ദുബായ് എക്‌സ്‌പോ; ഇന്ത്യന്‍ പവലിയന്‍ അടുത്ത മാസത്തോടെ സജ്ജമാവും

ദുബായ്: ദുബായ് എക്‌സ്‌പോയിലെ ഇന്ത്യന്‍ പവലിയന്‍ ആഗസ്ത് അവസാനത്തോടെ സജ്ജമാകുമെന്ന് ദുബായ് ഇന്ത്യന്‍ കോണ്‍സുലേറ്റ് അറിയിച്ചു. യുഎഇ അന്താരാഷ്ട്ര സഹകരണ സഹമന്ത്രിയും എക്‌സ്‌പോ ഡയറക്ടര്‍ ജനറലുമായ റീം അല്‍ ഹാഷ്മിയുമായി കൂടിക്കാഴ്ച നടത്തിയ ശേഷമാണ് ദുബായ് ഇന്ത്യന്‍ കോണ്‍സുലേറ്റ് ഇക്കാര്യം അറിയിച്ചത്.



കൊമേഴ്‌സ് ആന്റ് കമ്മീഷണര്‍ ജനറല്‍ അഡീഷനല്‍ സെക്രട്ടറി എസ് കിഷോറിന്റെ നേതൃത്വത്തിലുള്ള ഇന്ത്യന്‍ പ്രതിനിധി സംഘത്തില്‍ യുഎഇയിലെ ഇന്ത്യന്‍ അംബാസഡര്‍ പവന്‍ കപൂര്‍, കോണ്‍സുല്‍ ജനറല്‍ ഡോ. അമന്‍ പുരി, ഫെഡറേഷന്‍ ഓഫ് ഇന്ത്യന്‍ ചേംബേഴ്‌സ് ഓഫ് കൊമേഴ്‌സ് ആന്റ് ഇന്‍ഡസ്ട്രി സെക്രട്ടറി ജനറല്‍ ദിലീപ് ചെനോയ് എന്നിവരും ഉണ്ടായിരുന്നു. ഇന്ത്യയും യുഎഇയും തമ്മിലുള്ള ശക്തമായ ബന്ധത്തെ കുറിച്ച് പറഞ്ഞ റീം അല്‍ ഹാഷ്മി, കൊവിഡിന്റെ പ്രതിസന്ധി ഘട്ടത്തിലും പരസ്പരം സഹകരണം മെച്ചപ്പെടുത്താനായതായി അഭിപ്രായപ്പെട്ടു. എക്‌സ്‌പോയിലെ ഇന്ത്യന്‍ പവലിയന് വലിയ പ്രാധാന്യമാണ് ഇന്ത്യന്‍ ഭരണകൂടം നല്‍കുന്നതെന്നും ഉയര്‍ന്ന മന്ത്രി തല സമിതി നേരിട്ടാണ് ഇതിന്റെ പ്രവര്‍ത്തനങ്ങള്‍ക്ക് നേതൃത്വം നല്‍കുന്നതെന്നും സെക്രട്ടറി എസ് കിഷോര്‍ പറഞ്ഞു.

Also Read: ആഗസ്ത് ഒന്നു മുതല്‍ ഗവണ്‍മെന്‍റ് ഓഫീസുകളില്‍ പ്രവേശനം വാക്‌സിനെടുത്തവര്‍ക്ക് മാത്രം: യുഎഇ

കൂടിക്കാഴ്ചയ്ക്കു ശേഷം ഇന്ത്യന്‍ പതിനിധി സംഘം എക്‌സ്‌പോയിലെ ഇന്ത്യന്‍ പവലിയന്‍ സന്ദര്‍ശിച്ച് കാര്യങ്ങള്‍ വിലയിരുത്തി. അല്‍ ഫുര്‍സാന്‍ പാര്‍ക്കിന് സമീപം 2019 ആഗ്‌സ്തില്‍ ആരംഭിച്ച ഇന്ത്യന്‍ പവലിയന്റെ നിര്‍മാണം അവസാന ഘട്ടത്തിലാണ്. ഇന്ത്യ ഓണ്‍ മൂവ് എന്ന പ്രമേയത്തില്‍ ഒരുക്കുന്ന 8,736 ചതുരശ്ര മീറ്റിലുള്ള പവലിയന്റെ ഘടന പൂര്‍ത്തിയായി. ഇന്റീരിയര്‍ ജോലികള്‍ രണ്ടാഴ്ചയ്ക്കുള്ളില്‍ പൂര്‍ത്തിയാകും. മുക്കാല്‍ നൂറ്റാണ്ടു കാലത്തെ ഇന്ത്യയുടെ നേട്ടങ്ങള്‍ പ്രതിഫലിപ്പിക്കുന്നതായിരിക്കും ഇന്ത്യന്‍ പവലിയന്‍. നൂതന സാങ്കേതിക വിദ്യകള്‍ക്കും ബിസിനസ് സാധ്യതകള്‍ക്കും പവലിയന്‍ അവസരമൊരുക്കും. ദീപാവലി, ഹോളി തുടങ്ങിയ ആഘോഷ ദിവസങ്ങളില്‍ പവലിയനില്‍ പ്രത്യേക പരിപാടികളുണ്ടാകുമെന്നും അധികൃതര്‍ അറിയിച്ചു.