ഇസ്രായേലിന്റെ പരാജയമെന്ന് മുന്‍ പ്രധാനമന്ത്രി
ഇറാന്‍- സൗദി ബന്ധത്തിന്റെ പശ്ചാത്തലത്തില്‍ രാജ്യത്തെ ഭരണകൂടത്തെ രൂക്ഷമായി വിമര്‍ശിച്ച് രംഗത്തെത്തിയിരിക്കുകയാണ് മുന്‍ പ്രധാനമന്ത്രി നഫ്താലി ബെന്നറ്റ്. ഇറാനെതിരെ പ്രാദേശിക സഖ്യം സൃഷ്ടിക്കാനുള്ള ഇസ്രായേലിന്റെ ശ്രമങ്ങളുടെ പരാജയത്തെയാണ് സൗദി- ഇറാന്‍ ഐക്യധാരണ പ്രതിനിധീകരിക്കുന്നതെന്ന് അദ്ദേഹം പറഞ്ഞു. ‘സൗദി അറേബ്യയും ഇറാനും തമ്മിലുള്ള ബന്ധം പുതുക്കുന്നത് ഇസ്രയേലിനെ സംബന്ധിച്ചിടത്തോളം ഗുരുതരവും അപകടകരവുമായ സംഭവവികാസമാണ്. ഇറാന്റെ രാഷ്ട്രീയ വിജയമാണിത്. ഇറാനെതിരെ ഒരു പ്രാദേശിക സഖ്യം കെട്ടിപ്പടുക്കാനുള്ള ശ്രമത്തിന് ഇത് മാരകമായ പ്രഹരമാണ്’- നഫ്താലി ബെന്നറ്റ് ട്വീറ്ററില്‍ കുറിച്ചു. ഇത് നെതന്യാഹു ഗവണ്‍മെന്റിന്റെ വലിയ പരാജയമാണ്. നയതന്ത്ര മേഖലയിലെ കഴിവ് കേടിന്റെയും സര്‍ക്കാരിന്റെ മൊത്തത്തിലുള്ള ബലഹീനതയുടെയും രാജ്യത്തെ ആഭ്യന്തര സംഘര്‍ഷങ്ങളുടെയും ഫലമാണിതെന്നും ബെന്നറ്റ് പറഞ്ഞതായി ദി ടൈംസ് ഓഫ് ഇസ്രായേല്‍ റിപ്പോര്‍ട്ട് ചെയ്തു.
നെതന്യാഹു സര്‍ക്കാരിന്റെ ഭരണപരാജയം
‘ആഗോള തലത്തിലും പ്രാദേശിക മേഖലയിലുമുള്ള രാജ്യങ്ങള്‍ ഇസ്രായേലിനെ ഒരു പ്രവര്‍ത്തനരഹിതമായ സര്‍ക്കാരായി വിലയിരുത്തിത്തുടങ്ങിയിരിക്കുന്നു. സ്വയം നശീകരണത്തിലാണ് ഇസ്രായേല്‍ ഭരണാധികാരികള്‍ ഇപ്പോള്‍ ശ്രദ്ധ കേന്ദ്രീകരിക്കുന്നത്. അതുകൊണ്ടു തന്നെ മേഖലയിലെ മറ്റു രാജ്യങ്ങള്‍ പരസ്പരം ഐക്യപ്പെട്ടതില്‍ അദ്ഭുതപ്പെടാനില്ലെന്നും അദ്ദേഹം പറഞ്ഞു. ഇസ്രായേല്‍ സര്‍ക്കാരിന്റെ ഏകാധിപത്യ പ്രവര്‍ണതകള്‍ക്കെതിരേ രാജ്യത്ത് നടക്കുുന്ന വ്യാപകമായ പ്രതിഷേധങ്ങളെയും പ്രക്ഷുബ്ധങ്ങളെയും പരാമര്‍ശിച്ചാണ് ബെന്നറ്റ്ിന്റെ ഈ പ്രസ്താവന. നെതന്യാഹു സര്‍ക്കാര്‍ സാമ്പത്തിക, നയതന്ത്ര, സുരക്ഷാ മേഖലകളില്‍ വമ്പിച്ച പരാജയമാണ്. ഓരോ ദിവസവും അവസാനിക്കുന്നത് ഇസ്രായേല്‍ രാഷ്ട്രത്തെ കൂടുതല്‍ അപകടങ്ങളിലേക്ക് തള്ളിവിട്ടുകൊണ്ടാണ്. ഒരു വിശാലമായ ദേശീയ സര്‍ക്കാരിനു മാത്രമേ കാര്യങ്ങള്‍ പഴയപടിയാക്കാന്‍ കഴിയൂ എന്നും അദ്ദേഹം പറഞ്ഞു.
കരാറിനെതിരേ ഇസ്രായേല്‍ പ്രതിപക്ഷ നേതാവും
ഇസ്രായേല്‍ പ്രതിപക്ഷ നേതാവും മുന്‍ പ്രധാനമന്ത്രിയുമായ യെയര്‍ ലാപിഡും സൗദി- ഇറാന്‍ സൗഹൃദ കരാറിനെതിരേ രംഗത്തെത്തി. ഇക്കാര്യത്തില്‍ ഇസ്രായേല്‍ ‘സമ്പൂര്‍ണ പരാജയം’ ആണെന്ന് തെളിയിച്ചതായി അദ്ദേഹം കുറ്റപ്പെടുത്തി. ഇറാനെതിരെ ഇസ്രായേല്‍ നിര്‍മ്മിച്ച പ്രാദേശിക പ്രതിരോധ സംവിധാനങ്ങളുടെ തകര്‍ച്ചയാണ് ചൈനയുടെ മധ്യസ്ഥതയിലുണ്ടായ ഈ അനുരഞ്ജന കരാറിലൂടെ സംഭവിച്ചിരിക്കുന്നതെന്നും അദ്ദേഹം വിശേഷിപ്പിച്ചു. ഇറാനെതിരെ പ്രവര്‍ത്തിക്കുന്നതിനും യുഎസുമായുള്ള ബന്ധം ശക്തിപ്പെടുത്തുന്നതിനും ശ്രമിക്കുന്നതിനു പകരം നിലവിലെ സര്‍ക്കാര്‍ അധികാര ഭ്രാന്തില്‍ ശ്രദ്ധ കേന്ദ്രീകരിക്കുമ്പോള്‍ ഇങ്ങനെ മാത്രമേ സംഭവിക്കൂ എന്നും ലാപിഡ് പറഞ്ഞു.
ഭരണകക്ഷിയിലെ എംപിയും വിമര്‍ശനവുമായി രംഗത്ത്
ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ ലിക്കുഡ് പാര്‍ട്ടിയിലെ പാര്‍ലമെന്റ് അംഗങ്ങള്‍ പോലും സൗദി- ഇറാന്‍ കരാറിന്റെ പശ്ചാത്തലത്തില്‍ സര്‍ക്കാരിനെതിരായ വിമര്‍ശനവുമായി രംഗത്തെത്തിയെന്നതാണ് ഏറെ ശ്രദ്ധേയം.
‘അധികാര പോരാട്ടങ്ങളിലും കുതികാല്‍വെട്ടിലും ഇസ്രായേല്‍ നേതാക്കള്‍ ശ്രദ്ധ കേന്ദ്രീകരിക്കുമ്പോള്‍ ലോകം നിങ്ങള്‍ക്കു വേണ്ടി കാത്തുനില്‍ക്കില്ലെന്ന് മുതിര്‍ന്ന ലിക്കുഡ് പാര്‍ലമെന്റംഗം യൂലി എഡല്‍സ്‌റ്റൈന്‍ പറഞ്ഞു. പ്രത്യേകിച്ച് രാജ്യത്തിന്റെ ഏറ്റവും വലിയ ശത്രുക്കള്‍ ഇത്തരം സന്ദര്‍ഭങ്ങളില്‍ അടങ്ങിയിരിക്കില്ലെന്നും അദ്ദേഹം കുറ്റപ്പെടുത്തി.
ചൈന- ഇറാന്‍ സര്‍ജിക്കല്‍ സ്‌ട്രൈക്ക്
അടുത്ത കാലത്തായി അമേരിക്കയുമായുള്ള സൗദി ബന്ധം വഷളായ സാഹചര്യം മുതലെടുത്ത് ചൈനയും ഇറാനും നടത്തിയ സര്‍ജിക്കല്‍ സ്‌ട്രൈക്കാണ് സൗദിയും ഇറാനും തമ്മിലുള്ള അനുരഞ്ജന ധാരണയെന്നാണ് വാഷിംഗ്ടണിലെ ഫൗണ്ടേഷന്‍ ഫോര്‍ ഡിഫന്‍സ് ഓഫ് ഡെമോക്രസിയുടെ സിഇഒ മാര്‍ക്ക് ഡുബോവിറ്റ്‌സ് വിശേഷിപ്പിച്ചത്. ഈ സാഹചര്യം മുതലെടുക്കാന്‍ അവര്‍ക്ക് കഴിഞ്ഞു. സൗദി-അമേരിക്ക, സൗദി-ഇസ്രായേല്‍ അനുരഞ്ജനത്തിന്റെ സാധ്യത തടയുകയെന്നതാണ് ഇതിലൂടെ അവര്‍ ലക്ഷ്യം വയ്ക്കുന്നത്. ഇറാന്റെ ആണവ ശ്രമങ്ങളെ നേരിടാന്‍ ഒരു പ്രാദേശിക സഖ്യം കെട്ടിപ്പടുക്കാനുള്ള അമേരിക്കയുടെയും ഇസ്രായേലിന്റെയും ശ്രമങ്ങളെ ഇത് ദുര്‍ബലപ്പെടുത്തുമെന്നും അദ്ദേഹം അഭിപ്രായപ്പെട്ടു.
മേഖലയില്‍ അമേരിക്കയുടെ സ്വാധീനം കുറയുന്നു
അതേസമയം, ഇറാനും സൗദിയും സഹകരണ ധാരണയില്‍ എത്തിയത് ബെഞ്ചമിന്‍ നെതന്യാഹു സര്‍ക്കാരിനെ സംബന്ധിച്ചിടത്തോളം വലിയ തിരിച്ചടിയാണെങ്കിലും അത് ഇസ്രായേലും സൗദിയുമായുള്ള ബന്ധത്തെ ബാധിക്കില്ലെന്ന് വിലയിരുത്തുന്നവരും രാജ്യത്തുണ്ട്. ഇത്തരമൊരു സാഹചര്യം ഇറാനിയന്‍ ആണവ കേന്ദ്രങ്ങള്‍ക്കെതിരായ സൈനിക ആക്രമണത്തിന് ഇസ്രായേലിന് കൂടുതല്‍ കരുത്ത് പകരുമെന്നും നിരീക്ഷണമുണ്ട്. എന്നാല്‍ ചൈനീസ് മധ്യസ്ഥതയില്‍ മേഖലയിലെ രണ്ട് സുന്നി -ഷിയാ ശക്തികള്‍ തമ്മിലുള്ള ധാരണ മറ്റൊരര്‍ഥത്തില്‍ ഇസ്രായേലിന് തലവേദനയാണെന്നും പേര് വെളിപ്പെടുത്താത്ത ഇസ്രായേല്‍ ഉദ്യോഗസ്ഥന്‍ അറിയിച്ചു. നെതന്യാഹു സര്‍ക്കാരിന് ഏറ്റവും കൂടുതല്‍ ആവശ്യമുള്ള ഒരു സന്ദര്‍ഭത്തില്‍ മേഖലയിലെ അമേരിക്കയുടെ സ്വാധീനം കുറയുന്നു എന്നതാണിതെന്നും അദ്ദേഹം പറയുന്നു.
സൗദി- ഇസ്രായേല്‍ ബന്ധത്തെ ബാധിക്കില്ലെന്നും വിലയിരുത്തല്‍
അതേസമയം, ഇറാന്‍- സൗദി കരാര്‍ സൗദിയുമായുള്ള ഇസ്രായേല്‍ ബന്ധത്തെ ബാധിക്കില്ലെന്നാണ് അദ്ദേഹത്തിന്റെ വിലയിരുത്തല്‍. ഇറാനുമായുള്ള ബന്ധം നിലനിര്‍ത്തുമ്പോള്‍ തന്നെ യുഎഇയുമായി ഇസ്രായേല്‍ നല്ല ബന്ധത്തിലാണെന്നതാണ് ഇതിന് തെളിവായി അദ്ദേഹം ചൂണ്ടിക്കാണിക്കുന്നത്. അതേസമയം, ഇറാനുമായുള്ള അന്താരാഷ്ട്ര ആണവ കരാറുമായി ബന്ധപ്പെട്ട നയതന്ത്ര വഴികള്‍ അടയുന്ന പക്ഷം ഇറാനെതിരേ സൈനിക നീക്കം നടത്താനുള്ള നീക്കം ഇസ്രായേലിന്റെ ഭാഗത്തു നിന്ന് ഉണ്ടായേക്കാമെന്നും അദ്ദേഹം വിലയിരുത്തുന്നു. എന്നാല്‍ ഇത് അമേരിക്കയുടെ നിലപാടിനെ ആശ്രയിച്ചിരിക്കും. ഇക്കാര്യത്തില്‍ അമേരിക്ക പറയുന്നതിന് എതിരായി പ്രവര്‍ത്തിക്കാന്‍ ഇസ്രായേല്‍ സര്‍ക്കാരിന് കഴിയുമെന്ന് തോന്നുന്നില്ലെന്നും അദ്ദേഹത്തെ ഉദ്ധരിച്ച് ഇസ്രായേല്‍ പത്രം റിപ്പോര്‍ട്ട് ചെയ്തു.
