സൗദിയില്‍ ഇനി മുതല്‍ എണ്ണ വില കൂടില്ല; അധിക വില സര്‍ക്കാര്‍ നല്‍കും

റിയാദ്: കൊവിഡ് പ്രതിസന്ധിയില്‍ നിന്ന് കരകയറാന്‍ ജനങ്ങളെയും സ്ഥാപനങ്ങളെയും സഹായിക്കുന്നതിന്റെ ഭാഗമായി സൗദി പ്രാദേശിക വിപണിയില്‍ എണ്ണ വില വര്‍ധിക്കുന്നത് തടയാന്‍ നടപടി. സല്‍മാന്‍ രാജാവിന്റെ പ്രത്യേക നിര്‍ദ്ദേശ പ്രകാരമാണ് തീരുമാനം.



ഇതു പ്രകാരം അന്താരാഷ്ട്ര വിപണിയില്‍ പെട്രോളിന്റെ വില വര്‍ധിക്കുന്നതിനനുസൃതമായി സൗദിയില്‍ അതിന്റെ വില കൂടില്ല. പകരം ജൂണിലെ വിലയിലാണ് വരും മാസങ്ങളിലും സ്വദേശികള്‍ക്കും പ്രവാസികള്‍ക്കും ഒരു പോലെ പെട്രോള്‍ ലഭ്യമാക്കുക. ഇതുവഴി പെട്രോള്‍ പമ്പ് ഉടമകള്‍ക്കുണ്ടാവുന്ന നഷ്ടം സര്‍ക്കാര്‍ വഹിക്കുമെന്നും ഉത്തരവില്‍ പറയുന്നു. സൗദി ഭരണാധികാരി സല്‍മാന്‍ രാജാവാണ് രാജ്യത്തെ പെട്രോള്‍ വില വര്‍ധനവ് നിയന്ത്രിക്കുന്നതിനുള്ള ഉത്തരവ് പുറപ്പെടുവിച്ചത്. അന്താരാഷ്ട്ര വിപണിയിലെ എണ്ണ വിലക്കനുസരിച്ച് രാജ്യത്തെയും വില പുതുക്കി നിശ്ചയിക്കുന്ന രീതിയാണ് നിലവില്‍ തുടര്‍ന്നു വരുന്നത്. എല്ലാ മാസവും പതിനൊന്നാം തീയതിയാണ് പുതിയ വിലനിര്‍ണം നടക്കുക. ഇനിയും വില നിര്‍ണയും നടക്കുമെങ്കിലും അതിലെ വര്‍ധനവ് ജനങ്ങളെ ബാധിക്കില്ല.

Also Read: ബീച്ചുകളില്‍ പൊതുമുതല്‍ നശിപ്പിക്കല്‍ വ്യാപകം; നിരീക്ഷണ ക്യാമറകളുമായി കുവൈറ്റ് മുനിസിപ്പാലിറ്റി

പുതിയ വിജ്ഞാപനം അനുസരിച്ച് ജൂലൈയില്‍ പെട്രോള്‍ വിലയില്‍ വര്‍ധനവുണ്ടാകില്ല. ജൂണ്‍ മാസത്തെ വില തന്നെ തുടരും. 91 ഇനം പെട്രോളിന് 2.18 റിയാലും 95 ഇനം പെട്രോളിന് 2.33 റിയാലായിരുന്നു ജൂണിലെ വില. ഇത് ജൂലൈയിലും വരും മാസങ്ങളിലും തുടരും. മുന്‍ മാസങ്ങളിലെ ശരാശരി വര്‍ധനവ് പ്രകാരം ജൂലൈയില്‍ 91 ഇനം പെട്രോളിന് 2.28 റിയാലും, 95 ഇനം പെട്രോളിന് 2.44 റിയാലുമായിരുന്നു പുതുക്കി നിശ്ചയിക്കേണ്ടിയിരുന്നത്. പുതിയ രാജ വിജ്ഞാപനത്തോടെ ഈ വര്‍ധനവ് ഒഴിവാക്കിയിരിക്കുകയാണ്. ഇനി മുതല്‍ എല്ലാ മാസവും പെട്രോള്‍ വില ജൂണ്‍ മാസത്തേക്കാള്‍ കൂടുകയാണെങ്കില്‍ ആ അധിക തുക സര്‍ക്കാര്‍ വഹിക്കും.