കുട്ടികളിലെ ക്യാൻസർ: ഈ ലക്ഷണങ്ങൾ അവഗണിക്കരുത്; ഡോക്ടർ പറയുന്നു

സ്ത്രീ പുരുഷ വ്യത്യാസമോ പ്രായഭേദമോ ഇല്ലാതെ കണ്ടുവരുന്ന രോഗമാണ് ക്യാൻസർ. ഇതിൽ കുട്ടികളിലെ ക്യാൻസർ അഥവാ Pediatric Cancer ഒരു പ്രധാനപ്പെട്ട ആരോഗ്യപ്രശ്നമായി ഇന്നും തുടരുന്നു. ഇന്ന് കാണപ്പെടുന്ന വിവിധ തരം ക്യാൻസറുകളിൽ 3% മുതൽ 4% വരെ പീഡിയാട്രിക് ക്യാൻസറാണ്. ഓരോ വർഷവും ഒന്ന് മുതൽ പത്തൊൻമ്പത് വയസ്സുള്ള കുട്ടികളിൽ ശരാശരി 400,000 പേർ ക്യാൻസർ ബാധിതരാവുന്നു എന്ന് ലോകാരോഗ്യ സംഘടന പറയുന്നു. ലുക്കീമിയ, ബ്രെയിൻ ക്യാൻസർ, ലിംഫോമ, വിവിധ തരം ട്യൂമറുകൾ തുടങ്ങിയവയൊക്കെ കുട്ടികളിൽ കൂടുതലായി കണ്ടുവരുന്നു.

കുട്ടികളിലെ ക്യാൻസർ സംബന്ധമായി അറിഞ്ഞിരിക്കേണ്ട ചില പ്രധാന കാര്യങ്ങളുണ്ട്.

കുട്ടികളിലെ ക്യാൻസർ

കുട്ടികളിൽ ഏറ്റവും സാധാരണമായി കണ്ടുവരുന്ന ക്യാൻസറുകൾ അക്യൂട്ട് ലുക്കീമിയയാണ് എന്ന് കോഴിക്കോട് ആസ്റ്റർ മിംസ് ആശുപത്രിയിലെ പീഡിയാട്രിക്ക് ഹേമറ്റോ ഓങ്കോളജി വിഭാഗത്തിൽ കൺസൾട്ടന്റ് ആയി പ്രവർത്തിക്കുന്ന ഡോ. കേശവൻ എം ആർ പറയുന്നു. സെൻട്രൽ നാഡീവ്യൂഹം മുഴകൾ, ലിംഫോമ, വിൽംസ് ട്യൂമർ, ന്യൂറോബ്ലാസ്റ്റോമ, ഓസ്റ്റിയോസാർക്കോമ പോലുള്ള അസ്ഥി മുഴകൾ എന്നിവയും കുട്ടികളിൽ കണ്ടുവരുന്നു. കുട്ടികളിൽ ഉണ്ടായിവരുന്ന ക്യാൻസറിന്റെ കാരണം കണ്ടുപിടിക്കപ്പെട്ടിട്ടില്ല. പക്ഷേ ജനിതകമാറ്റങ്ങളും പാരിസ്ഥിതിക ഘടകങ്ങളും ഒരു പങ്കുവഹിക്കുമെന്ന് ഗവേഷണങ്ങൾ സൂചിപ്പിക്കുന്നു.

കുട്ടികളിലെ ക്യാൻസർ ലക്ഷണങ്ങൾ

പീഡിയാട്രിക്ക് ക്യാൻസർ കുട്ടികളിൽ ഉണ്ടാക്കുന്ന ലക്ഷണങ്ങൾ പലതാണ്. ഉടലെടുക്കുന്ന ക്യാൻസറുകളനുസരിച്ച് പീഡിയാട്രിക് ക്യാൻസറിന്റെ ലക്ഷണങ്ങളും മാറും. ചില സാധാരണ ലക്ഷണങ്ങളിൽ ശരീരഭാരം കുറയുക, വിളർച്ച, ക്ഷീണം, സന്ധികളിൽ നീര് ഉണ്ടാവുക അല്ലെങ്കിൽ വേദനയുണ്ടാവുക, അണുബാധ മൂലമുണ്ടാകുന്ന പനി, അമിതമായ ചതവ്, തലവേദന എന്നിവയെല്ലാം ഉൾപ്പെടുന്നു. വയറിലും കഴുത്തിലും ഉണ്ടാകുന്ന മുഴ എന്നിവയും ഇതിൽ ഉൾപ്പെടും. നമ്മുടെ കുട്ടികളിൽ എന്തെങ്കിലും അസാധാരണമായ ലക്ഷണങ്ങൾ കണ്ടാൽ ഉടൻ തന്നെ വൈദ്യസഹായം ലാഭമാക്കേണ്ടത് പ്രധാനമാണ്, കാരണം നേരത്തെയുള്ള കണ്ടെത്തലും ചികിത്സയും ഫലം മെച്ചപ്പെടുത്തും, ഡോ. കേശവൻ പറയുന്നു.

കുട്ടികളിലെ ക്യാൻസറിന്റെ കാരണങ്ങൾ

പീഡിയാട്രിക് ക്യാൻസർ ഉടലെടുക്കുവാൻ പ്രത്യേകമായ ഒരു കാരണമില്ല. ഭൂരിഭാഗം കാരണങ്ങളും അജ്ഞാതമാണ്. ജനിതകമായ കാരണങ്ങൾ, പാരിസ്ഥിതിക വിഷവസ്തുക്കളുമായുള്ള സമ്പർക്കം, ചില രീതിയിലുള്ള അണുബാധകൾ എന്നിവയെല്ലാം ഇതിന്റെ ഭാഗമാവാം. കുട്ടികളിൽ ക്യാൻസർ രൂപപ്പെടുവാൻ റേഡിയേഷനുകൾ പ്രധാനമായ പങ്ക് വഹിക്കുന്നുണ്ട്.

കുട്ടികളോട് ഒരിക്കലും ഈ കാര്യങ്ങൾ പറയാൻ പാടില്ല

പീഡിയാട്രിക് ക്യാൻസർ എങ്ങനെ ചികിത്സിക്കാം

പരിചയസമ്പന്നരായ വിദഗ്ധരുടെ പരിചരണമാണ് പീഡിയാട്രിക് ക്യാൻസറിന് ആവശ്യം. സോളിഡ് ട്യൂമറിന് കീമോതെറാപ്പി, സർജിക്കലായ നീക്കം, റേഡിയേഷൻ തെറാപ്പി, മജ്ജ അല്ലെങ്കിൽ സ്റ്റെം സെൽ മാറ്റിവക്കൽ എന്നിവയുൾപ്പെടെ മൾട്ടി ഡിസിപ്ലിനറി ടീം മാനേജ്മെന്റ് ആവശ്യമാണ്. ഏതെങ്കിലും അവയവങ്ങളിലോ പേശികളിലോ ഉള്ള ക്യാൻസറിന്റെ മുഴകൾ നേരത്തെ കണ്ടുപിടിച്ചാൽ ശസ്ത്രക്രിയയിലൂടെ വളരെ വേഗം സുഖപ്പെടുത്താം. എന്നാൽ ക്യാൻസറിന്റെ മുഴകൾ ശരീരത്തിന്റെ മറ്റ് ഭാഗങ്ങളിലേക്ക് വ്യാപിച്ചിട്ടുണ്ടെങ്കിൽ കീമോതെറാപ്പിയോ റേഡിയേഷനോ ആവശ്യമായി വന്നേക്കും.

കുട്ടികളിലെ ക്യാൻസർ ഭേദമാക്കാൻ കഴിയില്ലേ?

പ്രത്യേകമായ പരിചരണത്തിലൂടെ പീഡിയാട്രിക് ക്യാൻസർ ഭേദമാക്കാം. ലക്ഷണങ്ങൾ തിരിച്ചറിഞ്ഞ് രോഗനിർണ്ണയം നേരത്തെ നടത്തുന്നത് ചികിത്സയുടെ ഫലം മെച്ചപ്പെടുവാൻ ആവശ്യമാണ്. ആദ്യ രണ്ട് വർഷത്തിലെ തെറാപ്പിയിൽ രോഗം ആവർത്തിക്കുവാനുള്ള സാധ്യതയുണ്ട്. അതിനാൽ തുടർച്ചയായുള്ള പരിചരണം ഇതിന് ആവശ്യമാണ്. ചികിത്സയ്ക്കുശേഷം ദീർഘകാല പ്രത്യാഘാതങ്ങൾക്ക് ഇടവരുത്താതെ കുട്ടികളെ സൂക്ഷ്മമായി നിരീക്ഷിക്കണം. വൈകിയുള്ള രോഗനിർണയവും ചികിത്സയും മൂലം ഉണ്ടാകുന്ന പ്രത്യാഘാതങ്ങളെപ്പറ്റി മാതാപിതാക്കളെ അവബോധവാന്മാരാക്കണം.

പീഡിയാട്രിക് ക്യാൻസർ കേവലം കുട്ടിയെ മാത്രമല്ല ഒരു കുടുംബത്തെ മൊത്തം ഉലച്ചുകളയുന്ന വിഷമകരമായ യാഥാർഥ്യമാണ്. എന്നാൽ കൃത്യമായി ജനങ്ങളിൽ അവബോധം വളർത്തുന്നതിലൂടെയും, രോഗം ബാധിച്ച കുട്ടികൾക്ക് സാധാരണ ജീവിതത്തിലേക്ക് മടങ്ങി വരുവാനുള്ള ഊർജം നൽകാൻ സാധിക്കുന്നതിലൂടെയും ഈ അവസ്ഥയെ സധൈര്യം നേരിടാൻ സാധിക്കും.

വിവരങ്ങൾക്ക് കടപ്പാട്:

Dr. Kesavan M. R. (Consultant – Paediatric Hemato Oncology, Aster MIMS, Calicut)