2020 ൽ ഏറ്റവും കൂടുതൽ മരണനകരണമായി ലോകാരോഗ്യ സംഘടന ചൂണ്ടിക്കാണിച്ചത് ക്യാൻസർ എന്ന രോഗത്തെയാണ്. ലോകത്താകാണാമാനം ആറിൽ ഒരാൾ ക്യാൻസർ മൂലം മരണപ്പെടുന്നു.
ക്യാൻസർ ലക്ഷണങ്ങൾ എങ്ങനെ തിരിച്ചറിയാം?
പല തരത്തിലുള്ള അടയാളങ്ങളും ലക്ഷങ്ങളുമൊക്കെ ശരീരത്തിൽ പ്രകടമാകുന്ന ഒരു രോഗാവസ്ഥയാണ് കാൻസർ. ഇത്തരം അടയാളങ്ങളും ലക്ഷണങ്ങളും കാൻസർ ബാധിച്ചിരിക്കുന്നത് ശരീരത്തിന്റെ ഏത് ഭാഗത്താണെന്നും അത് എത്ര വലുതാണെന്നും അവയവങ്ങളെയോ ടിഷ്യുകളെയോ എത്രമാത്രം ബാധിക്കുന്നു എന്നതിനെ ആശ്രയിച്ചിരിക്കും. കാൻസർ ശരീരത്തിൽ പടർന്നിട്ടുണ്ടെങ്കിൽ, ശരീരത്തിന്റെ വിവിധ ഭാഗങ്ങളിൽ അടയാളങ്ങളോ ലക്ഷണങ്ങളോ പ്രത്യക്ഷപ്പെടാം.
സാധാരണയായി കാൻസർ വളരുമ്പോൾ അത് സമീപത്തുള്ള അവയവങ്ങൾ, രക്തക്കുഴലുകൾ, ഞരമ്പുകൾ എന്നിവയിലേക്ക് വ്യാപിക്കുവാൻ തുടങ്ങും. ഈ സമ്മർദ്ദം കാൻസറിന്റെ ചില ലക്ഷണങ്ങൾക്കും അടയാളങ്ങൾക്കും കാരണമാകുന്നു. തലച്ചോറിന്റെ ചില ഭാഗങ്ങൾ പോലുള്ള ഗുരുതരമായ പ്രദേശത്താണ് ക്യാൻസർ ഉള്ളത് എങ്കിൽ, ചെറിയ ട്യൂമർ പോലും പ്രധാന രോഗലക്ഷണമായി രൂപപ്പെട്ടേക്കാം. എന്നാൽ ചില അവസരങ്ങളിൽ ക്യാൻസർ പിടിപെട്ടാലും ശരീരം രോഗ ലക്ഷണങ്ങൾ കാണിച്ചെന്ന് വരില്ല.
എന്താണ് ബെല്‍സ് പാള്‍സി: രോഗലക്ഷണവും കാരണവും
എന്തൊക്കെയാണ് ക്യാൻസർ ലക്ഷണങ്ങൾ
ക്യാൻസർ നേരത്തെ തിരിച്ചറിയുക എന്നാൽ ചികിത്സ വേഗത്തിലാക്കുക എന്ന് കൂടി ആണ് അർഥമാക്കുന്നത്. എന്നാൽ ക്യാൻസർ മൂലം മരണം സംഭവിക്കുന്നതിന് പിന്നിലെ ഒരു പ്രധാന കാരണം പലപ്പോഴും രോഗ ലക്ഷണങ്ങൾ നേരത്തെ തിരിച്ചറിയാൻ വൈകുന്നതും അതുമൂലം ചികിത്സ വൈകുന്നതുമൊക്കെയാണ്.
ക്ഷീണം അല്ലെങ്കിൽ ചുമ പോലുള്ള ചില ലക്ഷണങ്ങൾ ക്യാൻസർ അല്ലാതെ മറ്റെന്തെങ്കിലും കാരണം മൂലവും ഉണ്ടാകാവുന്നവയാണ്. ഈ ലക്ഷണങ്ങളൊക്കെ അപ്രധാനമാണെന്ന് തോന്നാം. അതുപോലെ തന്നെ, ഒരു വ്യക്തിക്ക് സ്തനത്തിലുണ്ടാകുന്ന തടിപ്പ് പോലുള്ള ഒരു ലക്ഷണം ഒരുപക്ഷേ സ്വയം ഇല്ലാതാകുന്ന ഒരു നീർവീക്കമാണെന്ന് വാദിക്കാം. എന്നാൽ ഒരു ലക്ഷണവും അവഗണിക്കുകയോ പരിശോധിക്കാതിരിക്കുകയോ ചെയ്യരുത്, പ്രത്യേകിച്ചും ഇത് വളരെക്കാലം നീണ്ടുനിൽക്കുകയോ മോശമാവുകയോ ചെയ്താൽ.
ശരീരത്തിലെ പല അസ്വസ്ഥതകളും പലപ്പോഴും ക്യാൻസർ മൂലമായിരിക്കില്ല. എന്നിരിന്നാലും, അവ പരിശോധിക്കേണ്ടത് പ്രധാനമാണ്. ക്യാൻസർ ലക്ഷണം അല്ലെങ്കിൽ, ഇത്തരം പ്രശ്നങ്ങളുടെ കാരണം എന്താണെന്ന് കണ്ടെത്താനും ആവശ്യമെങ്കിൽ ചികിത്സിക്കാനും ഒരു ഡോക്ടർക്ക് നിങ്ങളെ സഹായിക്കാനാകും.
ക്യാൻസറിന്റെ സാധാരണ കാണുന്ന ലക്ഷണങ്ങൾ
1. പെട്ടന്നുള്ള ശരീരഭാരക്കുറവ്: ക്യാൻസർ ശരീരത്തെ ബാധിച്ചിട്ടുണ്ടെങ്കിൽ അതിന്റെ ഒരു പ്രധാന ലക്ഷണം ശരീരഭാരം കുറയുന്നു എന്നതാണ്. പ്രത്യേകിച്ച് ഒരു കാരണവുമില്ലാതെ നിങ്ങളുടെ ശരീരഭാരം കുറയുമ്പോൾ, അതിനെ വിശദീകരിക്കാനാകാത്ത ഭാരം കുറയൽ (Unexplained weight loss) എന്ന് വിളിക്കുന്നു. പെട്ടന്ന് നാലോ അഞ്ചോ കിലോയോ അതിൽ കൂടുതലോ ശരീരഭാരം കുറയുന്നത് ക്യാൻസറിന്റെ ആദ്യ ലക്ഷണമായിരിക്കാം.
അമിതവണ്ണം ഉള്ളവര്‍ക്ക് ഈ കാന്‍സര്‍ വരാന്‍ സാധ്യത കൂടുതല്‍
2. പനി: ക്യാൻസർ ലക്ഷണങ്ങളിൽ ഒന്നാണ് പനി. പക്ഷേ കാൻസർ ആരംഭിച്ച സ്ഥലത്ത് നിന്ന് അത് മറ്റ് ഇടങ്ങളിലേക്ക് വ്യാപിച്ചതിനുശേഷമാണ് ഇങ്ങനെ പലപ്പോഴും സംഭവിക്കാറുള്ളത്. കാൻസർ ബാധിച്ച മിക്കവാറും എല്ലാ ആളുകൾക്കും ചില സമയങ്ങളിൽ പനി ഉണ്ടാകും, പ്രത്യേകിച്ചും കാൻസറോ അതിന്റെ ചികിത്സയോ രോഗപ്രതിരോധ സംവിധാനത്തെ ബാധിക്കുകയാണെങ്കിൽ. (ഇത് അണുബാധയോട് പൊരുതുവാനുള്ള ശരീരത്തിന്റെ കഴിവിനെ ബുദ്ധിമുട്ടിലാക്കുന്നു.) ലുക്കീമിയ, ലിംഫോമ തുടങ്ങിയ ക്യാൻസറുകളുടെ ആദ്യകാല ലക്ഷണമാണ് പനി.
3. തളർച്ച: ക്യാൻസർ വളരുന്നതിനനുസരിച്ച് ഇത് ഒരു പ്രധാന ലക്ഷണമായി കരുതാം. എന്നാൽ രക്താർബുദം പോലുള്ള ചില ക്യാൻസറുകളിൽ ഇത് നേരത്തെ സംഭവിക്കാം. ചില വൻകുടൽ അല്ലെങ്കിൽ വയറ്റിലെ ക്യാൻസറുകൾ വ്യക്തമല്ലാത്ത രക്തനഷ്ടത്തിന് കാരണമാകും. ക്യാൻസർ മൂലം തളർച്ച വരുന്നതിന്റെ മറ്റൊരു കാരണമാണിത്.
4. ശരീര വേദന: ചില തരം ക്യാൻസറുകൾക്ക് ശരീരവേദനയും ആദ്യകാല ലക്ഷണമായി പ്രകടമാകാറുണ്ട്. ചികിത്സ കൊണ്ട് നിങ്ങാത്തതോ അല്ലെങ്കിൽ മെച്ചപ്പെടാത്തതോ ആയിട്ടുള്ള ഒരു തലവേദന ബ്രെയിൻ ട്യൂമറിന്റെ ലക്ഷണമായിരിക്കാം. നടുവേദന ഉണ്ടാവുന്നത് വൻകുടൽ, മലാശയം അല്ലെങ്കിൽ അണ്ഡാശയത്തിൽ ഉണ്ടാകുന്ന അർബുദത്തിന്റെ ലക്ഷണമാണ്.
5. ചർമ്മത്തിലെ മാറ്റങ്ങൾ: ചർമ്മ കാൻസറിനൊപ്പം മറ്റ് ചില ക്യാൻസറുകളും ചർമ്മത്തിലെ മാറ്റങ്ങൾക്ക് കാരണമാകും. അതിന്റെ അടയാളങ്ങളിലും ലക്ഷണങ്ങളിലും ഇവ ഉൾപ്പെടുന്നു:
☛ ഇരുണ്ടതായി കാണപ്പെടുന്ന ചർമ്മം (ഹൈപ്പർപിഗ്മെന്റേഷൻ)
☛ ചുവന്ന ചർമ്മം (എറിത്തമ)
☛ ചൊറിച്ചിൽ (പ്രൂറിറ്റിസ്)
☛ അമിതമായ രോമ വളർച്ച
6. മലവിസർജ്ജനത്തിലോ പിത്താശയ പ്രവർത്തനത്തിലോ മാറ്റം: ദീർഘകാല മലബന്ധ പ്രശ്നം, വയറിളക്കം, വയറുവേദന തുടങ്ങിയവയൊക്കെ വൻകുടൽ കാൻസറിന്റെ ലക്ഷണമാകാം. മൂത്രം കടന്നുപോകുമ്പോൾ ഉണ്ടാകുന്ന വേദന, മൂത്രത്തിൽ രക്തം, അല്ലെങ്കിൽ മൂത്രസഞ്ചി പ്രവർത്തനത്തിലെ മാറ്റം (പതിവിലും കൂടുതലോ കുറവോ മൂത്രം ഒഴിക്കേണ്ട അവസ്ഥ പോലുള്ളവ) മൂത്രസഞ്ചി അല്ലെങ്കിൽ പ്രോസ്റ്റേറ്റ് കാൻസറുമായി ബന്ധപ്പെട്ടേക്കാം. മൂത്രസഞ്ചി അല്ലെങ്കിൽ മലവിസർജ്ജനത്തിലെ എന്തെങ്കിലും മാറ്റങ്ങൾ ശ്രദ്ധയിൽ പെട്ടാൽ ഉടൻ തന്നെ ഡോക്ടറെ സമീപിക്കുക.
7. വ്രണങ്ങൾ ഭേദമാകാൻ വൈകുന്നത്: ത്വക്ക് ക്യാൻസറുകൾ രക്തസ്രാവം ഉണ്ടായി, ഭേദമാകാത്ത വ്രണങ്ങൾ പോലെ കാണപ്പെടാം. വായിൽ ദീർഘനാൾ നീണ്ടുനിൽക്കുന്ന വ്രണം ഒരു വായിലെ ക്യാൻസർ ആകാം. പുകവലിക്കുന്നവർ, പുകയില ചവയ്ക്കുന്നവർ, അല്ലെങ്കിൽ പലപ്പോഴും മദ്യം കുടിക്കുന്ന ആളുകൾ എന്നിവരിൽ ഇത് ഉടൻ തന്നെ കൈകാര്യം ചെയ്യണം. ലിംഗത്തിലോ യോനിയിലോ ഉള്ള വ്രണങ്ങളും അണുബാധയുടെ ലക്ഷണങ്ങളും ക്യാൻസറിന്റെ ആദ്യ ഘട്ടം മൂലം ആകാം. ഇത് ആരോഗ്യ വിദഗ്ദ്ധരെ കണ്ട് പരിശോധിച്ച് ഉറപ്പ് വരുത്തേണ്ടതാണ്.
8. വായ്ക്കുള്ളിൽ/നാവിൽ വെളുത്ത പാടുകൾ: വായയ്ക്കുള്ളിലെ വെളുത്ത പാടുകളും നാവിൽ ഉണ്ടാകുന്ന വെളുത്ത പാടുകളും ല്യൂക്കോപ്ലാകിയ ആയിരിക്കാം. ക്യാൻസറിനു മുമ്പുള്ള ഒരു അവസ്ഥയാണ് ല്യൂക്കോപ്ലാകിയ. ഇത് പലപ്പോഴും പുകവലി അല്ലെങ്കിൽ മറ്റ് പുകയില ഉപയോഗം മൂലമാണ് സംഭവിക്കുന്നത്. ഇത് ചികിത്സിച്ചില്ലെങ്കിൽ, വായയിലെ കാൻസറായി മാറും. ദീർഘനാൾ നീണ്ടുനിൽക്കുന്ന വായയിൽ ഉണ്ടാകുന്ന ഏതെങ്കിലും തരത്തിലുള്ള മാറ്റങ്ങൾ ഉടൻ തന്നെ ഒരു ഡോക്ടറെയോ ദന്തരോഗവിദഗ്ദ്ധനെയോ കണ്ട് പരിശോധിക്കണം.
9. അസാധാരണമായ രക്തസ്രാവം അല്ലെങ്കിൽ മറ്റ് സ്രവങ്ങൾ: കാൻസറിന്റെ ആദ്യ ഘട്ടത്തിലും ഗുരുതരമായ ഘട്ടത്തിലും അസാധാരണമായ രക്തസ്രാവം സംഭവിക്കാം. ചുമയ്ക്കുമ്പോൾ രക്തം വരുന്നത് ശ്വാസകോശ അർബുദത്തിന്റെ ലക്ഷണമാകാം. മലത്തിലെ രക്തം (വളരെ ഇരുണ്ടതോ കറുത്തതോ ആയ മലം പോലെ കാണപ്പെടാം) വൻകുടലിന്റെയോ മലാശയ അർബുദത്തിന്റെയോ അടയാളമായിരിക്കാം. ഗർഭാശയത്തിൻറെ അർബുദം അല്ലെങ്കിൽ എൻഡോമെട്രിയം (ഗർഭപാത്രത്തിന്റെ പാളി) അസാധാരണമായ യോനി രക്തസ്രാവത്തിന് കാരണമാകും. മൂത്രത്തിലെ രക്തം മൂത്രസഞ്ചി അല്ലെങ്കിൽ വൃക്ക കാൻസറിന്റെ അടയാളമായിരിക്കാം. മുലക്കണ്ണിൽ നിന്ന് രക്തരൂക്ഷിതമായ സ്രവം പുറത്തേക്ക് വരുന്നത് സ്തനാർബുദത്തിന്റെ ലക്ഷണമാകാം.
10. മുഴകൾ രൂപപ്പെടുന്നത്: പല ക്യാൻസറുകളും ചർമ്മത്തിലൂടെ അനുഭവപ്പെടാം. ഈ ക്യാൻസറുകൾ കൂടുതലും സംഭവിക്കുന്നത് സ്തനം, വൃഷണം, ലിംഫ് നോഡുകൾ (ഗ്രന്ഥികൾ), ശരീരത്തിലെ മൃദുവായ ടിഷ്യുകൾ എന്നിവയിലാണ്. ഒരു മുഴ അല്ലെങ്കിൽ ശരീരത്തിൽ തടിപ്പ് അനുഭവപ്പെടുക എന്നത് കാൻസറിന്റെ ആദ്യകാല അടയാളമോ അല്ലെങ്കിൽ വൈകിയുള്ള അടയാളമോ ആയിരിക്കാം, അത് ഒരു ഡോക്ടറെ അറിയിക്കണം, പ്രത്യേകിച്ചും നിങ്ങൾ അത് കണ്ടെത്തുകയോ അല്ലെങ്കിൽ അതിന്റെ വലുപ്പം കൂടുന്നതായിട്ടൊ ശ്രദ്ധയിൽപ്പെട്ടാൽ. ചില സ്തനാർബുദങ്ങൾ മുഴ വരുന്നതിന് പകരം ചർമ്മത്തിൽ ചുവപ്പ് നിറം അല്ലെങ്കിൽ കട്ടി പിടിച്ച ചർമ്മത്തിന്റെ രൂപത്തിലും അടയാളങ്ങൾ കാണിക്കുന്നു എന്ന കാര്യം ഓർമ്മിക്കുക.
11. ദഹനക്കേട് അല്ലെങ്കിൽ ഭക്ഷണം ഇറക്കുവാൻ ബുദ്ധിമുട്ട്: ദഹനക്കേട് അല്ലെങ്കിൽ ഭക്ഷണം ഇറക്കുവാനുള്ള ബുദ്ധിമുട്ട് മൂലമുള്ള പ്രശ്നങ്ങൾ അന്നനാളം (വയറ്റിലേക്ക് ഭക്ഷണം പോകുന്ന കുഴൽ), ആമാശയം, അല്ലെങ്കിൽ ശ്വാസനാളം (തൊണ്ട) എന്നിവയുടെ ക്യാൻസറിന്റെ ലക്ഷണങ്ങളായിരിക്കാം.
12. അരിമ്പാറയിലോ മറുകിലോ ഉണ്ടാകുന്ന മാറ്റം: നിറം, വലുപ്പം, ആകൃതി എന്നീ കാര്യങ്ങൾ വ്യത്യാസപ്പെടുന്ന അരിമ്പാറ, മറുക് എന്നിവ ശ്രദ്ധയിൽ പെട്ടാൽ ഒരു ഡോക്ടറെ ഉടൻ തന്നെ കാണണം. ചർമ്മത്തിലെ മറ്റേതെങ്കിലും മാറ്റങ്ങളും ഡോക്ടറെ അറിയിക്കണം. ചർമ്മത്തിലെ മാറ്റം ഒരു മെലനോമ (ഒരുതരം കരുവാളിപ്പ്‌ രോഗം) ആയിരിക്കാം.
13. വിട്ടുമാറാത്ത ചുമ അല്ലെങ്കിൽ തൊണ്ടയടപ്പ്‌: വിട്ടുപോകാത്ത ചുമ ശ്വാസകോശ അർബുദത്തിന്റെ ലക്ഷണമാകാം. ശ്വാസനാളം (വോയിസ് ബോക്സ്) അല്ലെങ്കിൽ തൈറോയ്ഡ് ഗ്രന്ഥിയുടെ ക്യാൻസറിന്റെ ലക്ഷണമാണ് തൊണ്ടയടപ്പ്‌.
English Summary: Common Signs and Symptoms of Cancer
