‘രാത്രിയിൽ ഞെട്ടി ഉണർന്ന് ശ്വാസംവലിച്ചും ചുമച്ചും ജീവിക്കാൻ കഴിയില്ല’, ഇത് വലിയ അരക്ഷിതാവസ്ഥയെന്ന് മമ്മൂട്ടി

Curated by Karthik KK | Samayam Malayalam | Updated: 13 Mar 2023, 7:58 am

Mammootty On Brahmapuram Issue: ബ്രഹ്മപുരം വിഷയത്തിൽ പ്രതികരണവുമായി നടൻ മമ്മൂട്ടി. നിരവധി നടി നടന്മാർ ഈ വിഷയത്തിൽ പ്രതികരിച്ചിരുന്നു. സൂപ്പർ താരങ്ങൾ ഒന്നും തന്നെ പ്രതികരിച്ചില്ലെന്ന രൂക്ഷ വിമർശനവും ഉയർന്നിരുന്നു. ഇതിന് പിന്നാലെയാണ് മമ്മൂട്ടിയുടെ പ്രതികരണം പുറത്ത് വന്നിരിക്കുന്നത്.

രാത്രിയിൽ ഞെട്ടി ഉണർന്ന് ശ്വാസംവലിച്ചും ചുമച്ചും ജീവിക്കാൻ കഴിയില്ല, ഇത് വലിയ അരക്ഷിതാവസ്ഥയെന്ന് മമ്മൂട്ടി

ഹൈലൈറ്റ്:

ഇനിയും രാത്രിയിൽ ഞെട്ടി ഉണർന്ന് ശ്വാസം വലിച്ചും ചുമച്ചും ജീവിക്കാനാകില്ലെന്ന് മമ്മൂട്ടി.
ബ്രഹ്മപുരം വിഷയത്തിലാണ് മമ്മൂട്ടിയുടെ പ്രതികരണം.
ബ്രഹ്മപുരം വിഷയത്തിൽ ശാശ്വത പരിഹാരമാണ് വേണ്ടതെന്ന് മമ്മൂട്ടി.

എറണാകുളം: ബ്രഹ്മപുരം തീപ്പിടുത്തത്തിൽ ഇപ്പോഴും കൊച്ചി ഉരുകുകയാണ്. പലർക്കും ചുമയും ശ്വാസം മുട്ടലും. പലരും വീട് വിട്ട് മാറി താമസിക്കുന്നു. വീട്ടിനകത്ത് തന്നെ അടച്ചിരിക്കുന്നവർ നിരവധി. ഈ ചൂട് കാലകത്ത് ജനലുകളോ വാതിലുകളോ തുറക്കാതെ അടച്ചിരിക്കേണ്ട ഗതികേടിലാണ് കൊച്ചിയിലെ ജനങ്ങൾ. പലരും ബ്രഹ്മപുരം വിഷയവുമായി ബന്ധപ്പെട്ട് പ്രതിഷേധവുമായി രംഗത്ത് എത്തിയിട്ടുണ്ട്. പല സിനിമ താരങ്ങളും ഇതുമായി ബന്ധപ്പെട്ട് പ്രതികരിച്ചിട്ടുണ്ട്. ഇതിനിടയിലാണ് കൊച്ചിയിലെത്തിയ മമ്മൂട്ടി ഇതുമായി ബന്ധപ്പെട്ട് പ്രതികരിച്ചിരിക്കുന്നത്.

ബ്രഹ്മപുരം പ്രശ്നത്തിൽ ഇനി വേണ്ടത് ശാശ്വത പരിഹാരമാണെന്നാണ് മമ്മൂട്ടി പ്രതികരിച്ചത്. ശ്വാസം മുട്ടി ഇനിയും കൊച്ചിക്കാർക്ക് ജീവിക്കാൻ വയ്യ. രാത്രിയിൽ ഞെട്ടി ഉണർന്ന് ശ്വാസംവലിച്ചും ചുമച്ചും ജീവിക്കാൻ കഴിയില്ലെന്നും അദ്ദേഹം പറയുന്നു. ഷൂട്ടിങിനായി പൂനയിലായിരുന്നെന്നും കഴിഞ്ഞ ദിവസമാണ് തിരിച്ച് കൊച്ചയിലെത്തിയതെന്നും മമ്മൂട്ടി വ്യക്തമാക്കി. വീട്ടിലെത്തിയപ്പോൾ നല്ല ചുമ. പിന്നാലെ അത് ശ്വാസംമുട്ടലായി മാറി. വയനാട് ആയിരുന്നു കഴിഞ്ഞ ദിവസത്തെ ഷൂട്ടിങ്. ചുമ ഇപ്പോഴും വിട്ടുമാറിയിട്ടില്ലെന്നും മമ്മൂട്ടി പറയുന്നു.

പലരും മാറി നിൽക്കുകയാണെന്നും വീട് വിട്ടുപോയെന്നുമൊക്കെയാണ് പറയുന്നത്. എറണാകുളം ജില്ലയിൽ മാത്രമല്ല, സമീപ ജില്ലകളിലും ഇത് വ്യാപിച്ചു. വലിയ അരക്ഷിതാവസ്ഥയാണെന്നും നടൻ മമ്മൂട്ടി പറഞ്ഞു. ബ്രഹ്മപുരം പ്ലാന്റ് തുടങ്ങിയത് മുതൽ അവിടത്തെ പ്രശ്നങ്ങളും കേൾക്കുന്നുണ്ട്. അത് പരിഹരിക്കേണ്ട ബാധ്യത ഭരണകർത്താക്കൾക്കുണ്ട്. പരിഹരിക്കാനുള്ള സംവിധാനം ഇവിടെയില്ലെങ്കിൽ വിദേശത്തുള്ള മാതൃകകൾ സ്വീകരിക്കണം. എല്ലാം ഭരണകൂടത്തിന്റെ ചുമലിൽ വച്ചു മാറിനിന്ന് ആരോപണങ്ങൾ മാത്രമുന്നയിക്കുന്ന ജനസമൂഹമായി നനമ്മൾ മാറരുതെന്നും മമ്മൂട്ടി വ്യക്തമാക്കി.

പ്ലാസ്റ്റിക്ക് മാലിന്യത്തിന്റെ കാര്യത്തിൽ നമ്മളുടെ ഉത്തരവാദിത്തങ്ങൾ നമ്മൾ നിറവേറ്റണം. പ്ലാസ്റ്റിക്കിനെ മാറ്റി നിർത്തണം. കൊച്ചി ഒരു മഹാ നഗരമായി മാറി കഴിഞ്ഞു. ദിനംപ്രതി കൊച്ചി വളരുകയാണ്. വെള്ളവും റോഡും പോലെ തന്നെ മികച്ച അടിസ്ഥന സൗകര്യങ്ങളിലൊന്ന് തന്നെയാണ് മാലിന്യ സംസ്ക്കരണം. കൊച്ചിയെ ഇനിയും പുക കൂട്ടിലിട്ട് ശ്വാസം മുട്ടിക്കരുതെന്നും മമ്മൂട്ടി പറഞ്ഞു.

Read Latest Kerala News and Malayalam News

Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക