മുംബൈ: കെട്ടിടത്തിന് മുകളിൽ നിന്നും ഇരുമ്പ് കമ്പി വീണ് അമ്മയും മകളും മരിച്ച സംഭവത്തിൽ പ്രതിഷേധം കനക്കുകയാണ്. 29കാരിയായ ഷമ ഷെയ്ഖ്, 8 വയസുകാരിയായ മകൾ ആയത് എന്നിവർക്കാണ് കഴിഞ്ഞ ദിവസം ദാരുണ സംഭവത്തിൽ ജീവൻ നഷ്ടമായത്. മുംബൈയിലെ ജോഗേശ്വരി ഈസ്റ്റിൽ ഇന്നലെ വൈകിട്ട് നാലേമുക്കാലോടെയാണ് അപകടം നടന്നത്.
നിർമാണത്തിലിരിക്കുന്ന കെട്ടിടത്തിന്റെ മുകളിൽ നിന്നും ഇരുമ്പ് കമ്പി താഴേയ്ക്ക് പതിക്കുകയായിരുന്നു. നടന്നുവരികയായിരുന്ന ഷമയുടെയും ആയതിന്റെയും ദേഹത്തേയ്ക്കാണ് കമ്പി പതിച്ചത്. സമീപത്ത് കൂടി പോവുകയായിരുന്ന ഓട്ടോറിക്ഷയും ഇരുമ്പ് കമ്പി വീണ് പൂർണമായും തകർന്നിട്ടുണ്ട്. എട്ട് വയസുകാരിയായ ആയതിനേയും കൂട്ടി സ്കൂളിൽ നിന്നും മടങ്ങുന്നതിനിടെയാണ് അപ്രതീക്ഷിത അപകടം ഇരുവരുടെയും ജീവൻ കവർന്നത്.
തയ്യൽ തൊഴിലാളിയാണ് ഷമയുടെ ഭർത്താവ് ആസിഫ്. 8 വയസുകാരിയായ മകൾ ആയതിനും 4 വയസുകാരനായ മകനുമൊപ്പം പ്രതാപ് നഗറിലായിരുന്നു കുടുംബം താമസിച്ചിരുന്നത്. രണ്ടാം ക്ലാസുകാരിയായ ആയതിനെ കൂട്ടിക്കൊണ്ടുവരാൻ ഷമദിവസം നടന്നുപോകാറുണ്ടെന്ന് അയൽവാസികൾ പറഞ്ഞു. ശനിയാഴ്ച സ്റ്റേഷൻ റോഡിൽ നിർമാണത്തിലിരിക്കുന്ന കെട്ടിടത്തിന്റെ സമീപത്ത് കൂടി കടന്നുപോയപ്പോഴാണ് ഇരുമ്പ് കമ്പി ഇരുവരുടെയും മേൽ പതിച്ചത്. രക്തത്തിൽ കുളിച്ച നിലയിലായിരുന്നു ഇരുവരും. ഉടൻ പ്രദേശത്തെ ഓട്ടോ ഡ്രൈവർമാർ ചേർന്ന് ഇരുവരെയും ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
നിർമാണ മേഖലയിലെ സുരക്ഷാ ക്രമീകരണങ്ങളെ കുറിച്ച് കൃത്യമായ മാനദണ്ഡങ്ങൾ രൂപീകരിക്കാൻ മുംബൈ മുനിസിപ്പൽ കോർപ്പറേഷനോട് ഹൈക്കോതി നിർദ്ദേശിച്ചതിന് പിന്നാലെയാണ് അപകടം. നിർമാണ മേഖലയുമായി ബന്ധപ്പെട്ട് സമാനമായ അപകടങ്ങൾ റിപ്പോർട്ട് ചെയ്യുന്ന സാഹചര്യത്തിൽ കൂടിയായിരുന്നു കോടതി നിർദ്ദേശം.
Read Latest National News and Malayalam News
രക്തത്തിൽ കുളിച്ച് വനിതാ ഡോക്ടർ; കൊലപ്പെടുത്തിയത് കാമുകൻ, ലൗ ജിഹാദ് ആരോപിച്ച് പ്രതിഷേധം
വിദ്യാർത്ഥിനിയുടെ മരണം 22 കാരൻ പിടിയിൽ
