Sumayya P | Samayam Malayalam | Updated: 09 Jul 2021, 09:09:58 AM
കൊവിഡ് വ്യാപനത്തിന്റെ തോത് പരിഗണിച്ച് ഇന്ത്യ ഉള്‍പ്പെടെ 94 രാജ്യങ്ങളെയാണ് ഖത്തര്‍ ആരോഗ്യ മന്ത്രാലയം റെഡ് കാറ്റഗറിയില്‍ ഉള്‍പ്പെടുത്തിയിരിക്കുന്നത്
ഇന്ത്യ ഉള്‍പ്പെടെ 94 രാജ്യങ്ങള്‍ റെഡ് പട്ടികയില്‍
കൊവിഡ് വ്യാപനത്തിന്റെ അടിസ്ഥാനത്തില്‍ രാജ്യങ്ങളെ ഗ്രീന്‍, യെല്ലോ, റെഡ് എന്നിങ്ങനെ മൂന്ന് വിഭാഗങ്ങളായി തിരിച്ചും വാക്സിന് കുത്തിവയ്പ്പിലൂടെ രോഗപ്രതിരോധ ശേഷി കൈവരിച്ചതിന്റെ അടിസ്ഥാനത്തില്‍ യാത്രക്കാരെ അഞ്ച് വിഭാഗങ്ങളായി തിരിച്ചുമാണ് നിയന്ത്രണങ്ങള്‍ പ്രഖ്യാപിച്ചിരിക്കുന്നത്. കൊവിഡ് വ്യാപനത്തിന്റെ തോത് പരിഗണിച്ച് ഇന്ത്യ ഉള്‍പ്പെടെ 94 രാജ്യങ്ങളെയാണ് ഖത്തര്‍ ആരോഗ്യ മന്ത്രാലയം റെഡ് കാറ്റഗറിയില്‍ ഉള്‍പ്പെടുത്തിയിരിക്കുന്നത്. ഇന്ത്യയ്ക്കു പുറമെ, ഏഷ്യന്‍ രാജ്യങ്ങളായ പാകിസ്താന്‍, ബ്ംഗ്ലാദേശ്, പാകിസ്താന്‍, ശ്രീലങ്ക, നേപ്പാള്‍ തുടങ്ങിയ രാജ്യങ്ങളും ഈ വിഭാഗത്തിലാണ് പെടുന്നത്. ജിസിസി രാജ്യങ്ങള്‍ ഉള്‍പ്പെടെ 88 രാജ്യങ്ങളാണ് യെല്ലോ വിഭാഗത്തിലുള്ളത്. 30 രാജ്യങ്ങള്‍ മാത്രമേ ഗ്രീന്‍ പട്ടികയില്‍ ഉള്‍പ്പെട്ടിട്ടുള്ളൂ. ഇവയില്‍ കൂടുതലും യൂറോപ്യന്‍ രാജ്യങ്ങളാണ്.
പൂര്‍ണമായി വാക്സിന് എടുത്തവര്‍ക്ക് ക്വാറന്റൈന്‍ ഇളവ്
ഖത്തറില്‍ അംഗീകാരമുള്ള ഏതെങ്കിലുമൊരു വാക്സിന് പൂര്‍ണമായി എടുത്തവര്‍ക്കും ഖത്തറില്‍ നിന്ന് ഒന്‍പത് മാസത്തിനിടെ കൊവിഡ് വന്ന് ഭേദമായവര്‍ക്കും ക്വാറന്റൈന്‍ ആവശ്യമില്ല. ഇതു പ്രകാരം വാക്സിനെടുത്ത ഇന്ത്യക്കാര്‍ക്കും ക്വാറന്റൈന്‍ ഇളവ് ലഭിക്കും. അതേസമയം, ഖത്തറിന് പുറത്ത് ഏതെങ്കിലും ജിസിസി രാജ്യത്തു നിന്നാണ് കൊവിഡ് വന്ന് ഭേദമായതെങ്കില്‍ അവര്‍ ഖത്തര്‍ അംഗീകരിച്ച ഒരു ഡോസ് വാക്സിന് സ്വീകരിച്ചിട്ടുണ്ടെങ്കില്‍ ക്വാറന്റൈന്‍ ഇളവ് അവര്‍ക്കും ലഭ്യമാവും.
അംഗീകൃത വാക്സിനുകള്‍ ഏതെല്ലാം?
ഖത്തറില്‍ നിലവില്‍ വിതരണം ചെയ്യുന്ന വാക്‌സിനുകളായ ഫൈസര്‍ ബയോണ്‍ടെക്, മോഡേണ, കോവിഷീല്‍ഡ്, ജോണ്‍സണ്‍ ആന്റ് ജോണ്‍സണ്‍ എന്നിവയ്ക്ക് പുറമേ സിനോഫാം, സിനോവാക് എന്നീ വാക്സിനുകള്‍ക്കും ഉപാധികളോടെ ഖത്തര്‍ ആരോഗ്യ മന്ത്രാലയം അംഗീകാരം നല്‍കിയിട്ടുണ്ട്. സിനോഫാം, സിനോവാക് വാക്സിന് എന്നിവയുടെ രണ്ട് ഡോസും എടുത്തവര്‍ ഖത്തറില്‍ എത്തിയാല്‍ അവര്‍ ആന്റിബോഡി പരിശോധനയ്ക്ക് വിധേയരാകരണം. ശരീരത്തില്‍ കൊവിഡിനെ പ്രതിരോധിക്കുന്ന ആന്റിബോഡി കണ്ടെത്തുന്നത് വഴി ആന്റിബോഡി ടെസ്റ്റ് പോസിറ്റീവ് ആയാല്‍ അവര്‍ക്ക് ക്വാറന്റൈന്‍ ആവശ്യമില്ല. നെഗറ്റീവ് ആണെങ്കില്‍ വരുന്ന രാജ്യത്തിന്റെ കാറ്റഗറി അനുസരിച്ചുള്ള ക്വാറന്റൈന്‍ വ്യവസ്ഥകള്‍ അവര്‍ക്ക് ബാധകമാണ്.
ക്വാറന്റൈന്‍ വേണ്ടത് ആര്‍ക്കെല്ലാം?
രണ്ട് ഡോസ് എടുക്കേണ്ട വാക്‌സിന്റെ ഒരു ഡോസ് മാത്രം എടുത്തവര്‍, വാക്സിനെടുത്ത് 14 ദിവസം പൂര്‍ത്തിയാക്കാത്തവര്‍, ഖത്തര്‍ ആരോഗ്യ മന്ത്രാലയത്തിന്റെ അംഗീകാരമില്ലാത്ത വാക്സിനെടുത്തവര്‍, ഖത്തറിന് പുറത്ത് നിന്ന് ഒന്‍പത് മാസത്തിനിടെ കൊവിഡ് വന്ന് ഭേദമായവര്‍ ഇവര്‍ക്ക് ക്വാറന്റൈന്‍ നിര്‍ന്ധമാണ്. എന്നാല്‍ ഇവര്‍ വരുന്ന രാജ്യത്തിന്റെ കാറ്റഗറിയുടെ അടിസ്ഥാനത്തില്‍ ക്വാറന്റൈന്‍ വ്യവസ്ഥകളില്‍ മാറ്റങ്ങളുണ്ട്. ഗ്രീന്‍ പട്ടികയില്‍ പെട്ട രാജ്യങ്ങളില്‍ നിന്ന് വരുന്നവര്‍ക്ക് അഞ്ച് ദിവസത്തെ ഹോം ക്വാറന്റൈന്‍ മതി. യെല്ലോ രാജ്യങ്ങളില്‍ നിന്ന് വരുന്നവര്‍ ഏഴു ദിവസം ഹോട്ടല്‍ ക്വാറന്റൈനില്‍ കഴിയണം. റെഡ് കാറ്റഗറി രാജ്യങ്ങളില്‍ നിന്ന് വരുന്നവര്‍ക്ക് 10 ദിവസത്തെ ഹോട്ടല്‍ ക്വാറന്റൈനാണ് വ്യവസ്ഥ ചെയ്തിരിക്കുന്നത്.
പിസിആര്‍ നെഗറ്റീവ് സര്‍ട്ടിഫിക്കറ്റ് എല്ലാവര്‍ക്കും ബാധകം
മൂന്ന് കാറ്റഗറി രാജ്യങ്ങളില്‍ നിന്ന് എത്തുന്ന വാക്സിന് എടുത്തവരും എടുക്കാത്തവരുമായ എല്ലാ വിഭാഗങ്ങളില്‍ പെട്ടവര്‍ക്കും യാത്രയുടെ 72 മണിക്കൂറിനുള്ളില്‍ എടുത്ത ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് നിര്‍ബന്ധമാണ്. എന്നാല്‍ പൂര്‍ണമായി വാക്സിന് എടുക്കാത്തവര്‍ക്ക് അവര്‍ വരുന്ന രാജ്യത്തിന്റെ കാറ്റഗറി അനുസരിച്ച് തുടര്‍ ടെസ്റ്റുകള്‍ ആവശ്യമാണ്.
– ഗ്രീന്‍ കാറ്റഗറിയില്‍ പെട്ടവരാണെങ്കില്‍ ക്വാറന്റൈന്റെ നാലാം ദിവസം പിഎച്ച്‌സിസിയില്‍ നിന്ന് ഒരു പിസിആര്‍ ടെസ്റ്റ് കൂടി നടത്തണം. ഫലം നെഗറ്റീവാണെങ്കില്‍ അടുത്ത ദിവസം ക്വാറന്റൈന്‍ അവസാനിപ്പിക്കാം.
– യെല്ലോ പട്ടികയില്‍ പെട്ടവരാണെങ്കില്‍ ഹോട്ടല്‍ ക്വാറന്റൈന്‍ ആറാം ദിവസം സ്വന്തം ചെലവില്‍ ടെസ്റ്റ് നടത്തണം.
– റെഡ് കാറ്റഗറിയില്‍പ്പെട്ടവരാണെങ്കില്‍ ഹോട്ടല്‍ ക്വാറന്റൈന്‍ ഒന്‍പതാം ദിവസമാണ് സ്വന്തം ചെലവില്‍ ടെസ്റ്റ് നടത്തേണ്ടത്. വിവിധ ഇടവേളകളിലായി ആര്‍ടിപിസിആര്‍ പരിശോധന ആവര്‍ത്തിക്കേണ്ടി വരും. ഇതിനുള്ള ചെലവ് സ്വന്തമായി വഹിക്കണം.
– ഇതിനു പുറമെ, പൂര്‍ണമായി വാക്സിന് എടുത്തവരാണെങ്കിലും റെഡ് കാറ്റഗറിയില്‍ നിന്ന് വരുന്നവര്‍ എയര്‍പോര്‍ട്ടില്‍ വച്ച് ഒരു പിസിആര്‍ ടെസ്റ്റ് നടത്തി നെഗറ്റീവാണെന്ന് തെളിയിക്കണം.
കുട്ടികള്‍ക്ക് ക്വാറന്റൈന്‍ ആവശ്യമുണ്ടോ?
11 വയസ്സിന് താഴെ പ്രായമുള്ള കുട്ടികളാണെങ്കില്‍ അവരുടെ മാതാപിതാക്കള്‍ക്ക് ബാധകമായ കാര്യങ്ങള്‍ കുട്ടികള്‍ക്കും ബാധകമാണ്. മാതാപിതാക്കള്‍ പൂര്‍ണ വാക്‌സിനേഷന്‍ ലഭിച്ചവരാണെങ്കില്‍ കുട്ടികളെയും ആ രീതിയില്‍ പരിഗണിക്കും. 12 മുതല്‍ 17 വരെ പ്രായമുള്ള കുട്ടികള്‍ വാക്സിന് എടുക്കാത്തവരാണെങ്കില്‍ അവര്‍ ഏത് രാജ്യത്ത് നിന്നു വരുന്നവരാണ് എന്നതിന്റെ അടിസ്ഥാനത്തില്‍ അവര്‍ ക്വാറന്റൈനില്‍ കഴിയണം. ഹോട്ടല്‍ ക്വാറന്റൈനില്‍ കഴിയേണ്ടിവരുന്ന പക്ഷം ഒരു രക്ഷിതാവ് കൂടെ നില്‍ക്കണം. രക്ഷിതാവ് വാക്സിന് എടുത്തവരാണെങ്കിലും ഇത് ബാധകമാണ്.
സന്ദര്‍ശക വിസയില്‍ വരുന്നവര്‍
വിസിറ്റ് വിസകളിലും ടൂറിസ്റ്റ് വിസകളിലും ഖത്തറിലെത്തുന്ന വാക്സിനെടുത്തവര്‍ക്ക് ക്വാറന്റൈന്‍ ആവശ്യമില്ല. വാക്സിന് എടുത്തിട്ടില്ലെങ്കിലും ഒന്‍പത് മാസത്തിനിടെ രോഗം വന്ന് ഭേദമായ ജിസിസി പൗരന്മാര്‍ക്കും ക്വാറന്റൈന്‍ ഇളവുണ്ട്. വാക്സിനെടുത്ത രക്ഷിതാക്കളോടൊപ്പം വരുന്ന മൂന്ന് വയസ്സുവരെ പ്രായമുള്ളവര്‍ക്കും ക്വാറന്റൈന്‍ വേണ്ട. അതേസമയം, വാക്സിനെടുക്കാത്തവരോ ഭാഗികമായി വാക്സിനെടുത്തവരോ ആയ ആളുകള്‍ക്ക് നിലവില്‍ വിസിറ്റ് വിസ അനുവദിക്കുന്നില്ല. എല്ലാ യാത്രക്കാരും യാത്രയുടെ 12 മണിക്കൂര്‍ മുമ്പ് www.ehteraz.gov.qa എന്ന വെബ്സൈറ്റ് വഴി ഓണ്‍ലൈനില്‍ രജിസ്റ്റര്‍ ചെയ്യണമെന്നും ആരോഗ്യമന്ത്രാലയം അറിയിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : qatar says to resume issuing entry visas starting july 12
Malayalam News from malayalam.samayam.com, TIL Network
