യോഗത്തില്‍ റിയാദ് സിറ്റിയിലെ റോയല്‍ കമ്മീഷന്‍ സിഇഒ ഫഹദ് അല്‍ റഷീദ്, ഫ്രാന്‍സിലെ സൗദി അംബാസഡര്‍ ഫഹദ് അല്‍ റുവൈലി, ബിഐഇയുടെ സെക്രട്ടറി ജനറല്‍ ഡിമിട്രിയോസ് കെര്‍കെന്‍സെസ് തുടങ്ങി നിരവധി മുതിര്‍ന്ന ഉദ്യോഗസ്ഥരും ഭരണാധികാരികളും സംബന്ധിച്ചു. ബ്യൂറോ ഇന്റര്‍നാഷണല്‍ ഡെസ് എക്സ്പോസിഷന്‍സിന്റെ എന്‍ക്വയറി മിഷനില്‍ നിന്നുള്ള ഒരു പ്രതിനിധി സംഘം, 2030ലെ എക്‌സപോയുടെ ആതിഥേയ രാജ്യം തിരഞ്ഞെടുക്കുന്നതിനുള്ള നടപടിക്രമങ്ങളുടെ ഭാഗമായാണ് സൗദി തലസ്ഥാനമായ റിയാദില്‍ എത്തിയത്.
Also Read: മണിക്കൂറിന്റെ ഇടവേള മാത്രം; മലയാളി ദമ്പതികൾ ഷാർജയിൽ അന്തരിച്ചു
റിയാദ് സിറ്റിയിലെ റോയല്‍ കമ്മീഷന്‍ സിഇഒ ഫഹദ് അല്‍ റഷീദ്, ബിഐഇയുടെ സന്ദര്‍ശന പ്രതിനിധി സംഘത്തിലെ അംഗങ്ങള്‍, ബന്ധപ്പെട്ട ഏജന്‍സികളില്‍ നിന്നുള്ള നിരവധി പ്രതിനിധികള്‍ എന്നിവരുടെ സാന്നിധ്യത്തിലായിരുന്നു ശില്‍പശാല. എക്സ്പോ 2030 ആതിഥേയത്വം വഹിക്കാനുള്ള സൗദി അറേബ്യയുടെ ശ്രമത്തെക്കുറിച്ചും റിയാദില്‍ ഉയര്‍ന്ന ആഗോള ഇവന്റ് സംഘടിപ്പിക്കുന്നതിന്റെ നേട്ടങ്ങളെ കുറിച്ചും ശില്‍പശാല ചര്‍ച്ച ചെയ്തു. കിരീടാവകാശിയും പ്രധാനമന്ത്രിയും റിയാദ് സിറ്റിക്കുള്ള റോയല്‍ കമ്മീഷന്‍ ഡയറക്ടര്‍ ബോര്‍ഡ് ചെയര്‍മാനുമായ മുഹമ്മദ് ബിന്‍ സല്‍മാന്‍ രാജകുമാരന്റെ പ്രത്യേക ശ്രദ്ധയും താല്‍പര്യവും മൂലം വേള്‍ഡ് എക്സ്പോയുടെ അസാധാരണമായ ഒരു പതിപ്പിന് ആതിഥേയത്വം വഹിക്കാന്‍ റിയാദിന് കഴിയുമെന്ന് അല്‍ റഷീദ് വിശദീകരിച്ചു.
പ്രതിനിധി സംഘം ധനകാര്യ മന്ത്രി മുഹമ്മദ് അല്‍ ജദാനുമായി കൂടിക്കാഴ്ച നടത്തുകയും എക്‌സിബിഷനെ സാമ്പത്തികമായി പിന്തുണയ്ക്കുന്നതിനുള്ള രാജ്യത്തിന്റെ പ്രതിജ്ഞാബദ്ധതയുമായി ബന്ധപ്പെട്ട വിശദാംശങ്ങള്‍ അവലോകനം ചെയ്യുകയും ചെയ്തു. അടിസ്ഥാനപരവും പ്രവര്‍ത്തനപരവുമായ ചെലവുകള്‍ നല്‍കുന്നതുള്‍പ്പെടെ, വേള്‍ഡ് എക്സ്പോയ്ക്ക് ആവശ്യമായി വരുന്ന ധനസഹായം നല്‍കാനും ആതിഥേയത്വം വഹിക്കാനും ആവശ്യമായ എല്ലാ തയ്യാറെടുപ്പുകളും നടത്താനുള്ള രാജ്യത്തിന്റെ പ്രതിബദ്ധത മന്ത്രി പറഞ്ഞു. സൗദി വിഷന്‍ 2030 പ്രകാരം രാജ്യം സാക്ഷ്യം വഹിച്ച സാമ്പത്തിക പരിഷ്‌കാരങ്ങള്‍ വളര്‍ച്ചാ നിരക്ക് വര്‍ദ്ധിപ്പിക്കുന്നതിനും ത്വരിതപ്പെടുത്തുന്നതിനും കാരണമായെന്നും അല്‍ ജദാന്‍ കൂട്ടിച്ചേര്‍ത്തു. റിയാദില്‍ വിവിധ സാമ്പത്തിക അവസരങ്ങള്‍ സൃഷ്ടിക്കുന്നതിനും വിവിധ മേഖലകളില്‍ വരുമാനം ഉണ്ടാക്കുന്നതിനും സംഭാവന ചെയ്യുന്ന കിംഗ്ഡത്തിന്റെ സംരംഭങ്ങളില്‍ വേള്‍ഡ് എക്‌സ്‌പോയും ഉള്‍പ്പെടുമെന്നും അദ്ദേഹം പറഞ്ഞു.
തിങ്കളാഴ്ച ആരംഭിച്ച പദ്ധതി അവലോകനം മാര്‍ച്ച് 10 വരെ തുടരും. എക്സ്പോക്ക് അപേക്ഷ നല്‍കിയ രാജ്യങ്ങളില്‍ ഒരുക്കിയ സൗകര്യങ്ങളും സംവിധാനങ്ങളും വിവിധ പദ്ധതികളുമാണ് കമ്മിറ്റി പരിശോധിക്കുന്നത്. സൗദിക്ക് പുറമെ എക്സ്പോ 2030ക്ക് അപേക്ഷ നല്‍കിയ ദക്ഷിണ കൊറിയ, ഇറ്റലി, യുക്രൈന്‍, എന്നീ രാജ്യങ്ങളും സംഘം സന്ദര്‍ശിക്കുന്നുണ്ട്. പരിശോധക സംഘത്തിന്റെ കണ്ടെത്തലുകള്‍ ഈ വര്‍ഷം മെയ് മാസത്തില്‍ ചേരുന്ന എക്സിക്യൂട്ടീവ് കമ്മറ്റി ചര്‍ച്ച ചെയ്യും. തുടര്‍ന്ന് ഈ വര്‍ഷം നവംബറില്‍ നടക്കുന്ന ജനറല്‍ അസംബ്ലിയില്‍ അംഗ രാജ്യങ്ങള്‍ രഹസ്യ ബാലറ്റിലൂടെയാണ് ആതിഥേയ രാജ്യത്തെ തെരഞ്ഞെടുക്കുക. 2030 ഒക്ടോബര്‍ 1 മുതല്‍ 2031 മാര്‍ച്ച് 31 വരെ റിയാദില്‍ വെച്ച് എക്സ്പോ നടത്താനാണ് സൗദിയുടെ തീരുമാനം. ശാസ്ത്ര സാങ്കേതിക വിദ്യകളിലെ മുന്നേറ്റം, സാംസ്‌കാരിക വൈവിധ്യം, പൈതൃകം, പരിസ്ഥിതി, സാമൂഹിക സാമ്പത്തിക രംഗം എന്നിവയിലെ ആഗോള മാറ്റങ്ങളാണ് എക്സ്പോയില്‍ അവതരിപ്പിക്കുക. 2021 ഒക്ടോബര്‍ 1 മുതല്‍ 2022 മാര്‍ച്ച് 31 വരെ ദുബായില്‍ വെച്ചാണ് അവസാനമായി എക്സ്പോ നടന്നത്. 2025 ഏപ്രില്‍ 13 മുതല്‍ ഒക്ടോബര്‍ 13 വരെ ജപ്പാനിലെ കന്‍സായിയിലെ ഒസാക്കയിലാണ് അടുത്ത എക്സ്പോ അരങ്ങേറുക.
Read Latest Gulf News and Malayalam News
പടർന്ന് പിടിച്ച് കാട്ടുതീ
