സിംഗിൾ ലൈഫിനോട് വിരക്തി തോന്നിയിട്ടൊന്നുമല്ല, കൂട്ടുകാരൊക്കെ കെട്ടുന്നത് കണ്ടിട്ട് അസൂയ തോന്നിയിട്ടുമില്ല, കുറച്ച് നാളായി ഒരു പാർട്ണർ വേണമെന്ന് തോന്നി തുടങ്ങിയിട്ടുണ്ട്. അങ്ങനെയാണ് പേരെടുത്ത മാട്രിമോണി സൈറ്റിൽ പ്രൊഫൈൽ ക്രിയേറ്റ് ചെയ്യുന്നത്. ആവേശം ഒട്ടും കുറഞ്ഞില്ല. ഒരു പ്രൊഫൈൽ പോരാ എന്ന് തോന്നി, മൂന്ന് മാട്രിമോണി സൈറ്റുകളിലാണ് പ്രൊഫൈൽ ക്രിയേറ്റ് ചെയ്തത്. രണ്ടെണ്ണത്തിൽ പ്രീമിയം മെമ്പർഷിപ്! ഒപ്പം ജീവിക്കാൻ വരുന്ന കോന്തൻ ഏത് വഴിയാണ് വരുന്നതെന്ന് അറിയില്ലല്ലോ! ഇരിക്കട്ടെ എല്ലാത്തിലും ഓരോ അക്കൗണ്ട്!
ഫോട്ടോ ഒക്കെ ഇട്ട്, ഡിസ്ക്രിപ്ഷൻ അടിപൊളിയായി എഴുതി പ്രൊഫൈൽ മനോഹരമാക്കി. ഫസ്റ്റ് ഇമ്പ്രഷൻ ആണല്ലോ ബെസ്റ്റ് ഇമ്പ്രഷൻ! ഒന്ന് രണ്ട് ദിവസം കഴിഞ്ഞപ്പോഴേയ്ക്കും ഇന്ററസ്റ്റ് മെസ്സേജുകൾ വന്നുതുടങ്ങി. ആരൊക്കെ തന്റെ പ്രൊഫൈൽ നോക്കി, ആരൊക്കെ ഫോട്ടോ നോക്കി, ആരൊക്കെ ഫോൺ നമ്പർ നോക്കി, ആരൊക്കെ കോണ്ടാക്ട് ചെയ്തു, ആരൊക്കെ തന്റെ പ്രൊഫൈലിൽ ഇന്ററസ്റ്റ് കാണിച്ചു, തുടങ്ങിയ ഓരോന്നും അറിയാം. കൊള്ളാല്ലോ പരിപാടി. സോഷ്യൽ മീഡിയയിൽ ഫോട്ടോ പോസ്റ്റ് ചെയ്യുമ്പോൾ ലൈക്കും കമ്മന്റും വരുമ്പോൾ കിട്ടുന്ന ഒരു സുഖം!
വൈകിട്ട് ജോലി കഴിഞ്ഞ് വീട്ടിൽ തിരിച്ചെത്താനായി തിരക്ക്. കാരണം എല്ലാ നോട്ടിഫിക്കേഷനും നോക്കണം, ആരേലും മെസ്സേജ് അയച്ചിട്ടുണ്ടെങ്കിൽ വായിക്കണം, അവരുടെ പ്രൊഫൈൽ നോക്കണം, വന്നതൊന്നും ഇഷ്ടപ്പെട്ടില്ലെങ്കിൽ തിരഞ്ഞ് പിടിച്ച് അങ്ങോട്ടേയ്ക്ക് കോണ്ടാക്ട് ചെയ്യണം, തിരക്കോട് തിരക്ക്. സമയം പോരാ ഒന്നിനും. ഓഫീസിൽ പോലും ഇത്ര കൃത്യതയോടെ ജോലി ചെയ്യാറുണ്ടോ എന്ന് സംശയിക്കേണ്ടിയിരിക്കുന്നു.
ഇത്ര ഒക്കെ ഇന്ററസ്റ്റ് കിട്ടിയിട്ടും ഒരു വൈബ് കിട്ടുന്ന ഒരു പ്രൊഫൈലും കണ്ടില്ല.
നിരാശ തോന്നിയില്ല. സമയമെടുക്കും. മാട്രിമോണി സൈറ്റുകൾ നോക്കാനുള്ള ആവേശം കുറയാത്തത് കൊണ്ട് തന്നെ, ഇടയ്ക്കിടയ്ക്ക് പ്രൊഫൈൽ എഡിറ്റ് ചെയ്ത് അപ്ഡേറ്റ് ചെയ്തിടും. മാട്രിമോണി മെസ്സേജ് നോട്ടിഫിക്കേഷൻ കൊണ്ട് പേഴ്‌സണൽ ഇമെയിൽ ഇൻബോക്സ് നിറഞ്ഞു കവിയുന്നുണ്ട്. വന്ന ഓരോ നോട്ടിഫിക്കേഷനും സമയമെടുത്ത് പരിശോധിച്ചു. ഒന്നും അങ്ങോട്ട് ബോധിച്ചില്ല, അതാണ് വാസ്തവം.
പുതിയ സൗഹൃദങ്ങൾ നെയ്തെടുക്കാം ശ്രദ്ധയോടെ
രാത്രിയെന്നോ പകലെന്നോ ഇല്ലാതെ ഫോണിലേക്ക് നിരന്തരം കോളുകളും മെസ്സേജുകളും. അപരിചിതമായ നമ്പറിൽ നിന്ന് കോളുകൾ ആദ്യമൊക്കെ അറ്റൻഡ് ചെയ്തു. പതിവായതോടെ കയ്യിലൊതുങ്ങാത്ത അവസ്ഥ. പിന്നെ എടുക്കാതായി. പ്രധാനപ്പെട്ട കോളുകൾ പോലും എടുക്കാൻ കഴിയാത്ത അവസ്ഥ. വാട്സാപ്പ് മെസ്സേജുകൾ, ഇൻസ്റ്റാഗ്രാം, ഫെയ്‌സ്‌ബുക്ക്‌ എന്നുവേണ്ട എല്ലാ സ്ഥലങ്ങളിലും പേര് തപ്പിയെടുത്ത് മെസ്സേജുകൾ. ‘യഥാർത്ഥ പ്രശ്നങ്ങൾ’ തുടങ്ങുകയായി.
ചില നമ്പറുകളിൽ നിന്ന് നിരന്തരം കോളുകളും മെസ്സേജുകളുമൊക്കെ വന്ന് തുടങ്ങി. ബ്ലോക്ക് ചെയ്‌താൽ വേറെ നമ്പറിൽ നിന്നായി വിളികൾ. എത്രയെന്ന് വെച്ചാ റിപ്പോർട്ട് ചെയ്യുക?
ഒരിക്കൽ ഒരു വിരുതൻ പറഞ്ഞ മറുപിടിയാണ് രസകരം.
ശല്യം സഹിക്കാൻ വയ്യാതായപ്പോൾ നിരന്തരം വിളിച്ച് ശല്യപ്പെടുത്തുന്ന ആളുടെ നമ്പർ ഒരു ആൺ സുഹൃത്തിന് കൈമാറി ഡീൽ ചെയ്യാൻ ആവശ്യപ്പെട്ടിരുന്നു. സുഹൃത്ത് അയാളെ വിളിച്ച് ഇനി വിളിക്കേണ്ട, ഞങ്ങൾക്ക് താല്പര്യമില്ല എന്നൊക്കെ പറഞ്ഞു വെച്ചു. രണ്ട് ദിവസം കഴിഞ്ഞപ്പോൾ വീണ്ടും സുഹൃത്തിന്റെ നമ്പറിലേക്ക് അയാളുടെ വിളി.
താല്പര്യമില്ല എന്ന് പറഞ്ഞതല്ലേ എന്ന് അങ്ങോട്ട് ചോദിക്കുമ്പോൾ തന്ന മറുപിടി കേട്ട് സുഹൃത്ത് പോലും ഞെട്ടിപ്പോയി.
“അതേ… നിങ്ങൾ ആരാണെന്ന് എനിക്ക് മനസിലായില്ല. ഞാനിങ്ങനെ കുറെ പേരോട് ചോദിക്കുന്നത് കൊണ്ട് ഓർമ്മ വരുന്നില്ല. നിങ്ങളുടെ പേരൊന്ന് പറയാമോ?”
അതായത് വിളിക്കുന്ന ആൾക്ക് ആരെയാ വിളിക്കുന്നതെന്ന് പോലും അറിയില്ലെന്ന് ചുരുക്കം. എന്താല്ലേ?
Love Quotes: പ്രണയം പങ്കുവയ്ക്കാം പ്രിയപ്പെട്ട വരികളിലൂടെ
കാര്യങ്ങൾ ഇതുകൊണ്ടൊന്നും അവസാനിച്ചില്ല. പല സുഹൃത്തുക്കളും ചോദിച്ചത് എന്തിനാണ് സ്വന്തം നമ്പർ കൊടുത്തത്, അച്ഛന്റെയോ അമ്മയുടേയോ നമ്പർ കൊടുക്കായിരുന്നില്ലേ, എന്നൊക്കെയാണ്. തന്നെ കെട്ടാൻ പോകുന്ന ആളോട് താൻ അല്ലെ സംസാരിക്കേണ്ടത് എന്നാണ് നമിതയുടെ പക്ഷം. മാത്രവുമല്ല, ഇങ്ങനെയൊരു ടോർച്ചർ പ്രതീക്ഷിച്ചല്ലല്ലോ അക്കൗണ്ട് ഉണ്ടാക്കിയത്?
പകലെന്നോ രാത്രിയെന്നോ ഇല്ലാതെ വരുന്ന കോളുകൾ മൂലം ഫോൺ പലപ്പോഴും സൈലന്റ് മോഡിലേക്ക് മാറ്റേണ്ടി വന്നു. അങ്ങനെ ചെയ്തപ്പോൾ വേണ്ട പല കോളുകളും മിസ് ആകുകയും ചെയ്തു.
മാട്രിമോണി പ്രൊഫൈലിൽ അപ്ഡേറ്റ് ചെയ്ത നമിതയുടെ ചിത്രങ്ങൾ സ്വന്തം ചിത്രങ്ങളുമായി ചേർത്ത് വെച്ച് ഒരാൾ അവൾക്ക് അയച്ചു. പാതിരാത്രി അശ്ലീല മെസ്സേജുകൾ അയച്ച് സുഖം കണ്ടെത്തുന്നു ചിലർ. താൻ സ്വന്തമായെന്ന തരത്തിലുള്ള പെരുമാറ്റമാണ് ചിലരുടേത്. ഫോണിൽ കിട്ടിയില്ലെങ്കിൽ ഫെയ്‌സ്‌ബുക്കിലും ഇൻസ്റ്റാഗ്രാമിലുമെല്ലാം മെസ്സേജ് വരാൻ തുടങ്ങി. അക്കൗണ്ടുകൾ പ്രൈവറ്റ് ആക്കിയെങ്കിലും മെസ്സേജുകൾക്ക് പഞ്ഞമൊന്നുമുണ്ടായില്ല.
തനിക്ക് ഇഷ്ടപ്പെട്ട ആളെ കണ്ടെത്താനുള്ള നമിതയുടെ ആഗ്രഹം ഒടുക്കം അവളെ കൊണ്ടുചെന്നെത്തിച്ചത് കടുത്ത പിരിമുറുക്കത്തിലേക്കാണ്. മറ്റാർക്കും ഒന്നും സംഭവിച്ചില്ല. എങ്ങോട്ടേയ്ക്കെങ്കിലും ഓടി പോലെയോ എന്ന് വരെ ആലോചിച്ചു.
വലിയ പ്രതീക്ഷയോടെ തയ്യാറാക്കിയ പ്രൊഫൈലുകൾ അവസാനം ഡിലീറ്റ് ചെയ്യേണ്ടി വന്നു, പ്രിയതമനെ കണ്ടെത്തിയതുമില്ല. കൂട്ടുകാരൊക്കെ ഇടയ്ക്ക് ഇത് പറഞ്ഞ് കളിയാക്കാറുണ്ടെങ്കിലും ഇത് കൊടുത്ത ട്രോമ ചെറുതൊന്നുമല്ല. ആരെങ്കിലും ഒരു നിമിത്തം പോലെ വരുമ്പോൾ വരട്ടെ, എന്തായാലും ഇനി മാട്രിമോണി സൈറ്റിലൂടെ പാർട്ണറെ കണ്ടെത്തേണ്ട എന്നവൾ തീരുമാനിച്ചിരുന്നു.
കല്യാണമൊന്നുമായില്ലേ, നല്ല ആലോചന ഒന്നും വരുന്നില്ലേ, മെട്രോമോണി സൈറ്റിൽ കൊടുക്കാരുന്നില്ലേ എന്നൊക്കെയുള്ള കുശലാന്വേഷണങ്ങൾ നടത്തുന്നവരുണ്ടോ അറിയുന്നു ഇത്തരം സൈറ്റുകൾ വഴിയുള്ള ലീലാവിലാസങ്ങൾ!
