‘ബിജെപി കേരളത്തിൽ സർക്കാരുണ്ടാക്കും, ക്രിസ്ത്യൻ സഹോദരങ്ങൾ ഒപ്പമുണ്ട്’; പ്രധാനമന്ത്രി മോദി

Jibin George | Samayam Malayalam | Updated: 2 Mar 2023, 10:58 pm

കേരളത്തിൽ ബിജെപി സർക്കാർ രൂപീകരിക്കുമെന്ന് പ്രധാനമന്ത്രി നരേന്ദ്ര മോദി പറഞ്ഞു. ന്യൂനപക്ഷങ്ങളെ ഒപ്പം നിർത്തുമെന്നും കേരളത്തിലെ ജനങ്ങൾക്ക് ബദലായി പ്രവർത്തിക്കുമെന്നും അദ്ദേഹം വ്യക്തമാക്കി

ഹൈലൈറ്റ്:

കേരളത്തിലും ബിജെപി സർക്കാരുണ്ടാക്കുമെന്ന് പ്രധാനമന്ത്രി നരേന്ദ്ര മോദി.
കേരളത്തിൽ അധികാരത്തിലേറുമെന്ന കാര്യത്തിൽ ആത്മവിശ്വാസമുണ്ട്.
വടക്ക് കിഴക്കൻ സ്ഥാനങ്ങളിലും ഗോവയിലും സംഭവിച്ചത് പോലെ കേരളത്തിലും സംഭവിക്കും.

ന്യൂഡൽഹി: കേരളത്തിലും ബിജെപി സർക്കാരുണ്ടാക്കുമെന്ന് പ്രധാനമന്ത്രി നരേന്ദ്ര മോദി. കേരളത്തിൽ അധികാരത്തിലേറുമെന്ന കാര്യത്തിൽ ആത്മവിശ്വാസമുണ്ട്. ബിജെപി ന്യൂനപക്ഷങ്ങൾക്ക് എതിരാണെന്ന കേരളത്തിലെ മിഥ്യാധാരണ തകർക്കപ്പെടുമെന്നും പ്രധാനമന്ത്രി പറഞ്ഞു. വടക്ക് കിഴക്കൻ സംസ്ഥാനങ്ങളിലെ തെരഞ്ഞെടുപ്പ് വിജയത്തിന് പിന്നാലെ ഡൽഹിയിലെ പാർട്ടി ആസ്ഥാനത്ത് പ്രവർത്തകരെ അഭിസംബോധന ചെയ്ത് സംസാരിക്കുന്നതിനിടെയാണ് കേരളത്തിലും ബിജെപി അധികാരത്തിലെത്തുമെന്ന് പ്രധാനമന്ത്രി വ്യക്തമാക്കിയത്.

‘ഉറങ്ങിയതല്ല, ദിവസങ്ങൾക്ക് മുൻപ് അമ്മ മരിച്ചിരുന്നു’; രണ്ട് ദിവസം മൃതദേഹത്തിനൊപ്പം താമസിച്ച് 14കാരൻ

വടക്ക് കിഴക്കൻ സ്ഥാനങ്ങളിലും ഗോവയിലും സംഭവിച്ചത് പോലെ കേരളത്തിലും സംഭവിക്കും. സർക്കർ രൂപീകരിച്ച് ബിജെപി അധികാരത്തിലെത്തും. കേരളത്തിലെ ജനങ്ങൾക്ക് യഥാർത്ഥ ബദലായി ബിജെപി മാറും. ബിജെപിക്കെതിരെ കേരളത്തിൽ നിലനിൽക്കുന്ന മിഥ്യാധാരണകൾ തകർക്കപ്പെടുമെന്ന ആത്മവിശ്വാസം ഇപ്പോൾ ഉണ്ടെന്നും പ്രധാനമന്ത്രി പറഞ്ഞു.

വർഷങ്ങളായി ബിജെപിയുടെ പേരിൽ ന്യൂനപക്ഷങ്ങളെ ഭീഷണിയിലാഴ്ത്തുന്നുണ്ട്. ഗോവയ്ക്ക് ശേഷം വടക്ക് കിഴക്കൻ സംസ്ഥാനങ്ങളും ബിജെപിക്കൊപ്പം നിൽക്കുകയാണ്. കോണ്‍ഗ്രസും ഇടതും ഒരു പോലെയാണെന്ന് ത്രിപുര തെരഞ്ഞെടുപ്പ് തെളിയിച്ചിട്ടുണ്ട്. വടക്ക് കിഴക്കൻ സംസ്ഥാനങ്ങളിലെ ന്യൂനപക്ഷങ്ങൾ ബിജെപിയെ ഭയക്കുന്നില്ല. ക്രിസ്ത്യൻ സഹോദരങ്ങൾ ബിജെപിക്കൊപ്പമാണ്. ഒരു സംസ്ഥാനത്ത് ഗുസ്തി ഒരിടത്ത് ദോസ്തി എന്നത് കേരളത്തിലെ ജനങ്ങൾ കാണുന്നുണ്ടെന്ന് പ്രധാനമന്ത്രി കൂട്ടിച്ചേർത്തു.

തിപ്ര മോത്ത പണിപറ്റിച്ചു; മണിക് സർക്കാരിൻ്റെ മണ്ഡലത്തിൽ സിപിഎമ്മിന് തോൽവി; ജയിച്ചു കയറി ബിജെപിയുടെ ‘ദീദി’

നാഗാലാൻഡിലെയും മേഘാലയിലെയും ക്രിസ്ത്യൻ വിഭാഗത്തിൻ്റെ വോട്ട് ബിജെപിക്കാണ്. ജനങ്ങൾക്ക് ജനാധിപത്യത്തിലുള്ള വിശ്വാസം വ്യക്തമാക്കുന്നതാണ് തെരഞ്ഞെടുപ്പ് ഫലം. ഇത് മാറ്റത്തിൻ്റെ സമയമാണ്. തെരഞ്ഞെടുപ്പിൽ ബിജെപിയെ തെരഞ്ഞെടുത്ത എല്ലാവർക്കും നന്ദിയുണ്ട്. ചെറിയ സംസ്ഥാനങ്ങളോട് വിവേചനം കാണിക്കുന്നവർ എങ്ങനെ ഇന്ത്യയെ ഒന്നിപ്പിക്കുമെന്ന് പ്രതിപക്ഷത്തെ കുറ്റപ്പെടുത്തി പ്രധാനമന്ത്രി മോദി ചോദിച്ചു.