ജനാധിപത്യത്തിൽ ജനതയുടെ ആവശ്യങ്ങളുടെ, ആശാനിരാശകളുടെ ഒക്കെ പ്രതിഫലന കേന്ദ്രം അവരുടെ നിയമനിർമ്മാണ സഭകളാണ്. കേന്ദ്രത്തിലും സംസ്ഥാനങ്ങളിലും ത്രിതല പഞ്ചായത്ത് തലങ്ങളിലുമൊക്കെ ഇത്തരം ജനാഭിലാഷ കേന്ദ്രങ്ങൾ നമ്മുടെ ജനാധിപത്യ സംവിധാനത്തിൽ നില നിൽക്കുന്നുണ്ട്. വാർത്താ മാധ്യമങ്ങളിലൂടെ നിയമനിർമ്മാണ സഭകൾ സംബന്ധിച്ച വിവരങ്ങൾ നമുക്ക് സുപരിചിതമാണ്. എന്നാൽ, ചില നടപടിക്രമങ്ങളുടെ പേരുകൾ മാധ്യമങ്ങളിലൂടെ കേൾക്കുന്നുണ്ടെങ്കിലും അതെങ്ങനെയാണ്, അതിന് പിന്നിലെ നിയമങ്ങൾ എന്തൊക്കെയാണ് എന്നത് എല്ലാവർക്കും അറിഞ്ഞുകൊള്ളണമെന്നില്ല.
സാധാരണ രാഷ്ട്രീയ പ്രസംഗങ്ങൾ പോലെയല്ല നിയമസഭയ്ക്കകത്തെ പ്രസംഗങ്ങൾ. അവയ്ക്ക് കൃത്യമായ ചിട്ടവട്ടങ്ങൾ നിർദ്ദേശിക്കപ്പെടിട്ടിട്ടുണ്ട്. മറ്റ് സർക്കാർ പരിപാടികൾ പോലെയല്ല നിയമസഭയ്ക്കകത്തെ കാര്യങ്ങൾ. അതിന് കുറെക്കൂടി കൃത്യമായ നിർവ്വചനങ്ങളും നിർദ്ദേശങ്ങളുമുണ്ട്. എഴുതപ്പെട്ട നിയമങ്ങളായും പിന്തുടരുന്ന കീഴ്‌വഴക്കങ്ങളായും ധാരാളം നടപടിക്രമങ്ങൾ ഓരോ നിയമനിർമ്മാണ സഭയിലുമുണ്ട്. നിയമസഭാംഗങ്ങൾ മുതൽ ഗ്യാലറിയിലിരിക്കുന്ന ആളുകൾ വരെ കൃത്യമായി ഇത് പാലിക്കേണ്ടതുണ്ട്.
കേരള നിയമസഭാ സ്പീക്കറായ എ എൻ ഷംസീർ നടപ്പ് നിയമസഭാ സമ്മേളനത്തിൽ സഭാംഗങ്ങൾ പാലിക്കേണ്ട നടപടികളെ കുറിച്ച് ഹ്രസ്വമായ ഒരു പ്രസംഗം നടത്തുന്നുണ്ട്. അത് ഏറെ കൗതുകമുള്ളതാണ്. ദീർഘകാലം സഭയിൽ എം എൽ എമാരായിട്ടുള്ളവരും പുതുമുഖങ്ങളുമൊക്കെയുള്ള ഈ നിയമസഭയിൽ അത്തരം ഒരു പ്രസംഗം സഭാ സാമാജികർക്ക് മാത്രമല്ല ഓരോ കേരളീയനും അടിസ്ഥാനപരമായി അറിഞ്ഞിരിക്കേണ്ടതാണ് എന്ന അർത്ഥം കൂടിയുണ്ട്. സഭാംഗങ്ങൾ സഭയിൽ പാലിക്കേണ്ട അടിസ്ഥാന ഉത്തരവാദിത്തങ്ങളെ കുറിച്ചാണ് സ്പീക്കർ ആ പ്രസംഗത്തിൽ പറഞ്ഞത്. നിയമസഭയിലെ നാഥൻ സ്പീക്കർ ആണെന്ന് നമുക്ക് ഏവർക്കും അറിയാം. സഭയുടെ ഏതു നടപടിയും സ്പീക്കറുടെ തീരുമാനത്തിന് വിധേയമായിരിക്കും. സഭയിൽ പൊതുവേ പാലിച്ചു വരുന്ന കീഴ് വഴക്കങ്ങളിൽ ഒന്നാണ് സ്പീക്കറെ അഭിവാദനം ചെയ്യുന്ന രീതി. സഭയിൽ പ്രവേശിക്കുമ്പോഴും സാമാജികർക്ക് അനുവദിക്കപ്പെട്ട കസേരകളിൽ ഇരിക്കുമ്പോഴും സ്പീക്കറെ അഭിവാദനം ചെയ്യുന്ന രീതി നിലവിലുണ്ട്.
ലക്ഷ്യം അതിജീവനം മാത്രം: അഖിലേഷ് യാദവിന്റെ 2024 തിരഞ്ഞെടുപ്പ് പ്ലാനുകൾ ഇങ്ങനെ
സഭയിൽ ഒരു അംഗത്തിനും നേർക്കുനേർ വാഗ്വാദത്തിന് അവസരം നൽകുന്നില്ല. ഓരോ അംഗവും അനുവദിച്ച സ്ഥാനത്തു നിന്ന് സഭാ അധ്യക്ഷനെ നോക്കി വേണം സംസാരിക്കാൻ. ഇത് പലപ്പോഴും പാലിക്കപ്പെടാറില്ല. സഭാ സമ്മേളനങ്ങളിൽ ഭരണപക്ഷ – പ്രതിപക്ഷ വാക്കു തർക്കങ്ങൾ ഉണ്ടാകുമ്പോൾ സാമാജികർ പരസ്പരം വെല്ലുവിളിക്കുകയോ വാക്കു തർക്കത്തിൽ ഏർപ്പെടുകയോ ചെയ്യുന്ന സന്ദർഭങ്ങൾ ധാരാളം നമ്മൾ കണ്ടിട്ടുണ്ട്. അപ്പോഴൊക്കെ സ്പീക്കറുടെ ശാസന അദ്ദേഹത്തെ നോക്കി സമാജികർ സംസാരിക്കണം എന്നായിരിക്കും. അത് ഈ നിയമം നിലനിൽക്കുന്നത് കൊണ്ടാണ്.
സഭാംഗങ്ങൾ സംസാരിക്കുമ്പോൾ സാധാരണ മറ്റംഗങ്ങൾ എഴുന്നേൽക്കുകയോ സഭയിൽ നിന്ന് തൽക്കാലത്തേക്ക് മറ്റെന്തെങ്കിലും ആവശ്യത്തിനായി ഇറങ്ങിപ്പോവുകയോ ചെയ്യാറുണ്ട്. എന്നാൽ ഇത് സഭാ അധ്യക്ഷൻ സംസാരിച്ചു കൊണ്ടിരിക്കുമ്പോൾ അനുവദനീയമല്ല. അതുപോലെ തന്നെ ഒരംഗം സംസാരിച്ചു നിൽക്കുമ്പോൾ ആ അംഗത്തിന്റെയും സഭാ അധ്യക്ഷന്റെയും ഇടയിലൂടെ മറ്റാരും നടന്നു പോവാൻ പാടില്ല. സഭ സമ്മേളിക്കുമ്പോൾ സഭയിലിരുന്ന് പത്രമാസികകൾ വായിക്കുന്നതും സഭയുമായി ബന്ധമില്ലാത്ത പുസ്തകങ്ങളോ മറ്റു പ്രസിദ്ധീകരണങ്ങളോ വായിക്കുന്നതും തെറ്റായ കീഴ് വഴക്കമാണ്. ഇതിന് വിരുദ്ധമായ പല പ്രവൃത്തികളും നമ്മൾ സഭയിൽ കണ്ടിട്ടുണ്ട്. കർണാടക നിയമസഭയിൽ കുറച്ചു വർഷങ്ങൾക്കു മുമ്പ് സഭാ സമ്മേളനം നടന്നു കൊണ്ടിരിക്കുമ്പോൾ ചില സമാജികർ മൊബൈലിൽ നീലച്ചിത്രം കണ്ട സംഭവം ഏറെ വിവാദമായിരുന്നു.
നിയമസഭാ മന്ദിരം
അതുപോലെത്തന്നെ സഭയിൽ ഒരംഗം സംസാരിച്ചു കൊണ്ടിരിക്കുമ്പോൾ ആ അംഗത്തിന്റെ പ്രസംഗം തടസ്സപ്പെടുത്തുന്ന രീതിയിൽ പെരുമാറുന്നതും അപശബ്ദങ്ങൾ ഉണ്ടാക്കുന്നതും തെറ്റായ നടപടിയായി കരുതുന്നു. പക്ഷേ ഇത് പലപ്പോഴും പാലിക്കപ്പെടാറില്ല. സഭയിൽ വിവാദ ചർച്ചകൾ നടന്നു കൊണ്ടിരിക്കുമ്പോൾ സമാജികരുടെ പ്രസംഗത്തിനിടയിൽ തന്നെ എതിർ ഭാഗം അവരുടെ ന്യായീകരണങ്ങൾ നിരത്തി പ്രതിരോധിക്കാൻ ശ്രമിക്കാറുണ്ട്. പലപ്പോഴും സ്പീക്കർ ഈ വിഷയത്തിൻമേൽ സഭയിൽ ഇടപെടുന്നതും നമ്മൾ കണ്ടിട്ടുണ്ട്.
നിയമസഭയിലെ മറ്റൊരു പ്രധാന ഭാഗമാണ് ഗാലറി. മുൻകൂട്ടി അനുമതി നേടിയിട്ടുണ്ടെങ്കിൽ ഏതൊരാൾക്കും സഭയിലെ നടപടികൾ വീക്ഷിക്കാൻ സാധിക്കും. പക്ഷേ ഗാലറിയിരിക്കുന്ന ആളുകൾ ഒരു കാരണവശാലും സഭാനടപടികളിൽ ഇടപെടാൻ പാടില്ല. തിരിച്ച് സഭയിലെ സമാജികർ ഗാലറിയെ ഒരുതരത്തിലും സഭയിൽ കൊണ്ടുവരാനും പാടില്ല. തങ്ങൾക്ക് പ്രിയപ്പെട്ട ആരെങ്കിലും സഭയിലെത്തിയാൽ തന്നെ അവരുടെ വരവിനെ സ്വാഗതം ചെയ്യാനോ കയ്യടിക്കാനോ സാമാജികർക്ക് അവകാശമില്ല. ഗാലറിയിലെ ആളുകളെ ഒരു കാരണവശാലും സാമാജികർ അവരുടെ സഭാ പ്രസംഗത്തിൽ പരാമർശിക്കാൻ പാടില്ല.
ത്രിപുര ‘രാജകുമാര’ന്റെ തിരഞ്ഞെടുപ്പു വിജയം തിരുവിതാംകൂറിനെ മോഹിപ്പിക്കുന്നുവോ?
സഭയിലെ പ്രസംഗങ്ങൾക്കും ചില ചട്ടങ്ങളുണ്ട്. കോടതിയുടെ പരിഗണനയിലിരിക്കുന്ന വിഷയങ്ങളാണെങ്കിൽ സമാജികർ സ്പീക്കർക്ക് മുൻകൂറായി ആ വിഷയം എഴുതിക്കൊടുത്ത് സഭയിൽ പ്രസംഗിക്കാൻ അനുമതി വാങ്ങണം. അനുമതിയില്ലാതെ സഭയിലെ മറ്റൊരംഗത്തെ കുറിച്ചുള്ള ആരോപണങ്ങൾ സഭയിൽ ഉന്നയിക്കാൻ പാടില്ല. അതോടൊപ്പം തന്നെ ഏതെങ്കിലും ഒരു നിയമസഭ മറ്റു നിയമസഭകളെയോ പാർലമെന്റിനെയോ അവഹേളിക്കുന്ന രീതിയിൽ സംസാരിക്കുന്നതും സഭാചട്ടങ്ങൾ വിലക്കുന്നുണ്ട്. സഭയുടെ ഏതെങ്കിലും തീരുമാനത്തെ റദ്ദാക്കാനുള്ള ഉപക്ഷേപത്തിന്മേൽ സംസാരിക്കുമ്പോഴല്ലാതെ ഒരിക്കലും സഭയുടെ തീരുമാനത്തെ പരാമർശിക്കാൻ പാടില്ലാത്തതുമാണ്. പ്രസംഗങ്ങൾക്ക് കൂടുതൽ വ്യക്തത വരുത്തുന്നതിനു വേണ്ടി രാഷ്ട്രപതിയെയോ ഗവർണറെയോ പ്രസംഗത്തിൽ ഉൾച്ചേർത്ത് സംസാരിക്കുന്നതും സഭാ നടപടികളിൽ വിലക്കിയിട്ടുണ്ട്.
രാജ്യദ്രോഹപരവും അപകീർത്തിപരവുമായ വാക്കുകൾ പ്രസംഗത്തിൽ ഉപയോഗിക്കുന്നതും വിലക്കിയിട്ടുണ്ട്. പല സാമാജികരുടെയും പ്രസംഗങ്ങൾ ഈ രൂപത്തിൽ നിയമസഭാ സമിതി പരിശോധിക്കുകയും അതിൽ പ്രശ്നങ്ങൾ കണ്ടെത്തുകയും ചെയ്തിട്ടുണ്ട്. ഒരാൾക്ക് പ്രസംഗിക്കാനുള്ള അവകാശമുണ്ടെങ്കിലും സഭാ നടപടികളെ പ്രതികൂലമായി ബാധിക്കുന്ന രീതിയിൽ അതൊരിക്കലും തുടരാൻ അനുവദിക്കില്ല. സഭാനടപടിക്രമങ്ങളിലെ വ്യവസ്ഥകൾക്ക് വിധേയമായി ഉപക്ഷേപത്തിന്മേൽ സംസാരിക്കുമ്പോഴല്ലാതെ ഉന്നതാധികാര സ്ഥാനങ്ങളിൽ ഉള്ളവരുടെ പെരുമാറ്റത്തെക്കുറിച്ച് പരാമർശിക്കുന്നതും സഭയിൽ വിലക്കിയിട്ടുണ്ട്. സാധാരണ നിയമസഭകളിൽ അംഗങ്ങളുടെ പെരുമാറ്റവും പ്രസംഗങ്ങളും സംബന്ധിച്ച ഏറ്റവും അടിസ്ഥാനപരമായ നടപടികളും കീഴ്‌വഴക്കങ്ങളും ഇവയൊക്കെയാണ്.
