ബെം​ഗളൂരിലേക്ക് വെറും അഞ്ചു മണിക്കൂർ ദൂരം മാത്രം; മൈസൂരു എക്സ്പ്രസ് വേ ടോൾ ബൂത്ത് തുറന്നു; നിരക്കുകൾ ഇങ്ങനെ

119 കിലോമീറ്റർ ദൈർഘ്യമുള്ള എക്‌സ്പ്രസ് വേയുടെ ബെംഗളൂരുവിലെ കുമ്പൽഗോഡ് മുതൽ മണ്ഡ്യയിലെ നിദ്ദഘട്ട വരെയുള്ള 55.63 കിലോമീറ്ററിലെ ടോൾ ചാർജുകളാണ് ദേശീയ ഹൈവേ അതോറിറ്റി പ്രഖ്യാപിച്ചിരിക്കുന്നത്. രാമനഗര ജില്ലയിലെ ബിഡദി കണമിണിക്കെയിൽ രണ്ടിടങ്ങളിലായാണ് ടോൾ ബുത്തുകൾ തയ്യാറാക്കിയിരിക്കുന്നത്. ഇതോടെ വടക്കൻ കേരളത്തിൽ നിന്നും ബെംഗളൂരുവിലേക്കുള്ള ദൂരം കുറയ്ക്കുന്നതിന് സഹായിക്കും.

ബെംഗളൂരു ഭാഗത്തു നിന്നും വരുന്ന വാഹനങ്ങൾക്ക് ബിഡദി കണമിണിക്കെയിലും മൈസൂരു ഭാഗത്തു നിന്നും വരുന്ന വാഹനങ്ങൾക്ക് വേണ്ടി ശേഷഗിരിഹള്ളിയിലുമാണ് ടോൾ ബൂത്തുകൾ ക്രമീകരിച്ചിരിക്കുന്നത്.

8,172 കോടി രൂപ ചെലവഴിച്ച് നിർമ്മിച്ച 10 വരി ദേശീയപാത മാർച്ച് 11ന് പ്രധാനമന്ത്രി നരേന്ദ്ര മോദിയാണ് ഉദ്ഘാടനം ചെയ്യുന്നത്. പുതിയ പാത യാഥാർദ്ധ്യമാകുന്നതോടെ 118 കിലോമീറ്റർ ദൂരം താണ്ടുന്നതിനുള്ള യാത്രാസമയം ഒരു മണിക്കൂർ 10 മിനിറ്റായി ചുരുങ്ങും.

നിദ്ദഘട്ട – മൈസൂരു 61 കിലോമീറ്റർ ദൂരത്തെ കിലോമീറ്റർ ദൂരത്തെ ടോൾ പിരിവ് ഉദ്ഘാടനത്തിന് ശേഷം ആരംഭിക്കുമെന്ന് എൻഎച്ച്എഐ പ്രൊജക്ട് ഡയറക്ടർ ബി ടി ശ്രീധർ പറഞ്ഞു.

ഈ പാതയിലെ ഒറ്റയാത്രയ്ക്കുള്ള ഫീസ് വാഹന വിഭാഗത്തിന്റെ അടിസ്ഥാനത്തിൽ 135 രൂപ മുതൽ 880 രൂപ വരെയാണ് ഈടാക്കുക. വിശദമായ ടോൾ നിരക്കുകൾ ഇങ്ങനെ,

കാർ, ജീപ്പ്, വാൻ – ഒരു വശത്തേക്ക് 135 രൂപ, ഇരുവശങ്ങളിലേക്കും 205 രൂപ, പ്രതിമാസ പാസ് 4525 രൂപ

ലൈറ്റ് കൊമേഴ്സൽ വെഹിക്കിൾ, ഗുഡ്സ് വെഹിക്കിൾ, മിനി ബസ് – ഒരു വശത്തേക്ക് 220 രൂപ, ഇരുവശങ്ങളിലേക്കും 330 രൂപ, പ്രതിമാസ പാസ് 7315 രൂപ

ബസ്, ലോറി – ഒരു വശത്തേക്ക് 460 രൂപ, ഇരുവശങ്ങളിലേക്കും 690 രൂപ, പ്രതിമാസ പാസ് 15,325 രൂപ

കൊമേഴ്സ്യൽ വെഹിക്കിൾ – ഒരു വശത്തേക്ക് 500 രൂപ, ഇരുവശങ്ങളിലേക്കും 750 രൂപ, പ്രതിമാസ പാസ് 16,715 രൂപ

ഹെവി കൺസ്ട്രക്ഷൻ വെഹിക്കിൾ, എർത്ത് മൂവിങ് എക്യുപ്മെന്റ് – ഒരു വശത്തേക്ക് 720 രൂപ, ഇരുവശങ്ങളിലേക്കും 1,080 രൂപ, പ്രതിമാസ പാസ് 24,030 രൂപ

7 ആക്സിലിൽ കൂടുതലുള്ള ഓവർസൈസ്ഡ് വെഹിക്കിൾ – ഒരു വശത്തേക്ക് 880 രൂപ, ഇരുവശങ്ങളിലേക്കും 1,315 രൂപ, പ്രതിമാസ പാസ് 29,255 രൂപ

Also Read : കടുവ, കാട്ടാന കണക്കെടുപ്പ് ആരംഭിക്കുന്നു; നടത്തുന്നത് ഫീൽഡ് തല പരിശോധന: മന്ത്രി

അതേസമയം, ടോൾ പ്ലാസ സ്ഥിതി ചെയ്യുന്ന രാമനഗര ജില്ലയിൽ രജിസ്റ്റർ ചെയ്തിരിക്കുന്ന വാഹനങ്ങൾക്ക് തിരക്കിൽ ഇളവുണ്ടാകും. കാർ, ജീപ്പ്, വാൻ എന്നിവയ്ക്ക് 70 രൂപയാണ് ലൈറ്റ് കൊമേഴ്ഷ്യൽ ബസ് അടക്കമുള്ള വാഹനങ്ങൾക്ക് 110, 230 രൂപയുമാണ് ഇരുവശങ്ങളിലേക്കും ഈടാക്കുക.

Read Latest National News and Malayalam News