സ്ത്രീകളിലെ പോഷകഹാരകുറവ് വളരെ വലിയ പ്രശ്നമാണ്. പലപ്പോഴും സ്ത്രീകൾ ഈ കാര്യങ്ങൾ ശ്രദ്ധിക്കാറില്ല എന്നതാണ് സത്യം. പുരുഷന്മാരെക്കാൾ കൂടുതൽ പോഷകങ്ങൾ സ്ത്രീക്ക് വളരെ അത്യാവശ്യമാണ്. സ്ത്രീകൾ ഓരോ പ്രായത്തിലും ഭക്ഷണത്തിൽ ഉൾപ്പെടുത്തേണ്ട ഭക്ഷണങ്ങളെക്കുറിച്ച് കൊച്ചി റെയ്ൻബോ പോളിക്ലിനിക്കിലെ കൺസൾട്ടൻ്റ് ക്ലിനിക്കൾ ന്യൂട്രീഷ്യനിസ്റ്റ് ഡോ.മുംതാസ് ഖാലിദ് ഇസ്മയിൽ സംസാരിക്കുന്നു.
- എന്തുകൊണ്ടാണ് പോഷകാഹാരം സ്ത്രീകൾക്ക് നിർബന്ധം?
പുരുഷന്മാരിൽ നിന്ന് സ്ത്രീകളുടെ ഹോർമോണുകൾ വളരെയധികം വ്യത്യാസപ്പെട്ടിരിക്കുന്നു. ആർത്തവം, ഗർഭാവസ്ഥ, മുലയൂട്ടൽ, ആർത്തവ വിരാമം തുടങ്ങി പല തരത്തിലുള്ള ശാരീരിക മാറ്റങ്ങളിലൂടെ ആണ് സ്ത്രീകൾ കടന്ന് പോകുന്നത്. അതുകൊണ്ട് തന്നെ പുരുഷന്മാരെ അപേക്ഷിച്ച് സ്ത്രീകൾക്ക് പോഷകാഹാരം വളരെ പ്രധാനമാണ്. - ആർത്തവ കാലത്തെ പോഷകാഹാരം എങ്ങനെ ആയിരിക്കണം?
ആർത്തവ ആരംഭിക്കുന്ന കൗമാരക്കാലം വളരെ പ്രധാനമാണ്. കാരണം ഈ സമയത്താണ് പെൺകുട്ടികൾ ഭക്ഷണത്തിൽ തിരഞ്ഞെടുപ്പ് നടത്തുന്നത്. ഭാരം കൂടാതിരിക്കാൻ ഭക്ഷണം പെട്ടെന്ന് നിയന്ത്രിക്കും അല്ലെങ്കിൽ ജങ്ക് ഫു‍ഡുകൾ അമിതമായി കഴിക്കും. ശരിയായ ഭക്ഷണം കഴിക്കാതിരിക്കുന്നതും ഒരു വലിയ പ്രശ്നമാണ്. - എന്തൊക്കെയാണ് ആർത്തവ കാലത്ത് കഴിക്കേണ്ടത്?
നിലക്കടല, പരിപ്പ് പയർ വർഗങ്ങൾ, ഇലക്കറികൾ, ശർക്കര എന്നിവയെല്ലാം ഭക്ഷണത്തിൽ ഉൾപ്പെടുത്തണം. ചായയും കാപ്പിയും ഒഴിവാക്കുന്നതും ആർത്തവ കാലത്തെ പ്രശ്നങ്ങൾ പരിഹരിക്കാൻ സഹായിക്കും. അയൺ അടങ്ങിയ ഭക്ഷണങ്ങൾ ധാരാളം കഴിക്കാൻ ശ്രദ്ധിക്കണം. - ഗർഭകാലത്തെയും മുലയൂട്ടലിലെയും ഭക്ഷണക്രമം എങ്ങനെയായിരിക്കണം?
പോഷകത്തിൻ്റെയും ഊർജത്തിൻ്റെയും ആവശ്യകത ഈ ഘട്ടത്തിൽ വളരെ പ്രധാനമാണ്. അയൺ, സിങ്ക്, ഫോളിക് ആസിഡ്, കാൽസ്യം എന്നിവയെല്ലാം വളരെ പ്രധാനമാണ്. ഈ സമയത്ത് തവിട്ടോടു കൂടിയിട്ടുള്ള ധാന്യങ്ങൾ, പരിപ്പ് പയർ വർഗങ്ങൾ, പാൽ, മുട്ട എന്നിവയെല്ലാം ഭക്ഷണത്തിൽ ഉൾപ്പെടുത്തണം - ആർത്തവ വിരാമ കാലഘട്ടത്തിലെ ഭക്ഷണം
ഈ സമയത്ത് ശരീരത്തിൽ അമിതമായ ചൂട് പോലുള്ള പ്രശ്നങ്ങൾ പൊതുവെ സ്ത്രീകൾ നേരിടാറുണ്ട്. ശരീരത്തിലെ ഈസ്ട്രജൻ്റെ അളവ് കുറയുന്നതാണ് ഇതിന് കാരണം. ഭക്ഷണത്തിലൂടെ ഈസ്ട്രജൻ നൽകാൻ ശ്രമിക്കണം. സോയാബീൻ, റോൾഡ് ഓട്സ്, ചോളം, ചേന, ചേമ്പ്, കാച്ചിൽ എന്നിവ ഭക്ഷണത്തിൽ ഉൾപ്പെടുത്തുക. - വാർദ്ധക്യം കാലത്തെ ഭക്ഷണവും പ്രധാനം
കാൽസ്യവും മഗ്നീഷ്യവും ഈ ഘട്ടത്തിൽ വളരെ പ്രധാനമാണ്. ചെറു നാരങ്ങ വെള്ളം ഉപ്പും പഞ്ചസാരയുമിട്ട് കുടിക്കാവുന്നതാണ്. നട്സ് ദിവസവും 20 മുതൽ 30 ഗ്രാം ഭക്ഷണത്തിൽ ഉൾപ്പെടുത്തണം. പഴങ്ങളും പച്ചക്കറികളും കഴിക്കുക. സോഡിയം കുറവുള്ള സ്ത്രീകൾ ഉപ്പ് കഴിക്കാൻ മറക്കരുത്. - സ്ത്രീകളുടെ ശരീരത്തിലെ വെള്ളം എത്ര പ്രധാനമാണ്?
വാർദ്ധക്യകാലത്ത് മലബന്ധം ഒഴിവാക്കാൻ ധാരാളം വെള്ളം കുടിക്കാൻ ശ്രമിക്കുക. എല്ലാ പോഷകങ്ങളും ശരീരത്തിൽ ആഗിരണം ചെയ്യാനും ശരീരത്തിലെ ചൂട് ക്രമമാക്കാനും വെള്ളം വളരെ പ്രധാനമാണ്. - വ്യായാമവും ഉറക്കവും എങ്ങനെ ബന്ധപ്പെട്ടിരിക്കുന്നു?
ദിവസവും ഏഴ് മണിക്കൂർ എങ്കിലും ഉറങ്ങാൻ ശ്രമിക്കണം. ജോലി പോകുന്ന സ്ത്രീകളാണെങ്കിലും വീട്ടിലെ ജോലി ചെയ്യുന്നവരാണെങ്കിലും ശരീരം സംരക്ഷിക്കാൻ ദിവസവും 30 മുതൽ 45 മിനിറ്റ് എങ്കിലും വ്യായാമം ചെയ്യാൻ ശ്രമിക്കണം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
