ബ്രഹ്മപുരത്തേത് മനപ്പൂർവം സൃഷ്ടിച്ച തീപിടിത്തം, സർക്കാർ ഇടപെടൽ ഉണ്ടായില്ലെന്ന് പ്രതിപക്ഷ നേതാവ്; വസ്തുതാവിരുദ്ധമെന്ന് മന്ത്രി

തിരുവനന്തപുരം: ബ്രഹ്മപുരം മാലിന്യ പ്ലാൻ്റിലെ തീപിടിത്തം മനപ്പൂർവം സൃഷ്ടിച്ചതെന്ന് പ്രതിപക്ഷ നേതാവ് വി ഡി സതീശൻ. എറണാകുളം ജില്ലയിൽ ഗുരുതരമായ സാഹചര്യമാണ് നിലനിൽക്കുന്നതെന്നും മതിയായ ഇടപെടൽ സർക്കാരിന്റെ ഭാഗത്തുനിന്ന് ഉണ്ടായില്ലെന്നും പ്രതിപക്ഷ നേതാവ് നിയമസഭയിൽ ആരോപിച്ചു. തീപിടിത്തത്തിൽ ഹൈക്കോടതിയുടെ മേൽനോട്ടത്തിൽ അന്വേഷണം വേണമെന്നും പ്രതിപക്ഷ നേതാവ് സബ്മിഷനിലൂടെ ആവശ്യപ്പെട്ടു. അതേസമയം തീ ഇന്ന് പൂർണമായും അണയ്ക്കാനാകുമെന്നും ആശങ്കപ്പെടേണ്ട സാഹചര്യമില്ലെന്നും തദ്ദേശ വകുപ്പ് മന്ത്രി എം ബി രാജേഷ് മറുപടി നൽകി.

ബ്രഹ്മപുരത്തേത് കരാറുകാർ മനപ്പൂർവ്വം സൃഷ്ടിച്ച തീപിടിത്തമാണെന്ന് കൊച്ചുകുട്ടികൾക്കു വരെ അറിയാമെന്ന് വി ഡി സതീശൻ സഭയിൽ ആരോപിച്ചു. ഇത് അപകടകരായ ആരോഗ്യപ്രശ്നങ്ങൾക്ക് വഴിതെളിക്കുകയാണ്. മാലിന്യ സംസ്കരണ പ്ലാൻ്റിൽ, പ്ലാസ്റ്റിക് മാലിന്യം നീക്കം ചെയ്യുന്ന കരാറുകാരും ജൈവ മാലിന്യവും നീക്കം ചെയ്യുന്ന കരാറുകാരും കരാർ പ്രകാരമുള്ള കാര്യങ്ങൾ ചെയ്യുന്നില്ല. നീക്കം ചെയ്യേണ്ട പ്ലാസ്റ്റിക് മാലിന്യങ്ങൾ മലപോലെ കൂട്ടിയിട്ടിരിക്കുകയാണ്. ജൈവ മാലിന്യങ്ങൾ മണ്ണിട്ടു മൂടിയാണ് സംസ്കരിക്കുന്നത്. ഇതിനായി മറ്റു പ്രത്യേക സംവിധാനങ്ങളില്ല. മണ്ണിട്ടുമൂടാതിരുന്ന ജൈവ മാലിന്യങ്ങളും അജൈവ മാലിന്യങ്ങളും കൂടിക്കിടന്ന സ്ഥലത്താണ് തീപിടിത്തം ഉണ്ടായത്. ഒരു കരാറുകാരൻ്റെ കരാർ കാലാവധി മാർച്ച് മൂന്നിനു അവസാനിച്ചതിനെ തുടർന്ന് അയാൾ കരാർ നീട്ടി ചോദിച്ചിരുന്നു. കരാർ നീട്ടി നൽകാൻ പരിശോധന നടത്തേണ്ട സാഹചര്യമുണ്ട്. പരിശോധന നടത്തിയാൽ മാലിന്യങ്ങൾ നീക്കം ചെയ്തിട്ടില്ലെന്ന് വ്യക്തമാകും. ഇതു മറയ്ക്കാനായി മനപ്പൂർവ്വമായി ഉണ്ടാക്കിയ തീപിടിത്തമാണെന്നു വ്യക്തമാണെന്നും അദ്ദേഹം ആരോപിച്ചു.

Brahmapuram Plant Fire: കൊച്ചിയെ വിടാതെ മാലിന്യപ്പുക, ആലപ്പുഴയിലേക്കും വ്യാപിക്കുന്നു; ബ്രഹ്മപുരത്തെ തീ നിയന്ത്രണ വിധേയം

തീപിടിത്തം ഉണ്ടായതിനെ തുടർന്ന് കൊച്ചി നഗരത്തിലെ മാലിന്യനീക്കം പൂർണമായും സ്തംഭിച്ചു. അത് മറ്റു തരത്തിലുള്ള ആരോഗ്യപ്രശ്നങ്ങൾക്കു കാരണമാകും. പ്ലാസ്റ്റിക് കത്തുന്നതിനെ തുടർന്നുള്ള വിഷപ്പുക ഉണ്ടാക്കുന്ന പ്രശ്നങ്ങൾ ഗുരുതരമാണെന്നും പ്രതിപക്ഷ നേതാവ് ചൂണ്ടിക്കാട്ടി. അതേസമയം പ്രതിപക്ഷ നേതാവ് ഉന്നയിച്ച പ്രശ്നം ഗൗരവമുള്ളതാണെന്നു ശരിവെച്ച മന്ത്രി എം ബി രാജേഷ് തീപിടിത്തം തടയാൻ സർക്കാർ നടപടി സ്വീകരിച്ചില്ലെന്ന ആരോപണം വസ്തുതാവിരുദ്ധമാണെന്ന് മറുപടി നൽകി.

‘ഏഴു മുതലുള്ള ക്ലാസുകളിലേക്ക് കയറാത്ത പ്രത്യേക തരം പുക’; കൊച്ചിയിലെ അവധി പ്രഖ്യാപനത്തിൽ കളക്ടർക്ക് വിമർശനം

ഈ മാസം രണ്ടാം തീയതിയാണ് തീപിടിത്തം ഉണ്ടായത്. അന്നുതന്നെ കൊച്ചി മേയർ, എംഎൽഎ എന്നിവരുമായി താനും മന്ത്രി പി രാജീവും നിരന്തരമായി ബന്ധപ്പെട്ടിരുന്നു. പരിഭ്രാന്തി ഉണ്ടാക്കുന്ന സാഹചര്യം കൊച്ചിയിൽ ഇല്ല. തീ അണയ്ക്കുന്നതിൽ ഏറെക്കുറെ പൂർണമായും വിജയിക്കാനായി. ഇന്ന് പൂർണമായും അണയ്ക്കാനാകുമെന്നാണ് പ്രതീക്ഷിക്കുന്നത്. അപകടരമായി ഒന്നും സംഭവിച്ചില്ല. ഏകോപനത്തിനായി സമിതി രൂപീകരിച്ചുവെന്നും മന്ത്രി പറഞ്ഞു.

‘ഫ്ലാറ്റിനകം മുഴുവൻ പുകമണം, ചുറ്റും കാണാത്ത രീതിയിൽ പുക നിറഞ്ഞു’; സാംസ്കാരിക കേരളത്തിൽ ഇതിന് പരിഹാരമില്ലേയെന്ന് സജിത മഠത്തിൽ

കൊച്ചിയിലെ അന്തരീക്ഷ വായുവിൻ്റെ സ്ഥിതി മെച്ചപ്പെട്ടു വരികയാണ്. ഗുരുതര ആരോഗ്യപ്രശ്നങ്ങൾ റിപ്പോർട്ട് ചെയ്തിട്ടില്ല. മാലിന്യം കിടക്കുന്ന സ്ഥലത്തേക്ക് ഫയർ ഫോഴ്സിന് എത്തിച്ചേരാൻ സാധിച്ചില്ല എന്ന പ്രശ്നമുണ്ടായിരുന്നു. തീ അണയ്ക്കാനുള്ള ഏകോപനത്തിന് വിവിധ വകുപ്പുകളുടെ സംവിധാനം ഉണ്ടാക്കി. തീപിടിത്തത്തിൻ്റെ കാരണം കണ്ടെത്താൻ പോലീസ് അന്വേഷണം നടക്കുകയാണെന്നും മന്ത്രി വ്യക്തമാക്കി.