കേന്ദ്രസർക്കാരിനും ഡൽഹി അടക്കം നാല് സംസ്ഥാനങ്ങൾക്കും പങ്കാളിത്തമുള്ള നാഷണൽ ക്യാപ്പിറ്റൽ റീജിയൺ ട്രാൻസ്പോർട്ട് കോർപ്പറേഷനാണ് ആർആർടിഎസ് പദ്ധതി നടപ്പാക്കുന്നത്. രാജ്യതലസ്ഥാനത്തെ അയൽസംസ്ഥാനങ്ങളിലടക്കമുള്ള സമീപനഗരങ്ങളുമായി ബന്ധിപ്പിക്കുന്നതാണ് പദ്ധതി. ഇതിൻ്റെ ആദ്യഘട്ടമാണ് 82.15 കിലോമീറ്റർ ദൂരമുള്ള ഡൽഹി – മീററ്റ് പാത. 2025ൽ പൂർത്തിയാകുമെന്ന് കരുതുന്ന പാതയുടെ 17 കിലോമീറ്റർ നീളത്തിലുളള ആദ്യഘട്ടം ഈ വർഷം തുറന്നുകൊടുക്കും. യുപി സ‍ർക്കാരും ഡൽഹി സ‍ർക്കാരും പങ്കാളികളായ ഈ പാതയ്ക്ക് 30,000 കോടിയിലധികമാണ് നി‍ർമാണച്ചെലവ്.
പരമാവധി 180 കിലോമീറ്റർ വേഗമാർജിക്കുന്ന ട്രെയിനുകൾ ഫ്രഞ്ച് കമ്പനിയായ അൽസ്റ്റോം ആണ് നിർമിച്ചിരിക്കുന്നത്, കൊച്ചി മെട്രോ കോച്ചുകൾ നിർമിച്ച അതേ സ്ഥാപനം. 14 സ്റ്റോപ്പുകളുള്ള ഡൽഹി – മീററ്റ് യാത്ര ഒരു മണിക്കൂറിൽ താഴെ സമയം കൊണ്ട് പൂർത്തിയാക്കാനാകുമെന്നാണ് പ്രതീക്ഷ. പൂർണമായും പുതിയ സ്റ്റാൻഡേഡ് ഗേജ് പാത നിർമിച്ച് അതുവഴി സെമി ഹൈസ്പീഡ് ട്രെയിനുകൾ ഓടിക്കുന്ന പദ്ധതി ഇന്ത്യയിൽ തന്നെ ആദ്യത്തേതാണ്. കെ-റെയിൽ സിൽവർലൈൻ ട്രെയിനിന് ഒരു ജില്ലയിൽ ഒരു സ്റ്റേഷൻ മാത്രമാണ് വിഭാവനം ചെയ്യുന്നതെങ്കിൽ പത്ത് കിലോമീറ്ററിൽ താഴെ മാത്രമാണ് ഡൽഹി മീററ്റ് ആർആർടിഎസിൽ സ്റ്റേഷനുകൾ തമ്മിലുള്ള ദൂരം. യാത്രവേഗം കുറയാനുള്ള കാരണങ്ങളിലൊന്നും ഇതാണ്.
പുറത്തിറങ്ങുന്നത് 120 വന്ദേ ഭാരത് സ്ലീപ്പർ ട്രെയിനുകൾ, ഞെട്ടിച്ച് റഷ്യൻ കമ്പനി; ‘ഇന്ത്യൻ റെയിൽവേയുടെ മുഖം മാറും’
സ്റ്റേഷനുകളോടു ചേർന്ന് വാണിജ്യ, വിനോദകേന്ദ്രങ്ങൾ വികസിപ്പിക്കാനും പദ്ധതിയുണ്ട്. ദുഹായ് സ്റ്റേഷനിലും യാത്രക്കാർക്ക് കയറാനും ഇറങ്ങാനും സ്റ്റേഷനുണ്ടാകും. ഇതിനോടു ചേർന്ന് 77 ഏക്കറോളം വികസിപ്പിക്കാനാണ് പദ്ധതി. അമ്യൂസ്മെൻ്റ് പാർക്കുകളും മാളുകളും അടക്കമുള്ള വികസനങ്ങൾ മറ്റു സ്റ്റേഷനുകളോടു ചേർന്നും ഉണ്ടാകും.
മെട്രോയുമായി വ്യത്യാസം ഏറെ
ട്രെയിനുകളുടെ വശക്കാഴ്ചകളിൽ മെട്രോയുമായി സാമ്യം തോന്നാമെങ്കിലും രണ്ട് സംവിധാനങ്ങളും തമ്മിൽ ഏറെ വ്യത്യാസമുണ്ട്. ആർആർടിഎസ് ട്രെയിനുകൾ താരതമ്യേന കൂടുതൽ ദൂരം സഞ്ചരിക്കാനുള്ളതാണ് എന്നതാണ് പ്രധാന വ്യത്യാസം. കൂടാതെ മെട്രോ സ്റ്റേഷനുകൾ തമ്മിൽ ഒന്നോ രണ്ടോ കിലോമീറ്റർ മാത്രം വ്യത്യാസമുണ്ടാകുമ്പോൾ ആർആർടിഎസിൽ ഇത് പത്ത് കിലോമീറ്ററോളമാണ്. ബസുകൾക്ക് സമാനമായി ഒന്നിനു പിറകിൽ മറ്റൊന്നായി സീറ്റുകൾ ക്രമീകരിച്ചിരിക്കുന്നു. കൂടാതെ യാത്രക്കാർക്ക് നടുവിൽ നിൽക്കാനുള്ള സൗകര്യവുമുണ്ട്.
ദേശീയപാത വികസനം; നഷ്ടപരിഹാരം നിശ്ചയിക്കുന്നത് കെട്ടിടങ്ങളുടെ കാലപ്പഴക്കം നോക്കി
കൂടാതെ യാത്രക്കാ‍ർക്കായി ലഗേജ് റാക്ക്, വൈഫൈ, ട്രെയിനിനുള്ളിൽ തന്നെ മെഡിക്കൽ സേവനം, സുരക്ഷയ്ക്കായി സിസിടിവി ക്യാമറകൾ തുടങ്ങിയവയുമുണ്ട്. സ്ത്രീകൾക്കും അംഗപരിമിത‍ർക്കുമായി സീറ്റുകൾ നീക്കി വെച്ചിട്ടുണ്ട്. പ്രീമിയം ക്ലാസിൽ കൂടുതൽ സുഖപ്രദമായ സീറ്റുകളുണ്ടാകും. പൂർണമായും ഇന്ത്യയിൽ തന്നെ രൂപകൽപന ചെയ്ത് നി‍ർമാണം പൂ‍ർത്തിയാക്കിയവയാണ് ഈ ട്രെയിനുകൾ.
സമീപനഗരങ്ങളിലേയ്ക്ക് വളരും
കേന്ദ്രസ‍ർക്കാരിന് 50 ശതമാനം ഓഹരിയുള്ള നാഷണൽ ക്യാപിറ്റൽ റാപ്പിഡ് ട്രാൻസ്പോർട്ട് കോ‍ർപ്പറേഷനിൽ ഡൽഹി, യുപി, ഹരിയാന, രാജസ്ഥാൻ സർക്കാരുൾക്ക് 12.5 ശതമാനം വീതം പങ്കാളിത്തമുണ്ട്. യുപിയുമായി ബന്ധിപ്പിക്കുന്ന ഡൽഹി – ഗാസിയാബാദ് – മീററ്റ് പാതയ്ക്കു പുറമെ ഡൽഹി – ഗുരുഗ്രാം – ആൽവാ‍ർ, ഡൽഹി – പാനിപത് പാതകളും നി‍‍ർമിക്കാനാണ് കോ‍ർപ്പറേഷൻ്റെ പദ്ധതി. അതിവേഗം വളരുന്ന രാജ്യതലസ്ഥാനത്ത് ഗതാഗതക്കുരുക്ക് ഒഴിവാക്കാനും പൊതുജനങ്ങൾക്ക് അതിവേഗയാത്ര സാധ്യമാക്കാനുമാണ് സെമി ഹൈസ്പീഡ് യാത്ര സാധ്യമാക്കുന്ന ഇന്ത്യയിലെ ആദ്യ റീജിയണൽ റെയിൽ തയ്യാറാക്കുന്നത്.
ഇന്ത്യൻ റെയിൽവേ ഉപയോഗിക്കുന്ന ബ്രോഡ് ഗേജിൽ നിന്ന് വ്യത്യസ്തമായി രാജ്യത്തെ മെട്രോ ട്രെയിനുകളും യൂറോപ്പിലെ ട്രെയിനുകളും പരക്കെ ഉപയോഗിക്കുന്ന സ്റ്റാൻഡേഡ് ഗേജിലാണ് ആർആർടിഎസ് കുതിക്കുക. 5 മുതൽ 10 മിനിട്ട് വരെ ഇടവേളയിൽ ട്രെയിനുകൾ സർവീസ് നടത്തും. കൂടാതെ ഏതു കാലാവസ്ഥയിലും കുറഞ്ഞ ഇടവേളയിൽ ട്രെയിനുകൾ ഓടിക്കാൻ ഉതകുന്ന ഇടിസിഎസ് 2 സിഗ്നലിങ് സംവിധാനവുമുണ്ടാകും.
കേരള സ‍ർക്കാർ വിഭാവനം ചെയ്യുന്ന കെറെയിൽ സിൽവ‍ർലൈനിൽ സ്റ്റേഷനുകൾ തമ്മിൽ ഏകദേശം അൻപതു കിലോമീറ്ററോളം ദൂരമുണ്ടാകും. 20 മിനിട്ട് ഇടവേളയിലായിരിക്കും ട്രെയിനുകൾ സർവീസ് നടത്തുക. ഇക്കാര്യങ്ങൾ മാറ്റി നിർത്തിയാൽ കെ റെയിലും ഡൽഹി ആ‍ർആർടിഎസും തമ്മിൽ സാങ്കേതികപരമായി ഏറെ സമാനതകളുണ്ട്. 82.15 കിലോമീറ്റർ ദൂരമുള്ള ഡൽഹി – മീററ്റ് പാതയ്ക്കായി 30,274 കോടി രൂപയാണ് ചെലവാകുന്നത്. എന്നാൽ 529.45 കിലോമീറ്റർ പിന്നിടുന്ന സിൽവർലൈൻ പദ്ധതിയ്ക്ക് 63,940 കോടി രൂപ മാത്രമാണ് ചെലവാകുക എന്നാണ് കെ-റെയിൽ കോർപ്പറേഷൻ അവകാശപ്പെടുന്നത്.
വരള്‍ച്ച രൂക്ഷം; കബിനി നദിയില്‍ പമ്പിംഗും പ്രതിസന്ധിയില്‍ |Kabini River
