Sumayya P | Samayam Malayalam | Updated: 13 Mar 2023, 11:24 am
പരസ്പര താല്‍പ്പര്യമുള്ള നിരവധി പ്രാദേശിക, അന്തര്‍ദേശീയ വിഷയങ്ങളെക്കുറിച്ചും ഇരു നേതാക്കളും അഭിപ്രായങ്ങള്‍ കൈമാറിയതായും ഔദ്യോഗിക വാര്‍ത്താ ഏജന്‍സിയായ വാം അറിയിച്ചു.
ചര്‍ച്ചയ്ക്കിടെ, 2026ല്‍ ഇന്റര്‍നാഷണല്‍ മോണിറ്ററി ഫണ്ടിന്റെയും (ഐഎംഎഫ്) ലോകബാങ്കിന്റെയും വാര്‍ഷിക സമ്മേളനങ്ങള്‍ക്ക് ആതിഥേയത്വം വഹിക്കുന്നതില്‍ ഖത്തറിന് യുഎഇയുടെ പിന്തുണ ശെയ്ഖ് മുഹമ്മദ് വാഗ്ദാനം ചെയ്തു. നേരത്തേ ഈ സമ്മേളനങ്ങള്‍ക്ക് ആതിഥേയത്വം വഹിക്കാനുള്ള അവകാശവാദം യുഎഇ മുന്നോട്ടുവച്ചിരുന്നെങ്കില്‍ അത് പിന്‍വലിക്കുമെന്ന് യുഎഇ പ്രസിഡന്റ് ഖത്തര്‍ അമീറിനെ അറിയിച്ചു. ഈ ആഗോള സമ്മേളനത്തിന് ആതിഥേയത്വം വഹിക്കുന്നതില്‍ യുഎഇ പ്രസിഡന്റ് ഖത്തര്‍ അമീറിനും ഖത്തറിലെ ജനങ്ങള്‍ക്കും എല്ലാ വിജയങ്ങളും ആശംസിച്ചു.
Also Read: ദുബായില്‍ 2.2 കോടിയുടെ സ്‌കോളര്‍ഷിപ്പ് നേടി മലയാളി പെണ്‍കുട്ടി
യുഎഇ പ്രസിഡന്റിന്റെ ഈ നിലപാടില്‍ ഖത്തര്‍ അമീര്‍ അദ്ദേഹത്തിന് നന്ദി രേഖപ്പെടുത്തുകയും ഖത്തറിനോടുള്ള യുഎഇയുടെ നസ്‌നേഹത്തിനും പിന്തുണയ്ക്കും ആത്മാര്‍ത്ഥമായ അഭിനന്ദനം അറിയിക്കുകയും ചെയ്തതായും വാര്‍ത്താ ഏജന്‍സി അറിയിച്ചു. ഖത്തറിനെതിരായ ഉപരോധത്തെ തുടര്‍ന്ന് ഇരു രാജ്യങ്ങളും തമ്മിലുള്ള ബന്ധം പൂര്‍വ സ്ഥിതിയിലേക്ക് ശരിയായ രീതിയില്‍ തിരിച്ചെത്തിയിരുന്നില്ല. എന്നാല്‍ ഖത്തര്‍ ആതിഥ്യമരുളിയ ഫിഫ ലോകകപ്പ് ഇരു രാജ്യങ്ങള്‍ക്കും പരസ്പരം കൂടുതല്‍ അടുക്കാനുള്ള സാഹചര്യം സൃഷ്ടിക്കുകയായിരുന്നു. ലോകകപ്പ് വേളയില്‍ യുഎഇ പ്രസിഡന്റും വൈസ് പ്രസിഡന്റും ഉള്‍പ്പെടെയുള്ള ഭരണാധികാരികള്‍ ഖത്തര്‍ സന്ദര്‍ശിക്കുകയും ഖത്തര്‍ അമീര്‍ ഉള്‍പ്പെടെയുള്ള നേതാക്കള്‍ യുഎഇയില്‍ എത്തുകയും ചെയ്തിരുന്നു. ഇതിനു പിന്നാലെയാണ് യുഎഇ പ്രസിഡന്റ് അമീറിനെ വിളിച്ച് ഐഎംഎഫ്, ലോകബാങ്ക് സമ്മേളനം നടത്താനുള്ള അവസരം ഖത്തറിന് നല്‍കുന്നതായി അറിയിച്ചിരിക്കുന്നത്. വരും ദിനങ്ങളില്‍ കൂടുതല്‍ സൗഹാര്‍ദ്ദത്തിന്റെ വാതിലുകള്‍ ഇത് തുറന്നിടുമെന്നാണ് നിരീക്ഷകര്‍ വിലയിരുത്തുന്നത്.
Read Latest Gulf News and Malayalam News
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
