വാക്സിനെടുത്തില്ലെങ്കിൽ ജോലിയുമില്ല; വാക്സിൻ സ്വീകരിക്കാത്തവരോട് അവധിയിൽ പോകാൻ ആവശ്യപ്പെട്ട് ഫിജി

സുവ: കൊവിഡിനെതിരായ വാക്സിനേഷൻ പൂർത്തിയാക്കാൻ പലരാജ്യങ്ങളും വിവിധ മാർഗങ്ങളാണ് നടപ്പിലാക്കുന്നത്. വാക്സിനേഷന് ജനങ്ങളെ പ്രോത്സാഹിപ്പിക്കാൻ ആകർഷമായ പ്രചാരണ പരിപാടികൾ ചിലർ നടത്തുമ്പോൾ മറ്റുപല രാജ്യങ്ങളും നിർബന്ധിത വാക്സിനേഷനുമായി നിയമങ്ങൾ കർശനമാക്കുകയാണ് ചെയ്യുന്നത്. ഇപ്പോഴിതാ വാക്സിനെടുക്കാത്തവർക്ക് ജോലി ചെയ്യാൻ കഴിയില്ലെന്ന് വ്യക്തമാക്കിയിരിക്കുകയാണ് ദക്ഷിണ പസഫിക് രാജ്യമായ ഫിജി.



രാജ്യം കൊവിഡ് ഡെൽറ്റ വകഭേദത്തിനെതിരെ പൊരുതുന്ന സാഹചര്യത്തിലാണ് ഫിജി എല്ലാ ജോലിക്കാർക്കും വാക്സിനേഷൻ നിർബന്ധമാക്കുന്നത്. ആഗസ്റ്റ് 15നകം ഒന്നാം ഡോസ് വാക്സിൻ സ്വീകരിക്കാത്ത സർക്കാർ ജീവനക്കാർ അവധിയിൽ പോകണമെന്നാണ് പ്രധാനമന്ത്രി ഫ്രാങ്ക് ബെയ്നിമറാമ ആവശ്യപ്പെട്ടിരിക്കുന്നത്. നവംബർ ഒന്നിനകം രണ്ടാം ഡോസ് എടുത്തില്ലെങ്കിൽ ജോലിയിൽ നിന്ന് പിരിച്ചുവിടുമെന്നും അദ്ദേഹം മുന്നറിയിപ്പ് നൽകി.

Also Read : തെലങ്കാനയിൽ പുതിയ പാര്‍ട്ടി പ്രഖ്യാപിച്ച് ജഗൻ മോഹൻ റെഡ്ഡിയുടെ സഹോദരി; കെസിആറിന് ഭീഷണിയോ



സ്വകാര്യമേഖലയിൽ ജോലി ചെയ്യുന്നവരും ആഗസ്റ്റ് ഒന്നിനകം ആദ്യ ഡോസ് വാക്സിനെടുക്കണമെന്നാണ് നിർദേശം. വാക്സിനെടുക്കാത്തവർക്ക് കനത്ത പിഴയും കമ്പനികൾ അടച്ചുപൂട്ടിക്കുമെന്നും ഉത്തരവിലുണ്ടെന്ന് ഇംഗ്ലീഷ് വാർത്താ ചാനലായ ഇന്ത്യാ ടുഡേ റിപ്പോർട്ട് ചെയ്യുന്നു.

Also Read : യുപിയിലെ 160 മണ്ഡലങ്ങൾ ബിജെപിയെ കൈവിടുമോ? കേന്ദ്രമന്ത്രിസഭയിൽ സ്ഥാനമില്ല, അതൃപ്തിയുമായി സഖ്യകക്ഷി



രാജ്യത്ത് കൊവിഡ് പ്രോട്ടോക്കോൾ പാലിക്കുന്നതിൽ വീഴ്ചയുണ്ടായെന്ന വിലയിരുത്തലുകൾക്കിടെയാണ് സർക്കാർ നടപടികൾ കർശനമാക്കിയിരിക്കുന്നത്. സാമൂഹികാകലം പാലിക്കൽ മാസ്ക് ധരിക്കൽ തുടങ്ങിയവയിലെല്ലാം വീഴ്ച സംഭവിച്ചതാണ് കൊവിഡ് കേസുകൾ കുതിച്ചുയരാൻ കാണമെന്നാണ് വിലയിരുത്തൽ. ഫിജിയിൽ ഇപ്പോൾ പ്രതിദിനം 700ലധികം കൊവിഡ് കേസുകളാണ് റിപ്പോർട്ട് ചെയ്യുന്നത്.