ആറ്റുകാൽ പൊങ്കാലയുടെ പശ്ചാത്തലത്തിൽ ഏറ്റവും ശ്രദ്ധ നേടിയ ചിത്രങ്ങളിലൊന്നായിരുന്നു പഴയ തിരുവിതാംകൂർ രാജകുടുംബത്തിന്റെ പുതിയ പിൻമുറക്കാർ ജനങ്ങളെ തുറന്ന വാഹനത്തിൽ അഭിവാദനം ചെയ്തു പോകുന്ന ചിത്രം. അശ്വതി തിരുനാൾ ഗൗരി ലക്ഷ്മിഭായി, അവരുടെ മകൻ ആദിത്യ വർമ്മ എന്നിവർ തുറന്ന ജീപ്പിൽ ഭക്തർക്ക് നേരെ കൈവീശി യാത്ര ചെയ്യുന്ന ചിത്രമായിരുന്നു അത്.
ടെന്നീസ് ക്ലബ്ബ് പൗര സമിതി ഏർപ്പാട് ചെയ്ത പരിപാടിയായിരുന്നു അത്. ടെന്നീസ് ക്ലബ്ബുകാരോ രാജകുടുംബാംഗങ്ങളോ ഇതുസംബന്ധിച്ച് പ്രത്യേകിച്ചെന്തെങ്കിലും പ്രസ്താവനകളിറക്കുകയുണ്ടായില്ല. എന്നാൽ ചില മാധ്യമങ്ങൾ അവരുടെ ആഗ്രഹം വെളിപ്പെടുത്തുകയുണ്ടായി. തിരുവിതാംകൂർ രാജകുടുംബത്തിന്റെ രാഷ്ട്രീയപ്രവേശനത്തിന്റെ നാന്ദിയാണ് ഈ തുറന്ന ജീപ്പിലെ സഞ്ചാരമെന്ന് മാധ്യമങ്ങൾ വ്യാഖ്യാനിച്ചു. എന്തായാലും, ഇത്തരത്തിൽ തുറന്ന ജീപ്പിൽ സഞ്ചരിച്ച് ‘പ്രജകളെ’ അഭിവാദ്യം ചെയ്യുന്ന രീതി തിരുവിതാംകൂർ രാജകുടുംബാംഗങ്ങൾ അങ്ങനെ ചെയ്തിട്ടില്ല ഇതുവരെ. ജനാധിപത്യ സർക്കാരിന് അധികാരം കൈമാറ്റം ചെയ്യപ്പെട്ടപ്പോൾ സ്വാഭാവികമായും വളരെയേറെ ദുഖിച്ചിരുന്നു അവർ. ഏറെക്കാലം വോട്ടുചെയ്യാൻ രാജകുടുംബാംഗങ്ങൾ തയ്യാറായില്ല. എന്നാൽ കാലം മാറിയതോടെ ജനാധിപത്യത്തെ അവർക്ക് അംഗീകരിക്കാൻ സാധിച്ചു. ഇപ്പോൾ വോട്ടു ചെയ്യാൻ പോകുന്ന ധാരാളം പേർ രാജകുടുംബാംഗങ്ങൾക്കിടയിലുണ്ട്.
ആദുത്യ വർമ്മയും അദ്ദേഹത്തിന്റെ പിതാവുമാണ് തെരഞ്ഞെടുപ്പ് പ്രക്രിയയിൽ ആദ്യമായി നേരിട്ട് പങ്കെടുത്ത രാജകുടുംബാംഗങ്ങൾ. തിരുവനന്തപുരത്തെ ചില വിഭാഗങ്ങൾക്ക് ആദിത്യയെ രാഷ്ട്രീയത്തിലിറക്കാൻ വലിയ താല്പര്യമുണ്ട്. അവരോടുള്ള വിധേയത്വം ഇപ്പോഴും പാലിക്കുന്ന പലരെയും നമുക്കവിടെ കാണാം. തങ്ങളോട് വിധേയത്വം നടിച്ച് നിൽക്കുന്നവർ തീർക്കുന്ന കുഴിയിലേക്ക് ആദിത്യ വർമ്മ ചാടുമോയെന്നു മാത്രമാണ് ഇനി അറിയാനുള്ളത്. നിലവിൽ രാഷ്ട്രഭേദമില്ലാതെ രാജകുടുംബാംഗങ്ങളെ തിരുവിതാംകൂറുകാർ ബഹുമാനിക്കുന്നുണ്ട്. ഇതിൽ ശക്തമായ വിള്ളല്‍ വീഴുമെന്ന പ്രശ്നത്തെയാണ് അവർക്ക് നേരിടേണ്ടി വരിക. രാഷ്ട്രീയത്തിൽ ജയിക്കുകയാണെങ്കിൽപ്പോലും ഒന്നോ രണ്ടോ മണ്ഡലങ്ങളിൽക്കൂടുതൽ സ്വാധീനം ചെലുത്തുകയെന്നത് അവർക്ക് ദുഷ്കരമായിരിക്കുകയും ചെയ്യും. ഉത്തരേന്ത്യൻ സാഹചര്യങ്ങളല്ല ദക്ഷിണേന്ത്യയിൽ, പ്രത്യേകിച്ച് കേരളത്തിൽ ഉള്ളതെന്ന് ആദിത്യക്ക് അറിയാമെന്ന് അദ്ദേഹത്തിന്റെ മുൻ പ്രസ്താവനകളിൽ നിന്ന് വ്യക്തമാണ്. കൗമുദി ടിവിക്ക് ചില മാസങ്ങൾക്കു മുമ്പ് നല്‍കിയ അഭിമുഖത്തിൽ അദ്ദേഹം രാഷ്ട്രീയപ്രവേശം സംബന്ധിച്ച് സംസാരിച്ചിരുന്നു. ഒരു വിഭാഗത്തോടൊപ്പം ചേർന്നാൽ മറുവിഭാഗത്തിന് വിദ്വേഷമുണ്ടാകും എന്നദ്ദേഹം ചൂണ്ടിക്കാണിക്കുകയുണ്ടായി.
ജനാധിപത്യം ഇന്ത്യൻ രാഷ്ട്രീയ വ്യവസ്ഥിതിയായി മാറിയെങ്കിലും രാജകുടുംബങ്ങളോട് ജനത കാണിക്കുന്ന മമതയും വിധേയത്വവും എടുത്തുപറയേണ്ടതാണ്. തിരുവിതാംകൂർ മാത്രമല്ല ഇന്ത്യയിലെ പല സംസ്ഥാനങ്ങളിലും മഴ തോർന്നിട്ടും മരം പെയ്യുന്ന ഈ ഏർപ്പാട് തുടർന്നു വരുന്നുണ്ട്. സമീപകാലത്തെ പ്രവണതകൾ പരിശോധിച്ചാൽ 2014-ൽ ഒഡീഷയിൽ ഒരുമിച്ച് നടന്ന നിയമസഭാ – ലോകസഭാ തിരഞ്ഞെടുപ്പിൽ 14 സ്ഥാനാർത്ഥികളാണ് രാജകുടുംബങ്ങളിൽ നിന്നും മത്സരിച്ചത്. ബിജു ജനതാദളിലെ കലികേഷ് നാരായണ സിംഗ് ദേവിന് എതിർ സ്ഥാനാർത്ഥിയായി ലഭിച്ചത് സഹോദര ഭാര്യയായ സംഗീതാ സിംഗ് ദേവിനെയാണ്. അവർ ബിജെപി ടിക്കറ്റിലാണ് മത്സരിച്ചത്. അന്ന് കലികേഷ് പറഞ്ഞ വാദങ്ങൾ പ്രധാനമായിരുന്നു. തന്റെ കുടുംബത്തിന് ജനങ്ങളെ സേവിച്ച് വലിയ പാരമ്പര്യം ഉണ്ടെന്നും ചരിത്രം അത് പറഞ്ഞു തരുമെന്നും അദ്ദേഹം കൂട്ടിച്ചേർത്തു. 2014 ലെ ഒഡീഷ ഇലക്ഷൻ പ്രധാന പ്രത്യേകത, ആ ഇലക്ഷൻ പ്രചാരണത്തിൽ രാജകുടുംബാംഗങ്ങൾ അണിനിരന്നിരുന്നു എന്നതാണ്. അതിനർത്ഥം ചരിത്രപരവും വൈകാരികവുമായി ജനതയെ രാജകുടുംബങ്ങൾക്ക് സ്വാധീനിക്കാൻ കഴിയുന്നുവെന്നത് ഒരു വസ്തുതയാണ്.
രാജസ്ഥാൻ പേര് പോലെ തന്നെ രാജാക്കന്മാരുടെ കേന്ദ്രസ്ഥാനമാണ്. 1952-ലെ പൊതു തെരഞ്ഞെടുപ്പ് മുതലേ ചെങ്കോലും കിരീടവും അവിടത്തെ രാഷ്ട്രീയത്തിന്റെ ഭാഗമായിരുന്നു. 2019-ലെ പൊതുതെരഞ്ഞെടുപ്പിൽ ബിജെപി നിർത്തിയ ദിയാകുമാരി ജയ്പൂർ രാജകുടുംബമാണ്. കോൺഗ്രസ് സ്ഥാനാർത്ഥിയായ ദുഷ്യന്ത്‌ സിംഗ് ബോലാപൂർ രാജകുടുംബവും. മറ്റൊരു സ്ഥാനാർത്ഥി ജിതേന്ദ്ര സിംഗ് പരത്തൂർ രാജകുടുംബാംഗമാണ്. ഇതിൽ ബിജെപി സ്ഥാനാർത്ഥിയായ ദിയാകുമാരിയെ പരിചയപ്പെടുത്തുന്നത് ‘പോരാളിയുടെ മകൾ’ എന്നാണ്. ഇന്ത്യാ ചരിത്രത്തിൽ പേർഷ്യൻ അധിനിവേശത്തെ മുസ്ലിം അധിനിവേശമായി ചിത്രീകരിച്ച് ബ്രിട്ടൻ നടപ്പിലാക്കിയ വംശീയ ചരിത്രവൽക്കരണത്തിന്റെ തുടർച്ച പേറുന്നത് ബിജെപിയാണ്. രാജസ്ഥാൻ ഉൾപ്പെടെയുള്ള മേഖലകളെ പേർഷ്യ പിടിച്ചടക്കിയിരുന്നെങ്കിലും അതിനെ പ്രതിരോധിച്ചവരുടെ പോരാളിയാണ് എന്ന് പരിചയപ്പെടുത്തിയാണ് ബിജെപി ദിയാകുമാരിയെ അവതരിപ്പിച്ചത്.
ഹിമാചൽ പ്രദേശിലെ സ്ഥിതിയും മറ്റൊന്നല്ല. അധികാരത്തിലെ രാജശബ്ദം ഇപ്പോഴും അവിടെ തുടരുന്നു. അഞ്ചു പതിറ്റാണ്ടായി ഹിമാചൽ രാഷ്ട്രീയത്തിലുള്ള വീരഭദ്ര സിംഗ് രാംപൂർ ബുഷ്ഹാർ രാജകുടുംബമാണ്. ഹിമാചൽ കോൺഗ്രസിന്റെ അധ്യക്ഷയായിരുന്ന പ്രതിഭാ സിംഗ് കിയോന്താൾ രാജകുടുംബാംഗമാണ്. 2022ലെ തെരഞ്ഞെടുപ്പ് വേളയിൽ ബിജെപി പ്രചരണത്തിൽ കോൺഗ്രസിനെതിരെ അഴിച്ചുവിട്ട പ്രധാന പ്രചരണം ഹിമാചലിലെ കോൺഗ്രസുകാർ രാജാക്കന്മാരും റാണിമാരും മാത്രമാണെന്നായിരുന്നു. അമിത് ഷാ കുറെക്കൂടി കടന്ന ഭാഷയാണ് ഉപയോഗിച്ചത്. രാജാക്കന്മാരുടെയും റാണിമാരുടെയും കാലം കഴിഞ്ഞു. ഇനിയുള്ള നാളുകൾ സാധാരണക്കാരുടേതാണ്. ഇത് പറയുമ്പോഴും ഹിമാചലിന്റെ രാഷ്ട്രീയ ആഴങ്ങളിൽ രാജാക്കന്മാരോടുള്ള ഭക്തി അവസാനിക്കാത്ത കഥ പോലെ തുടരുന്നു.
നാട്ടുരാജാക്കന്മാരുടെ ഉദയാസ്തമയങ്ങൾ കണ്ട ചരിത്രഭൂമിയാണ് ഉത്തർപ്രദേശ്. നവാബ് മുതൽ രാജകുമാരന്മാർ വരെ. മുൻ സമാജ് വാദി മന്ത്രി അസംഖാൻ നവാബിയൻ പരമ്പരയിലുള്ള ആളാണെങ്കിലും ആ പാരമ്പര്യത്തെ പരസ്യമായി എതിർക്കുകയും വെറുക്കുകയും ചെയ്ത ഇന്ത്യയിലെ ആദ്യത്തെ വ്യക്തി അദ്ദേഹം ആയിരുന്നു. നവാബിയൻ പാരമ്പര്യം പേറുന്ന നിർമ്മിതികൾ പൊളിച്ചു കളഞ്ഞു കൊണ്ട് ജനാധിപത്യത്തിന് കൂടുതൽ തെളിമ നൽകാൻ ശ്രമിച്ചിരുന്നു.
ഈ രാജപരമ്പരയുടെ ഒടുവിലത്തെ കണ്ണിയാണ് ത്രിപുരയിലെ തിപ്രാ മോത്ത നേതാവ്. പ്രദ്യോത് വിക്രം മാണിക്യ ദേബ് വർമ്മ. ത്രിപുര രാജകുടുംബാംഗവും ആ പ്രത്യേക ഗോത്രത്തിന്റെ നിലവിലെ രാജ പദവി അലങ്കരിക്കുന്ന ആളുമാണ്. അദ്ദേഹത്തിന്റെ പിതാവ് പഴയ കോൺഗ്രസ് എംപിയാണ്. സിഎഎ ക്കെതിരെ ശബ്ദമുയർത്തിയാണ് പ്രദ്യോത് സംസ്ഥാന രാഷ്ട്രീയത്തിലേക്ക് പ്രവേശിക്കുന്നത്. ത്രിപുരയിലെ തദ്ദേശീയരെ സംഘടിപ്പിക്കുന്നതിന് തന്റെ പഴയ പാരമ്പര്യം ഇദ്ദേഹം കൃത്യമായി ഉപയോഗിച്ചു. അത് ത്രിപുര ജനവിധിയെ തന്നെ മാറ്റിമറിച്ചു.
രാജകുടുംബങ്ങളുടെ പാരമ്പര്യം ജനാധിപത്യത്തിന്റെ പ്രത്യാശാസ്ത്രങ്ങൾക്കുമപ്പുറത്ത് ജനങ്ങളിൽ ഇപ്പോഴും വേരാഴ്ത്തി നിൽക്കുന്നത് ഏറെ അപകടമുള്ള വസ്തുതയാണ്. ഫ്യൂഡൽ പാരമ്പര്യത്തിന്റെ അവശിഷ്ടങ്ങൾക്ക് ജീവൻ കൊടുക്കുന്ന ഇത്തരം ശ്രമങ്ങൾ ജനാധിപത്യ സമൂഹത്തെ അസ്ഥിരപ്പെടുത്തുന്നതിന് മാത്രമേ സഹായിക്കൂ. ജനങ്ങൾക്ക് പരമാധികാരമുള്ള ഈ സംവിധാനത്തിൽ പാരമ്പര്യത്തിന്റെ തഴമ്പുമായി വരുന്നവർക്ക് വേദിയൊരുക്കുന്നതും അപകടം തന്നെയാണ്.
