യക്ഷനായിരുന്നു. 2008-2010 വര്‍ഷങ്ങളില്‍ എഎംസി സ്കൂള്‍ ബോര്‍ഡ് വൈസ് ചെയര്‍മാനുമായിരുന്നു. 2010-15 ല്‍ തല്‍തേജ് വാര്‍ഡില്‍ നിന്നുള്ള കൗണ്‍സിലറായും അദ്ദേഹം പ്രവര്‍ത്തിച്ചിട്ടുണ്ട്.

2017ലാണ് ഭുപേന്ദ്ര പട്ടേല്‍ ആദ്യമായി നിയമസഭ സ്ഥാനാര്‍ഥിയായി മത്സരത്തിനിറങ്ങുന്നത്. മുന്‍ മുഖ്യമന്ത്രിയായിരുന്ന ആനന്ദിബെന്‍ പട്ടേലിന് ശേഷം മണ്ഡലത്തില്‍ നിന്നും ബിജെപി ടിക്കറ്റില്‍ മത്സരിക്കാന്‍ അവസരം ലഭിച്ചത് അദ്ദേഹത്തിനായിരുന്നു. 1.17 ലക്ഷം വോട്ടുകള്‍ നേടിയായിരുന്നു കോണ്‍ഗ്രസിന്‍റെ ശക്തികാന്ത് ഭുരാഭായിയെ ഭുപേന്ദ്ര പട്ടേല്‍ തോല്‍പ്പിക്കുന്നത്. ഇന്ന് 24 ശതമാനം വോട്ടുകള്‍ മാത്രമാണ് കോണ്‍ഗ്രസ് സ്ഥാനാര്‍ഥിക്ക് നേടാനായത്.

ഭുപേന്ദ്രയുടെ സ്വന്തം ഘട്ലോദിയ



2012 ലാണ് ഘട്ലോദിയ മണ്ഡലം രൂപീകരിക്കുന്നത്. മുന്‍പ് ശാര്‍ഖേജ് മണ്ഡലത്തിന്‍റെ ഭാഗമായിരുന്നു ഘട്ലോദിയ. 3.70 ലക്ഷം വോട്ടര്‍മാരാണ് മണ്ഡലത്തിലുള്ളത്. പാട്ടീദാര്‍ (പട്ടേല്‍), റാബറി സമുദായത്തിനാണ് മണ്ഡലത്തില്‍ പ്രാമുഖ്യം. തെര‍ഞ്ഞെടുപ്പ് നടന്ന മൂന്ന് തവണയും മണ്ഡലം ബിജെപിക്കൊപ്പമായിരുന്നു. ബിജെപി സ്ഥാനാര്‍ഥികളായി മത്സരിച്ച രണ്ട് പേരും ഗുജറാത്ത് മുഖ്യമന്ത്രിയായിട്ടുണ്ടെന്നാണ് മണ്ഡലത്തിന്‍റെ പ്രത്യേകത. 2012-ല്‍ ആനന്ദിബെന്‍ പട്ടേല്‍ കോണ്‍ഗ്രസിന്‍റെ ശക്തികാന്തിനെ 74.1 ശതമാനം വോട്ടുകള്‍ നേടിയാണ് ഗുജറാത്ത് നിയമസഭയിലേക്ക് വിജയിച്ചത്. 2017-ല്‍ ഭുപേന്ദ്ര പട്ടേല്‍ കോണ്‍ഗ്രസിന്‍റെ ശക്തികാന്തിനെ തോല്‍പ്പിച്ചാണ് മണ്ഡലത്തില്‍ നിന്നും വിജയിച്ചത്. തുടര്‍ന്ന് 2021 സെപ്റ്റംബറില്‍ വിജയ് രൂപാണി സര്‍ക്കാര്‍ രാജിവെച്ചപ്പോള്‍ മുഖ്യമന്ത്രി സ്ഥാനത്തേക്ക് ഭുപേന്ദ്ര പട്ടേലിലെ തെരഞ്ഞെടുക്കുകയായിരുന്നു. 2015-ല്‍ പട്ടേല്‍ വിഭാഗത്തിന് സംവരണം വേണമെന്ന് ആവശ്യപ്പെട്ട് ഗുജറാത്തില്‍ ബിജെപി വലിയ പ്രതിഷേധം നേരിട്ടിരുന്നെങ്കിലും ഘട്ലോദിയ ബിജെപിയെ തെരഞ്ഞെടുപ്പില്‍ കൈവിട്ടില്ല. അന്ന് ബിജെപിക്കെതിരെ പ്രതിഷേധം നയിച്ചിരുന്ന ഹാര്‍ദിക് പട്ടേല്‍ ഇന്ന് ബിജെപിയുടെ ഭാഗമാണ്.