ചെന്നൈ: ഊട്ടി മുനിസിപ്പൽ ഉറുദു മിഡിൽ സ്‌കൂളിലെ എട്ടാം ക്ലാസ് വിദ്യാർഥിനിക്ക് ദാരുണാന്ത്യം. 45 അയേൺ ഗുളികകൾ കഴിച്ചാണ് മരണപ്പെട്ടത്. വ്യാഴാഴ്ചയായിരുന്നു സംഭവം. പതിമൂന്ന്കാരിയായ ജയ്ബ ഫാത്തിമയാണ് മരണപ്പെട്ടത്. മൂന്ന് ദിവസം മുമ്പാണ് കുട്ടി ഗുളിക കഴിച്ചത്. സ്കൂളിലെ പ്രധാന അധ്യാപകന്റെ മുറിയിൽ സൂക്ഷിച്ചിരുന്ന അയേൺ ഗുളികകളാണ് കുട്ടി കഴിച്ചത്. ഗുളിക കഴിച്ച മൂന്ന് പെൺകുട്ടികളെയും രണ്ട് ആൺകുട്ടികളെയും തലകറക്കത്തെ തുടർന്ന് ഊട്ടി സർക്കാർ മെഡിക്കൽ കോളേജ് ആശുപത്രിയിലേക്ക് കൊണ്ടുപോയിരുന്നു. ആൺകുട്ടികളുടെ ആരോഗ്യ സ്ഥിതി ഭേദമായി വന്നെങ്കിലും പെൺകുട്ടികളെ കൂടുതൽ ചികിത്സയ്ക്കായി കോയമ്പത്തൂർ മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. അതിനിടയിലാണ് ജയ്ബ ഫാത്തിമയുടെ സ്ഥിതി ഗുരുതരമായത്. തുടർന്ന് ചെന്നൈയിലെ സ്റ്റാൻലി മെഡിക്കൽ കോളേജ് ആശുപത്രിയിലേക്ക് കൊണ്ടുപോകും വഴിയാണ് മരണപ്പെട്ടത്. കഴിഞ്ഞ തിങ്കളാഴ്ചയാണ് ഉച്ചഭക്ഷണ സമയത്ത് പ്രധാന അധ്യാപകൻ്റെ മുറിയിൽ കയറി അയേൺ ഗുളികകൾ എടുത്തത്.



ആരാണ് ഏറ്റവും കൂടുതൽ ഗുളികകൾ കഴിക്കുക എന്ന് വെല്ലുവിളിച്ച് തുടങ്ങിയതായിരുന്നു. 15 ഗുളികകൾ അടങ്ങുന്ന മൂന്ന് സ്ട്രിപ്പാണ് ജയ്ബ കഴിച്ചതെന്നാണ് റിപ്പോർട്ട്. സ്കൂളിലെ ഉറുദു അധ്യാപകൻ്റെ മകളാണ് ജയ്ബ. സ്‌കൂളുകളിൽ എട്ടാം ക്ലാസ് മുതൽ പന്ത്രണ്ടാം ക്ലാസ് വരെയുള്ള പെൺകുട്ടികൾക്ക് ആഴ്ചയിലൊരിക്കൽ അയൺ ഗുളികകൾ നൽകാറുണ്ട്. ഇതിന് വേണ്ടിയാണ് അയേൺ ഗുളികകൾ ഓഫീസിൽ സൂക്ഷിച്ചിരുന്നത്. സ്‌കൂളിലെ എട്ട് അധ്യാപകർക്കും പ്രഥമാധ്യാപകർക്കും സംഭവവുമായി ബന്ധപ്പെട്ട് വിദ്യാഭ്യാസ വകുപ്പ് മെമ്മോ അയച്ചിട്ടുണ്ടെന്ന് ജില്ലാ വിദ്യാഭ്യാസ ഓഫീസർ എ മുനിസ്വാമി പറഞ്ഞു.



Read Latest National News and Malayalam News