ജമ്മു: ജമ്മുവില്‍ 26കാരിയായ യുവ ഡോക്ടറെ കുത്തിക്കൊലപ്പെടുത്തി. കാമുകനായിരുന്ന ഡോക്ടറാണ് യുവതിയെ ഹോളി ആഘോഷങ്ങള്‍ക്കിടയില്‍ കൊലപ്പെടുത്തിയത്. കൊലപാതകത്തിന് ശേഷം സ്വയം കുത്തിപ്പരുക്കേല്‍പ്പിച്ച് ജീവനൊടുക്കാന്‍ ശ്രമിച്ച യുവാവ് ആശുപത്രിയില്‍ ഗുരുതരാവസ്ഥയില്‍ കഴിയുകയാണ്. ജമ്മുവിലെ തല്ലാബ്തിലോ സ്വദേശിയായ സുമേധ ശര്‍മയെന്ന ദന്ത ഡോക്ടറാണ് കൊല്ലപ്പെട്ടത്. കാമുകനായ ജൊഹാര്‍ ഗനായിയാണ് യുവതിയെ കൊലപ്പെടുത്തിയ ശേഷം സ്വയം ജീവനൊടുക്കാന്‍ ശ്രമിച്ചത്.
മാര്‍ച്ച് ഏഴാം തീയതി ജമ്മുവിലെ ജാനിപൂരിലുള്ള ജൊഹാറിന്റെ വസതിയില്‍ വെച്ചാണ് കൊലപാതകം നടന്നത്. ഹോളി ആഘോഷങ്ങള്‍ക്കായാണ് സുമേധ ജൊഹാറിന്റെ വീട്ടില്‍ എത്തിയത്. ഇവിടെ വെച്ച് ഇരുവരും തമ്മില്‍ വാക്ക് തര്‍ക്കം ഉണ്ടാവുകയും ജൊഹാര്‍ കാമുകിയെ കുത്തിക്കൊലപ്പെടുത്തുകയുമായിരുന്നു. സുമേധയുടെ വയറ്റില്‍ നിരവധി തവണ കുത്തേറ്റ പാടുകളുണ്ട്. ഇതിന്‌ പിന്നാലെ യുവാവ് സ്വയം കത്തികൊണ്ട് കുത്തി ജീവനൊടുക്കാന്‍ ശ്രമിക്കുകയായിരുന്നു.
കൊലപാതകത്തിന് പിന്നാലെ ജീവനൊടുക്കാന്‍ പോവുകയാണെന്ന് സൂചിപ്പിച്ച് ജൊഹാര്‍ ഫേസ്ബുക്ക് പോസ്റ്റ് ഇട്ടിരുന്നു. ജീവിതം മടുത്തെത്തും എല്ലാം അവസാനിപ്പിക്കാന്‍ പോവുകയാണെന്നുമായിരുന്നു ജൊഹാര്‍ ഫേസ്ബുക്കില്‍ കുറിച്ചത്. ഇത് ശ്രദ്ധയില്‍പ്പെട്ട ബന്ധു ഉടന്‍ തന്നെ വിവരം പോലീസില്‍ അറിയിക്കുകയായിരുന്നു. പോലീസെത്തി വാതില്‍ തുറന്ന് അകത്ത് എത്തിയപ്പോള്‍ ഇരുവരും രക്തത്തില്‍ കുളിച്ച് കിടക്കുകയായിരുന്നു. ആശുപത്രിയില്‍ എത്തിക്കുമ്പോഴേയ്ക്കും സുമേധയുടെ ജീവന്‍ നഷ്ടമയായിരുന്നു. ജൊഹാര്‍ തീവ്രപരിചരണ വിഭാഗത്തില്‍ തുടരുകയാണ്.
കൊലപാതകത്തിലേക്ക് നയിച്ച കാരണം വ്യക്തമല്ല. അതേസമയം ലൗ ജിഹാദ് ആരോപിച്ച് ബജ്രംഗ് ദളും ചില ഹിന്ദു സംഘടനകളും പ്രതിഷേധനവുമായി രംഗത്ത് എത്തിയിട്ടുണ്ട്, സംഭവത്തെ കുറിച്ച് അന്വേഷിക്കാന്‍ പ്രത്യേക അന്വേഷണ സംഘത്തെ നിയോഗിച്ചിട്ടുണ്ട്. സുമേധ പിന്നീട് ഡല്‍ഹിയിലും ജൊഹാര്‍ ജമ്മുവിലുമാണ് ഉപരിപഠനം നടത്തിയത്. പഠനകാലം മുതല്‍ ഇരുവരും തമ്മില്‍ അടുപ്പത്തിലായിരുന്നുവെന്ന് പോലീസ് പറഞ്ഞു.
Read Latest National News and Malayalam News
‘വിനിഷയുടെ ബിപി പെട്ടെന്ന് കുറഞ്ഞു, മാറ്റിയത് വിദഗ്ധ ചികിത്സയ്ക്കായി’; കുടുംബത്തിന്റെ ആരോപണം നിഷേധിച്ച് ആശുപത്രിവിദ്യാർത്ഥിനിയുടെ മരണം 22 കാരൻ പിടിയിൽ
