UAE og (4)
തീരുമാനം അടത്ത വര്‍ഷം ജൂണ്‍ ഒന്ന് മുതല്‍
2023 ജൂണ്‍ ഒന്നിനോ അതിന് ശേഷമോ ആരംഭിക്കുന്ന സാമ്പത്തിക വര്‍ഷം മുതല്‍ യുഎഇയിലെ ബിസിനസുകള്‍ക്ക് കോര്‍പറേറ്റ് നികുതി ബാധകമാകും. ചെറുകിട, ഇടത്തരം സംരംഭങ്ങള്‍ക്കും സ്റ്റാര്‍ട്ടപ്പുകള്‍ക്കും പിന്തുണ നല്‍കുന്നതിനും സമ്പദ്വ്യവസ്ഥയെ കൂടുതല്‍ മത്സരക്ഷമമാക്കുന്നതിനുമായാണ് 375,000 ദിര്‍ഹം എന്ന ഉയര്‍ന്ന ലാഭ പരിധി നിര്‍ണിയിച്ചിരിക്കുന്നതെന്ന് അധികൃതര്‍ വ്യക്തമാക്കി. ബിസിനസിന്റെ മൊത്തം വിറ്റുവരവിന്‍റെ അടിസ്ഥാനത്തിലല്ല നികുതി നല്‍കേണ്ട വരുമാനത്തിന്‍റെ പരിധി നിര്‍ണയിച്ചിരിക്കുന്നത്. മറിച്ച് കമ്പനിയുടെ ലാഭം 3.75 ലക്ഷം ദിര്‍ഹം എത്തിയാല്‍ മാത്രമേ നികുതി നല്‍കേണ്ടതുള്ളൂ എന്നും അധികൃതര്‍ വ്യക്തമാക്കി.
നികുതി ബാധകമല്ല, ആര്‍ക്കൊക്കെ?
വ്യക്തികളുടെ ശമ്പളത്തിനോ ജോലിയില്‍ നിന്നുള്ള വരുമാനത്തിനോ കോര്‍പറേറ്റ് നികുതി ബാധകമല്ല. കൂടാതെ, ബാങ്ക് നിക്ഷേപങ്ങളില്‍ നിന്നോ സേവിംഗ്‌സ് പ്രോഗ്രാമുകളില്‍ നിന്നോ ലഭിക്കുന്ന വ്യക്തിഗത വരുമാനം, വ്യക്തികള്‍ അവരുടെ വ്യക്തിഗത ശേഷിയില്‍ നടത്തുന്ന റിയല്‍ എസ്റ്റേറ്റ് നിക്ഷേപം എന്നിവയ്ക്കും നികുതി ബാധകമല്ല. സര്‍ക്കാരുകളുടെ വരുമാനം വൈവിധ്യവത്കരിക്കുന്നതിനായി മിക്കവാറും എല്ലാ രാജ്യങ്ങളിലും ബിസിനസുകള്‍ക്ക് കോര്‍പ്പറേറ്റ് നികുതി ചുമത്തുന്നുണ്ടെന്ന കാര്യം ധനകാര്യ മന്ത്രാലയം ചൂണ്ടിക്കാട്ടി.
ഫ്രീ സോണ്‍ കമ്പനികളെ ഒഴിവാക്കി
പുതിയ ഫെഡറല്‍ നികുതി നിയമം അനുസരിച്ച്, യുഎഇ കോര്‍പ്പറേറ്റ് ടാക്സ് നിയമം പാലിച്ച് പ്രവര്‍ത്തിക്കുന്ന യുഎഇയിലെ ഫ്രീ സോണ്‍ കമ്പനികളെ കോര്‍പ്പറേറ്റ് നികുതിയില്‍ നിന്ന് ഒഴിവാക്കിയിട്ടുണ്ട്. പ്രകൃതിവിഭവങ്ങള്‍ വേര്‍തിരിച്ചെടുക്കുന്ന പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന കമ്പനികളെയും ഒഴിവാക്കിയിട്ടുണ്ട്. എന്നാല്‍, അവ ഇപ്പോള്‍ നല്‍കിവരുന്ന എമിറേറ്റ്തല നികുതി തുടര്‍ന്നു നല്‍കണം. സര്‍ക്കാര്‍ സ്ഥാപനങ്ങള്‍, പെന്‍ഷന്‍ ഫണ്ടുകള്‍, നിക്ഷേപ ഫണ്ടുകള്‍, പൊതു ആനുകൂല്യ സ്ഥാപനങ്ങള്‍ എന്നിവയും കോര്‍പ്പറേറ്റ് നികുതിയുടെ പരിധിയില്‍ നിന്ന് ഒഴിവാക്കപ്പെട്ടിട്ടുണ്ട്.
നികുതി രേഖകള്‍ ഏഴു വര്‍ഷം സൂക്ഷിക്കണം
പ്രതിവര്‍ഷം 375,000 ദിര്‍ഹത്തില്‍ കൂടുതല്‍ ലാഭമുണ്ടാക്കുന്ന താമസക്കാര്‍, നോണ്‍ റെസിഡന്‍റ് വ്യക്തികള്‍, ഫ്രീ സോണ്‍ വ്യക്തികള്‍ എന്നിവരുള്‍പ്പെടെയുള്ളവര്‍ക്ക് കോര്‍പ്പറേറ്റ് നികുതി ബാധകമാണ്. പ്രവാസികള്‍ക്ക് യുഎഇയില്‍ സ്ഥിരം സ്ഥാപനമുണ്ടെങ്കില്‍, രാജ്യത്ത് സാധനങ്ങള്‍ വില്‍ക്കുന്നതിലൂടെയും സേവനങ്ങള്‍ നല്‍കുന്നതിലൂടെയും ലഭിക്കുന്ന വരുമാനത്തിനും ഒമ്പത് ശതമാനം നികുതി ബാധകമാണ്. നികുതി കാലയളവ് അവസാനിച്ചതിന് ശേഷം ഏഴ് വര്‍ഷത്തേക്ക് വരുമാനവുമായി ബന്ധപ്പെട്ടതും നികുതിയുമായി ബന്ധപ്പെട്ടതുമായ രേഖകള്‍ സ്ഥാപനങ്ങള്‍ സൂക്ഷിച്ചുവയ്‌ക്കേണ്ടതാണെന്നും അധികൃതര്‍ അറിയിച്ചു. പുതിയ നിയമപ്രകാരം, വാര്‍ഷിക കോര്‍പ്പറേറ്റ് നികുതി റിട്ടേണുകള്‍ നികുതി കാലയളവ് അവസാനിച്ച് ഒമ്പത് മാസത്തിനുള്ളില്‍ നികുതിക്ക് വിധേയരായ എല്ലാ വ്യക്തികളും സമര്‍പ്പിക്കേണ്ടതുണ്ട്. രാജ്യത്തെ ഗ്രൂപ്പ് കമ്പനികള്‍ക്ക് ടാക്സ് ഗ്രൂപ്പ് രൂപീകരിക്കാനും ഒറ്റ നികുതി റിട്ടേണ്‍ ഫയല്‍ ചെയ്യാനും ഒറ്റത്തവണ നികുതി അടയ്ക്കാനും കഴിയുമെന്നും ഈ മേഖലയില്‍ പ്രവര്‍ത്തിക്കുന്നവര്‍ വ്യക്തമാക്കി.
Video-തങ്ക അങ്കി ഘോഷയാത്രക്കുള്ള ഒരുക്കങ്ങൾ ആരംഭിച്ചു
തങ്ക അങ്കി ഘോഷയാത്രക്കുള്ള ഒരുക്കങ്ങൾ ആരംഭിച്ചു
