സിക്ക വൈറസ്: കേരളത്തിൽ നിന്നുള്ളവർക്ക് പരിശോധന, നിർദേശവുമായി തമിഴ്നാട്

ചെന്നൈ: സംസ്ഥാനത്ത് കൂടുതൽ പേർക്ക് സിക്ക വൈറസ് സ്ഥിരീകരിച്ച സാഹചര്യത്തിൽ കേരളത്തിൽ നിന്നുള്ള യാത്രക്കാരെ പരിശോധനകൾക്ക് വിധേയമാക്കാനൊരുങ്ങി തമിഴ്നാട് സർക്കാർ. കേരളത്തിൽ നിന്നുള്ളവരെ കർശന പരിശോധനകൾക്ക് വിധേയമാക്കുമെന്ന് തമിഴ്നാട് ആരോഗ്യ മന്ത്രി വ്യക്തമാക്കി.



സംസ്ഥാനത്ത് പുതിയതായി 14 പേര്‍ക്ക് കൂടി സിക വൈറസ്

മെഡിക്കൽ സംഘത്തെ വിന്യസിച്ച് അതിർത്തിയിൽ പരിശോധന ശക്തമാക്കും. കന്യാകുമാരി ജില്ലയിൽ പ്രത്യേക നിരീക്ഷണം ഏർപ്പെടുത്തുമെന്നും തമിഴ്നാട് ആരോഗ്യവകുപ്പ് അറിയിച്ചു. കേരളത്തിൽ 15 പേർക്ക് സിക്ക വൈറസ് ബാധ സ്ഥിരീകരിച്ചതോടെയാണ് അയൽ സംസ്ഥാനമായ തമിഴ്നാട് പരിശോധന ഏർപ്പെടുത്താൻ തീരുമാനിച്ചത്.

കേരളത്തിൽ പുതിയതായി 14 പേര്‍ക്ക് കൂടി സിക്ക വൈറസ് ബാധ സ്ഥിരീകരിച്ചുവെന്ന് ആരോഗ്യ വകുപ്പ് അറിയിച്ചിരുന്നു. ഇതോടെ ആകെ വൈറസ് കേസുകളുടെ എണ്ണം 15 ആയി ഉയർന്നു. വ്യാഴാഴ്ച 24 കാരിയായ യുവതിക്ക് രോഗം സ്ഥിരീകരിച്ചിരുന്നു. പാറശ്ശാല സ്വദേശിനിക്കാണ് രോഗം സ്ഥിരീകരിച്ചത്. ഇവര്‍ കഴിഞ്ഞ ദിവസം ഇവര്‍ പ്രസവിക്കുകയും ചെയ്തിരുന്നു. ഇതിന് പിന്നാലെയാണ് കൂടുതൽ പേരിൽ സിക്ക വൈറസ് ബാധ സ്ഥിരീകരിച്ചത്.

സിക്ക വൈറസ്: ഗർഭിണികൾക്ക് കൂടുതൽ നിർദേശങ്ങൾ, ആക്ഷൻ പ്ലാന്‍ രൂപീകരിച്ച് സർക്കാർ

സംസ്ഥാനത്ത് കൂടുതൽ പേർക്ക് സിക്ക വൈറസ് സ്ഥിരീകരിച്ച സാഹചര്യത്തിൽ പ്രതിരോധ പ്രവർത്തനങ്ങൾ ശക്തിപ്പെടുത്താൻ ആക്ഷൻ പ്ലാൻ രൂപീകരിച്ചതായി ആരോഗ്യമന്ത്രി വീണാ ജോർജ്. സംസ്ഥാനത്താകെ ജാഗ്രത നിർദേശം നൽകിയിട്ടുണ്ട്. രോഗബാധ റിപ്പോർട്ട് ചെയ്യാൻ സാധ്യതയുള്ള പ്രദേശങ്ങളുൽ ആശുപത്രികളും കേന്ദ്രീകരിച്ച് ശക്തമായ പ്രതിരോധ പ്രവർത്തനങ്ങൾ നടത്തും.