ഗുളിക കഴിച്ചാല്‍ തല്‍ക്കാലം മാറുമെങ്കിലും വീണ്ടും ഇത് വരുന്നു. വന്ന പനി ഒരാഴ്ചയോളം നീണ്ടു നില്‍ക്കുന്നു. ഇതിനൊപ്പം മറ്റ് ബുദ്ധിമുട്ടുകളുമുണ്ടാകുന്നു. ഇന്‍ഫ്‌ളുവന്‍സ വൈറസാണ് ഈ പനിയ്ക്ക് കാരണമാകുന്നത്. എച്ച് 3 എന്‍ 2 (H3N2)ശ്രണിയില്‍ പെട്ട ഈ വൈറസ് പെട്ടെന്ന് വ്യാപകമായി പടര്‍ന്ന് പിടിയ്ക്കുന്ന ഒന്നാണ്.ഇത് കൊച്ചുകുട്ടികള്‍ക്ക് മുതല്‍ മുതിര്‍ന്നവര്‍ക്ക് വരെ വരും. സാധാരണ 2 ദിവസം വൈറസ് ബാധയുണ്ടാകുന്നിടത്ത് 3-5 ദിവസം വരെ ഇത് നീണ്ടു നില്‍ക്കുന്നു. ഗുരുതരമായാല്‍ മരണം വരെ റിപ്പോര്‍ട്ട് ചെയ്യപ്പെടുന്നതിനാല്‍ ഇതിന്റെ ലക്ഷണങ്ങളേയും പ്രതിവിധികളേയും കുറിച്ച് അറിഞ്ഞിരിയ്‌ക്കേണ്ടത് അത്യാവശ്യവുമാണ്…
ഇന്‍ഫെക്ഷന്‍
ഒച്ചയടപ്പ്, തൊണ്ടവേദന, മൂക്കടപ്പ്, ജലദോഷം, തലവേദന തുടങ്ങിയ പല ലക്ഷണങ്ങളും ഈ വൈറസ് ബാധ കൊണ്ടുണ്ടാകുന്നു. ചെറിയ കുട്ടികള്‍ക്ക് ഛര്‍ദിയും വയറിളക്കവും കൂടി വരുന്നു. പനിയോട് അനുബന്ധിച്ച് വരുന്ന പ്രശ്‌നങ്ങള്‍ നീണ്ടു നില്‍ക്കാം.
സൈനസ് പ്രശ്‌നം, കണ്ണിന്, ചെവിയ്ക്ക് ഇന്‍ഫെക്ഷന്‍, കഫക്കെട്ട് തുടങ്ങിയ പല പ്രശ്‌നങ്ങള്‍ക്കും ഇത് കാരണമാകുന്നു. ഡ്രൈ കഫ് ഇതിന്റെ മറ്റൊരു ഭാഗമാണ്. ചുമ നീണ്ടു നില്‍ക്കുന്നതാണ് ഇതിന്റെ മറ്റൊരു പ്രത്യേകത. ഈ ഇന്‍ഫ്‌ളുവന്‍സ പനിയുണ്ടാക്കുന്ന ക്ഷീണം ഒരു മാസത്തോളം നീണ്ടു നില്‍ക്കുന്നു.
കുട്ടികളെങ്കില്‍
സാധാരണ നാം പനിയ്ക്കും മറ്റും തനിയെ മരുന്ന് വാങ്ങി കഴിയ്ക്കുന്നവരുണ്ട്. മാത്രമല്ല, ആവശ്യമില്ലാതെ ആന്റി ബയോട്ടിക്‌സ് കഴിയ്ക്കരുത്. ഇത് മരുന്നുകളോട് വൈറസിന് പ്രതിരോധം വരുത്തുന്നതിനും ഇത്തരം മരുന്നുകള്‍ ഭാവിയില്‍ ഫലിയ്ക്കാതെ വരികയും ചെയ്യുന്നു. ഈ പനി വന്നാല്‍ മാറുന്നത് വരെ വിശ്രമിയ്ക്കുന്നതാണ് നല്ലത്. കാരണം ഇത് പൂര്‍ണമായി മാറാതെ പുറത്തിറങ്ങിയാല്‍ അവനവന്റെ രോഗം പൂര്‍ണമായി മാറില്ലെന്ന് മാത്രമല്ല, പെട്ടെന്ന് ഇത് പടരുകയും ചെയ്യുന്നു.
കുട്ടികളെങ്കില്‍ ഇവരെ സ്‌കൂളില്‍ വിടാതിരിയ്ക്കുക. പരീക്ഷാസമയമെങ്കില്‍ സ്‌കൂള്‍ വിവരമറിയിച്ചാല്‍ ഇവര്‍ക്ക് തനിയെ പരീക്ഷയെഴുതാനോ മറ്റോ ഉള്ള സാഹചര്യമുണ്ടാക്കിയേക്കും. കാരണം കുട്ടികള്‍ക്ക് ഇത് പെട്ടെന്ന് പടരാന്‍ ഇടയാക്കും. പ്രത്യേകിച്ചും സ്‌കൂളുകളിലും മറ്റും.
വെള്ളം
ഈ പനിയുടെ പാര്‍ശ്വഫലങ്ങള്‍ മാറാന്‍ നാം പോഷകഗുണമുളള ഭക്ഷണം കഴിയ്ക്കണം. പ്രോട്ടീനുകള്‍ കഴിയ്ക്കാം. കഞ്ഞിയ്‌ക്കൊപ്പം പയര്‍ പോലുള്ളവ ചേര്‍ത്ത് കഴിയ്ക്കുന്നത് നല്ലതാണ്. തേങ്ങാപ്പാല്‍ അല്‍പം കഞ്ഞിയില്‍ ചേര്‍ത്ത് കഴിയ്ക്കുന്നത് ക്ഷീണം പെട്ടെന്ന് മാറാന്‍ നല്ലതാണ്. മറ്റൊരു കാര്യമെന്നത് ശരീരത്തില്‍ വൈറ്റമിന്‍ ഡി തോത് ശരിയാണോ എന്ന് പരിശോധിയ്ക്കുക. ഇതിന്റെ തോത് കുറയുന്നത് പെട്ടെന്ന് രോഗം വരാന്‍ ഇടയാക്കും എന്ന് മാത്രമല്ല, വന്ന രോഗം പെട്ടെന്ന് മാറാതിരിയ്ക്കാനും കാരണമാകും.
ധാരാളം വെള്ളം കുടിയ്ക്കുക, സൂപ്പ് പോലുള്ളവ ഉണ്ടാക്കിക്കഴിയ്ക്കുന്നതും കുരുമുളക് രസം വച്ച് കഴിയ്ക്കുന്നതുമെല്ലാം നല്ലതാണ്. വയറിന് പ്രശ്‌നമുള്ളവര്‍ കുരുമുളക് രസം പോലുള്ളവ കഴിയ്ക്കാതിരിയ്ക്കുകയാണ് നല്ലത്.
മാസ്‌ക്
നീണ്ടു നില്‍ക്കുന്ന കഫക്കെട്ടാണ് ഈ പനി വരുത്തുന്ന മറ്റൊരു പ്രശ്‌നം. ഈ പ്രശ്‌നത്തിനും സൈനസ് പ്രശ്‌നത്തിനുമെല്ലാം അല്‍പം ഉപ്പോ മഞ്ഞള്‍പ്പൊടിയോ ഇട്ട് ആവി പിടിയ്ക്കുന്നത് ഗുണം നല്‍കും. ഇതു പോലെ ഉപ്പുവെള്ളം ഗാര്‍ഗിള്‍ ചെയ്യുന്നതോ ഇഞ്ചിയിട്ട് തിളപ്പിച്ച വെള്ളം കൊണ്ട് ഗാര്‍ഗിള്‍ ചെയ്യുന്നതും നല്ലതാണ്. കഫം പെട്ടെന്ന് പോകാന്‍ സഹായിക്കുന്ന ശ്വസന വ്യായാമമുണ്ട്. മൂക്കിലൂടെ ശക്തയില്‍ ആവുന്നത്ര ശ്വാസം ഉള്ളിലേയ്‌ക്കെടുത്ത് വായിലൂടെ ശക്തിയില്‍ പുറത്ത് വിടുക. ഇത് ശ്വാസകോശം പെട്ടെന്ന് ക്ലീന്‍ ആകാനും കഫം പുറന്തള്ളാനും സഹായിക്കും.
മാസ്‌ക് വയ്ക്കുന്നതും ശുചിത്വം പാലിയ്ക്കുന്നതും പുറത്ത് പോയി വന്നാല്‍ കൈ കഴുകുന്നതുമെല്ലാം ഇന്‍ഫ്‌ളുവന്‍സ വൈറസിനെ അകറ്റി നിര്‍ത്താന്‍ നല്ലതാണ്.
