വണ്ടിപ്പെരിയാർ: തെളിവെടുപ്പിനിടെ പ്രതി അർജുനെതിരെ നാട്ടുകാരുടെ പ്രതിഷേധം, കരണത്തടിച്ചു

ഇടുക്കി: വണ്ടിപ്പെരിയാർ കേസിൽ പ്രതിയുമായി തെളിവെടുപ്പ് നടത്തുന്നതിനിടെ നാടകീയ രംഗങ്ങൾ. അർജുനെതിരെ പ്രതിഷേധവുമായി നാട്ടുകാർ സ്ഥലത്തെത്തി. ഇതിനിടെ നാട്ടുകാരിലൊരാൾ അര്‍ജുന്‍റെ കരണത്തടിക്കുകയും ചെയ്തെന്ന് മാതൃഭൂമിയാണ് റിപ്പോർട്ട് ചെയ്തത്.



പ്രതിയെ സ്ഥലത്തെത്തിച്ചപ്പോൾ വൻ പ്രതിഷേധമാണ് നാട്ടുകാർ ഉയർത്തിയത്. ആറുവയസുകാരിയെ പീഡിപ്പിച്ച് കൊലപ്പെടുത്തിയ കേസിൽ ഇത് രണ്ടാം തവണയാണ് പ്രതിയെ കുട്ടിയുടെ വീട്ടിലെത്തിച്ച് തെളിവെടുപ്പ് നടത്തുന്നത്. പ്രതിയെ കണ്ട നാട്ടുകാർ രോഷാകുലർ ആയതോടെ ഏറെ പണിപ്പെട്ടാണ് പോലീസ് അർജുനെ വീട്ടിനുള്ളിലേക്ക് കൊണ്ടുപോയത്.

Also Read : മകൾക്കൊപ്പം കാമുകൻ വീടിനുള്ളിൽ; യുവാവിനെ പിതാവ് കുത്തിക്കൊന്നു, മൃതദേഹം വഴിയരികിൽ വലിച്ചെറിഞ്ഞു



ആദ്യതവണ തെളിവെടുപ്പിന് എത്തിച്ചപ്പോഴും നാട്ടുകാർ പ്രതിക്കെതിരെ രംഗത്തെത്തിയിരുന്നു. ഇത്തവണയും പ്രതിഷേധ സാധ്യത കണക്കിലെടുത്ത് കനത്ത പോലീസ് കാവലാണ് ഇവിടെ ഏർപ്പെടുത്തിയത്. പോലീസ് വലയം ഭേദിച്ചാണ് നാട്ടുകാർ പ്രതിയെ കൈയ്യേറ്റം ചെയ്യാൻ ശ്രമിച്ചത്. നാട്ടുകാരിൽ ഒരാൾ അർജുന്‍റെ മുഖത്തടിച്ചപ്പോൾ, മറ്റൊരാൾ വെട്ടുകത്തിക്ക് ആക്രമിക്കാനും ശ്രമിച്ചെന്ന് ഏഷ്യാനെറ്റ് ന്യൂസും റിപ്പോർട്ട് ചെയ്തു.

പെണ്‍കുട്ടിയുടെ ഡമ്മി ഉപയോഗിച്ചുള്ള തെളിവെടുപ്പാണ് നടത്തിയത്. പീഡനശ്രമത്തിനിടെ ബോധരഹിതയായ പെണ്‍കുട്ടിയെ വീട്ടിലെ പഴക്കുല തൂക്കുന്ന കയറിലാണ് അര്‍ജുന്‍ ഷാള്‍ ഉപയോഗിച്ച് കെട്ടിത്തൂക്കി കൊന്നത്. ശേഷം വീടിന്‍റെ ജനല്‍ വഴി രക്ഷപ്പെട്ടെന്നാണ് കരുതുന്നത്. തെളിവെടുപ്പില്‍ പ്രതി ഇതെല്ലാം അന്വേഷണസംഘത്തിന് മുന്നില്‍ വിവരിച്ചു.

ഡല്‍ഹിയില്‍ 2,500 കോടിയുടെ ഹെറോയിന്‍ പിടികൂടി; പ്രതികൾക്ക് തീവ്രവാദബന്ധമുണ്ടോ എന്ന് അന്വേഷണം

ചൊവ്വാഴ്ചയാണ് അർജുന്‍റെ കസ്റ്റഡി കാലാവധി തീരുന്നത്. അതുവരെ സ്റ്റേഷനിൽ ചോദ്യം ചെയ്യൽ തുടരും. പെണ്‍കുട്ടിയെ പീഡിപ്പിച്ച് കൊലപ്പെടുത്തിയ സംഭവത്തില്‍ പ്രതിക്ക് മറ്റാരുടെയെങ്കിലും സഹായം ലഭിച്ചോ എന്നതും പോലീസ് അന്വേഷിക്കുന്നുണ്ട്.