Sumayya P | Samayam Malayalam | Updated: 09 Jul 2021, 09:47:11 AM
രാജ്യത്ത് റെസിഡന്‍സി വിസയുള്ളവരും ഫൈസര്‍, ആസ്ട്രാസെനെക്ക, മൊഡേണ വാക്‌സിനുകളുടെ രണ്ട് ഡോസോ ജോണ്‍സണ്‍ ആന്റ് ജോണ്‍സന്റെ ഒരു ഡോസോ എടുത്തവരുമായ പ്രവാസികള്‍ക്ക് ആഗസ്ത് ഒന്നു മുതല്‍ പ്രവേശനാനുമതി നല്‍കും
യാത്രാ വിലക്ക് ആഗസ്ത് ഒന്നിന് അവസാനിക്കും
ഏഴു മാസമായി തുടരുന്ന വിദേശ സര്‍വീസുകള്‍ക്കുള്ള വിലക്ക് ആഗസ്ത് ഒന്നിന് തന്നെ അവസാനിക്കുമെന്ന് കൊവിഡ് പ്രതിരോധത്തിനായുള്ള ഉന്നതാധികാര സമിതി ചെയര്‍മാനും പ്രതിരോധ മന്ത്രിയുമായ ശെയ്ഖ് ഹമദ് അല്‍ അലി അല്‍ സബാഹ് പറഞ്ഞു. ഇതുമായി ബന്ധപ്പെട്ട് പ്രചരിക്കുന്ന കാര്യങ്ങള്‍ ശരിയല്ല. രാജ്യത്ത് റെസിഡന്‍സി വിസയുള്ളവരും ഫൈസര്‍, ആസ്ട്രാസെനെക്ക, മൊഡേണ വാക്‌സിനുകളുടെ രണ്ട് ഡോസോ ജോണ്‍സണ്‍ ആന്റ് ജോണ്‍സന്റെ ഒരു ഡോസോ എടുത്തവരുമായ പ്രവാസികള്‍ക്ക് ആഗസ്ത് ഒന്നു മുതല്‍ പ്രവേശനാനുമതി നല്‍കുമെന്നും അദ്ദേഹം അറിയിച്ചു.
കര്‍ഫ്യൂ വീണ്ടും ഏര്‍പ്പെടുത്താന്‍ ആലോചിച്ചിട്ടില്ല
കുവൈത്തില്‍ വീണ്ടും കര്‍ഫ്യൂ ഏര്‍പ്പെടുത്താന്‍ ആലോചിച്ചിട്ടില്ലെന്നും അത്തരമൊരു സാഹചര്യം ഒഴിവാക്കാന്‍ സാധ്യമാകുന്ന എല്ലാ ബദല്‍ മാര്‍ഗങ്ങളും സ്വീകരിക്കുമെന്നും അദ്ദേഹം വ്യക്തമാക്കി. വാക്‌സിനേഷന്‍ വര്‍ധിപ്പിക്കുന്നത് ഉള്‍പ്പെടെയുള്ള ബദല്‍നടപടികള്‍ക്കാണ് മുന്‍ഗണന നല്‍കുന്നതെന്ന് ശെയ്ഖ് ഹമദ് അല്‍ അലി അസല്‍ സബാഹ് പറഞ്ഞു. കൊവിഡ് കേസുകളും തീവ്രപരിചരണ വിഭാഗത്തിലുള്ളവരുടെ എണ്ണവും വര്‍ധിച്ചുവരുന്ന സാഹചര്യം ഉണ്ടെങ്കിലും തല്‍ക്കാലം ലോക്ഡൗണും കര്‍ഫ്യൂവും നടപ്പാക്കേണ്ടെന്നാണ് കമ്മിറ്റിയുടെ തീരുമാനം. അതേസമയം, സാഹചര്യം നിരീക്ഷിച്ച് അനിവാര്യമായ ഘട്ടത്തില്‍ കര്‍ശന നടപടികളിലേക്ക് പോകുമെന്നും അദ്ദേഹം അറിയിച്ചു. അടച്ചിടല്‍ പരമാവധി ഒഴിവാക്കി മറ്റു നടപടികളിലൂടെ സ്ഥിതി നിയന്ത്രണവിധേയമാക്കാനാണ് ശ്രമം. വിപണിക്കും തൊഴില്‍ മേഖലയ്ക്കും അത് ഏല്‍പ്പിക്കുന്ന ആഘാതം കണക്കിലെടുത്താണിത്. ആരോഗ്യ സുരക്ഷാ മാര്‍ഗനിര്‍ദേശങ്ങള്‍ പാലിക്കുന്നുവെന്ന് ഉറപ്പാക്കാന്‍ കര്‍ശനനടപടികള്‍ കൈക്കൊള്ളും. ജനങ്ങള്‍ ആരോഗ്യസുരക്ഷാ മാര്‍ഗനിര്‍ദേശങ്ങള്‍ കര്‍ശനമായി പാലിക്കണമെന്നും പ്രതിരോധ കുത്തിവയ്പ്പിനായി മുന്നോട്ടുവരണമെന്നും അദ്ദേഹം അഭ്യര്‍ത്ഥിച്ചു.
വാക്‌സിന്‍ ഇറക്കുമതി; സ്വകാര്യ ആശുപത്രികള്‍ക്ക് വിലക്കില്ല
രാജ്യത്തെ സ്വകാര്യ ആശുപത്രികള്‍ക്ക് വാക്‌സിന്‍ ഇറക്കുമതി ചെയ്യുന്നതില്‍ സര്‍ക്കാര്‍ വിലക്കേര്‍പ്പെടുത്തിയെന്ന രീതിയില്‍ സാമൂഹ്യ മാധ്യമങ്ങളില്‍ നടക്കുന്ന പ്രചാരണവും ശരിയല്ലെന്ന് ആരോഗ്യ മന്ത്രാലയം അധികൃതര്‍ അറിയിച്ചു. രാജ്യത്ത് അംഗീകാമുള്ള കൊവിഡ് പ്രതിരോധ വാക്‌സിനുകള്‍ ഇറക്കുമതി ചെയ്യാന്‍ സ്വകാര്യ ആരോഗ്യ സ്ഥാപനങ്ങള്‍ക്ക് ഫെബ്രുവരിയില്‍ തന്നെ സര്‍ക്കാര്‍ അനുവാദം നല്‍കിയിരുന്നുവെന്ന് മന്ത്രാലയം പ്രസ്താവനയില്‍ വ്യക്തമാക്കി. അതേസമയം, രാജ്യത്തെ രജിസ്റ്റര്‍ ചെയ്ത മെഡിക്കല്‍ കമ്പനികള്‍, ഫ്രാഞ്ചൈസികള്‍ വഴി മാത്രമേ ഇവ വാങ്ങാവൂ എന്ന് സ്വകാര്യ സ്ഥാപനങ്ങള്‍ക്ക് നിര്‍ദ്ദേശം നല്‍കിയിരുന്നു. ഇക്കാര്യം സ്വകാര്യ ആരോഗ്യ സ്ഥാപനങ്ങളുടെ യൂനിയന്‍ നേരത്തേ സമ്മതിച്ചതാണെന്നും മന്ത്രാലയം അറിയിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : no change in decision to let expats travel to kuwait on august 1
Malayalam News from malayalam.samayam.com, TIL Network
