തൊഴില്‍ സ്ഥാപനം കരാര്‍ അപ്ലോഡ് ചെയ്യണം
സ്വകാര്യ മേഖലാ തൊഴിലാളികളുടെ തൊഴില്‍ കരാറുകള്‍ രജിസ്റ്റര്‍ ചെയ്യാന്‍ തൊഴിലാളിയുമായി കരാറില്‍ ഏര്‍പ്പെടുന്ന സ്ഥാപനം ആദ്യം ഖിവ പോര്‍ട്ടലില്‍ തൊഴില്‍ കരാര്‍ രജിസ്റ്റര്‍ ചെയ്യണം. ഇതിനായി ആദ്യം ഖിവാ പ്ലാറ്റ്ഫോമില്‍ പ്രവേശിച്ച് സ്ഥാപനത്തിന്റെ അക്കൗണ്ട് തെരഞ്ഞെടുക്കണം. പ്ലാറ്റ്ഫോമില്‍ നിന്ന് ഇലക്ട്രോണിക് സേവനങ്ങള്‍, കരാര്‍ ഡോക്യുമെന്‍റേഷന്‍ എന്നിവ തെരഞ്ഞെടുത്ത ശേഷം രജിസ്റ്റര്‍ ചെയ്ത മൊബൈല്‍ ഫോണില്‍ ലഭിക്കുന്ന ഒടിപി നല്‍കണം. തുടര്‍ന്ന്, പുതിയ കരാര്‍ തയ്യാറാക്കല്‍ എന്ന മെനു തെരഞ്ഞെടുത്ത ശേഷം തൊഴിലാളിയുമായും തൊഴില്‍ കരാറുമായും ബന്ധപ്പെട്ട വിവരങ്ങള്‍ നല്‍കണം. ഇവ പൂര്‍ണമായും നല്‍കിയ ശേഷം സബ്മിറ്റ് ബട്ടണ്‍ ക്ലിക്ക് ചെയ്താല്‍ കരാര്‍ രജിസ്റ്റര്‍ ചെയ്യുന്ന നടപടി പൂര്‍ത്തിയാകും. തൊഴിലാളി കൂടി പോര്‍ട്ടല്‍ വഴി കരാറിന് അംഗീകാരം നല്‍കിയാല്‍ മാത്രമേ അത് നിലവില്‍ വരികയുള്ളൂ.
ജീവനക്കാരന്‍ കരാര്‍ പരിശോധിച്ച് അംഗീകരിക്കണം
കരാറില്‍ ഏര്‍പ്പെടുന്ന തൊഴിലാളികളാവട്ടെ, ഖിവ പ്ലാറ്റ്ഫോമിലെ തങ്ങളുടെ വ്യക്തിഗത അക്കൗണ്ടില്‍ പ്രവേശിച്ച് തൊഴില്‍ കരാറുകള്‍ എന്ന ഐക്കണില്‍ ക്ലിക്ക് ചെയ്താല്‍ രജിസ്റ്റര്‍ ചെയ്ത മൊബൈല്‍ ഫോണിലേക്ക് ഒടിപി ലഭിക്കും. ഈ ഒടിപി നല്‍കി തൊഴില്‍ ഓഫര്‍ എന്ന ഐക്കണില്‍ ക്ലിക്ക് ചെയ്യണം. കരാര്‍ പരിശോധിച്ച ശേഷം അത് അംഗീകരിക്കുകയോ നിരാകരിക്കുകയോ കരാറില്‍ ഭേദഗതി ആവശ്യപ്പെടുകയോ ചെയ്യാന്‍ തൊഴിലാളിക്ക് അവകാശമുണ്ടെന്നും മാനവശേഷി, സാമൂഹിക വികസന മന്ത്രാലയം അറിയിച്ചു. കരാര്‍ ഡോക്യുമെന്‍റേഷന്‍ മുതല്‍ കരാര്‍ ബന്ധം അവസാനിക്കുന്നതു വരെ സ്ഥാപനവും തൊഴിലാളികളും തമ്മിലുള്ള കരാര്‍ ബന്ധം കൈകാര്യം ചെയ്യുന്നതിനുള്ള ഉത്തരവാദിത്തം മന്ത്രാലയത്തെ ഏല്‍പ്പിക്കുന്നതിനുള്ള മന്ത്രിസഭയുടെ പ്രമേയത്തിന് അനുസൃതമായാണ് പദ്ധതിയെന്നും മന്ത്രാലയം ചൂണ്ടിക്കാട്ടി.
തൊഴിലാളുകളുടെയും തൊഴിലുടമകളുടെയും സംരക്ഷണം ലക്ഷ്യം
രാജ്യത്തെ സ്വകാര്യ മേഖലയിലെ തൊഴിലാളികള്‍ക്കും തൊഴിലുടമകള്‍ക്കും സംരക്ഷണം നല്‍കുകയും വേതന വിതരണവുമായി ബന്ധപ്പെട്ട നിയമങ്ങള്‍ കൃത്യമായി പാലിക്കപ്പെടുന്നുണ്ടെന്ന് ഉറപ്പു വരുത്തുകയും ചെയ്യുക വഴി രാജ്യത്തെ തൊഴില്‍ വിപണിയുടെ ആകര്‍ഷണീയത വര്‍ധിപ്പിക്കുകയാണ് തൊഴില്‍ കരാറുകള്‍ ഖിവാ പ്ലാറ്റ്ഫോം വഴി ഓണ്‍ലൈനായി രജിസ്റ്റര്‍ ചെയ്യണമെന്ന വ്യവസ്ഥ നടപ്പിലാക്കുന്നതിലൂടെ ലക്ഷ്യമിടുന്നതെന്ന് മാനവശേഷി, സാമൂഹിക വികസന മന്ത്രാലയം അറിയിച്ചു. മാനവശേഷി, സാമൂഹിക വികസന മന്ത്രാലയം മുഴുവന്‍ സര്‍ക്കാര്‍ വകുപ്പുളുമായും സഹകരിച്ചാണ് ബിസിനസ് മേഖലക്കുള്ള ഏകീകൃത പ്ലാറ്റ്ഫോം ആയ ഖിവ വഴി തൊഴില്‍ കരാര്‍ രജിസ്ട്രേഷന് എളുപ്പമാക്കാനും ജീവനക്കാരെ ജനറല്‍ ഓര്‍ഗനൈസേഷന്‍ ഫോര്‍ സോഷ്യല്‍ ഇന്‍ഷുറന്‍സില്‍ രജിസ്റ്റര്‍ ചെയ്യാനും നടപടികള്‍ ആവിഷ്‌കരിച്ചിരിക്കുന്നത്.
Video-മെസിയെ വിലക്കാൻ ഒരുങ്ങി ഒരു രാജ്യം | messi
മെസിയെ വിലക്കാൻ ഒരുങ്ങി ഒരു രാജ്യം | messi
