ഗെയ്സർ ഗ്യാസ് ചോർന്ന് നവദമ്പതികൾക്ക് ദാരുണാന്ത്യം; മുറി തുറന്നത് പോലീസ് എത്തി

Jibin George | Samayam Malayalam | Updated: 9 Mar 2023, 9:28 am

ഗെയ്സർ ഗ്യാസ് ചോർന്നുണ്ടായ അപകടത്തിൽ നോയിഡയിൽ നവദമ്പതികൾ മരിച്ചു. കുളിമുറിയിലെ ഗെയ്സർ ഗ്യാസ് സംവിധാനം ചോർന്നതാകാം അപകടകാരണമെന്നാണ് പോലീസ് നിഗമനം. സംഭവത്തിൽ പോലീസ് അന്വേഷണം ആരംഭിച്ചു

Geyser Gas Leak accident — മരിച്ച ദമ്പതികൾ. Photo: Special Arrangements

ഹൈലൈറ്റ്:

ഗെയ്സർ ഗ്യാസ് ചോർന്ന് ദമ്പതികൾ ശ്വാസം മുട്ടി മരിച്ചു.
ദമ്പതികളെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
സംഭവത്തിൽ പോലീസ് അന്വേഷണം ആരംഭിച്ചു.

നോയിഡ: ഗെയ്സർ ഗ്യാസ് ചോർന്ന് നവദമ്പതികൾ ശ്വാസം മുട്ടി മരിച്ചു. ദീപക് (40), ശിൽപ്പ (36) എന്നിവരാണ് മരിച്ചത്. ഗാസിയാബാദിലെ മുറാദ്‌നഗറിലെ അഗ്രസെൻ വിഹാർ ഫേസ് വൺ കോളനിയിൽ ബുധനാഴ്ചയാണ് ദാരുണമായ സംഭവം. ഗെയ്സർ ഗ്യാസ് സംവിധാനം ചോർന്നതാണ് ദമ്പതികളുടെ മരണത്തിന് കാരണമായതെന്ന് പോലീസ് പറഞ്ഞു.

അഫ്താബ് മികച്ച പാചകക്കാരൻ, മാംസം കഷണങ്ങളാക്കാനും സൂക്ഷിക്കാനും വിദഗ്ധൻ; ശ്രദ്ധയുടെ മോതിരം പുതിയ കാമുകിക്ക് നൽകി

ഫോൺ വിളിച്ചിട്ടും ഡോർ ബെൽ അടിച്ചിട്ടും ഏറെനേരം കഴിഞ്ഞിട്ടും ദമ്പതികൾ പ്രതികരിക്കാതെ വന്നതോടെ സമീപവാസികൾ പോലീസിൽ വിവരമറിയിക്കുകയായിരുന്നു. പോലീസ് എത്തി ഡ്യൂപ്ലിക്കേറ്റ് താക്കോൽ ഉപയോഗിച്ച് വാതിൽ തുറന്ന് വീട്ടിൽ കയറിയപ്പോഴാണ് ദമ്പതികളെ അവശനിലയിൽ കണ്ടെത്തിയത്. ഉടൻ തന്നെ ദമ്പതികളെ ഗാസിയാബാദിലെ സ്വകാര്യ ആശുപത്രിയിൽ എത്തിച്ചെങ്കിലും ഇരുവരെയും രക്ഷിക്കാനായില്ല.

ഒരു മണിക്കൂറോളം നേരം ദമ്പതികൾ അവശനിലയിൽ മുറിയിൽ കിടന്നതായിട്ടാണ് റിപ്പോർട്ടുകൾ. നിയമ നടപടികൾ പൂർത്തിയാക്കിയ ശേഷം ഇരുവരുടെയും മൃതദേഹങ്ങൾ പോസ്റ്റ് മോർട്ടം നടപടികൾക്കായി അയച്ചതായി എസ്എച്ച്ഒ മുറാദ്‌നഗർ സതീഷ് കുമാർ അറിയിച്ചു. സംഭവത്തിൽ വിശദമായ അന്വേഷണം നടത്താനുള്ള നീക്കത്തിലാണ് പോലീസ്.

പ്രിയങ്ക ഗാന്ധിയുടെ സഹായി വധഭീഷണി മുഴക്കി; ആരോപണവുമായി ബിഗ് ബോസ് താരം

ദമ്പതികൾ ഹോളി ആഘോഷിക്കാൻ വീട്ടിൽ നിന്ന് പുറത്തേക്ക് പോയിരുന്നു. വീട്ടിൽ തിരിച്ച് എത്തിയ ശേഷമാണ് അപകടമുണ്ടായത്. കുളിക്കാനായി ഗെയ്സർ സംവിധാനം ഇരുവരും ഉപയോഗിക്കുകയും തുടർന്ന് ഓഫ് ചെയ്യാൻ മറന്നതാകാം അപകടത്തിന് കാരണമായതെന്നുമാണ് പോലീസിൻ്റെ നിഗമനം. കുളിമുറിയിൽ വെള്ളം ചൂടാക്കാനാണ് ഗെയ്സർ ഗ്യാസ് സംവിധാനം ഉപയോഗിക്കുക.