കേരളത്തിൽ നിന്ന് പുതിയ ഇനം ഭൂഗർഭമത്സ്യത്തെ കണ്ടെത്തിയിരിക്കുകയാണ് ഗവേഷകർ. ആറു വർഷത്തോളം നീണ്ട പഠനത്തിനിടെയാണ് പുതിയ ഇനം മത്സ്യത്തെ കണ്ടെത്താനായത്. ജനങ്ങളുടെ സഹായത്തോടെയാണ് കണ്ടെത്തൽ നടത്തിയത് എന്നതിനാൽ പൊതുജനം എന്ന് അർത്ഥം വരുന്ന പോപ്പുലി എന്ന പേരാണ് ഈ മീനിന് നൽകിയിരിക്കുന്നത്.
കിണറുകൾക്കുള്ളിൽ മാത്രം കാണപ്പെടുന്ന മൊട്ടുസൂചിയോളം മാത്രം നീളമുള്ള ഈ മത്സ്യത്തെ കോട്ടയം മല്ലപ്പള്ളിയിലെ ഒരു കിണറ്റിൽ നിന്നാണ് കണ്ടെത്തിയത്. മല്ലപ്പള്ളി ചരിവുപുരയിടത്തിൽ പ്രദീപ് തമ്പിയുടെ വീട്ടിലെ കിണറ്റിൽ നിന്ന് 2020 ഡിസംബർ ഒന്നിനായിരുന്നു മീനിനെ കിട്ടിയത്. മോട്ട‍ർ വഴി ടാങ്കിലേയ്ക്ക് പമ്പ് ചെയ്ത് എത്തിച്ച വെള്ളത്തിലുണ്ടായിരുന്ന ചെറുജീവിയെ കണ്ട കൗതുകമാണ് കണ്ടെത്തലിലേയ്ക്ക് നയിച്ചത്. ചിത്രങ്ങൾ സമൂഹമാധ്യമങ്ങളിൽ പങ്കുവച്ചതോടെ ഇത് കുഫോസിലെ ഗവേഷകരുടെ ശ്രദ്ധയിൽപ്പെട്ടു. കുഫോസിലെ ഗവേഷകരായ ഡോ. രാജീവ് രാഘവൻ രമ്യ എൽ സുന്ദ, ശിവ് നാടാർ എന്നിവരും ന്യൂഡ.ഹി ശിവ് നാടാർ ഇൻസ്റ്റിറ്റ്യൂഷൻ ഓഫ് എമിനൻസിലെ ഡോ. നീലേഷ് ദഹാനുകർ, ജ‍ർമനിയിലെ സെൻകെൻബെർഗ് നാച്ചുറൽ ഹിസ്റ്ററി മ്യൂസിയത്തിലെ ഡോ. റാൾഫ് ബ്രിറ്റ്സ്, സിപി അർജുൻ എന്നിവരും ചേർന്നാണ് ഗവേഷണം നടത്തിയത്. ഇതൊതു പുതിയ ഇനം ഭൂഗർഭ മത്സ്യമാണെന്ന് ഇവർ ഗവേഷണത്തിലൂടെ കണ്ടെത്തുകയായിരുന്നു.
Also Read: ബിബിസി ഓഫീസുകളിൽ ആദായ നികുതി വകുപ്പ് ഉദ്യോഗസ്ഥർ; ഫോണുകൾ പിടിച്ചെടുത്തുവെന്ന് റിപ്പോർട്ട്
ഹോറാഗ്ലാനിസ് പോപ്പുലി എന്ന ശാസ്ത്രീയനാമം നൽകിയിരിക്കുന്ന മത്സ്യം മുൻപ് കണ്ടെത്തിയിട്ടുള്ള ജീനസ് ഹോറാഗ്ലാനിസ് എന്ന സ്പീഷിസിൻ്റെ സഹോദരവ‍ർഗമാണ്. നിറമില്ലാത്ത ത്വക്കിന് അടിയിലൂടെ ശരീരത്തിൻ്റെ അകം കാണാനാകും. ശരീരത്തിന് ഇരുവശത്തുമുള്ള ചിറകുകൾ വളരെ ചെറുതാണ്. ശരീരത്തിലൂടെ ഒഴുകുന്ന ചുവന്ന രക്തം മൂലം ഒരു ചുവപ്പുരാശി ശരീരത്തിനുണ്ട്. നട്ടെല്ലിനാകട്ടെ നീളം വളരെ കുറവാണ്. എന്നാൽ ശരീരത്തിനു മേൽഭാഗത്തും വാൽഭാഗത്തുമുള്ള ചിറകുകൾക്ക് നല്ല നീളമുണ്ട്. ഇവയം വാലിൻ്റെ തൊട്ടടുത്തു വരെ വ്യാപിച്ചു കിടക്കുന്നുണ്ട്. ഇവയ്ക്ക് കാഴ്ചശക്തിയില്ലെങ്കിലും മുഴിയ്ക്ക് സമാനമായി തലയിലുള്ള മീശകൾക്ക് സംവേദനക്ഷമതയുണ്ട്. വെർട്ടിബ്രാറ്റെ സുവോളജി എന്ന അന്താരാഷ്ട്ര ജേണലിലാണ് പഠനം പ്രസിദ്ധീകരിച്ചിട്ടുള്ളത്.
പുതിയ കണ്ടെത്തലോടു കൂടി കേരളത്തിൽ കണ്ടെത്തുന്ന ഭൂഗ‍ർഭമത്സ്യങ്ങളുടെ എണ്ണം 12 ആയി ഉയർന്നു. ചെങ്കല്ലുള്ള പ്രദേശങ്ങളിലെ കിണറുകളിലാണ് ഈ ജീവിവർഗത്തെ കാണാനാകുകയെന്നും മല്ലപ്പള്ളിയ്ക്കു പുറമെ ഇടനാട്, ചെങ്ങന്നൂർ, തിരുവൻവണ്ടൂർ തുടങ്ങിയ മേഖലകളിൽ നിന്നും ഈ ജീവികളുടെ സാംപിളുകൾ കണ്ടെത്തിയിട്ടുണ്ടെന്നും ഗവേഷകരനായ സിപി അർജുൻ പറയുന്നു.
Also Read: ‘ഒന്നും ഒളിക്കാനില്ല, ഭയക്കാനും’; അദാനി വിഷയത്തിൽ പ്രതികരിച്ച് അമിത് ഷാ
പ്രദേശത്തെ ജനങ്ങളുടെ കൂടി സഹായത്തോടെയായിരുന്നു ആറു വർഷത്തോളം നീണ്ട ഗവേഷണം. ജീവിവർഗം എവിടെയെല്ലാം കാണപ്പെടുന്നുണ്ടെന്നും ഇവയുടെ ശരീരഘടന എന്താണെന്നുമാണ് ഗവേഷകർ പഠിച്ചത്. കൂടാതെ മൈക്രോ സിടി ഉപയോഗിച്ച് വിശദമായ പരിശോധനയും നടത്തി. സർവേയുടെ ഭാഗമായി കേരളത്തിൽ ചെങ്കല്ല് കലർന്ന മണ്ണുള്ള പ്രദേശങ്ങളിലെ കൽക്കെട്ടില്ലാത്ത കിണറുകൾ, കുഴൽക്കിണറുകൾ, ചതുപ്പുനിലങ്ങൾ, പറമ്പുകൾ, പ്ലാൻ്റേഷനുകൾ, ചെങ്കൽഗുഹകൾ തുടങ്ങിയ സ്ഥലങ്ങളിലെല്ലാം പരിശോധന നടത്തി. പ്രദേശത്തെ ജനങ്ങളോട് പഠനത്തിൻ്റെ പ്രാധാന്യത്തെപ്പറ്റി ബോധ്യപ്പെടുത്തി ഇവരോടും വിവരങ്ങൾ കൈമാറാൻ അഭ്യർഥിച്ചു. ഈ സഹകരണവും ശാസ്ത്രീയചിന്തയുമാണ് പോപ്പുലി എന്ന പേരിനു പിന്നിൽ.
ഹോറാഗ്ലാനിസ് എന്ന പേരിനും ഒരു ഇന്ത്യൻ ബന്ധമുണ്ട്. പ്രശസ്ത ഇന്ത്യൻ മത്സ്യഗവേഷകനായ എസ് എൽ ഹോറയുടെ ബഹുമാനാർത്ഥമാണ് ഈ പേര്. ഗ്ലാനിസ് എന്നത് ക്യാറ്റ്ഫിഷുകളെ പൊതുവെ സൂചിപ്പിക്കുന്ന പദമാണ്. മുൻപ് ക്യാറ്റ്ഫിഷ് ഇനത്തിൽപ്പെട്ട ഹോറാഗ്ലാനിസ് കൃഷ്ണൈ, ഹോറാഗ്ലാനിസ് അലിക്കുഞ്ഞി, ഹോറാഗ്ലാനിസ് അബ്ദുൾകലാമി എന്നീ മത്സ്യങ്ങളെ കേരളത്തിൽ കണ്ടെത്തിയിട്ടുണ്ട്. എന്നാൽ 3.25 സെൻ്റിമീറ്റ‍ർ നീളമുള്ള പുതിയ സ്പീഷിസ് ഇവയിൽ നിന്നെല്ലാം വ്യത്യസ്തമാണെന്നും ഇതാദ്യമായാണ് ഈ ജീവിയെപ്പറ്റി വിശദമായ പഠനം നടത്തുന്നതെന്നും ഗവേഷകർ പറയുന്നു. ഇന്ത്യയിൽ ഇതുവരെ കണ്ടെത്തിയിട്ടുള്ള 18 ഭൂഗ‍ർഭമത്സ്യങ്ങളിൽ 12 ഇനവും കേരളത്തിലാണ്. 1948ലായിരുന്നു ഹോറാഗ്ലാനിസ് ക്രിഷ്ണൈ എന്ന ഇനം മത്സ്യത്തെ കണ്ടെത്തിയത്. മധ്യതിരുവിതാംകൂ‍ർ മേഖലയിൽ നിന്നാണ് ഇത്തരത്തിലുള്ള ഭൂരിഭാഗം മത്സ്യങ്ങളെയും കണ്ടെത്തിയിട്ടുള്ളത്.
രാഹുലിനെ യാത്രയാക്കാൻ കെസിയും സുധാകരനും
