Also Read: കുവൈറ്റ് സ്‌കൂളുകളിലും കിന്റര്‍ഗാര്‍ട്ടനുകളിലും നിരോധിച്ച ഭക്ഷണ ഉല്‍പ്പന്നങ്ങള്‍ ഇവയാണ്
സംരംഭക പങ്കാളിത്തംകൊണ്ട് ശ്രദ്ധേയമായി മലപ്പുറത്തെ പ്രവാസി ലോൺ മേള; 432 സംരംഭകർക്ക് വായ്പാനുമതി
മലപ്പുറം ജില്ലയിലെ പ്രവാസി സംരംഭകർക്കായി നോർക്ക റൂട്ട്സും കാനറാ ബാങ്കും ആസ്റ്റര്‍ ഗ്രൂപ്പിന്റെ നേതൃത്വത്തിലുള്ള മൈയിൽസ് കൽപകൻചേരിയും സംയുക്തമായി സംഘടിപ്പിച്ച പ്രവാസി ലോൺ മേളയിൽ
780 സംരംഭകർ പങ്കെടുത്തു. ഇതിൽ 432 സംരംഭകർക്ക് വായ്പാനുമതി ലഭിച്ചു. കാനറാ ബാങ്കിൽ നിന്നും 252 പേർക്കും മറ്റ് ധനകാര്യ സ്ഥാപനങ്ങളിൽ നിന്നും 180 പേർക്കുമാണ് ലോണിനായി പ്രഥമികാനുമതി ലഭിച്ചത്.
മാർച്ച് 7,8 തീയ്യതികളിൽ കൽപ്പകൻചേരി മൈയിൽസ് ആഡിറ്റോറിയത്തിലാണ് ലോൺ മേള നടന്നത്.
മേളയിൽ പങ്കെടുക്കാൻ അവസരം ലഭിക്കാതിരുന്നവർക്കായി മാർച്ച് 16 ന് മലപ്പുറം ടൗൺ ഹാളിൽ കേരള ബാങ്കിന്റെ സഹകരണത്തോടെ മേള സംഘടിപ്പിക്കുമെന്ന് നോർക്കാ റൂട്ട്സ് സി.ഇ ഒ കെ. ഹരികൃഷ്ണൻ നമ്പൂതിരി അറിയിച്ചു.
തിരിച്ചെത്തിയ പ്രവാസികളുടെ പുനരധിവാസത്തിനായി സംസ്ഥാന സർക്കാർ നോർക്ക റൂട്ട്സ് വഴി നടപ്പിലാക്കുന്ന നോർക്ക ഡിപ്പാർട്ട്മെൻറ് പ്രോജക്ട് ഫോർ റീട്ടെൻഡ് എമിഗ്രൻറ് (NDPREM) പദ്ധതി പ്രകാരമായിരുന്നു പ്രവാസി ലോൺമേള.
മേളയുടെ ഉദ്ഘാടനം കാനറാ ബാങ്ക് ഡിവിഷണൽ മാനേജർ ബിന്ദു എസ് നായർ നിർവ്വഹിച്ചു. ചടങ്ങിൽ നോർക്ക റൂട്ട്സ് കോഴിക്കോട് റീജിയണൽ മാനേജർ അബ്ദുൾ നാസർ വാക്കയിൽ അദ്ധ്യക്ഷത വഹിച്ചു. ആസ്റ്റർ ഡയറക്ടർ ശ്രീ. അഹന്മദ് മൂപ്പൻ , മൂപ്പൻ ഇൻസ്റ്റിറ്റ്യൂട്ട് ഫോർ ലോക്കൽ എംപവർമെന്റ് അഡ്മിനിസ്ട്രേറ്റർ അഷ്ക്കർ അലി കോക്കറാട്ടിൽ, നോർക്കാ റൂട്ട്സ് ബിസ്നസ് ഫെസിലിറ്റേഷൻ സെന്റർ മാനേജർ സുരേഷ് കെ.വി, നോർക്കാ റൂട്ട്സ് പ്രോജക്റ്റ് അസിസ്റ്റൻറ് എം. ജയകുമാർ, കാനറാ ബാങ്കിൽ നിന്നും സീനിയർ മാനേജർ അൽ ജസീർ എൻ എ , ബ്രാഞ്ച് മാനേജർമാരായ രേഷ്മ എസ്, ആനന്ദ് എം എം എന്നിവർ സംബന്ധിച്ചു.
പ്രവാസി സംരംഭങ്ങള്‍ക്ക് ഒരു ലക്ഷം രൂപ മുതല്‍ പരമാവധി 30 ലക്ഷം രൂപ വരെയുളള വായ്പകളാണ് എന്‍.ഡി.പി.ആര്‍.ഇ.എം പദ്ധതി പ്രകാരം അനുവദിക്കുക. കൃത്യമായ വായ്പാ തിരിച്ചടവിന് 15 ശതമാനം മൂലധന സബ്‌സിഡിയും (പരമാവധി മൂന്നു ലക്ഷം രൂപ വരെ) 3 ശതമാനം പലിശ സബ്‌സിഡിയും (ആദ്യത്തെ നാലു വര്‍ഷം) പദ്ധതി വഴി സംരംഭകര്‍ക്ക് ലഭിക്കും. പ്രവാസി കൂട്ടായ്മകള്‍, പ്രവാസികള്‍ ചേര്‍ന്ന് രൂപീകരിച്ച കമ്പനികള്‍, സൈാസൈറ്റികള്‍ എന്നിവര്‍ക്കും എന്‍.ഡി.പി.ആര്‍.ഇ.എം പദ്ധതി വഴി അപേക്ഷിക്കാന്‍ അര്‍ഹതയുണ്ട്.
എന്‍.ഡി.പി. ആര്‍.ഇ.എം പദ്ധതി സംബന്ധിച്ച കൂടുതല്‍ വിവരങ്ങള്‍ക്ക് 24 മണിക്കൂറും പ്രവര്‍ത്തിക്കുന്ന നോര്‍ക്ക ഗ്ലോബല്‍ കോണ്‍ടാക്ട് സെന്ററിന്റെ ടോള്‍ ഫ്രീ നമ്പറുകളായ 1800 425 3939 (ഇന്ത്യയില്‍ നിന്നും) +91-8802 012 345 (വിദേശത്തുനിന്നും, മിസ്സ്ഡ് കോള്‍ സര്‍വ്വീസ്) അല്ലെങ്കില്‍ നോര്‍ക്ക റൂട്ട്സ് ഹെഡ്ഡോഫീസ് 0471-2770500 (പ്രവ്യത്തി ദിവസങ്ങളില്‍, ഓഫീസ് സമയത്ത്) ബന്ധപ്പെടാവുന്നതാണ്.
Read Latest Gulf News and Malayalam News
വിവാഹിതനായി നടൻ സി ഷുക്കൂർ | Film Actor C Shukur |
