ഇതിനിടയിലാണ് ദേശീയപാതാ വികസനത്തിന് കേരളത്തിന്റെ വിഹിതം വേണ്ട കേന്ദ്രം മുഴുവൻ ഫണ്ടും കേന്ദ്രം നൽകുമെന്നുമുള്ള റിപ്പോർട്ടുകൾ വരുന്നത്. കിഫ്ബിക്കെതിരെയുള്ള കേന്ദ്രത്തിന്റെ മറ്റൊരു നീക്കമായി വിലയിരുത്തുന്നവരുമുണ്ട്. ദേശീയപാതാ വികസന പരിപാടികളിൽ കിഫ്ബിയുടെ ഫണ്ട് വേണ്ട എന്ന് പറഞ്ഞത് ഒരു തരത്തിൽ കേരളത്തിന് ആശ്വാസമാകുമെങ്കിലും കേന്ദ്രത്തിന്റെ ലക്ഷ്യം എന്തെന്ന ചോദ്യമാണ് അവശേഷിക്കുന്നത്.
ദേശിയപാതാ വികസനത്തിന് സ്ഥലം ഏറ്റെടുക്കുന്നതിനുള്ള മുഴുവൻ തുകയും കേന്ദ്രം വഹിക്കുമെന്ന് കഴിഞ്ഞ ദിവസം ഗതാഗത മന്ത്രി നിതിൻ ഗഡ്കരി കേരളത്തിന്റെ പ്രതിനിധി കെവി തോമസുമായുള്ള കൂടിക്കാഴ്ചയിടെയാണ് വ്യക്തമാക്കിയത്. കേരളത്തിന്റെ വിഹിതമായ 25 ശതമാനം കിഫ്ബി ഫണ്ടിൽ നിന്നായിരുന്നു ഇതുവരെ ചെലവഴിച്ചിരുന്നത്. ഇത് ഒഴിവാക്കണെമന്ന് മുഖ്യമന്ത്രി തന്നെ നേരത്തെ കേന്ദ്രത്തോട് അഭ്യർത്ഥിച്ചിരുന്നതുമാണ്. ഏതായാലും കേരളത്തിന്റെ ആവശ്യം കേന്ദ്രം ഇപ്പോൾ പരിഗണിച്ചിരിക്കുകയാണ്. ഇതുവരെയുള്ള ബൃഹദ് പദ്ധതികൾക്കെല്ലാം ഇത്രയും തുക കേരളം ചെലവിട്ടുവെങ്കിലും ഇനിമുതൽ അത് വേണ്ടിവരില്ല. എന്നിരിക്കിലും, ഈ നീക്കത്തിനു പിന്നിലും മറ്റെന്തെങ്കിലും താത്പര്യം കേന്ദ്രത്തിന് ഉണ്ടോയെന്ന സംശയം ഉയരുന്നതിന് കാരണമുണ്ട്.
കിഫ്ബി വായ്പയെ സംസ്ഥാനത്തിന്റെ പൊതു കടത്തിൽ ഉൾപ്പെടുത്തിയത് ഈയടുത്താണ്. ഏത് വിധേയനയും സംസ്ഥാനത്തിന്റെ വികസന പ്രവർത്തനങ്ങൾക്ക് തുരങ്കം വയ്ക്കുക എന്നത് മാത്രമാണ് കേന്ദ്രം ലക്ഷ്യമിടുന്നതെന്ന് സിപിഎമ്മും മറ്റ് എൽഡിഎഫ് കക്ഷികളും ആരോപിക്കുന്നു. കിഫ്ബിയുടെ വായ്പ സംസ്ഥാനത്തിന്റെ വായ്പാ പരിധിയിൽ ഉൾപ്പെടുത്തിയത് മൂലം സംസ്ഥാന സർക്കാർ കടുത്തസാമ്പത്തിക ഞെരുക്കത്തിലായിട്ടുണ്ട്. ഇത് ഗൗരവമായ സ്ഥിതിവിശേഷമാണ്. സംസ്ഥാന സർക്കാർ ലക്ഷ്യം വച്ചിട്ടുള്ള മറ്റ് വികസന പ്രവർത്തനങ്ങളെയും ക്ഷേമ പദ്ധതികളെയും ഇത് പ്രതികൂലമായി ബാധിക്കുമെന്നത്‌ വസ്‌തുതയാണെന്ന് ധനമന്ത്രി കെഎൻ ബാലഗോപാലും വ്യക്തമാക്കിയിട്ടുണ്ട്. അതുകൊണ്ടു തന്നെ കിഫ്ബി എടുത്ത വായ്പാ തുകയിൽ തിരിച്ചടച്ച തുക സംസ്ഥാനത്തിന്റെ വായ്പാ കണക്കിൽ നിന്ന് ഒഴിവാക്കണമെന്ന് കേന്ദ്ര സർക്കാരിനോട് സംസ്ഥാന സർക്കാർ അഭ്യർത്ഥിച്ചിട്ടുണ്ട്.
കിഫ്ബിയുടെ പ്രവർത്തനങ്ങളിൽ കേന്ദ്ര സർക്കാരിന് അതൃപ്തി തുടങ്ങിയിട്ട് കുറച്ച് നാളുകളായി. കിഫ്ബി വഴി സംസ്ഥാനം സ്വന്തം നിലയിൽ വികസന പ്രവർത്തനങ്ങളുമായി മുന്നോട്ട് പോകുന്നതാണ് കേന്ദ്ര സർക്കാരിന് അതൃപ്തിയുണ്ടാക്കുന്നുണ്ടെന്നാണ് ഇടതുപക്ഷം മനസ്സിലാക്കുന്നത്. കിഫ്ബിക്കെതിരെ ആദ്യം ഓഡിറ്റ് സംബന്ധിച്ച വിവാദവും പിന്നെ ആദായ നികുതിയുമായി ബന്ധപ്പെട്ട കേസുകളുമെല്ലാം വന്നു. അവയൊന്നും പ്രതീക്ഷിച്ച ഫലം നൽകാതെ വന്നതോടെയാണ് കേന്ദ്രം ഇഡിയെ ഇറക്കി കളിക്കുന്നത്. മസാല ബോണ്ട് നിയമ വിരുദ്ധമാണ് എന്നു പറഞ്ഞാണ് കിഫ്ബിക്കെതിരെ കേന്ദ്ര അന്വേഷണ ഏജൻസികൾ തുനിഞ്ഞിറങ്ങിയത്. കിഫ്ബി മസാലബോണ്ട് വിതരണത്തിൽ ഫെമ ലംഘനം നടന്നിട്ടുണ്ടെന്നായിരുന്നു കേന്ദ്രത്തിന്റെ വാദം. എന്നാൽ മസാല ബോണ്ടിറക്കാൻ കിഫ്‌‌ബിക്ക്‌ അനുമതി നൽകിയിരുന്നുവെന്ന്‌ ആർബിഐ സത്യവാങ്‌‌മൂലം സമർപ്പിച്ചതോടെ ആ കാര്യത്തിൽ തീരുമാനമാകുകയായിരുന്നു.
നിലവിൽ കിഫ്ബിയെ പൂട്ടുക എന്ന ഉദ്ദേശത്തോടെ കേന്ദ്ര സർക്കാർ വായ്പാ നയങ്ങളിൽ മാറ്റംവരുത്തുമ്പോൾ സംസ്ഥാനത്തെ സാമ്പത്തിക സ്ഥിതിയാണ് താളം തെറ്റുന്നത്. സാമ്പത്തിക വർഷത്തെ അവസാന മാസമായ മാർച്ചിൽ ശമ്പളത്തിനും പെൻഷനുമൊക്കെയായി വളരെ വലിയൊരു തുകയാണ് സംസ്ഥാനം കണ്ടെത്തേണ്ടത്. അതുകൊണ്ടു തന്നെ വലിയൊരു തുക വായ്പ എടുക്കേണ്ട അവസ്ഥയിലാണ് സർക്കാരിപ്പോൾ. എന്നാൽ കിഫ്ബി എടുത്ത വായ്പയും കൂടാതെ ക്ഷേമപെന്‍ഷന്‍ വിതരണം സുഗമമായി നടക്കാന്‍ രൂപീകരിച്ച പെന്‍ഷന്‍ കമ്പനി എടുത്ത വായ്പയും സംസ്ഥാനത്തിന്റെ വായ്പ ഇനത്തിൽ പെടുത്തിയതോടെ വായ്പ എടുക്കാനുള്ള സംസ്ഥാനത്തിന്റെ തുക കുറഞ്ഞിരിക്കുകയാണ്. ശമ്പളത്തിനും പെൻഷനും പുറമെ വികസന പ്രവർത്തനങ്ങൾക്കായുള്ള ഫണ്ടും സംസ്ഥാനം കണ്ടെത്തേണ്ടതുണ്ട്. സംസ്ഥാനത്തിന്റെ വായ്പാ വിഹിതം ഇത്തരത്തിൽ വെട്ടിക്കുറച്ചതിലൂടെ കേന്ദ്രം ലക്ഷ്യമിടുന്നത് കിഫ്ബിയെ തന്നെയാണെന്ന് പറയേണ്ടി വരും.
അതേസമയം ഈ സാമ്പത്തിക ഞെരുക്കത്തിനിടയിലും കിഫ്ബി വഴി 5,681 കോടി രൂപയുടെ പുതിയ പദ്ധതികള്‍ക്ക് സംസ്ഥാന സർക്കാർ അനുമതി നൽകി. 64 പദ്ധതികൾക്കായാണ് ഈ തുക വകയിരുത്തിയിരിക്കുന്നത്. ഇതിനായി വായ്പ എടുക്കാൻ തന്നെയാണ് സർക്കാരിന്റെ തീരുമാനം. വായ്പ എടുക്കാനുള്ള സംസ്ഥാന വിഹിതം കേന്ദ്രം വെട്ടിക്കുറച്ചെങ്കിലും കിഫ്ബി വഴി 9000 കോടി രൂപ കൂടി അടുത്ത സാമ്പത്തിക വർഷം കടമെടുക്കാനാണ് സർക്കാരിന്റെ നീക്കം. അതില്ലെങ്കിൽ സംസ്ഥാനത്തെ വികസന പ്രവർത്തനങ്ങൾ തടസ്സപ്പെടാനാണ് സാധ്യത. നിലവിൽ 12,089 കോടി രൂപയുടെ വികസന പ്രവർത്തനങ്ങളാണ് സംസ്ഥാനത്ത് കിഫ്ബി വഴി പൂർത്തികരിച്ചിട്ടുള്ളത്. 23,095 കോടി രൂപയാണ് കിഫ്ബി ഇതുവരെ വിവിധ പദ്ധതികൾക്കായി ചെലവിട്ടിരിക്കുന്നത്.
(Samayam Malayalam believes in promoting diverse views and opinions on all issues. They need not conform to our editorial positions.)
