Sumayya P | Samayam Malayalam | Updated: 11 Jul 2021, 02:02:01 PM
ഹജ്ജിന്റെ പ്രധാന ചടങ്ങുകള്‍ നടക്കുന്ന എല്ലാ സ്ഥലങ്ങളിലും ഡോക്ടര്‍മാരുടെ സംഘത്തെയും ആംബുലന്‍സ് ഉള്‍പ്പെടെയുള്ള സന്നാഹങ്ങളും സജ്ജമാക്കിക്കഴിഞ്ഞു.
ജിദ്ദ: കൊവിഡ് വ്യാപന ഭീതി നിലനില്‍ക്കുന്ന സാഹചര്യത്തില്‍ നടക്കുന്ന ഇത്തവണത്തെ ഹജ്ജ് തീര്‍ഥാടനം സുരക്ഷിതവും കുറ്റമറ്റതുമാക്കുന്നതിനുള്ള എല്ലാ ഒരുക്കങ്ങള്‍ പൂര്‍ത്തിയായിക്കഴിഞ്ഞതായി ഖത്തര്‍ റെഡ് ക്രസന്റ് അതോറിറ്റി വ്യക്തമാക്കി. ഏത് അടിയന്തിര ഘട്ടവും തരണം ചെയ്യുന്നതിനും ആരോഗ്യ സേവനങ്ങള്‍ ഉറപ്പ് വരുത്തുന്നതിനുമുള്ള എല്ലാ സന്നാഹങ്ങളും അതോറിറ്റിക്ക് കീഴില്‍ സജ്ജീകരിച്ചതായും അതികൃതര്‍ വ്യക്തമാക്കി.
549 പേരടങ്ങുന്ന മെഡിക്കല്‍ സംഘം സജ്ജം
ഹജ്ജിനെത്തുന്ന തീര്‍ഥാടകര്‍ക്കുള്ള വിവിധ സേവനങ്ങള്‍ ഉറപ്പ് വരുത്തുന്നതിനാവശ്യമായ സജ്ജീകരണങ്ങളാണ് സൗദി റെഡ് ക്രസന്റ് ഒരുക്കിയിരിക്കുന്നത്. തീര്‍ഥാടകര്‍ക്കാവശ്യമായ വൈദ്യസഹായം ഉറപ്പ് വരുത്തുന്നതിനും എത്രയും വേഗം ആശുപത്രികളിലേക്ക് മാറ്റുന്നനും ആവശ്യമായ സജ്ജീകരണങ്ങള്‍ ഇതിനകം ഒരുക്കിയിട്ടുണ്ട്. ഹജ്ജിന്റെ പ്രധാന ചടങ്ങുകള്‍ നടക്കുന്ന എല്ലാ സ്ഥലങ്ങളിലും ഡോക്ടര്‍മാരുടെ സംഘത്തെയും ആംബുലന്‍സ് ഉള്‍പ്പെടെയുള്ള സന്നാഹങ്ങളും സജ്ജമാക്കിക്കഴിഞ്ഞു. എമര്‍ജന്‍സി സേവനങ്ങളില്‍ വിദഗ്ധരായ ഡോക്ടര്‍മാര്‍, സ്പെഷ്യലിസ്റ്റുകള്‍, ടെക്നീഷ്യന്‍മാര്‍ ഉള്‍പ്പെടെ 549 അംഗ മെഡിക്കല്‍ സംഘത്തെയാണ് ഇതിനായി നിയോഗിച്ചിരിക്കുന്നത്.
51 കേന്ദ്രങ്ങളിലായി 144 ആംബുലന്‍സുകള്‍
ഇതിനു പുറമേ ആവശ്യമായ എല്ലാ മെഡിക്കല്‍ സൗകര്യങ്ങളോടും കൂടിയ 144 അത്യാധുനിക ആംബുലന്‍സുകള്‍, 22 മോട്ടോര്‍ സൈക്കിളുകള്‍, 10 ഗോള്‍ഫ് കാര്‍ട്ടുകള്‍, രണ്ട് ഡിസാസ്റ്റര്‍ വെഹിക്കിളുകള്‍ തുടങ്ങി ട്രോളികള്‍, സ്ട്രച്ചറുകള്‍ അടക്കമുള്ളവയും തയ്യാറാക്കിയിട്ടുണ്ട്. മക്ക, മിനാ, മുസ്ദലിഫ, അറഫ, തീര്‍ഥാടകരുടെ താമസ കേന്ദ്രങ്ങള്‍ എന്നിവ കേന്ദ്രീകരിച്ച് 51 ആംബുലന്‍സ് കേന്ദ്രങ്ങളാണ് തയ്യാറാക്കിയിട്ടുള്ളത്. ആംബുലന്‍സ് സേവനം ആവശ്യമുള്ളവര്‍ക്ക് എത്രയും വേഗത്തില്‍ അത് ലഭ്യമാക്കുകയെന്ന ലക്ഷ്യത്തോടെയാണിത്.
പരാതികള്‍ കേള്‍ക്കാന്‍ കണ്‍ട്രോള്‍ റൂം
ഹാജിമാരുടെ പരാതികള്‍, പ്രയാസങ്ങള്‍, ആവശ്യങ്ങള്‍ തുടങ്ങിയ സ്വീകരിക്കുന്നതിനും അവ പരിഹരിക്കുന്നതിനുമായി പ്രത്യേക കണ്‍ട്രോള്‍ റൂമും സൗദി റെഡ് ക്രസന്റ് അതോററ്റി ഒരുക്കിയിട്ടുണ്ട്. ഇതിനായി 106 ജീവനക്കാരെയാണ് പ്രത്യേകമായി നിയോഗിച്ചിട്ടുള്ളത്. ഇതിനു പുറമേ പുരുഷന്മാരും സ്ത്രീകളുമടങ്ങുന്ന മുന്നൂറോളം പ്രത്യേക പരിശീലനം നേടിയ വളണ്ടിയര്‍മാരും സേവനത്തിനായി രംഗത്തുണ്ടാകും. കൊവിഡ് വ്യാപന ഭീതി നിലനില്‍ക്കുന്ന സാഹചര്യത്തില്‍ മെഡിക്കല്‍ സേവനങ്ങള്‍ക്ക് കൂടുതല്‍ ഊന്നല്‍ നല്‍കിയുള്ള തയ്യാറെടുപ്പുകളാണ് ഇത്തവണത്തെ ഹജ്ജ് വേളയില്‍ ഒരുക്കിയിരിക്കുന്നതെന്ന് റെഡ് ക്രസന്റ് അതോറിറ്റി പ്രസിഡന്റ് ഡോ. ജലാല്‍ അല്‍ ഉവൈസി അറിയിച്ചു.
ജൂലൈ 18ന് ഹജ്ജ് കര്‍മങ്ങള്‍ തുടങ്ങും
ജുലൈ 17 മുതലാണ് ഇത്തവണത്തെ ഹജ്ജ് തീര്‍ഥാടനത്തിനായി ആളുകള്‍ മക്കയിലേക്ക് എത്തിത്തുടങ്ങുക. 18ാം തിയതിയോടെ പെര്‍മിറ്റ് ലഭിച്ച മുഴുവന്‍ ഹാജിമാരും മക്കയില്‍ പ്രവേശിക്കും. പ്രവേശന കവാടത്തില്‍ നിന്ന് വിശുദ്ധ മസ്ജിദുല്‍ ഹമാറിലേക്ക് കഅബ പ്രദക്ഷിണത്തിനായി ബസ്സുകളില്‍ കൂട്ടിക്കൊണ്ടു പോവും. അവിടെ നിന്നാണ് മറ്റ് തീര്‍ഥാടന കേന്ദ്രങ്ങളിലേക്ക് യാത്ര തിരിക്കുക. ജൂലൈ 18ന് തുടങ്ങുന്ന ഹജ്ജ് കര്‍മങ്ങള്‍ ജൂലൈ 22നാണ് അവാനിക്കുക. ഹജ്ജ് തീര്‍ഥാടനത്തിലെ സുപ്രധാന കര്‍മമായ അറഫ സമ്മേളനം ജൂലൈ 19ന് നടക്കും. കൊവിഡ് പശ്ചാത്തലത്തില്‍ 60,000 പേര്‍ക്കാണ് ഇത്തവണ ഹജ്ജിന് അവസരം ലഭിച്ചിരിക്കുന്നത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : saudi red crescent authority completes preparations for hajj season
Malayalam News from malayalam.samayam.com, TIL Network
