പാകിസ്ഥാനിൽ പോലീസ് ആസ്ഥാനത്ത് ഭീകരാക്രമണം; ഏറ്റുമുട്ടൽ തുടരുന്നു

Deepu Divakaran | Samayam Malayalam | Updated: 17 Feb 2023, 11:32 pm

പാകിസ്ഥാനിലെ കറാച്ചിയിൽ പോലീസ് ആസ്ഥാനത്ത് ഭീകരാക്രമണം. വൈകുന്നേരം 7.10 ഓടെ തുടങ്ങിയ ആക്രമണം അവസാനിച്ചിട്ടില്ല. അഞ്ചുനില കെട്ടിടമാണ് ഭീകരർ ആക്രമിച്ചത്.

Karachi Terrorist Attack — ആക്രമണം നടന്ന സ്ഥലത്ത് പോലീസ് കമാൻഡോകൾ.

ഹൈലൈറ്റ്:

കറാച്ചിയിൽ പോലീസ് മേധാവിയുടെ ഓഫീസിൽ ഭീകരാക്രമണം.
വൈകുന്നേരം 7.10 ഓടെ തുടങ്ങിയ ആക്രമണം ഇപ്പോഴും തുടരുകയാണ്.
എട്ടോളം ഭീകരർ കെട്ടിടത്തിനുള്ളിൽ ഉണ്ടെന്നു റിപ്പോർട്ട്.

കറാച്ചി: പാകിസ്ഥാനിലെ കറാച്ചിയിൽ പോലീസ് മേധാവിയുടെ ഓഫീസിൽ ഭീകരാക്രമണം. ഷരിയ ഫൈസലിലെ അഞ്ചുനില കെട്ടിടത്തിൽ വൈകുന്നേരം 7.10 ഓടെ തുടങ്ങിയ ആക്രമണം ഇപ്പോഴും തുടരുകയാണ്. ആയുധധാരികളായ എട്ടോളം ഭീകരർ കെട്ടിടത്തിനുള്ളിൽ ഉണ്ടെന്നാണ് റിപ്പോർട്ട്. ഗ്രനേഡുകളും മെഷീൻ തോക്കുകളും ഭീകരരുടെ പക്കലുണ്ട്. കെട്ടിടത്തിൽ നിരവധി സ്ഫോടനങ്ങൾ ഉണ്ടായി. ആക്രമണത്തിന്റെ ഉത്തരവാദിത്തം ഏറ്റെടുത്തതായി ഭീകരസംഘടനയായ പാകിസ്ഥാൻ താലിബാൻ വക്താവ് മാധ്യമപ്രവർത്തകർക്ക് സന്ദേശം നൽകിയതായി വിവിധ വാർത്താ ഏജൻസികൾ റിപ്പോർട്ട് ചെയ്തു.

ഭീകരരും പോലീസും തമ്മിൽ കനത്ത ഏറ്റമുട്ടൽ തുടരുകയാണ്. കെട്ടിടം സ്ഥിതി ചെയ്യുന്ന മേഖല കറാച്ചി പോലീസിൻ്റെയും പാകിസ്ഥാൻ റേഞ്ചേഴ്സിൻ്റെയും നിയന്ത്രണത്തിലാക്കി. ഉന്നത ഉദ്യോഗസ്ഥരടക്കം കെട്ടിടത്തിൽ ഉള്ളപ്പോഴാണ് ആക്രമണം ഉണ്ടായിരിക്കുന്നത്. ആക്രമണത്തിൽ രണ്ടു ഭീകരരെ വധിച്ചതായും ഏഴോളം ഉദ്യോഗസ്ഥർക്ക് പരിക്കേറ്റതായും റിപ്പോർട്ടുണ്ട്. പോലീസ് ഓഫീസ് പരിസരത്ത് നൂറിലധികം പോലീസ് ഉദ്യോഗസ്ഥർ കുടുംബത്തോടൊപ്പം താമസിച്ചുവരുന്നുണ്ട്.

ഗിനിയയിൽ മാരക വൈറസ് പടരുന്നു; എന്താണ് ‘മാർബർഗ്’? ലക്ഷണങ്ങൾ അറിയാം

പ്രദേശത്തെ വൈദ്യുതി വിച്ഛേദിച്ചാണ് പോലീസ് തിരിച്ചടിക്കുന്നത്. കെട്ടിടത്തിൻ്റെ പിന്നിലൂടെയാണ് ഭീകരർ പ്രവേശിച്ചതെന്ന് കറാച്ചി പോലീസ് മേധാവി ജാവേദ് അലം ഓധോ പറഞ്ഞു. പോലീസ് യൂണിഫോം ധരിച്ച രണ്ടു ഭീകരർ പ്രധാന ഗേറ്റിലൂടെയാണ് എത്തിയത്. പേഷാവറിൽ മുസ്ലീം പള്ളിയിൽ ഉണ്ടായ ചാവേർ ആക്രമണത്തിൽ 80 ലധികം പേർ കൊല്ലപ്പെട്ടതിനു പിന്നാലെയാണ് രാജ്യത്തെ നടുക്കി വീണ്ടും ആക്രമണം ഉണ്ടാകുന്നത്.

പോലീസ് കമാൻഡോകളും പാകിസ്ഥാൻ റേഞ്ചേഴ്സും സ്ഥലത്തെത്തിയിട്ടുണ്ടെന്ന് മന്ത്രി റാണാ സനാവുള്ള ജിയോ ടിവിയോട് പ്രതികരിച്ചു. പോലീസിന് ആവശ്യമായ എല്ലാ സഹായവും നൽകും. എട്ടോളം ഭീകരർ കെട്ടിടത്തിൽ തുടരുന്നതായി സ്ഥിരീകരണം ലഭിച്ചുവെന്നും അദ്ദേഹം അറിയിച്ചു. സ്ഫോടനത്തിൻ്റെയും ഏറ്റുമുട്ടലിൻ്റെയും ശബ്ദം കേട്ടതായി പ്രദേശവാസികൾ പ്രതികരിച്ചു. അതേസമയം ആക്രമണത്തെ പാകിസ്ഥാൻ പ്രധാനമന്ത്രി ഷഹബാസ് ഷെരീഫ് അപലപിച്ചു.