തീരദേശ ​ഹൈവേ: പുനരധിവാസ പാക്കേജ് രണ്ട് കാറ്റ​ഗറികളിലായി; കാലപ്പഴക്കം അനുസരിച്ച് കെട്ടിടത്തിന്റെ വില കുറയും

പാക്കേജ് നടപ്പാക്കുന്നതിന്റെ വിശദാംശങ്ങൾ കഴിഞ്ഞ ദിവസം പി എ മുഹമ്മദ് റിയാസ് നിയമസഭയെ അറിയിച്ചിരുന്നു. കെട്ടിടങ്ങളുടെ കാലപ്പഴക്കം പരിഗണിച്ച് തുക സർക്കാർ നൽകും. ഇതോടെ കാലപ്പഴക്കത്തേതുടർന്ന് കെട്ടിടത്തിന്റെ മൂല്യം കുറയാതെ ഉടമകൾക്ക് നഷ്ടപരിഹാരം ലഭിക്കുമെന്നാണ് സർക്കാരിന്റെ അവകാശവാദം. പദ്ധതി 2026ന് മുൻപായി പൂർത്തിയാക്കുമെന്ന് എംഎൽഎമാരുടെ ചോദ്യത്തിനുള്ള മറുപടിയായി പൊതുമരാമത്ത് മന്ത്രി പി എ മുഹമ്മദ് റിയാസ് സഭയെ അറിയിച്ചു.

കെട്ടിടത്തിന്റെ നഷ്ടപരിഹാരം കണക്കില്ലാക്കുന്നത് ഇങ്ങനെ



കെട്ടിടത്തിന്റെ ഉടമസ്ഥാവകാശ രേഖകൾ ഉള്ളവർ‌ക്ക്, ഏറ്റെടുക്കുമ്പോൾ മൂല്യനിർണയം നടത്തി കാലപ്പഴക്കം കണക്കിലെടുത്തുള്ള മൂല്യം കുറയ്ക്കും. അതിന്റെയൊപപ്പം സ്ഥലമേറ്റെടുക്കൽ നിയമപ്രകാരമുള്ള നഷ്ടപരിഹാരവും നൽകും. ഇതിന് പുറമെ, പ്രത്യേക പാക്കേജിൽ ഉൾപ്പെടുത്തി കാലപ്പഴക്കം കണക്കിലെടുത്ത് കുറച്ച മൂല്യം കൂടി അനുവദിക്കും. ഈ മൂന്ന് തുകയും ചേർന്നതായിരിക്കും ആകെ നഷ്ടപരിഹാരം.

സ്ഥലവില കണക്കാക്കുന്നത് ഇങ്ങനെ,



2013ലെ ഭൂമിയേറ്റെടുക്കൽ ചട്ടമനുസരിച്ച് നിശ്ചയിക്കുന്ന സ്ഥലവില നൽകുമെന്നാണ് സർക്കാർ അവകാശപ്പെടുന്നത്. പദ്ധതിയുടെ ഭാഗമായി പുനരധിവസം ആവശ്യമായ കുടുംബങ്ങൾക്ക് 600 ചതുരശ്ര അടി ഫ്ലാറ്റ് അല്ലെങ്കിൽ ഒറ്റത്തവണ നഷ്ടപരിഹാരമായി 13 ലക്ഷം രൂപ ലഭിക്കും.

ഉടമസ്ഥാവകാശ രേഖ ഇല്ലാത്തവർക്കും ഡിപ്രീസിയേഷൻ മൂല്യം കുറയ്ക്കാതെയുള്ള കെട്ടിട വില നഷ്ടപരിഹാരമായി ലഭിക്കും. പ്രത്യേക പുനരധിവാസ പാക്കേജുകളിൽ ഏറ്റവും മികച്ചതാണെന്നും മന്ത്രി ചൂണ്ടിക്കാണിച്ചു.

വിനോദസഞ്ചാര മേഖലയ്ക്ക് രക്ഷയായി തീരദേശ ഹൈവേ

വിനോദസഞ്ചാര മേഖലയ്ക്ക് ഉണർവേകുന്നതരത്തിൽ സംസ്ഥാനത്തെ വിവിധ ജില്ലകളെ ബന്ധിപ്പിക്കുന്ന തീരദേശ ഹൈവേയുടെ നിർമാണം വേഗത്തിലാകുമെന്നാണ് റിപ്പോർട്ട്. 1993ൽ ആവിഷ്കരിച്ച പദ്ധതിയുടെ നിർമാണ് വേഗത്തിലാക്കുമെന്നാണ് ഏറ്റവും ഒടുവിലായി പുറത്തുവന്ന റിപ്പോർട്ട്.

ഒൻപത് ജില്ലകളിൽ 623 കിലോമീറ്റർ ദൂരത്തിലായി കടന്നുപോകുന്ന തീരദേശ ഹൈവെയ്ക്ക് 52 സ്ട്രെച്ചുകളിലാണുള്ളത്. 44 സ്ട്രെച്ചുകളിലായി 537 കിലോമീറ്റർ റോഡ് കേരള റോഡ് ഫണ്ട് ബോർഡ് ആണ് നിർമിക്കുന്നത്.

24 സ്ട്രെച്ചുകളിലായി 415 കിലോമീറ്റർ ദൂരം ഭൂമി ഏറ്റെടുക്കാൻ സാമ്പത്തിക അനുമതി ലഭിച്ചു. 6,500 കോടി ചെലവ് വരുന്ന പദ്ധതി സംസ്ഥാനത്തിന്റെ വിനോദസഞ്ചാര മേഖലയുടെ മുഖഛായ മാറ്റുമെന്നാണ് സർക്കാരിന്റെ അവകാശവാദം. 14 മീറ്റർ വീതിയിലുള്ള പാതയിൽ സൈക്കിൾ ട്രാക്ക്, വൈദ്യുത വാഹനങ്ങൾ ചാർജ് ചെയ്യുന്നതിനുള്ള ചാർജിങ് സ്റ്റേഷനുകൾ, റസ്റ്ററന്റുകൾ അടക്കമുള്ള സൗകര്യങ്ങളും ഇതിനിടയിലുണ്ടാകും.

Also Read : ചൂടിന് ശമനമാകുമോ? വേനല്‍ മഴ ഇന്നെത്തും, ഇടിമിന്നലോട് കൂടിയ മഴയ്ക്കും സാധ്യത

നിലവിലെ ദേശീയപാത 66ന് സമാന്തരമായി തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂർ, മലപ്പുറം, കോഴിക്കോട്, കണ്ണൂർ, കാസർകോഡ് എന്നീ ജില്ലകളിലൂടെയാണ് തീരദേശ ഹൈവേ കടന്നുപോകുന്നത്.

Read Latest Kerala News and Malayalam News