Sumayya P |
Samayam Malayalam | Updated: 16 Dec 2022, 12:16 pm
തൊഴിലുടമകള്‍ ഹുറൂബ് ആയി റിപ്പോര്‍ട്ട് ചെയ്യുന്ന ജോലിക്ക് ഹാജരാകാത്ത തൊഴിലാളികളുമായി ബന്ധപ്പെട്ട് തൊഴില്‍ നിയമ ചട്ടങ്ങളില്‍ വരുത്തിയ പരിഷ്‌ക്കാരത്തിന്റെ ഭാഗമായാണ് പുതിയ നിര്‍ദ്ദേശം
തൊഴില്‍ മാറ്റവുമായി ബന്ധപ്പെട്ട് ഹുറൂബ് റിപ്പോര്‍ട്ട് ചെയ്യപ്പെട്ട തൊഴിലാളിയുടെ അപേക്ഷയുടെ അടിസ്ഥാനത്തിലാണ് മന്ത്രാലയം അതിന് അനുമതി നല്‍കുക. ഇങ്ങനെ അനുമതി ലഭിച്ചു കഴിഞ്ഞാല്‍ 15 ദിവസത്തിനകം ട്രാന്‍സ്ഫര്‍ നടപടികള്‍ പൂര്‍ത്തിയാക്കണമെന്നാണ് പുതിയ വ്യവസ്ഥ. തൊഴിലുടമകള്‍ ഹുറൂബ് ആയി റിപ്പോര്‍ട്ട് ചെയ്യുന്ന ജോലിക്ക് ഹാജരാകാത്ത തൊഴിലാളികളുമായി ബന്ധപ്പെട്ട് തൊഴില്‍ നിയമ ചട്ടങ്ങളില്‍ വരുത്തിയ പരിഷ്‌ക്കാരത്തിന്റെ ഭാഗമായാണ് പുതിയ നിര്‍ദ്ദേശമെന്ന് മന്ത്രാലയം അറിയിച്ചു. മറ്റൊരു തൊഴിലുടമയ്ക്ക് ഹുറൂബ് റിപ്പോര്‍ട്ട് തൊഴിലാളികളുടെ സേവനങ്ങള്‍ തങ്ങളുടെ അവരുടെ അക്കൗണ്ടിലേക്ക് മാറ്റാന്‍ അനുവാദമുണ്ട്. എന്നാല്‍ ഈ തൊഴിലാളികളുടെ കുടിശ്ശിക ഫീസുമായി ബന്ധപ്പെട്ട ബാധ്യതകള്‍ പുതിയ തൊഴിലുടമയിലേക്ക് ട്രാന്‍സ്ഫര്‍ ചെയ്യപ്പെടും. ഇക്കാര്യം തൊഴിലുടമ സമ്മതിച്ചാല്‍ മാത്രമേ, തൊഴില്‍ ട്രാന്‍സ്ഫര്‍ ചെയ്യാന്‍ സാധിക്കൂ എന്നും മന്ത്രാലയ വക്താവ് സാദ് അല്‍ ഹമ്മാദ് വ്യക്തമാക്കി.
സ്വകാര്യ മേഖലയിലെ കമ്പനികളിലും സ്ഥാപനങ്ങളിലും ജോലിക്ക് ഹാജരാകാത്ത വിദേശ തൊഴിലാളികളെ സംബന്ധിച്ച ചട്ടങ്ങളും നടപടിക്രമങ്ങളും മന്ത്രാലയം പരിഷ്‌കരിച്ചതായി ഒഅദ്ദേഹം പറഞ്ഞു. രാജ്യത്തെ തൊഴില്‍ അന്തരീക്ഷം മെച്ചപ്പെടുത്തുന്നതിനും തൊഴില്‍ കരാറില്‍ ഏര്‍പ്പെട്ടിരിക്കുന്ന കക്ഷികളുടെ അവകാശങ്ങള്‍ സംരക്ഷിക്കുന്നതിനും ലക്ഷ്യമിട്ടാണ് ഈ മാറ്റം. ഹുറൂബ് കേസുകളില്‍ തൊഴില്‍ കരാര്‍ ബന്ധം അവസാനിപ്പിക്കാന്‍ തൊഴിലുടമ അഭ്യര്‍ത്ഥന സമര്‍പ്പിക്കുന്നതോടെ മന്ത്രാലയത്തിന്റെ രേഖകളില്‍ തൊഴിലാളിയുടെ സ്റ്റാറ്റസ് ഹുറൂബ് എന്നായി മാറുമെന്നും വക്താവ് പറഞ്ഞു. അതോടെ നിലവിലെ തൊഴിലുടമ തൊഴിലാളിയുടെ എല്ലാ ബാധ്യതകളില്‍ നിന്നും ഒഴിവാകുമെന്നും അദ്ദേഹം അറിയിച്ചു. തൊഴിലാളികളുടെയും തൊഴിലുടമകളുടെയും അവകാശങ്ങള്‍ സംരക്ഷിക്കുന്നതിനും സൗദി തൊഴില്‍ വിപണിയുടെ കാര്യക്ഷമതയും ആകര്‍ഷണീയതയും വര്‍ധിപ്പിക്കാനുമാണ് ഈ നടപടികളിലൂടെ മന്ത്രാലയം ലക്ഷ്യമിടുന്നതെന്നും അല്‍ ഹമ്മാദ് പറഞ്ഞു.
കാർ കത്തി മാധ്യമപ്രവർത്തകൻ മരിച്ച സംഭവം
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
