ഒരു നിക്ഷേപ അവസരം എന്ന നിലയിൽ ഇന്ത്യയ്ക്ക് ഉണ്ടാകുന്ന തിരിച്ചടി രാജ്യത്ത് ‘ജനാധിപത്യപരമായ ഉയിർത്തെഴുന്നേൽപ്പിന്’ വഴിവെച്ചേക്കുമെന്നാണ് ജോർജ് സോറോസ് പറയുന്നത്. “മോദി ഈ വിഷയത്തിൽ നിശബ്ദനാണ്. പക്ഷെ വിദേശനിക്ഷേപകരുടെ ചോദ്യങ്ങൾക്കും പാർലമെൻ്റിലും അദ്ദേഹത്തിന് ഉത്തരം പറയേണ്ടി വരും.” മ്യൂണിക് സെക്യൂരിറ്റി കോൺഫറൻസിനു മുന്നോടിയായുള്ള പ്രസംഗത്തിൽ ജോർജ് സോറോസ് പറഞ്ഞു. അദാനി ഗ്രൂപ്പിനു മേൽ ഹിൻഡൻബർഗ് നടത്തിയ ആക്രമണം അന്താരാഷ്ട്രതലത്തിൽ ഇന്ത്യൻ വിപണിയുടെ പ്രതിച്ഛായയെ ബാധിച്ചേക്കുമെന്നാണ് നിലവിലെ ആശങ്ക. കൂടാതെ സെബി അടക്കമുള്ള റെഗുലേറ്ററി സംവിധാനങ്ങളുടെ സുതാര്യതയും പ്രധാനമന്ത്രി നരേന്ദ്ര മോദിയും അദാനിയും തമ്മിലുള്ള ബന്ധത്തെക്കുറിച്ചും പ്രതിപക്ഷം കഴിഞ്ഞ ദിവസങ്ങളിൽ കേന്ദ്രത്തോട് ചോദ്യം ഉന്നയിക്കുകയും ചെയ്തിരുന്നു.
ബിബിസി സർവ്വെ; ക്രമക്കേട് കണ്ടെത്തിയതായി ആദായ നികുതി വകുപ്പ്, വരുമാനവും പ്രവർത്തനവും തമ്മിൽ യോജിക്കുന്നില്ല
“അദാനി വിഷയം ഇന്ത്യയുടെ ഫെഡറൽ സംവിധാനത്തിൽ മോദിയ്ക്കുള്ള ബലം ഗണ്യമായി കുറയ്ക്കും. കൂടാതെ ഒഴിച്ചുകൂടാനാകാത്ത പല സാമ്പത്തിക പരിഷ്കാരങ്ങൾക്കും ഇത് വവി തുറക്കുകയും ചെയ്യും. എനിക്ക് അറിയില്ല, പക്ഷെ ഇന്ത്യയിൽ ജനാധിപത്യത്തിൻ്റെ ഉയിർത്തെഴുന്നേൽപ്പ് ഞാൻ പ്രതീക്ഷിക്കുന്നുണ്ട്.” ജോർജ് സോറോസ് പ്രസംഗത്തിൽ വ്യക്തമാക്കി.
രാഷ്ട്രീയനേതൃത്വവുമായി അടുത്ത ബന്ധമുള്ള ഗൗതം അദാനിയുടെ കമ്പനികൾ ഓഹരി വിപണിയിൽ കടലാസുകമ്പനികളുടെ സഹായത്തോടെ കോടികളുടെ വെട്ടിപ്പ് നടത്തിയെന്നും ഇതുവഴി ശതകോടികളുടെ വായ്പ നേടിയെന്നുമായിരുന്നു ഒരു ഷോർട്ട് സെല്ലറായ ഹിൻഡൻബർഗ് റിസർച്ചിൻ്റെ റിപ്പോർട്ട്. ഇതിനു പിന്നാലെയുണ്ടായ ഓഹരി തക‍ർച്ചയിൽ ലോകസമ്പന്നരുടെ പട്ടികയിൽ നിന്ന് അദാനി ബഹുദൂരം പിന്നോട്ടു പോകുകയും ചെയ്തു. വിഷയത്തിൽ കേന്ദ്രത്തിനെതിരെ പ്രതിപക്ഷം ചോദ്യമുയർത്തിയെങ്കിലും ഒന്നും മറയ്ക്കാനില്ലെന്നായിരുന്നു ബിജെപിയുടെ വിശദീകരണം. വെള്ളിയാഴ്ച ഇതുസംബന്ധിച്ച ഹർജികൾ പരിഗണിച്ച സുപ്രീം കോടതി കേന്ദ്രത്തിൻ്റെ നി‍ർദേശങ്ങൾ മുദ്ര വെച്ച കവറിൽ സ്വീകരിക്കാൻ തയ്യാറായില്ല. അന്വേഷണത്തിനായി പ്രത്യേക സമിതിയെ നിയോഗിക്കുമെന്നും കോടതി വ്യക്തമാക്കി. അദാനി വിഷയത്തിൽ രാഷ്ട്രീയവിവാദം തുടരുന്നതിനിടെയാണ് യുഎസ് ശതകോടീശ്വരൻ ജോർജ് സോറോസ് മോദിയ്ക്കെതിരെ കടന്നാക്രമണവുമായി രംഗത്തെത്തിയത്.
രാഷ്ട്രീയവിഷയങ്ങളിൽ ജോർജ് സോറോസ് അഭിപ്രായപ്രകടനം നടത്തുന്നത് ഇതാദ്യമല്ല. 8.5 ബില്യൺ ഡോളറിൻ്റെ ആസ്തിയുള്ള ജോർജ് സോറോസ് ഓപ്പൺ സൊസൈറ്റി ഫൗണ്ടേഷൻസ് എന്ന സന്നദ്ധസ്ഥാപനത്തിൻ്റെ സ്ഥാപകനാണ്. ബിജെപിയ്ക്കു വിരുദ്ധമായി ലിബറൽ രാഷ്ട്രീയത്തെ പിന്തുണയ്ക്കുന്നയാളാണ് സോറോസ്. ജനാധിപത്യവും സുതാര്യതയും അഭിപ്രായസ്വാതന്ത്ര്യവും പ്രോത്സാഹിപ്പിക്കുന്ന വ്യക്തികൾക്കും സംഘടനകൾക്കും ധനസഹായം നൽകുകയാണ് തങ്ങൾ ചെയ്യുന്നത് എന്നാണ് സോറോസിൻ്റെ സ്ഥാപനം വ്യക്തമാക്കുന്നത്. മുൻപ് യുഎസ് പ്രസിഡൻഷ്യൽ തെരഞ്ഞെടുപ്പിൽ ജോ ബൈഡനും ബരാക് ഒബാമയ്ക്കും ഹിലരി ക്ലിൻ്റണും സോറോസ് പിന്തുണ നൽകിയിട്ടുണ്ട്. ചൈനീസ് പ്രസിഡൻ്റ് ഷി ജിൻപിങ്, മുൻ യുഎസ് പ്രസിഡൻ്റ് ഡോണൾഡ് ട്രംപ്, തുർക്കി പ്രസിഡൻ്റ് റസിപ് തയിപ് എർദോവൻ എന്നിവർക്കെതിരെയും ജോർജ് സോറോസ് വിമർശനമുന്നയിച്ചിട്ടുണ്ട്.
മോദിയ്ക്കെതിരെ സോറോസ് നടത്തിയ പ്രസ്താവനയെ കേന്ദ്രമന്ത്രിയും ബിജെപി നേതാവുമായ സ്മൃതി ഇറാനി രൂക്ഷമായ ഭാഷയിലാണ് വിമ‍ർശിച്ചത്. ഇന്ത്യൻ രാഷ്ട്രീയത്തിൽ കടന്നുകയറാനുള്ള ദുരുദ്ദേശമാണ് സോറോസ് നടത്തുന്നത് എന്നായിരുന്നു സ്മൃതി ഇറാനിയുടെ കുറ്റപ്പെടുത്തൽ. തൻ്റെ ആവശ്യത്തിനു വഴങ്ങുന്ന ഒരു സ‍ർക്കാരിനെയാണ് ജോർജ് സോറോസിനു വേണ്ടതെന്നും സ്മൃതി ഇറാനി ചൂണ്ടിക്കാട്ടി. “ഇംഗ്ലണ്ടിൽ ഒരു ബാങ്ക് പൊളിച്ചയാളാണ്, ഒരു സാമ്പത്തിക കുറ്റവാളിയാണ്, ഇന്ത്യൻ ജനാധിപത്യവും തകർക്കണമെന്നാണ് അയാൾ പറഞ്ഞിരിക്കുന്നത്. ഇന്ത്യൻ ജനാധിപത്യത്തിൽ കടന്നുകയറാനുള്ള ദുരുദ്ദേശമാണ് ജോർജ് സോറോസ് പ്രഖ്യാപിച്ചിരിക്കുന്നത്. അദ്ദേഹത്തിൻ്റെ താത്പര്യത്തിന് ഇണങ്ങുന്ന ഒരു സർക്കാരുണ്ടാകണമെന്നാണ് അദ്ദേഹത്തിൻ്റെ പ്രസ്താവന സൂചിപ്പിക്കുന്നത്.” സ്മൃതി ഇറാനി ആഞ്ഞടിച്ചു. 90കളിൽ ബാങ്ക് ഓഫ് ഇംഗ്ലണ്ട് നേരിട്ട പ്രതിസന്ധി പരോക്ഷമായി സൂചിപ്പിച്ചുകൊണ്ടായിരുന്നു അവരുടെ വാക്കുകൾ.
‘അമ്പും വില്ലും’ ഷിൻഡെയ്ക്ക്, യഥാർഥ ശിവസേന; ഉദ്ധവ് താക്കറെയ്ക്ക് കനത്ത തിരിച്ചടി
അതേസമയം, സോറോസിൻ്റെ പ്രസ്താവനയെ വിമർശിച്ച് കോൺഗ്രസും രംഗത്തെത്തി എന്നത് ശ്രദ്ധേയമാണ്. ഇന്ത്യൻ ജനാധിപത്യത്തിൽ ജോർജ് സോറോസിന് ഒരു പങ്കുമില്ല എന്നായിരുന്നു കോൺഗ്രസ് നേതാവ് ജയറാം രമേശിൻ്റെ വാക്കുകൾ. രാജ്യത്ത് ജനാധിപത്യത്തിൻ്റെ ഉയിർത്തെഴുന്നേൽപ്പ് ഉണ്ടാകുന്നുണ്ടെങ്കിൽ ഇത് കോൺഗ്രസിനെയും പ്രതിപക്ഷ പാർട്ടികളെയും രാജ്യത്തെ തെരഞ്ഞെടുപ്പ് പ്രക്രിയയെയും മാത്രം ആശ്രയിച്ചായിരിക്കും നടക്കുക എന്ന് അദ്ദേഹം ട്വീറ്റ് ചെയ്തു. തെരഞ്ഞെടുപ്പ് ഫലങ്ങളെ സോറോസിനെപ്പോലുള്ള ആളുകൾക്ക് സ്വാധീനിക്കാൻ കഴിയില്ല എന്നാണ് നെഹ്രുവിയൻ പാരമ്പര്യം അടിവരയിടുന്നതെന്നും അദ്ദേഹം പറഞ്ഞു.
യുവതിയെ റെയില്‍വെ ട്രാക്കിലൂടെ വലിച്ചിഴച്ച് പീഡന ശ്രമം
