അപ്രതീക്ഷിതമായ ഒരിടത്ത് നിത്യാനന്ദയുടെ സാന്നിധ്യം കണ്ട് ഞെട്ടിയിരിക്കുകയാണ് ലോകം. ഐക്യരാഷ്ട്രസഭയുടെ സാമൂഹ്യ-സാംസ്കാരിക-സാമ്പത്തിക സമിതിയുടെ യോഗത്തിൽ സ്വാമി നിത്യാനന്ദയുടെ, കൈലാസ എന്ന് പേരുള്ള സാങ്കല്പിക രാജ്യത്തിന്റെ പ്രതിനിധിയും പങ്കെടുത്തു സംസാരിച്ചത് ഇന്ത്യക്കാർ കൗതുകത്തോടെയാണ് വീക്ഷിക്കുന്നത്. യുണൈറ്റഡ് കിങ്ഡം ഓഫ് കൈലാസ എന്ന് ഈ സമിതിയിൽ രജിസ്റ്റർ ചെയ്തിരിക്കുന്ന രാജ്യത്തിന്റെ പ്രതിനിധിയായി വിജയപ്രിയ നിത്യാനന്ദ എന്ന സ്വാമിനിയാണ് യോഗത്തിൽ പങ്കെടുത്തത്. സ്വയം പ്രഖ്യാപിത ആൾദൈവമായ നിത്യാനന്ദ തന്റെ ട്വിറ്ററിലൂടെ തന്നെയാണ് ലോകത്തെ ഈ വാർത്ത ആദ്യം അറിയിച്ചത്. സാമൂഹ്യ സാംസ്കാരിക അവകാശങ്ങൾക്ക് വേണ്ടിയുള്ള പത്തൊമ്പതാമത് യോഗത്തിൽ യുണൈറ്റഡ് കിങ്ഡം ഓഫ് കൈലാസയുടെ ബ്രാൻഡ് അംബാസിഡർ എന്ന പദവി വഹിച്ചു കൊണ്ടാണ് വിജയപ്രിയ പങ്കെടുത്തത്. ഹിന്ദുക്കളുടെ പരമാധികാര രാഷ്ട്രമാണ് കൈലാസമെന്നും മഹത്തായ ഹിന്ദു പാരമ്പര്യത്തിന്റെ വീണ്ടെടുപ്പാണ് നടക്കുന്നതെന്നും ഇവർ യോഗത്തിൽ പറഞ്ഞു. ആദി ശിവയോഗിമാരുടെ കാർഷികവൃത്തി ഉൾപ്പെടെ പത്തായിരത്തിലധികം വരുന്ന പാരമ്പര്യ ഹിന്ദു ആചാരങ്ങളുടെ പുനരുജ്ജീവനമാണ് നിത്യാനന്ദയുടെ പദ്ധതിയെന്നും ഇവർ വിശദീകരിക്കുന്നു.
എന്നാൽ പാരമ്പര്യത്തിന്റെ ഈ വീണ്ടെടുപ്പിന് നിത്യാനന്ദയുടെ ജന്മനാടായ ഇന്ത്യ എതിരാണെന്നും, ഒരു മനുഷ്യനെന്ന നിലയിൽ ജീവിക്കാൻ അവിടുത്തെ നിയമം അനുവദിക്കുന്നില്ലെന്നും വിജയപ്രിയ പറയുന്നു. അന്തർദേശീയ-ദേശീയ തലങ്ങളിൽ നിത്യാനന്ദയുടെയും രണ്ടുലക്ഷത്തോളം വരുന്ന അദ്ദേഹത്തിന്റെ അനുയായികളുടെയും അവകാശങ്ങൾ സംരക്ഷിക്കാനും അവർക്കെതിരായ നിയമപീഡനങ്ങൾ തടയാനും കഴിയണമെന്നും വിജയപ്രിയ പറഞ്ഞു ചുരുക്കുന്നു.
2019 മുതൽ നിത്യാനന്ദ ഇന്ത്യയിലില്ല. ബലാൽസംഗങ്ങളും ബാലപീഡനങ്ങളും ഉൾപ്പെടെ നിരവധിയായ കേസുകളുടെ ഘോഷയാത്രയ്ക്കിടെ ഒരു ഇടക്കാല ജാമ്യമെടുത്ത് മുങ്ങിയതാണ്. പിന്നീട് ഈ ആൾദൈവത്തിന്റെ ഭൗതിക സാന്നിധ്യം ആരും അറിഞ്ഞിട്ടില്ല. അറിഞ്ഞവർ പറഞ്ഞിട്ടുമില്ല. സോഷ്യൽ മീഡിയയിലെ വെർച്വൽ ലോകത്താണ് സ്വാമി പ്രത്യക്ഷപ്പെടാറ്. ഒരു വർഷം മുമ്പ് ഹിന്ദുവിന്റെ സകല പാരമ്പര്യവും പേറുന്ന കൈലാസ എന്ന സ്വതന്ത്ര പരമാധികാര രാഷ്ട്രം താൻ സ്ഥാപിച്ചെന്നും സ്വന്തമായി കറൻസി അച്ചടിച്ചിറക്കിയെന്നും സോഷ്യൽ മീഡിയയിലൂടെ നിത്യാനന്ത ലോകത്തെ അറിയിച്ചു. ഒരു ‘റിസർവ് ബാങ്ക്’ പണിപ്പുരയിലാണെന്നും ആൾ ദൈവത്തിന്റെ പ്രസ്താവന ഉണ്ടായിരുന്നു. ലോകത്തിലെ ഏറ്റവും മഹത്തായ ഹിന്ദു രാഷ്ട്രമെന്ന പേരിൽ കൊടിയും അനുബന്ധ ഉപാധികളും വരെ ഇയാൾ ഇറക്കി കഴിഞ്ഞു.
‘ഞാൻ മുങ്ങിയതല്ല; ഇസ്രായേലിലെ കൃഷി രീതികൾ കണ്ടും കേട്ടും പഠിച്ചു; അവിടുത്തെ കാർഷികമേഖല ഇന്ത്യയെപ്പോലെ ദുരിതം നിറഞ്ഞതല്ല’: ബിജു കുര്യൻ സംസാരിക്കുന്നുസോഷ്യൽ മീഡിയയിൽ നിരന്തരം കോമാളി ചേഷ്ടകളോടെ പ്രത്യക്ഷപ്പെട്ട് ട്രോളുകൾക്ക് വിധേയമാകുന്ന, ഗുരുതരമായ കുറ്റകൃത്യങ്ങൾ ചെയ്ത ഒരു കുറ്റവാളി, ലോക കുറ്റാന്വേഷണ സംവിധാനങ്ങളെ വെല്ലുവിളിച്ച് മറഞ്ഞിരിക്കുകയാണ്. ഇക്വഡോറിനടുത്തോ ട്രിനിഡാഡിനടുത്തോ ഒരു ദ്വീപ് തന്നെ വിലയ്ക്ക് വാങ്ങി അതിനെ സാങ്കൽപ്പിക രാജ്യമാക്കി മാറ്റിയിരിക്കുകയാണെന്ന സംശയം ബലപ്പെട്ടു വരികയാണ്.
തിരുവണ്ണാമലൈ ക്ഷേത്രത്തിൽ 1990-കളിൽ ഭിക്ഷയെടുത്ത് ജീവിച്ചിരുന്ന ഒരു സാധാരണ ആത്മാന്വേഷിയിൽ നിന്നും ഇന്ന് കാണുന്ന നിത്യാനന്ദ എന്ന ആൾ ദൈവത്തിന്റെ ജീവിതത്തിലേക്ക് സംഭവ ബഹുലമായ തട്ടിപ്പുകളുടെയും കുറ്റകൃത്യങ്ങളുടെയും ചെറുത്തുനിൽപ്പുകളുടെയും ഒക്കെ നീണ്ട കഥകളുണ്ട്. പതിനേഴാമത്തെ വയസ്സിൽ ഉത്തരേന്ത്യയിലേക്ക് നടത്തിയ സന്യാസയാത്രയാണ് ഇയാളുടെ ജീവിതത്തിലെ ആദ്യ വഴിത്തിരിവ്. ആത്മീയജ്ഞാനം കൈവരിച്ചെന്ന് പറഞ്ഞ് തിരുവണ്ണാമലയിൽ തിരിച്ചെത്തിയ ഇയാൾ ഭക്തരുടെ ഒരു സംഘത്തെ തന്നെ അവിടെ നിർമ്മിച്ചെടുത്തു. ഒരിക്കൽ അവിടെ നിന്നും പെരുമാറ്റ പ്രശ്നത്തിന്റെ പേരിലെന്ന് സംശയിക്കുന്ന ഒരു സംഭവത്തിൽ അടി കൊണ്ട് പുറത്താക്കപ്പെടുന്നു. നിഷ്കാസിതനായതോടെ മറ്റെന്ത് ചെയ്യണമെന്നറിയാതെ നിൽക്കുന്ന നിത്യാനന്ദയിലേക്ക് ബാംഗ്ലൂർ സ്വദേശിയായ ഒരു ചെട്ടിയാർ എത്തുന്നതോടെയാണ് ഇയാളുടെ വാണിജ്യാസ്ഥാനത്തിലുള്ള ആത്മീയ വ്യാപാരം ആരംഭിക്കുന്നത്.
ബാംഗ്ലൂർ കേന്ദ്രീകരിച്ച് ചെട്ടിയാരുടെ ബന്ധുവിനു വേണ്ടി രോഗവിമുക്തിക്കായി പ്രാർത്ഥിക്കാൻ ലഭിക്കുന്ന അവസരം ചെട്ടിയാരുടെ വീട്ടിലെ ആശ്രമം സ്ഥാപിക്കുന്നതുവരെ എത്തിനിൽക്കുന്നു. ഇവിടെ വെച്ചാണ് നിത്യാനന്ദയ്ക്ക് നൽകുന്ന പഴകാണിക്കയായി പൈനാപ്പിൾ മാറുന്നത് ഒരു സ്ത്രീ കുട്ടികൾ ഉണ്ടാവുന്നതിനു വേണ്ടി പ്രാർത്ഥിക്കുവാൻ ഇയാളുടെ അടുക്കൽ വരികയും ആ സ്ത്രീ കൊണ്ടുവന്ന പഴക്കൂട്ടയിൽ തൊട്ട് നിത്യാനന്ദ പ്രാർത്ഥിക്കുകയും ചെയ്തു. തൊട്ടത് പൈനാപ്പിളിന്റെ മുകളിലായിരുന്നു. സ്ത്രീ പിന്നീട് ഗർഭിണിയായി. ഇതോടെ നിത്യാനന്ദയുടെ പേരും പെരുമയും വർദ്ധിച്ചു. എന്നാൽ തിരുവണ്ണാമലയിൽ സംഭവിച്ചത് പോലെ കൈപ്രഹരം ബാംഗ്ലൂരിലും ആൾദൈവത്തെ കാത്തുനിന്നു. അവിടെ നിന്ന് രക്ഷപ്പെട്ട് ഈറോഡിനടുത്ത് കാവേരിയുടെ കരയിൽ ഒരു ആശ്രമം പണിതതോടെയാണ് നിത്യാനന്ദ ഇന്നത്തെ നിലയിലെത്തിയത്.
ആത്മീയതയിൽ ലൈംഗികത നിറച്ച് ചില രചനകൾ നടത്തി മാഗസിനുകളിൽ പ്രസിദ്ധീകരിക്കാൻ തുടങ്ങി. ബാംഗ്ലൂർ കേന്ദ്രീകരിച്ച ഒരു സ്വകാര്യ കേബിൾ നെറ്റ് വർക്കിന് ഇതേ വിഷയത്തിൽ അഭിമുഖങ്ങൾ നൽകാൻ തുടങ്ങിയതോടെ ആശ്രമത്തിലേക്ക് ജനങ്ങളുടെ പെരുപ്പമുണ്ടായി. എന്നാൽ ദക്ഷിണേന്ത്യയിൽ നിത്യാനന്ദ കുപ്രസിദ്ധനാകുന്നത് 2010-ൽ പുറത്തിറങ്ങിയ ഒരു അശ്ലീല വീഡിയോ ടേപ്പിന്റെ പേരിലാണ്. മലയാളം ഉൾപ്പെടെ നിരവധി അഭിനയിച്ച ഒരു നടി ഇയാളുടെ ആശ്രമവാസിയായി പ്രണയനിർവാ(മാ)ണ പരിപാടിയിൽ ഏർപ്പെടുന്ന രംഗമായിരുന്നു അത്. ഇതോടുകൂടി നിത്യാനന്ദക്കെതിരെ ആരോപണങ്ങളുടെ പെരുമഴയുണ്ടായി.
ആർഎസ്എസ് ബന്ധമുള്ള ‘ഹിന്ദുസ്ഥാന്‍ സമാചാർ’ പ്രസാർ ഭാരതിയുടെ ഏക വാർത്താ സോഴ്സ്; പ്രതികരിച്ച് സിപിഎം; മിണ്ടാതെ കോൺഗ്രസ്വീഡിയോ ടേപ്പ് പുറത്തായതിനെ തുടർന്ന് ആശ്രമത്തിലെ ചില അന്തേവാസികൾക്ക് ക്രൂരമായ പീഡനം നേരിടേണ്ടി വന്നു. ഒരു പെൺകുട്ടി കൊല്ലപ്പെടുകയും ചെയ്തു. അവരുടെ അമ്മ ഝാൻസി റാണി ഈ ആശ്രമം തടവറയാണെന്ന് പറഞ്ഞ് രംഗത്തെത്തി. ഹൃദയാഘാതം കൊണ്ടാണ് പെൺകുട്ടി മരണപ്പെട്ടതെന്ന് പോസ്റ്റ്മോർട്ടം റിപ്പോർട്ട് പുറത്തുവരുന്നു. ബാംഗ്ലൂർ കേന്ദ്രീകരിച്ചുള്ള നിത്യാനന്ദയുടെ ആശ്രമമാണ് പോസ്റ്റ്മോർട്ടത്തിന് നേതൃത്വം നൽകിയത്. കുട്ടിയുടെ അമ്മ റീ പോസ്റ്റ്മോർട്ടം നടത്താൻ തീരുമാനിച്ചു. എന്നാൽ റീപോസ്റ്റുമോർട്ടം ചെയ്യാൻ ആന്തരികാവയവങ്ങൾ ഒന്നും തന്നെ മൃതദേഹത്തിലുണ്ടായിരുന്നില്ല. ആ നിയമ പോരാട്ടം ഇപ്പോഴും നടക്കുന്നു.
നിരവധി തവണ തന്നെ ബലാത്സംഗം ചെയ്തെന്ന ഒരു അന്തേവാസിയുടെ മൊഴിയും അവരെ വധിക്കാനുള്ള ശ്രമങ്ങളും നിത്യാനന്ദയുടെ കുരുക്കു മുറുക്കി. ലെനിൻ കറുപ്പൻ എന്ന ഇയാളുടെ ആദ്യ ഡ്രൈവറുടെ മൊഴിയും അയാൾക്കെതിരായി. സമാന്തരമായി വിവിധ ആശ്രമങ്ങളിൽ ബാലപീഡനം ഉൾപ്പെടെ നിരവധി കേസുകൾ രജിസ്റ്റർ ചെയ്യപ്പെട്ടു. ഹരിയാനയിൽ ഒളിവിൽ കഴിയവെ ഈ ആൾ ദൈവത്തെ പോലീസ് അറസ്റ്റ് ചെയ്തു. 2019-ൽ ജാമ്യത്തിലിറങ്ങിയ നിത്യാനന്ദ നേപ്പാൾ വഴി രാജ്യം വിട്ടെന്നാണ് കണക്കുകൂട്ടുന്നത്. പിന്നീട് സാമൂഹ്യ മാധ്യമങ്ങളിലൂടെ മാത്രമേ ഇയാൾ പ്രത്യക്ഷപ്പെട്ടിട്ടുള്ളൂ. നിഗൂഢത നിറയുന്ന ആൾദൈവം വീണ്ടും വാർത്തകളിൽ ഇടം പിടിക്കുകയാണ്. ജീവിതത്തിന്റെ ഉത്കണ്ഠകൾ മാറ്റിവയ്ക്കാനെത്തുന്ന ഒട്ടനവധി വരെ കെണിവെച്ചു പിടിക്കുന്ന വേട്ടക്കാരന്റെ കൗശലത്തോടെ നിത്യാനന്ദ ഈ ഭൂമിയിൽ എവിടെയോയിരുന്ന് ഇതൊക്കെ കണ്ട് ചിരിക്കുന്നുണ്ടാവും.
