തിരിച്ചറിയല്‍ കാര്‍ഡുകള്‍ നഷ്ടപ്പെട്ടാല്‍ എന്തു ചെയ്യണം?
രാജ്യത്തിനകത്ത് വെച്ചോ പുറത്തു വച്ചോ പ്രവാസികളുടെ പാസ്പോര്‍ട്ടുകളോ തിരിച്ചറിയല്‍ കാര്‍ഡുകളോ നഷ്ടപ്പെടുകയോ കേടുപാടുകള്‍ സംഭവിക്കുകയോ ചെയ്താലുള്ള നടപടിക്രമങ്ങള്‍ പുതിയ പ്രമേത്തില്‍ ഉള്‍പ്പെടുത്തിയിട്ടുണ്ട്. ഇതുപ്രകാരം പാസ്പോര്ട്ടോ തിരിച്ചറിയല്‍ കാര്‍ഡോ ഇവ രണ്ടുമോ നഷ്ടപ്പെട്ടാലും പ്രവാസികള്‍ക്ക് യുഎഇയില്‍ പ്രവേശിക്കാന്‍ പുതിയ ചട്ടം അനുവദിക്കുന്നുണ്ട്. ഇതുമായി ബന്ധപ്പെട്ട നടപടിക്രമങ്ങള്‍ പൂര്‍ത്തിയാക്കാന്‍ മൂന്ന് പ്രവൃത്തി ദിവസത്തിനം ബന്ധപ്പെട്ട വകുപ്പിനെ സന്ദര്‍ശിക്കണം. ഇത്തരം സന്ദര്‍ഭങ്ങളില്‍ ആദ്യം ചെയ്യണ്ടത് സ്മാര്‍ട്ട് സര്‍വീസ് പ്ലാറ്റ്ഫോം വഴി പാസ്പോര്ട്ടോ ആഡി കാര്‍ഡോ നഷ്ടപ്പെട്ട വിവരം അധികൃതര്‍ക്ക് റിപ്പോര്‍ട്ട് ചെയ്യുക എന്നതാണ്. കൊണ്ട് പ്രവാസികള്‍ ആദ്യം യുഎഇയിലേക്ക് എന്‍ട്രി അഭ്യര്‍ത്ഥന സമര്‍പ്പിക്കണം.
ടൂറിസ്റ്റ് വിസ അനുവദിക്കുന്നതിലെ ചട്ടങ്ങള്‍
ടൂറിസ്റ്റ് വിസ അനുവദിക്കുന്നതിനുള്ള വ്യവസ്ഥകളും പുതിയ ചട്ടങ്ങളില്‍ വിശദീകരിക്കുന്നുണ്ട്. ടൂറിസ്റ്റ് വിസ നല്‍കുന്നത് സ്‌പോണ്‍സര്‍ അല്ലെങ്കില്‍ ഹോസ്റ്റ്, ടൂറിസവുമായി ബന്ധപ്പെട്ട സ്ഥാപനമോ കമ്പനിയോ ആയിരിക്കണം എന്നതാണ് നിബന്ധനകളിലൊന്ന്. അക്രഡിറ്റേഷനുള്ള ഏതെങ്കിലുമൊരു ടൂറിസം സംവിധാനത്തില്‍ രജിസ്റ്റര്‍ ചെയ്തതും ഏതെങ്കിലും
ടൂറിസം പ്രോഗ്രാം നടത്തുന്ന സ്ഥാപനവുമായിരിക്കണം. വിദേശത്തുള്ള ലാന്‍ഡ് എന്‍ട്രി ഔട്ട്ലെറ്റുകളില്‍ നിന്നോ യുഎഇ എംബസികളില്‍ നിന്നോ ഉള്ള ട്രക്ക് ഡ്രൈവര്‍മാരുടെ എന്‍ട്രി വിസകള്‍ക്കും ടൂറിസ്റ്റ് കപ്പലുകളിലും പിക്നിക് ബോട്ടുകളിലും വരുന്ന ജീവനക്കാരുടെ എന്‍ട്രി വിസകള്‍ക്കുമുള്ള നിബന്ധനകളും പുതിയ പ്രമേയത്തില്‍ വ്യക്തമാക്കുന്നു.
പ്രവാസികളുടെ അടുത്ത ബന്ധുക്കള്‍ക്ക് മാത്രം വിസിറ്റ് വിസ
അതോടൊപ്പം യുഎഇ പൗരന്‍മാര്‍ക്കും പ്രവാസികള്‍ക്കും സന്ദര്‍ശക വിസയില്‍ ഒരു സുഹൃത്തിനോ ബന്ധുവിനോയോ രാജ്യത്തേക്ക് കൊണ്ടുവരുന്നതുമായി ബന്ധപ്പെട്ട പുതിയ നിയന്ത്രണങ്ങളും പ്രമേയത്തില്‍ ഉള്‍പ്പെടുന്നുണ്ട്. നേരത്തേ പ്രഖ്യാപിച്ച നിബന്ധനകള്‍ക്കു പുറമേയാണിത്. പുതിയ പ്രമേയം അനുസരിച്ച് ഒരു യുഎഇ പൗരന് തന്റെ സുഹൃത്തിനെയോ ബന്ധുവിനെയോ വിസിറ്റ് വിസയില്‍ രാജ്യത്തേക്ക് കൊണ്ടുവരാം. സന്ദര്‍ശകന്‍ അടുത്ത ബന്ധു ആയിക്കൊള്ളണമെന്ന് നിബന്ധനയില്ല. എന്നാല്‍ പ്രവാസികള്‍ക്ക് വിസിറ്റ് വിസയില്‍ ആളുകളെ കൊണ്ടുവരണമെങ്കില്‍ വരുന്ന ആള്‍ പ്രവാസിയുടെ ഫസ്റ്റ് അല്ലെങ്കില്‍ സെക്കന്‍ഡ് ഡിഗ്രി ബന്ധുവായിരിക്കണം. അതായത് വളരെ അടുത്ത ബന്ധുക്കളായിരിക്കണം എന്നര്‍ഥം. എന്നു മാത്രമല്ല, സന്ദര്‍ശകനെ സ്‌പോണ്‍സര്‍ ചെയ്യുന്ന പ്രവാസിക്ക് ഒന്നോ രണ്ടോ ലെവല്‍ വിഭാഗത്തില്‍ ഉള്‍പ്പെടെട ജോലി ഉണ്ടായിരിക്കണണമെന്ന് പുതിയ നിബന്ധനയില്‍ പറയുന്നു.
അയല്‍ രാജ്യങ്ങളിലെ താമസക്കാര്‍ക്ക് എന്‍ട്രി വിസ
ലാന്‍ഡ് എന്‍ട്രി പോര്‍ട്ടുകളുടെ അടുത്തുള്ള അതിര്‍ത്തി പ്രദേശങ്ങളില്‍ 90 ദിവസത്തേക്ക് വിദേശികള്‍ക്ക് എന്‍ട്രി വിസ അനുവദിക്കും. വിസയുള്ളവര്‍ക്ക് അവരുടെ വിസയ്ക്ക് കാലവധി ഉള്ളിടത്തോളം കാലം രാജ്യത്ത് എത്ര തവണ വേണമെങ്കിലും പ്രവേശിക്കാം. കൂടാതെ 48 മണിക്കൂറില്‍ കൂടാത്ത കാലയളവില്‍ ഓരോ തവണയും യുഎഇയില്‍ താമസിക്കുകയും ചെയ്യാം. എന്നാല്‍ വിസ ഉടമയ്ക്ക് അടുത്തുള്ള അതിര്‍ത്തി രാജ്യത്ത് സാധുവായ താമസ വിസ ഉണ്ടായിരിക്കണമെന്ന നിബന്ധനയുണ്ട്. എന്നു മാത്രമല്ല, ആ അയല്‍ രാജ്യത്ത് താമസക്കാരനും ആയിരിക്കണം ഇയാള്‍. തൊഴിലുടമയോ അവരുടെ കുടുംബാംഗങ്ങളോ ഒപ്പമുണ്ടെങ്കില്‍ ഗാര്‍ഹിക തൊഴിലാളികളെ നിബന്ധനകളില്‍ നിന്ന് ഒഴിവാക്കും. എന്നാല്‍ ഇവര്‍ക്ക് യുഎഇയില്‍ വേതനത്തോടെയോ വേതനം ഇല്ലാതെയോ ജോലി ചെയ്യാന്‍ അനുവാദമുണ്ടായിരിക്കുകയില്ല.
മാനുഷിക പരിഗണനയില്‍ നല്‍കുന്ന റെസിഡന്‍സ് വിസകള്‍
ഒരു സ്‌പോണ്‍സറുടെയോ ഹോസ്റ്റോ ഉണ്ടെങ്കില്‍ വര്‍ഷം കാലാവധിയുള്ളതും വീണ്ടും പുതുക്കാവുന്നതുമായ റസിഡന്‍സ് പെര്‍മിറ്റ് നല്‍കുന്നതിന്റെ രൂപരേഖയും പുതിയ പ്രമേയം അവതരിപ്പിക്കുന്നുണ്ട്. യുദ്ധങ്ങളോ ദുരന്തങ്ങളോ അശാന്തിയോ ബാധിച്ച രാജ്യങ്ങളില്‍ നിന്നുള്ള പ്രവാസികള്‍ക്ക് താമസ വിസ നല്‍കുന്നതിന് പാലിക്കേണ്ട അഞ്ച് വ്യവസ്ഥകളും ഇതില്‍ പ്രതിപാദിക്കുന്നു. അതോറിറ്റിയുടെ ചെയര്‍മാന്‍ നിര്‍ണ്ണയിച്ച പ്രകാരം യുദ്ധം, ദുരന്തം, അല്ലെങ്കില്‍ അശാന്തി തുടങ്ങിയ അവസ്ഥയിലാണെന്ന് തരംതിരിക്കപ്പെടുന്ന രാജ്യത്തിലെ പൗരനായിരിക്കുക, വ്യക്തി യുഎഇയില്‍ ഉണ്ടായിരിക്കുക, മതിയായ സാമ്പത്തിക ശേഷി ഉണ്ടായിരിക്കുക, അനുയോജ്യമായ താമസസൗകര്യം എന്നിവ ഈ വ്യവസ്ഥകളില്‍ ഉള്‍പ്പെടുന്നു. ഇത്തരം കേസുകളില്‍ അപേക്ഷകന്റെ കുടുംബാംഗങ്ങള്‍ക്കും റസിഡന്‍സ് പെര്‍മിറ്റ് അനുവദിക്കും. അവര്‍ യുഎഇയില്‍ തന്നെ ഉണ്ടായിരിക്കണമെന്ന് നിബന്ധനയില്ല. അത്തരം പ്രശ്‌നബാധിത രാജ്യങ്ങളില്‍ കഴിയുന്ന ബന്ധുക്കളെയും യുഎഇയിലേക്ക് കൊണ്ടുവരാം.
പ്രവാസികളുടെ കുടുംബങ്ങള്‍ക്ക് റെസിഡന്‍സ് വിസ
വിദേശികളായ ബന്ധുക്കളെയോ അവരുടെ ഭാര്യമാരുടെ ബന്ധുക്കളെയോ കൊണ്ടുവരാന്‍ ആഗ്രഹിക്കുന്നവര്‍ റസിഡന്‍സ് പെര്‍മിറ്റ് ലഭിക്കുന്നതിന് ചില നിബന്ധനകള്‍ പാലിക്കണമെന്ന് പ്രമേയം വ്യക്തമാക്കുന്നു. രാജ്യത്തിലേക്ക് കൊണ്ടുവരാന്‍ ആഗ്രഹിക്കുന്ന വിദേശി യുഎഇ പൗരന്റെ ബന്ധുവാണെങ്കില്‍, അവരുടെ ബന്ധുത്വം തെളിയിക്കണം. വരുന്ന വിദേശി ഒരു യുഎഇ പ്രവാസിയുടെയോ അവരുടെ പങ്കാളിയുടെയോ ബന്ധുവാണെങ്കില്‍ അവര്‍ ചില ബന്ധനകള്‍ പാലിക്കുന്നവരായിരിക്കണം. അതായത് പ്രവാസിയുടെ പിതാവ്, മാതാവ്, പ്രായപൂര്‍ത്തിയാകാത്ത സഹോദരങ്ങള്‍, ഭാര്യയുടെ മാതാപിതാക്കള്‍ എന്നിവരെ മാത്രമേ റെസിഡന്‍സ് വിസയില്‍ പ്രവാസികള്‍ക്ക് കൊണ്ടുവരാനാവൂ. കൂടാതെ, തങ്ങളുടെ ബന്ധുക്കളെയോ ഭാര്യമാരുടെ ബന്ധുക്കളെയോ കൊണ്ടുവരാന്‍ ആഗ്രഹിക്കുന്ന ഒരു വിദേശിക്ക് മതിയായ പാര്‍പ്പിടവും മാസവരുമാനവും ഉണ്ടായിരിക്കണമെന്നും തീരുമാനം ആവശ്യപ്പെടുന്നു. പ്രതിമാസ വരുമാനം 10,000 ദിര്‍ഹമാണെങ്കില്‍ 5 വ്യക്തികളെയും വരെ കൊണ്ടുവരാം. പ്രതിമാസ വരുമാനം 15,000 ദിര്‍ഹം ഉണ്ടെങ്കില്‍ അവരുടെ 6 വ്യക്തികളെ വരെയും കൊണ്ടുവരാന്‍ അവര്‍ക്ക് അനുവാദമുണ്ടായിരിക്കും. അതേസമയം, 15000 ദിര്‍ഹം പ്രതിമാസ ശമ്പളമുള്ള ഒരാള്‍ക്ക് ആറില്‍ കൂടുതല്‍ പേരെ റെസിഡന്‍സ് വിസയില്‍ കൊണ്ടുവരണമെങ്കില്‍ അതോറിറ്റിയുടെ ചെയര്‍മാന്റെ പ്രത്യേക അനുമതി ആവശ്യമായി വരും.
യുഎഇക്ക് പുറത്ത് ആറു മാസത്തിലധികം താമസിച്ചാല്‍
180 ദിവസത്തില്‍ കൂടുതല്‍ രാജ്യത്തിന് പുറത്ത് തങ്ങിയാല്‍ റസിഡന്‍സ് വിസ റദ്ദാകുമെന്നാണ് തീരുമാനമെങ്കില്‍ ആ വ്യവസ്ഥയില്‍ നിന്ന് മൂന്ന് വിഭാഗം വിസക്കാരെ ഒഴിവാക്കിയതായും പുതിയ പ്രമേയത്തില്‍ പറയുന്നു. ഗോള്‍ഡന്‍ വിസയുള്ളവരും അവരുടെ കുടുംബങ്ങളും, ഗ്രീന്‍ വിസക്കാരും അവരുടെ കുടുംബങ്ങളും, നിയമാനുസൃതമായ കാരണങ്ങളാല്‍ ഡയറക്ടര്‍ ജനറല്‍ ഓഫ് റെസിഡന്‍സ് ആന്‍ഡ് ഫോറിനേഴ്സ് അഫയേഴ്സിന്റെ ഇളവ് ലഭിച്ച അംഗീകരിച്ച വ്യക്തികളും ആറ് മാസത്തില്‍ കൂടുതല്‍ രാജ്യത്തിന് പുറത്ത് താമസിച്ചാലും അവരുടെ റസിഡന്‍സ് പെര്‍മിറ്റ് റദ്ദാവുകയില്ല. എന്നാല്‍ വിസയുടെ കാലാവധി കഴിയുന്നതു മാത്രമേ ഈ ഇളവ് ലഭിക്കുകയുള്ളൂ. രാജ്യത്തിന് പുറത്ത് വെച്ച് വിസ കാലാവധി അവസാനിച്ചാല്‍ പിന്നീട് ആ വിസയില്‍ തിരികെ വരാനാവില്ല. ഗോള്‍ഡന്‍ വിസക്കാരും ഗ്രീന്‍ വിസക്കാരും അവരുടെ ബന്ധുക്കളും അല്ലാത്തവര്‍, രാജ്യത്തിന്റെ പുറത്ത് 180 ദിവസത്തില്‍ കൂടുതല്‍ താമസിച്ചാല്‍ തിരികെ വരണമെങ്കില്‍ നിശ്ചിത തുക ഫീസായി നല്‍കേണ്ടിവരും.
യുഎഇയില്‍ വച്ച് വിസ കാലാവധി നഷ്ടപ്പെട്ടാല്‍
റസിഡന്‍സ് പെര്‍മിറ്റ് റദ്ദാക്കുകയോ കാലഹരണപ്പെടുകയോ ചെയ്താല്‍ 180 ദിവസം വരെ യുഎഇയില്‍ തങ്ങാന്‍ അനുവാദമുള്ള അഞ്ച് വിഭാഗത്തിലുള്ള വ്യക്തികളെയും പുതിയ പ്രമേയം വിശദീകരിക്കുന്നുണ്ട്. ഗോള്‍ഡന്‍, ഗ്രീന്‍ വിസയുള്ളവരും അവരുടെ കുടുംബങ്ങളും, യുഎഇയില്‍ താമസിക്കുന്ന വിദേശികളായ വിധവകളും വിവാഹമോചിതരായ പ്രവാസികളും, ബിരുദാനന്തരം പഠനം തുടരുന്ന വിദ്യാര്‍ഥികള്‍, ഇമറാത്തികളുടെയോ വിദേശ പാസ്പോര്‍ട്ട് ഉടമകളുടെയോ പങ്കാളികള്‍, മാതാപിതാക്കള്‍, കുട്ടികള്‍ എന്നിവരുടെ വിസ കാലാവധി കഴിഞ്ഞ് 180 ദിവസം വരെ രാജ്യത്ത് താമസിക്കാം. എന്നാല്‍ വിസ റദ്ദാക്കപ്പെടുകയോ കാലഹരണപ്പെടുകയോ ചെയ്തതിനു ശേഷം രണ്ട് വിഭാഗം ആളുകള്‍ക്ക് 90 ദിവസം വരെ രാജ്യത്ത് തങ്ങാന്‍ അനുമതിയുണ്ടായിരിക്കും. ഒന്നും രണ്ടും മൂന്നും തൊഴില്‍ മേഖലകളില്‍ നിന്നുള്ള വിദഗ്ധരായ പ്രൊഫഷണലുകള്‍, പ്രോപ്പര്‍ട്ടി ഉടമകള്‍ എന്നിവരാണിവര്‍. സ്‌പോണ്‍സര്‍മാരോ ഹോസ്റ്റുകളോ നല്‍കുന്ന വിസ ഉടമകള്‍ക്ക് അവരുടെ വിസ കാലാവധി കഴിഞ്ഞ് 60 ദിവസം വരെ രാജ്യത്ത് താമസിക്കാം, മറ്റെല്ലാ വിഭാഗങ്ങള്‍ക്കും വിസ കാലാവധി കഴിഞ്ഞ് 30 ദിവസത്തേക്ക് മാത്രമേ യുഎഇയില്‍ തുടരാന്‍ അനുവാദമുള്ളൂ എന്നും പ്രമേയം വ്യക്തമാക്കുന്നു
